Ang Pagbatas sa mga Pagtilaw Nagadala sing Kadayawan kay Jehova

“Kon, sa tion nga nagahimo kamo sing maayo kag nagaantos kamo, ginabatas ninyo ini, isa ini ka butang nga kalahamut-an sa Dios.”​—⁠1 PEDRO 2:20.

1. Sanglit ang matuod nga mga Cristiano nabalaka sa pagtuman sa ila dedikasyon, ano nga pamangkot ang dapat binagbinagon?

ANG mga Cristiano nadedikar kay Jehova kag luyag nila himuon ang iya kabubut-on. Agod matuman ang ila dedikasyon, ginahimo nila ang ila bug-os nga masarangan agod masunod ang tikang sang ila Huwaran, nga si Jesucristo, kag agod makapanaksi sa kamatuoran. (Mateo 16:24; Juan 18:37; 1 Pedro 2:21) Apang, ginsakripisyo ni Jesus kag sang iban pa nga mga matutom ang ila kabuhi subong mga martir tungod sa ila pagtuo. Nagakahulugan bala ini nga ang tanan nga mga Cristiano makapaabot nga mapatay tungod sa ila pagtuo?

2. Paano ginatamod sang mga Cristiano ang mga pagtilaw kag pag-antos?

² Subong mga Cristiano, ginalaygayan kita nga mangin matutom tubtob sa kamatayon, nga wala gid man nagakahulugan nga mapatay tungod sa aton pagtuo. (2 Timoteo 4:⁠7; Bugna 2:10) Nagakahulugan ini nga bisan pa handa kita nga mag-antos​—⁠kag, kon kinahanglan, nga mapatay⁠​—⁠tungod sa aton pagtuo, indi naton luyag nga mag-antos kag mapatay. Wala kita nalipay nga mag-antos sing kasakit ukon kahuluy-an. Apang, bangod ang mga pagtilaw kag paghingabot ginapaabot, dapat naton binagbinagon sing maayo kon ano ang aton himuon kon mag-abot ini sa aton.

Matutom sa Idalom sang Pagtilaw

3. Anong mga halimbawa sa Biblia tuhoy sa pag-atubang sa paghingabot ang imo masaysay? (Tan-awa ang kahon nga “Kon Paano Nila Gin-atubang ang Paghingabot,” sa masunod nga pahina.)

³ Sa Biblia, mabasa naton ang madamo nga sugilanon nga nagapakita kon ano ang ginhimo sang mga alagad sang Dios sang una sang nag-atubang sila sing mga kahimtangan nga makatalagam sa kabuhi. Ang nagkalainlain nga mga paagi nga ginhimo nila nagahatag sing panuytoy sa mga Cristiano sa karon pananglit man nga magaatubang sila sing kaanggid nga mga pagtilaw kag paghingabot. Binagbinaga ang mga sugilanon sa kahon nga “Kon Paano Nila Gin-atubang ang Paghingabot,” kag tan-awa kon ano ang imo matun-an gikan sa sini.

4. Ano ang masiling tuhoy sa ginhimo ni Jesus kag sang iban pa nga matutom nga mga alagad sang napaidalom sila sa pagtilaw?

⁴ Bisan pa indi magkapareho ang ginhimo ni Jesus kag sang iban pa nga matutom nga mga alagad sang Dios sa pag-atubang sa paghingabot, depende sa mga kahimtangan, maathag nga wala nila ginbutang sa katalagman ang ila kabuhi sing di-kinahanglanon. Sang yara sila sa makatalagam nga mga kahimtangan, maisog sila apang mainandamon. (Mateo 10:​16, 23) Ang ila katuyuan amo ang pagpauswag sa hilikuton nga pagbantala kag paghupot sang ila integridad kay Jehova. Ang ila ginhimo sa nanuhaytuhay nga mga kahimtangan nagahatag sing halimbawa sa mga Cristiano sa karon nga nagaatubang sing mga pagtilaw kag paghingabot.

