Ngaa Indi Kita Dapat Mag-untat sa Pagpangamuyo?

“Indi mag-untat sa pagpangamuyo. May kaangtanan sa tanan nga butang magpasalamat.”​—⁠1 TESALONICA 5:​17, 18.

1, 2. Paano ginpakita ni Daniel nga ginpabaloran niya ang pribilehiyo nga pangamuyo, kag ano ang epekto sini sa iya kaangtanan sa Dios?

KINABATASAN na ni manalagna Daniel nga magpangamuyo sa Dios sing tatlo ka beses kada adlaw. Nagaluhod sia sa bintana nayon sang iya hulot sa atop, nga nagaatubang sa siudad sang Jerusalem, kag magpangamuyo. (1 Hari 8:​46-​49; Daniel 6:10) Bisan pa ang sugo sang hari nagdumili sa pagpangamuyo kay bisan sin-o kundi sa hari lamang sang Media nga si Dario, wala gid malingkang si Daniel bisan sing makadali. Nagbutang man ini sang iya kabuhi sa katalagman ukon wala, ini nga tawo wala mag-untat sa pagpangamuyo kay Jehova.

² Paano ni Jehova gintamod si Daniel? Sang ang anghel nga si Gabriel nag-abot agod sabton ang isa sang mga pangamuyo ni Daniel, ginlaragway niya ang manalagna subong isa nga “nahamut-an sing daku” ukon “isa ka tawo nga hinigugma gid.” (Daniel 9:​20-​23; The New English Bible) Sa tagna ni Ezequiel, ginpatuhuyan ni Jehova si Daniel subong isa ka matarong nga tawo. (Ezequiel 14:​14, 20) Sa bug-os niya nga kabuhi, maathag nga ang mga pangamuyo ni Daniel nagpasuod pa gid sa iya sa Dios, isa ka katunayan nga ginkilala bisan ni Dario.​​—⁠Daniel 6:⁠16.

3. Subong ginpakita sa eksperiensia sang isa ka misyonero, paano ang pangamuyo makabulig sa aton nga mahuptan ang integridad?

³ Ang regular nga pagpangamuyo makabulig man sa aton nga maatubang ang grabe nga mga pagtilaw. Halimbawa, binagbinaga ang kaso ni Harold King, isa ka misyonero sa Tsina nga ginbilanggo sing isahanon sa sulod sang lima ka tuig. Tuhoy sa iya eksperiensia, si Utod King nagsiling: “Mahimo nga ginpahilayo ako sa akon mga isigkatawo, apang wala sang makapahilayo sa akon gikan sa Dios. . . . Gani, kitaon kay bisan sin-o nga mahimo maglabay sa akon selda, nagaluhod ako sing tatlo ka  beses sa isa ka adlaw kag nagpangamuyo sing matunog, nga ginadumdom si Daniel, nga ginasiling sang Biblia. . . . Daw subong bala nga sa sini nga mga kahimtangan ginaubayan sang espiritu sang Dios ang akon hunahuna sa labing mapuslanon nga mga butang kag nagpakalma sa akon. Daw ano nga espirituwal nga kusog kag lugpay ang ginhatag sang pangamuyo sa akon!”

4. Anong mga pamangkot tuhoy sa pangamuyo ang binagbinagon naton sa sini nga artikulo?

⁴ Ang Biblia nagasiling: “Indi mag-untat sa pagpangamuyo. May kaangtanan sa tanan nga butang magpasalamat.” (1 Tesalonica 5:​17, 18) Bangod sini nga laygay, binagbinagon naton ang masunod nga mga pamangkot: Ngaa dapat naton hatagan sing igtalupangod ang aton mga pangamuyo? Ano ang aton mga rason sa pagdangop pirme kay Jehova? Kag ano ang aton dapat himuon kon nagabatyag kita nga di-takus sa pagpangamuyo sa Dios bangod sang aton mga kakulangan?

