Imo Bala Ginatindakan ang mga Suntok’?

SANG panahon sang Biblia, ang pangsuntok sa baka​​—⁠isa ka malaba nga sungkod, masami nga may matalom nga metal nga tunok sa punta⁠—gingamit sa pagpalakat kag sa paggiya sa mga sapat nga ginagamit sa pagbatak ukon sa pagguyod. Kon ang sapat nagapakigbato sa pangsuntok, ano ang resulta? Sa baylo nga masulhayan, ginasakit lamang sini ang kaugalingon.

Ang ginbanhaw nga si Jesucristo naghambal tuhoy sa suntok sang nagpakita sia kay Saulo, samtang nagalakbay si Saulo sa pagpangdakop sa iban pa nga mga disipulo ni Jesus. Gikan sa tunga sang isa ka makapabulag nga kasanag, nabatian ni Saulo si Jesus nga nagasiling: “Saulo, Saulo, ngaa ginahingabot mo ako? Ang padayon nga pagtindak sa mga suntok nagapabudlay sa imo.” Paagi sa pagmaltrato sa mga Cristiano, si Saulo nagapakig-away gid sa Dios, nagalakat sa dalanon nga makahalit lamang sa iya.​​—⁠Binuhatan 26:14.

Mahimo ayhan nga di-hungod man naton nga ‘ginatindakan ang mga suntok’? Ginapaanggid sang Biblia “ang mga pulong sang maalam” sa mga pangsuntok sa baka nga nagapahulag sa aton nga maglakat sa husto nga direksion. (Manugwali 12:11) Ang inspirado nga laygay sa Pulong sang Dios makapahulag kag makatuytoy sing husto sa aton​​—⁠kon pahanugutan naton ini. (2 Timoteo 3:16) Ang pagpamatok sa mga pagpahulag sini makahalit lamang sa aton.

Ginpamatian ni Saulo ang mga pulong ni Jesus, ginbag-o ang iya dalanon, kag nangin ang hinigugma nga Cristianong si apostol Pablo. Ang pagpamati naton sa laygay sang Dios makahatag man sa aton sing dayon nga mga pagpakamaayo.​​—⁠Hulubaton 3:​1-6.

[Credit Line sang retrato sa pahina 32]

L. Chapons/Illustrirte Familien-Bibel nach der deutschen Uebersetzung Dr. Martin Luthers