5. Ano nga paghingabot ang natabo sa Malawi sang katuigan 1960, kag ano ang ginhimo sang mga Saksi didto?

⁵ Sa moderno nga tion, ang katawhan ni Jehova masunson nga nakaeksperiensia sing daku gid nga kabudlayan kag kinawad-on bangod sang mga inaway, mga pagdumili, ukon paghingabot. Halimbawa, sang katuigan 1960, ang mga Saksi ni Jehova sa Malawi mapintas nga ginhingabot. Ang ila mga Kingdom Hall, mga puluy-an, mga pagkaon, kag mga negosyo​—⁠halos tanan nga ginapanag-iyahan nila⁠​—⁠ginguba. Ginbunal kag ginpintasan sila. Ano ang ginhimo sang mga kauturan? Linibo ang nagpalagyo gikan sa ila mga minuro. Madamo ang nagdangop sa mga kakahuyan, samtang ang iban naman nangin umalagi nga mga tinapok sa kaingod nga Mozambique. Walay sapayan nga madamong mga matutom ang nagkalamatay, ang iban namat-od nga magpalagyo gikan sa makatalagam  nga duog, nga amo ang makatarunganon nga butang nga himuon sa sini nga mga kahimtangan. Bangod sini, ginsunod sang mga Cristiano ang ginhimo anay ni Jesus kag ni Pablo.

6. Ano ang wala ginbiyaan sang mga kauturan sa Malawi walay sapayan sang mapintas nga paghingabot?

⁶ Bisan pa ang mga kauturan sa Malawi kinahanglan nga magpalagyo ukon magpanago, ginsunod nila ang teokratiko nga instruksion kag ginhimo ang ila Cristianong mga hilikuton sing tago sa bug-os nga masarangan nila. Ang resulta? Nalab-ot ang kataason nga 18,519 ka manugbantala sang Ginharian antes gid lang sang pagdumili sang 1967. Bisan pa ginapatuman gihapon ang pagdumili kag madamo ang nagpalagyo pakadto sa Mozambique, ginreport ang isa ka bag-o nga kataason nga 23,398 ka manugbantala sang 1972. Nagpromedyo sila sing kapin sa 16 ka oras sa ministeryo kada bulan. Wala duhaduha nga ang ila ginhimo naghatag sing kadayawan kay Jehova, kag ginpakamaayo ni Jehova ining matutom nga mga kauturan sa labing mabudlay gid nga tion.⁠ *

7, 8. Bangod sa ano nga mga rason namat-od ang iban nga indi magpalagyo, bisan pa nga ang pagpamatok nagatuga sing mga problema?

 ⁷ Sa pihak nga bahin, sa mga pungsod diin ang pagpamatok nagatuga sing mga problema, ang iban nga mga kauturan mahimo mamat-od nga indi magbiya, bisan pa makabiya kuntani sila. Kon magsaylo sila sa iban nga lugar, ang pila ka problema mahimo malubad, apang mahimo ini magtuga sang iban pa nga mga problema. Halimbawa, mahuptan bala nila ang komunikasyon upod sa Cristianong mga kauturan kag indi mapahilayo sa espirituwal? Mapadayon bala nila ang ila espirituwal nga hilikuton samtang nagapanikasog sila nga magpuyo, ayhan sa mas manggaranon nga pungsod ukon sa isa ka duog nga mahimo magtin-ad ang ila pangabuhi?​—⁠1 Timoteo 6:9.

⁸ Ang iban namat-od nga indi magsaylo sa iban nga lugar bangod nabalaka sila sa espirituwal nga kaayuhan sang ila mga kauturan. Namat-od sila nga magpabilin kag atubangon ang kahimtangan agod padayon nila nga mabantalaan ang ila tumandok nga teritoryo kag agod mangin tuburan sila sang pagpalig-on sa mga masigkasumilimba. (Filipos 1:14) Sa sini nga pamat-od, ang iban nakabulig pa gani nga matigayon ang legal nga mga kadalag-an sa ila lugar.⁠ *

9. Ano nga mga butang ang dapat binagbinagon sang isa ka tawo kon magpamat-od kon bala magpabilin ukon magsaylo bangod sang paghingabot?