Palambua ang Pag-abyanay Paagi sa Pangamuyo

5. Anong pinasahi nga pag-abyanay ang matigayon naton paagi sa pangamuyo?

⁵ Luyag mo bala nga kabigon ka ni Jehova nga iya abyan? Amo sini ang ginhambal niya tuhoy sa patriarka nga si Abraham. (Isaias 41:⁠8; Santiago 2:23) Luyag ni Jehova nga mapalambo naton ini nga sahi sang kaangtanan sa iya. Ang matuod ginaagda niya kita nga magsuod sa iya. (Santiago 4:8) Indi bala dapat nga ini nga pangagda magpahunahuna sa aton tuhoy sa sining pinasahi nga pribilehiyo sang pangamuyo? Mabudlay kaayo nga makahigayon sa pagpakighambal sa isa ka importante nga opisyales sang gobierno, ano pa gid kon mangin abyan niya! Apang, ang Manunuga sang uniberso nagapalig-on sa aton nga magpangamuyo sa iya sing hilway, bisan san-o nga luyag naton ukon kinahanglan naton. (Salmo 37:5) Ang aton wala untat nga pagpangamuyo nagabulig sa aton nga mangin suod nga abyan si Jehova.

6. Ano ang ginatudlo sa aton sang halimbawa ni Jesus tuhoy sa kinahanglanon nga “mangamuyo sing padayon”?

⁶ Apang, daw ano kahapos nga mapatumbayaan naton ang pangamuyo! Ang pag-atubang lamang sa mga pag-ipit adlaw-adlaw makakuha sang aton daku nga igtalupangod amo nga wala na kita nagapanikasog nga makighambal sa Dios. Ginapalig-on ni Jesus ang iya mga disipulo nga “mangamuyo sing padayon,” kag ginhimo gid niya ini. (Mateo 26:41) Bisan pa masako sia pirme halin sa aga tubtob sa gab-i, nagtigana sia sing tion sa pagpakighambal sa iya langitnon nga Amay. Kon kaisa, nagabangon si Jesus sing “temprano sa kaagahon, samtang madulom pa,” agod mangamuyo. (Marcos 1:35) Sa iban pa nga mga higayon, nagkadto sia sa isa ka nabaw-ing nga duog sa kagab-ihon agod mangamuyo kay Jehova. (Mateo 14:23) Pirme ni Jesus ginhatagan  sing tion ang pagpangamuyo, gani dapat kita man.​—⁠1 Pedro 2:21.

7. Ano nga mga kahimtangan ang nagapahulag sa aton nga makighambal sa aton langitnon nga Amay adlaw-adlaw?

⁷ Madamo sang nagakaigo nga tion sa pagpangamuyo sing pribado kada adlaw samtang nagaatubang kita sang mga problema kag mga pagsulay, kag samtang nagahimo sing mga desisyon. (Efeso 6:18) Kon ginapangabay naton ang panuytoy sang Dios sa tanan nga aspekto sang aton kabuhi, magalambo gid ang aton pagpakig-abyan sa iya. Kon ang duha ka mag-abyan magkaupod nga nagaatubang sa mga problema, indi bala nga nagabakod pa gid ang ila pag-abyanay? (Hulubaton 17:17) Amo man sini ang matabo kon nagasandig kita kay Jehova kag maeksperiensiahan ang iya bulig.​—⁠2 Cronica 14:11.

8. Ano ang natun-an naton gikan sa mga halimbawa nanday Nehemias, Jesus, kag Ana tuhoy sa kalawigon sang aton personal nga mga pangamuyo?

⁸ Nalipay gid kita nga wala ginalimitehan sang Dios kon daw ano kalawig ukon kon pila ka beses kita magpangamuyo sa iya! Madasig nga nagpangamuyo sing hipos si Nehemias antes mangabay sa hari sang Persia. (Nehemias 2:​4, 5) Malip-ot nga nangamuyo man si Jesus sang nagpangabay sia nga hatagan sia ni Jehova sing gahom sa pagbanhaw kay Lazaro. (Juan 11:​41, 42) Si Ana, sa pihak nga bahin, “nangamuyo sing malawig sa atubangan ni Jehova” sang ginbubo niya ang iya tagipusuon sa iya. (1 Samuel 1:​12, 15, 16) Ang aton personal nga mga pangamuyo mahimo nga malip-ot ukon malawig suno sa kinahanglanon kag kahimtangan.

