Report sang mga Manugbantala sang Ginharian

“Makatilingala Gid Ini!”

GIN-UPDAN ni Dorota, isa ka bug-os tion nga ministro sang mga Saksi ni Jehova sa Poland, ang iya 14-anyos nga bata nga lalaki sa isa ka regular nga pagpakonsulta sa klinika sa eskwelahan. Samtang nagapakonsulta, namangkot ang doktor nga si Janina⁠ * kay Dorota tuhoy sa mga ulubrahon sa balay sang iya bata nga lalaki.

“Kon indi ako makadigamo, ang akon bata ang nagadigamo sang palanyapunon namon nga anom sa pamilya,” sabat ni Dorota. “Nagapaninlo man sia sang balay kag nagabulig sa mga kalay-uhon sa balay. Palabasa sia. Maukod sia magtuon.”

“Kabudlay sina patihan,” siling ni Janina. “Dose anyos na ako nga nagatrabaho diri, kag wala pa gid ako makabati sang amo sini.”

Nakakita sang oportunidad nga makapanaksi, si Dorota nagpaathag: “Madamo sang ginikanan karon ang napaslawan nga hanason sing nagakaigo ang ila mga kabataan. Amo ini kon ngaa may manubo nga respeto sa kaugalingon ang ila mga kabataan.”

“Ngaa nahibaluan mo ini tanan?” pamangkot ni Janina. “Madamo nga ginikanan ang wala sing hinalung-ong sa sini nga mga butang.”

“Ang Biblia importante nga kuluhaan sini nga mga impormasyon,” sabat ni Dorota. “Halimbawa, suno sa Deuteronomio 6:​6-9, matudluan lamang naton ang aton mga kabataan kon ginatudluan anay naton ang aton mga kaugalingon. Indi bala nga ang mga prinsipio nga luyag naton itudlo sa aton mga kabataan dapat anay naton itanom sa aton mismo tagipusuon kag hunahuna?”

“Daw indi ini mapatihan,” siling ni Janina. “Daw indi gid ini mapatihan!” Pagkatapos ginpamangkot niya si Dorota kon paano nakabulig sa iya ang Biblia sa pagpadaku kag pagtudlo sa iya mga kabataan.

“Nagatuon kami sing Biblia upod sa amon mga kabataan kada semana,” paathag ni Dorota. “Ginagamit namon ang libro nga may tig-ulo nga Questions Young People Ask​​—⁠Answers That Work.”⁠ * Kag nagpaathag dayon sia tuhoy sa libro kag ginsambit ang pila ka mga topiko sini.

“Makatilingala gid ini!” siling ni Janina. “Mahimo ko bala makita ini nga libro?”

Isa ka oras sang ulihi, nagbalik si Dorota dala ang libro.

“Ano ang imo relihion?” pamangkot ni Janina, samtang ginausisa niya ang libro.

“Isa ako sa mga Saksi ni Jehova.”

“Paano nagapakig-angot ang mga Saksi ni Jehova sa mga indi nila pareho sing relihion?”

“Subong sang pagpakig-angot ko sa imo​​—⁠may pagtahod,” sabat ni Dorota, nga nagdugang: “Siempre, luyag namon nga mahibaluan nila ang kamatuoran sa Biblia.”

“Nagmag-an na ang akon pamatyag,” tu-ad ni Janina.

Sa tapos sang iya pagduaw, ginpalig-on ni Dorota si Janina nga basahon ang Biblia. “Hatagan sini sang kahulugan ang imo kabuhi kag buligan ka sa imo trabaho.”

“Napahulag mo gid ako nga himuon ini,” siling ni Janina.

May pagkamataktikanhon kag determinasyon nga ginpanginpuslan ni Dorota ang isa ka regular nga pagpakonsulta sa doktor agod mahatag ang isa ka maayo nga panaksi.​​—⁠1 Pedro 3:⁠15.

[Mga nota]