⁹ Isa gid ka personal nga desisyon ang magpabilin ukon magsaylo. Siempre pa, ini nga mga desisyon dapat lamang himuon sa tapos makapangayo sing panuytoy ni Jehova sa pangamuyo. Apang, bisan ano man ang aton desisyon, dapat naton dumdumon ang ginsiling ni apostol Pablo: “Ang tagsatagsa sa aton magahatag sing husay para sa iya kaugalingon sa Dios.” (Roma 14:12) Subong sang ginsambit namon kaina, ang ginapatuman ni Jehova amo nga ang tagsatagsa sa iya mga alagad magpabilin nga matutom sa idalom sang tanan nga kahimtangan. Ang iban sang iya mga alagad nagaantos sing mga pagtilaw kag paghingabot karon; ang iban naman mahimo nga sa ulihi pa. Ang tanan tilawan sa bisan paano, kag ang isa indi dapat magpaabot nga indi sia pagtilawan. (Juan 15:​19, 20) Subong dedikado nga mga  alagad ni Jehova, indi naton malikawan ang bug-os uniberso nga hulusayon may kaangtanan sa pagpakabalaan sa ngalan ni Jehova kag sa pagbindikar sa iya pagkasoberano.​—⁠Ezequiel 38:23; Mateo 6:​9, 10.

“Dili Magbalos sing Malaut sa Malaut kay Bisan Sin-o”

10. Anong importante nga sulundan ang ginpahamtang ni Jesus kag sang mga apostoles sa aton kon nagaatubang sang mga pag-ipit kag pagpamatok?

¹⁰ Ang isa pa ka importante nga prinsipio nga matun-an naton sa ginhimo ni Jesus kag sang mga apostoles sang gin-ipit sila amo ang indi gid pagbalusan ang mga nagahingabot sa aton. Indi naton mabasa sa Biblia nga si Jesus ukon ang iya mga sumulunod nag-organisar sang isa ka hublag ukon naggamit sing kusog agod batuan ang mga nagahingabot sa ila. Sa kabaliskaran, “dili magbalos sing malaut sa malaut kay bisan sin-o,” ang laygay ni apostol Pablo sa mga Cristiano. “Dili kamo magtimalos, mga hinigugma, kundi pabayai ang kasingkal; kay nasulat na: ‘Akon ang pagtimalos; ako ang magatumbas, siling ni Jehova.’” Dugang pa, “dili ka magpadaug sa malaut, kundi dag-a ang malaut paagi sa maayo.”​—⁠Roma 12:17-21; Salmo 37:1-4; Hulubaton 20:22.

11. Ano ang ginsiling sang isa ka istoryador tuhoy sa panimuot sang unang mga Cristiano sa Estado?

¹¹ Ginsunod sang unang mga Cristiano ini nga laygay. Sa iya libro nga The Early Church and the World, ginlaragway sang istoryador nga si Cecil J. Cadoux ang panimuot sang mga Cristiano sa Estado sadtong 30-70 C.⁠E. Nagsulat sia: “Wala gid kita sing ebidensia nga ang mga Cristiano sa sining panag-on nagpanikasog nga atubangon ang paghingabot paagi sa kusog. Ang pinakadaku nga ginhimo nila amo ang pagkondenar sa ila mga manuggahom ukon ang pagpaslaw sa ila paagi sa pagpalagyo. Apang, ang normal nga reaksion sang mga Cristiano sa paghingabot amo lamang ang haganhagan apang malig-on nga pagpangindi sa pagtuman sa mga sugo sang gobierno nga supak sa pagkamatinumanon kay Cristo.”