9. Ngaa ang aton mga pangamuyo dapat maglakip sang pagdayaw kag pagpasalamat tungod sa tanan nga ginahimo ni Jehova para sa aton?

⁹ Madamo nga mga pangamuyo sa Biblia ang nagapabutyag sang tinagipusuon nga apresasyon sa mataas kaayo nga posisyon ni Jehova kag sa iya dalayawon nga mga binuhatan. (Exodo 15:​1-⁠19; 1 Cronica 16:​7-​36; Salmo 145) Sa isa ka palanan-awon, nakita ni apostol Juan ang 24 ka gulang​—⁠ang kompleto nga kadamuon sang hinaplas nga mga Cristiano sa ila langitnon nga posisyon⁠​—⁠nga nagadayaw kay Jehova, nga nagasiling: “Takus ka, Jehova, nga amon Dios, sa pagbaton sang himaya kag dungog kag gahom, kay ikaw ang nagtuga sang tanan nga butang, kag bangod sang imo kabubut-on nagluntad sila kag gintuga.” (Bugna 4:​10, 11) May rason man kita sa pagdayaw sa Manunuga sing regular. Malipayon gid ang mga ginikanan kon tinagipusuon nga ginapasalamatan sila sang ila anak tungod sa mga butang nga ginhimo nila para sa iya! Ang mainapresyahon nga pagpamalandong sa kaayo ni Jehova kag ang aton tinagipusuon nga pagpasalamat tungod sini isa ka maayo nga paagi sa pagpauswag sa kalidad sang aton mga pangamuyo.

“Indi Mag-untat sa Pagpangamuyo”​—⁠Ngaa?

10. Ano ang papel sang pangamuyo sa pagpabakod sang aton pagtuo?

¹⁰ Ang regular nga pagpangamuyo importante  sa aton pagtuo. Sa tapos mailustrar ang kinahanglanon nga ‘magpangamuyo pirme kag indi mag-untat,’ si Jesus namangkot: “Kon mag-abot ang Anak sang tawo, makakita gid bala sia sing pagtuo sa duta?” (Lucas 18:1⁠-8) Ang hanuot kag tinagipusuon nga pangamuyo nagapabakod sang pagtuo. Sang ang patriarka nga si Abraham nagtigulang na kag wala pa gihapon sing anak, nakighambal sia sa Dios tuhoy sa sini. Bilang sabat, ginpangabay sia anay ni Jehova nga magtangla sa langit kag isipon ang mga bituon, kon maisip niya. Dayon nagpasalig ang Dios kay Abraham: “Mangin subong sina ang imo binhi.” Ang resulta? Si Abraham ‘nagtuo kay Jehova; kag gin-isip niya ini sa iya subong pagkamatarong.’ (Genesis 15:​5, 6) Kon tinagipusuon gid kita nga nagapangamuyo kay Jehova, ginabaton ang iya mga pasalig gikan sa Biblia, kag ginatuman sia, pabakuron niya ang aton pagtuo.

11. Paano ang pangamuyo makabulig sa aton sa pag-atubang sa mga problema?

¹¹ Ang pangamuyo makabulig man sa aton sa pag-atubang sa mga problema. Ang aton bala pagkabuhi malisod kag ang mga kahimtangan nga aton ginaatubang mabudlay batason? Ang Biblia nagasiling sa aton: “Ihaboy ang imo lulan kay Jehova, kag sia magaalay-ay sa imo. Indi gid sia magtugot nga malingkang ang matarong.” (Salmo 55:22) Kon nagaatubang kita sa mabudlay nga mga desisyon, mailog naton ang halimbawa ni Jesus. Nangamuyo sia sing pribado sa bug-os nga gab-i antes gintangdo ang iya 12 ka apostoles. (Lucas 6:12-16) Kag sang gab-i antes sia mapatay, hanuot gid nga nangamuyo si Jesus amo nga “ang iya balhas nangin kaangay sang mga tinulo sang dugo nga nagatupa sa duta.” (Lucas 22:44) Ang resulta? “Ginpamatian sia nga may kahamuot tungod sa iya diosnon nga kahadlok.” (Hebreo 5:7) Ang aton hanuot kag wala untat nga mga pangamuyo magabulig sa aton nga malandas ang mahuol nga mga kahimtangan kag mabudlay nga mga pagtilaw.

