Mga Pamangkot Gikan sa mga Bumalasa

Ano ang bawtismo tungod sa mga patay?

Sang nagsulat tuhoy sa langitnon nga pagkabanhaw, ginsulat ni apostol Pablo ang labing makawiwili nga mga dinalan. Sa King James Version, aton mabasa: “Ano pa abi ang ila himuon nga ginbawtismuhan tungod sa mga patay, kon ang mga patay indi na banhawon? ngaa nian nagpabawtismo sila tungod sa mga patay?” Kag ang The New Jerusalem Bible nagbadbad sining mga dinalan: “Ano ang himuon sang mga tawo nga nagpabawtismo tungod sa mga patay? Kon ang mga patay indi na banhawon, ano ang punto nga mabawtismuhan tungod sa ila?”​​—⁠1 Corinto 15:29.

Ginpahangop bala diri ni Pablo nga ang buhi nga mga tawo bawtismuhan tungod sa mga napatay nga wala nabawtismuhan? Daw amo ang ginapahangop sa sini kag sa iban pa nga mga badbad sang Biblia. Apang, ang maid-id pa nga pag-usisa sa Kasulatan kag sa orihinal nga Griego nga gingamit ni Pablo nagapakita sing tuhay nga paghangop. Ang buot silingon ni Pablo amo nga ang hinaplas nga mga Cristiano ginabawtismuhan, ukon ginatugmawan, sa isa ka dalanon sang kabuhi nga magadul-ong sa kamatayon nga may integridad kaangay sa iya ni Cristo. Pagkatapos sini, banhawon sila sa espiritu nga kabuhi kaangay niya.

Ginasakdag sang Biblia ini nga paathag. Sa iya sulat sa mga taga-Roma, si Pablo nagsiling: “Wala bala kamo makahibalo nga tanan kita nga ginbawtismuhan kay Jesucristo ginbawtismuhan sa iya kamatayon?” (Roma 6:3) Sa iya sulat sa mga taga-Filipos, si Pablo nagpatuhoy sa iya kaugalingon, nga nagasiling: “Nagaambit sa mga pag-antos [ni Cristo], nagpasakop sang akon kaugalingon sa kamatayon kaangay niya, agod makita kon sa bisan ano man nga paagi maagom ko ang mas nauna nga pagkabanhaw gikan sa mga minatay.” (Filipos 3:​10, 11) Ginpaathag ni Pablo nga ang kabuhi sang isa ka hinaplas nga sumulunod ni Cristo nagalakip sang isa ka dalanon nga nagahupot sing integridad sa idalom sang pagtilaw, sang isa ka dalanon nga nagaatubang sing kamatayon adlaw-adlaw, kag sa ulihi sang kamatayon nga nagahupot sing integridad, nga sundan sang langitnon nga pagkabanhaw.

Talalupangdon nga ini kag ang iban pa nga mga kasulatan nga direkta nga nagasambit sang kamatayon may kaangtanan sa mga nabawtismuhan nagapatuhoy sa buhi nga mga indibiduwal nga ginbawtismuhan na kag indi sa mga patay. Ginsilingan man ni Pablo ang iya masigkahinaplas nga mga Cristiano: “Nalubong kamo kaupod niya sa iya bawtismo, kag paagi sa kaangtanan sa iya ginbanhaw man kamo sing tingob paagi sa inyo pagtuo sa pagpanghikot sang Dios, nga nagbanhaw sa iya gikan sa mga patay.”​​—⁠Colosas 2:⁠12.

Ang Griegong preposition nga hy·perʹ, nga ginbadbad nga “tungod sa” sa nanuhaytuhay nga bersion sang Biblia sa 1 Corinto 15:​29, nagakahulugan man nga “sa tuyo nga.” Busa nahisanto sa iban pa nga mga teksto sa Biblia, ang New World Translation of the Holy Scriptures nagabadbad sing husto sini nga bersikulo: “Ano ang himuon nila nga mga ginabawtismuhan sa tuyo nga mangin mga patay? Kon ang mga patay indi pagbanhawon, ngaa bala ginabawtismuhan man sila sa tuyo nga mangin amo sina?”