12. Ngaa mas maayo nga batason ang pag-antos sangsa magbalos?

¹² Praktikal gid bala ining mapinasakupon nga dalanon? Indi ayhan nga sa paghimo sini, mahapos sila nga mapasunod ukon mahingalitan sang mga determinado gid sa pagpapas sa ila? Indi bala maalamon nga pangapinan ang kaugalingon? Sa punto-de-vista sang tawo, daw amo sini ang kahimtangan. Apang, subong mga alagad ni Jehova, nagasalig kita nga ang pagsunod sa panuytoy ni Jehova sa tanan nga butang amo ang labing maayo nga dalanon. Ginadumdom naton ang mga pinamulong ni Pedro: “Kon, sa nagahimo kamo sing maayo kag nagaantos kamo, ginabatas ninyo ini, isa ini ka butang nga kalahamut-an sa Dios.” (1 Pedro 2:20) Nagasalig kita nga nahibaluan gid ni Jehova ang nagakatabo kag indi sia magtugot nga magapadayon ini tubtob sa tion nga walay pat-od. Paano kita nakasiguro sa sini? Si Jehova nagpahayag sa iya nabihag nga katawhan sa Babilonia: “Sia nga nagatandog sa inyo nagatandog sang tawotawo sang akon mata.” (Zacarias 2:8) Daw ano kadugay pahanugutan sang bisan sin-o nga tandugon ang tawotawo sang iya mata? Si Jehova magahatag sing kaumpawan sa nagakaigo nga tion. Indi gid ini maduhaduhaan.​—⁠2 Tesalonica 1:5-8.

13. Ngaa mapinasakupon nga gintugutan ni Jesus nga dakpon sia sang kaaway?

 ¹³ Sa sini nga bahin, matamod naton si Jesus subong huwaran naton. Sang gintugutan niya nga dakpon sia sang iya mga kaaway sa katamnan sang Getsemane, wala ini nagkahulugan nga indi niya mapangapinan ang iya kaugalingon. Sa katunayan, nagsiling sia sa iya mga disipulo: “Nagahunahuna ka bala nga indi ako makapangabay sa akon Amay nga padalhan ako sa sini nga tion sing kapin sa napulog duha ka lehiyon sang mga anghel? Kon amo sina, paano matuman ang Kasulatan nga dapat ini matabo sa sining paagi?” (Mateo 26:​53, 54) Ang pagtuman sa kabubut-on ni Jehova amo gid ang labing importante kay Jesus, bisan pa nagkahulugan ini nga dapat sia mag-antos. Nagsalig sia sing bug-os sa ginasiling sang matagnaon nga salmo ni David: “Indi mo pagbayaan ang akon kalag sa Sheol. Indi ka magtugot nga ang imo mainunungon makakita sang buho.” (Salmo 16:10) Mga tinuig sang ulihi si apostol Pablo nagsiling tuhoy kay Jesus: “Tungod sa kalipay nga ginbutang sa iya atubang nagbatas sia sing usok sang pag-antos, nga nagatamay sang kahuluy-an, kag naglingkod sa tuo nga kamot sang trono sang Dios.”​—⁠Hebreo 12:2.

Ang Kalipay nga Mapakabalaan ang Ngalan ni Jehova

14. Ano nga kalipay ang nagsakdag kay Jesus sa tanan niya nga mga pagtilaw?

¹⁴ Ano nga kalipay ang nagsakdag kay Jesus nga mabatas ang pinakamasakit nga pagtilaw nga mahanduraw? Sa tanan nga mga alagad ni Jehova, si Jesus, ang pinalangga nga Anak sang Dios, amo gid ang puntariya ni Satanas. Gani ang paghupot ni Jesus sang iya integridad sa idalom sang pagtilaw amo gid ang sabat sa pagyaguta ni Satanas batok kay Jehova. (Hulubaton 27:11) Mahanduraw mo bala ang kalipay kag kaayawan nga ginbatyag ni Jesus sang ginbanhaw sia? Mahimo nga nagkalipay gid sia bangod nahibaluan niya nga natuman niya ang dapat niya himuon subong himpit nga tawo sa pagbindikar sa pagkasoberano ni  Jehova kag sa pagpakabalaan sa Iya ngalan! Dugang pa, ang paglingkod sa “tuo nga kamot sang trono sang Dios” isa gid ka dalayawon nga kadungganan kag pinakadaku nga tuburan sang kalipay para kay Jesus.​—⁠Salmo 110:​1, 2; 1 Timoteo 6:​15, 16.