12. Paano ginapakita sang pangamuyo ang personal nga interes ni Jehova sa aton?

¹² Ang isa pa ka rason nga magpalapit sing suod kay Jehova paagi sa pangamuyo amo nga, sia man, magapalapit sing suod sa aton. (Santiago 4:8) Kon nagapangamuyo kita sing tinagipusuon kay Jehova, wala bala naton mabatyagan nga interesado sia sa aton mga kinahanglanon kag mapinalanggaon nga nagaulikid sa aton? Maeksperiensiahan naton sing personal ang gugma sang Dios. Wala ni Jehova gintugyan kay bisan sin-o ang responsabilidad sa pagpamati sa tagsa ka pangamuyo nga ginapatuhoy sang iya mga alagad sa iya subong ila langitnon nga Amay. (Salmo 66:​19, 20; Lucas 11:2) Kag ginaagda niya kita nga ‘itugyan sa iya ang tanan naton nga mga kabalaka bangod sia nagaulikid sa aton.’​—⁠1 Pedro 5:​6, 7.

13, 14. Ano ang aton mga rason kon ngaa indi kita dapat mag-untat sa pagpangamuyo?

 ¹³ Ang pangamuyo makahatag sa aton sing daku pa nga kakugi sa publiko nga ministeryo kag nagapabakod sa aton kon ang di-pagsapak ukon pagpamatok mahimo magpabatyag sa aton nga mag-untat. (Binuhatan 4:​23-​31) Ang pangamuyo makaamlig man sa aton batok sa “mga pahito sang Yawa.” (Efeso 6:​11, 17, 18) Kon nagahimakas nga malandas ang mga pagtilaw sa adlaw-adlaw, makapangabay kita pirme sa Dios nga pabakuron kita. Ang modelo nga pangamuyo ni Jesus nagalakip sang pangabay nga ‘luwason kita ni Jehova gikan sa isa nga malauton,’ si Satanas nga Yawa.​—⁠Mateo 6:13.

¹⁴ Kon padayon kita nga nagapangamuyo sing bulig agod mapunggan ang aton makasasala nga mga huyog, maeksperiensiahan naton ang mahigugmaon nga bulig ni Jehova. Ginapasalig kita: “Ang Dios matutom, kag indi sia magtugot nga sulayon kamo labaw sa inyo masarangan, kundi kaupod sang pagsulay magahatag man sia sing lulutsan agod nga mabatas ninyo ini.” (1 Corinto 10:13) Naeksperiensiahan mismo ni apostol Pablo ang makapabakod nga pag-atipan ni Jehova sa nanuhaytuhay nga kahimtangan. “Sa tanan nga butang may kusog ako bangod sa iya nga nagahatag sing gahom sa akon,” siling niya.​—⁠Filipos 4:13; 2 Corinto 11:23-29.