15, 16. Anong sapatsapaton nga paghingabot ang ginbatas sang mga Saksi sa Sachsenhausen, kag ano ang naghatag sa ila sing kusog agod mabatas ini?

¹⁵ Makalilipay man para sa mga Cristiano nga makapakigbahin sa pagpakabalaan sa ngalan ni Jehova paagi sa pagbatas sa mga pagtilaw kag paghingabot, nga ginasunod ang halimbawa ni Jesus. Ang isa ka nagakaigo nga halimbawa amo ang eksperiensia sang mga Saksi nga nag-antos sa tuman gid kalain nga kampo konsentrasyon sa Sachsenhausen kag nakalampuwas sa makakalapoy nga death march (martsa padulong sa kamatayon) pagkatapos sang Bug-os Kalibutan nga Inaway II. Sa martsa, ginatos ka bilanggo ang napatay bangod sang malain nga paniempo, balatian, ukon gutom ukon mapintas nga ginpatay mismo sa higad-dalan sang SS nga mga guardia. Ang 230 tanan ka Saksi nakalampuwas paagi sa suod nga pag-inupdanay kag pagbinuligay bisan pa delikado ang ila kabuhi.

¹⁶ Ano ang naghatag sing kusog sa sining mga Saksi agod mabatas ining sapatsapaton nga paghingabot? Sa gilayon nga nakalab-ot sila sa lugar nga luwas sa katalagman, ginpabutyag nila ang ila kalipay kag pasalamat kay Jehova sa isa ka dokumento nga natig-uluhan, “Ang resolusyon sang 230 ka saksi ni Jehova halin sa anom ka nasyonalidad, nga nagtipon sa kagulangan malapit sa Schwerin sa Mecklenburg.” Nagsiling sila sa sini: “Ang malawig kag mabudlay nga panag-on sang pagtilaw natapos na kag ang mga nakalampuwas, daw subong nga gin-agaw gikan sa kalayuhon nga hurno, nga wala gani sing baho sang kalayo. (Tan-awa ang Daniel 3:27.) Sa kabaliskaran, puno sila sing kusog kag gahom gikan kay Jehova kag malangkagon nga nagahulat sa bag-ong mga sugo gikan sa Hari agod mapauswag ang Teokratikong mga intereses.”⁠ *

17. Ano nga sahi sang mga pagtilaw ang ginaatubang karon sang katawhan sang Dios?

¹⁷ Kaangay sadtong 230 ka matutom, ang aton pagtuo mahimo man tilawan, bisan nga wala pa kita ‘makapakigsumpong tubtob sa pagpaagay sang dugo.’ (Hebreo 12:4) Apang may yara lainlain nga mga sahi sang mga pagtilaw. Ayhan pagyaguta ini sang mga kaklase, ukon ayhan pag-ipit sang mga katubotubo nga maghimo sing imoralidad kag iban pa nga mga sala. Dugang pa, ang pamat-od nga maglihi sa dugo, magminyo lamang sa Ginuo, ukon padakuon ang mga anak sa pagtuo sa isa ka nabahinbahin nga panimalay mahimo kon kaisa magresulta sa daku nga pag-ipit kag pagtilaw.​—⁠Binuhatan 15:29; 1 Corinto 7:39; Efeso 6:⁠4; 1 Pedro 3:​1, 2.

18. Ano ang pasalig nga mabatas naton bisan ang labing mabudlay nga pagtilaw?

¹⁸ Apang, bisan ano man nga pagtilaw ang magaabot sa aton, nahibaluan naton nga nagaantos kita bangod ginauna naton si Jehova kag ang iya Ginharian, kag ginakabig naton nga isa gid ka pribilehiyo kag kalipay nga himuon ini. Nagakuha kita sing kaisog gikan sa nagapasalig nga mga pulong ni Pedro: “Kon ginapasipalahan kamo tungod sa ngalan ni Cristo, malipayon kamo, bangod ang espiritu sang himaya, bisan ang espiritu sang Dios, yara sa inyo.” (1 Pedro 4:14) Sa gahom sang espiritu ni Jehova, may kusog kita nga mabatas bisan ang labing mabudlay nga mga pagtilaw, ang tanan sa iya himaya kag kadayawan.​—⁠2 Corinto 4:⁠7; Efeso 3:16; Filipos 4:13.