Padayon sa Pagpangamuyo Walay Sapayan sang mga Kakulangan

15. Ano ang mahimo matabo kon ang aton paggawi wala makalab-ot sa mga talaksan sang Dios?

¹⁵ Agod ang aton mga pangamuyo pamatian nga may kahamuot, indi naton dapat sikwayon ang laygay sang Pulong sang Dios. “Ang bisan ano nga ginapangayo naton mabaton naton sa iya,” sulat ni apostol Juan, “bangod ginatuman naton ang iya mga sugo kag ginahimo ang mga butang nga kalahamut-an sa iya mga mata.” (1 Juan 3:22) Apang, ano ang mahimo nga matabo kon ang aton paggawi wala makalab-ot sa mga talaksan sang Dios? Si Adan kag si Eva nanago sang nagpakasala sila sa hardin sang Eden. Kita man mahimo nga may huyog nga manago “gikan sa nawong ni Jehova” kag mag-untat sa pagpangamuyo. (Genesis 3:8) “Natalupangdan ko nga halos pirme ang una nga sayop nga ginhimo sang mga nagpalayo kay Jehova kag sa iya organisasyon amo nga nag-untat sila sa pagpangamuyo,” siling ni Klaus, isa ka eksperiensiado nga nagalakbay nga manugtatap. (Hebreo 2:1) Amo ini ang natabo kay José Ángel. Sia nagsiling: “Sa sulod sang halos walo ka tuig, talagsa lang ako nagpangamuyo kay Jehova. Nagbatyag ako nga indi takus sa pagpakighambal sa iya, bisan pa ginakabig ko sia gihapon nga akon langitnon nga Amay.”

16, 17. Maghatag sing mga halimbawa kon paano ang regular nga pangamuyo makabulig sa aton nga malandas ang espirituwal nga kaluyahon.

¹⁶ Ang iban sa aton mahimo magbatyag nga indi takus magpangamuyo bangod sang espirituwal nga kaluyahon ukon bangod nakahimo kita sing sala. Apang amo gid ini ang tion nga makabenepisyo kita sa pagpangamuyo. Si Jonas nagpalagyo gikan sa iya asaynment. Apang ‘nagpanawag si Jonas kay Jehova bangod sang iya kapipit-an, kag nagsabat Sia sa iya. Nangayo si Jonas sing bulig gikan sa tiyan sang Sheol kag ginpamatian ni Jehova ang iya tingog.’ (Jonas 2:2) Si Jonas nangamuyo, ginsabat ni Jehova ang iya pangamuyo, kag si Jonas nakapanumbalik sa espirituwal.

¹⁷ Si José Ángel hanuot man nga nagpangamuyo sing bulig. Sia naghinumdom: “Tinagipusuon gid ako nga nagpangayo sing patawad sa Dios. Kag ginbuligan gid niya ako. Wala gid ako kuntani makabalik sa kamatuoran kon wala ang bulig sang pangamuyo. Regular na ako karon nga nagapangamuyo adlaw-adlaw, kag ginakalangkagan ko ini nga mga tion.” Dapat kita magbatyag pirme nga hilway sa pagpakighambal sing tampad sa Dios tuhoy sa aton mga sayop kag mapainubuson nga magpangayo sing patawad. Sang gintu-ad ni Hari David ang iya mga kalapasan, ginpatawad ni  Jehova ang iya mga sala. (Salmo 32:​3-5) Si Jehova luyag sa pagbulig sa aton, indi sa pagpakamalaut sa aton. (1 Juan 3:​19, 20) Kag ang mga pangamuyo sang mga gulang sa kongregasyon makabulig sa aton sa espirituwal, kay ini nga mga pangamuyo may “daku nga puersa.”​—⁠Santiago 5:​13-​16.

18. Ano ang masaligan sang mga alagad sang Dios walay sapayan kon daw ano na kalayo sila nga nagtalang?

¹⁸ Sin-o nga amay ang magasikway sa iya anak nga mapainubuson nga nagapangayo sing bulig kag laygay sa iya pagkatapos nga nakasayop? Ginapakita sang parabola sang buhaha nga anak nga walay sapayan kon daw ano na kita kalayo nga nagtalang, ang aton langitnon nga Amay nagakalipay kon magbalik kita sa iya. (Lucas 15:​21, 22, 32) Ginapalig-on ni Jehova ang tanan nga nakasayop nga magpanawag sa iya, “kay sia magapatawad sing bugana.” (Isaias 55:​6, 7) Bisan pa nakahimo si David sang pila ka mabug-at nga sala, nagpanawag sia kay Jehova, nga nagasiling: “Pamatii, O Dios, ang akon pangamuyo; kag indi ka magpanago sa pagpangabay ko sing pabor.” Nagsiling man sia: “Sa gab-i kag sa aga kag sa udto pirme ako nagakabalaka kag nagaugayong, kag ginapamatian [ni Jehova] ang akon tingog.” (Salmo 55:​1, 17) Makapasalig gid ini!

19. Ngaa indi kita dapat maghinakop nga ang daw wala masabat nga mga pangamuyo pamatuod sang di-kahamuot sang Dios?

¹⁹ Kamusta kon ang aton pangamuyo wala masabat? Kon amo, dapat naton pat-uron nga ang aton pangabay nahisanto sa kabubut-on ni Jehova kag ginapangabay sa ngalan ni Jesus. (Juan 16:23; 1 Juan 5:14) Ginpatuhuyan ni disipulo Santiago ang pila ka Cristiano nga ang mga pangamuyo wala masabat bangod ‘nagapangayo sila sa malain nga katuyuan.’ (Santiago 4:3) Sa pihak nga bahin, indi kita dapat maghinakop gilayon nga ang daw wala masabat nga mga pangamuyo pamatuod pirme sang di-kahamuot sang Dios. Kon kaisa, mahimo nga ginatugutan ni Jehova nga magpadayon sa pagpangamuyo ang matutom nga mga sumilimba tuhoy sa isa ka butang sa pila ka tion antes mangin maathag ang iya sabat. “Padayon sa pagpangayo, kag ihatag ini sa inyo,” siling ni Jesus. (Mateo 7:7) Busa, kinahanglan nga ‘magpadayon kita sa pagpangamuyo.’​—⁠Roma 12:12.

Magpangamuyo sing Regular

20, 21. (a) Ngaa indi kita dapat mag-untat sa pagpangamuyo sa sining “katapusan nga mga adlaw”? (b) Ano ang mabaton naton kon magpalapit kita adlaw-adlaw sa trono sang di-bagay nga kaayo ni Jehova?

²⁰ Ang mga pag-ipit kag mga problema labi nga nagadamo sa sining “katapusan nga mga adlaw,” nga ginatandaan sang “makahalanguyos nga mga tion nga mabudlay pakigbagayan.” (2 Timoteo 3:1) Kag ang mga pagtilaw mahapos nga magpuno sa aton hunahuna. Apang, ang aton wala untat nga mga pangamuyo magabulig sa aton nga masentro ang aton kabuhi sa espirituwal nga mga butang walay sapayan sang padayon nga mga problema, pagsulay, kag pagluya sing buot. Ang aton pagpangamuyo kay Jehova adlaw-adlaw makahatag sing importante nga pagsakdag nga kinahanglan naton.

²¹ Si Jehova, ang “Nagapamati sang pangamuyo,” indi tuman ka sako amo nga indi niya kita pagpamatian. (Salmo 65:2) Indi gid kita dapat mangin tuman ka sako nga indi makapakighambal sa iya. Ang aton pagpakig-abyan sa Dios isa gid ka hamili nga butang para sa aton. Kabay nga indi naton ini pagpasapayanan. “Gani, magpalapit kita nga may kahilwayan sa paghambal sa trono sang di-bagay nga kaayo, agod makatigayon kita sing kaluoy kag makasapo sing di-bagay nga kaayo subong bulig sa husto nga tion.”​—⁠Hebreo 4:16.

Paano Mo Sabton?

• Ano ang matun-an naton gikan kay manalagna Daniel tuhoy sa balor sang pangamuyo?

• Paano naton mapabakod ang aton pagpakig-abyan kay Jehova?

• Ngaa indi kita dapat mag-untat sa pagpangamuyo?

• Ngaa ang pagbatyag nga di-takus indi dapat magpugong sa aton sa pagpangamuyo kay Jehova?

[Mga Pamangkot sa Pagtinuon]

[Retrato sa pahina 16]

Si Nehemias nagpangamuyo sing malip-ot kag sing hipos antes makighambal sa hari

[Retrato sa pahina 17]

Si Ana “nangamuyo sing malawig sa atubangan ni Jehova”

[Mga retrato sa pahina 18]

Si Jesus nangamuyo sa bug-os nga gab-i antes gintangdo ang iya 12 ka apostoles

[Mga retrato sa pahina 20]

Madamo sing mga kahigayunan sa pagpangamuyo sa bug-os nga adlaw