[Mga nota]

Mapaathag Mo Bala?

• Paano ginatamod sang mga Cristiano ang pag-antos kag paghingabot?

• Ano ang matun-an naton gikan sa ginhimo ni Jesus kag sang iban pa nga mga matutom sang napaidalom sa pagtilaw?

• Ngaa maalamon nga indi magbalos kon ginahingabot kita?

• Ano nga kalipay ang nagsakdag kay Jesus sa iya mga pagtilaw, kag ano ang matun-an naton gikan sa sini?

[Mga Pamangkot sa Pagtinuon]

[Kahon/Mga retrato sa pahina 15]

Kon Paano Nila Gin-atubang ang Paghingabot

• Antes nag-abot ang mga soldado ni Herodes sa Betlehem agod patyon ang tanan nga lalaki nga mga lapsag nga duha ka tuig ang edad kag paubos, gindala ni Jose kag ni Maria ang lapsag nga si Jesus paagi sa panuytoy sang anghel kag nagpalagyo pakadto sa Egipto.​—⁠Mateo 2:13-16.

• Sing madamo nga beses sa tion sang ministeryo ni Jesus, gintinguhaan sang iya mga kaaway nga patyon sia bangod sang iya mabaskog nga pagpanaksi. Nakapalagyo si Jesus sa ila sa tagsa ka okasyon.​—⁠Mateo 21:​45, 46; Lucas 4:28-30; Juan 8:57-59.

• Sang ang mga soldado kag mga opisyales nagkadto sa katamnan sang Getsemane agod dakpon si Jesus, nagpakilala sia sing hayag, makaduha nga nagsiling sa ila: “Ako amo sia.” Ginpunggan pa gani niya ang iya mga sumulunod nga makigbato kag ginpabay-an nga dalhon sia sang kadam-an.​—⁠Juan 18:3-12.

• Sa Jerusalem, si Pedro kag ang iban pa gindakop, ginbunal, kag ginmanduan nga mag-untat sa pagpamulong tuhoy kay Jesus. Apang, sang mabuy-an sila “naghalin sila . . . , kag sa adlaw-adlaw sa templo kag sa balaybalay nagpadayon sila nga walay untat sa pagpanudlo kag sa pagpahayag sing maayong balita nahanungod kay Cristo, si Jesus.”​—⁠Binuhatan 5:40-42.

• Sang mabalitaan ni Saulo, nga nangin si apostol Pablo sang ulihi, ang buko sang mga Judiyo sa Damasco nga patyon sia, ginsulod sia sang mga utod sa isa ka alat kag gintunton sa isa ka buho sa pader sa kagab-ihon, kag nagpalagyo sia.​—⁠Binuhatan 9:22-25.

• Mga tinuig sang ulihi, si Pablo namat-od nga mag-apelar kay Cesar, bisan pa nasapwan ni Gobernador Festo kag ni Hari Agripa nga sia “walay ginahimo nga takus sa kamatayon ukon bilangguan.”​—⁠Binuhatan 25:10-12, 24-27; 26:30-32.

[Mga retrato sa pahina 16, 17]

Bisan napilitan nga magpalagyo bangod sang mapintas nga paghingabot, malipayon nga ginpadayon sang linibo ka matutom nga mga Saksi sa Malawi ang pag-alagad sa Ginharian

[Mga retrato sa pahina 17]

Ang kalipay nga mapakabalaan ang ngalan ni Jehova nagsakdag sa sining mga matutom sa martsa padulong sa kamatayon kag sa mga kampo konsentrasyon sang mga Nazi

[Credit Line]

Death march: KZ-Gedenkstätte Dachau, courtesy of the USHMM Photo Archives

[Mga retrato sa pahina 18]

May yara madamo nga sahi sang mga pagtilaw kag mga pag-ipit