Pagpatunga sang Dios—Ano ang Malauman Naton?

SANG ikawalo nga siglo B.⁠C.⁠E., natukiban sang 39-anyos nga si Hari Ezequias sang Juda nga may malubha sia nga balatian. Nagkalisod gid sia sa balita gani si Ezequias nakitluoy sa Dios paagi sa pangamuyo nga ayuhon sia. Nagsabat ang Dios paagi sa iya propeta: “Nabatian ko ang imo pangamuyo. Nakita ko ang imo mga luha. Yari karon, dugangan ko ang imo mga adlaw sing napulog-lima ka tuig.”​​—⁠Isaias 38:​1-5.

Ngaa nagpatunga ang Dios sa sini nga kahigayunan? Madamo nga siglo antes sini, nangako ang Dios sa matarong nga si Hari David: “Ang imo panimalay kag ang imo ginharian pat-od nga mangin malig-on tubtob sa tion nga walay latid sa atubang mo; ang imo mismo trono matukod  nga malig-on tubtob sa tion nga walay latid.” Ginsiling man sang Dios nga ang Mesias mabun-ag gikan sa linya ni David. (2 Samuel 7:​16; Salmo 89:​20, 26-​29; Isaias 11:1) Sang nagmasakit si Ezequias, wala pa sia sing anak nga lalaki. Gani, may katalagman nga madula ang harianon nga linya ni David. Ang pagpatunga sang Dios sa kaso ni Ezequias may espesipiko nga katuyuan sa pagpreserbar sang linahe nga nagapadulong sa Mesias.

Agod matuman ang iya mga pangako, nagpatunga si Jehova agod amligan ang iya mga katawhan sa madamo nga kahigayunan sa bug-os nga panag-on antes sang mga Cristiano. Si Moises nagsiling tuhoy sa paghilway sa Israel gikan sa pagkaulipon sa Egipto: “Bangod nga ginahigugma kamo ni Jehova, kag bangod nga ginatuman niya ang panumpa nga ginsumpa niya sa inyo mga katigulangan, amo nga ginpagua kamo ni Jehova paagi sa isa ka makusog nga kamot.”​​—⁠Deuteronomio 7:8.

Sang nahauna nga siglo, nagpatunga man ang Dios agod mapauswag pa ang iya mga katuyuan. Halimbawa, sa dalan pakadto sa Damasco, ginpakitaan ang Judiyo nga si Saulo sang isa ka milagruso nga palanan-awon agod pauntaton sia sa paghingabot sa mga disipulo ni Cristo. Ang pagkumbertir sa sini nga tawo, nga nangin si apostol Pablo, may importante nga papel sa pagpalapnag sang maayong balita sa mga pungsod.​​—⁠Binuhatan 9:​1-​16; Roma 11:13.

Kinaandan Bala ang Pagpatunga?

Kinaandan bala nga nagapatunga ang Dios ukon sa pinasahi lamang nga mga kahigayunan? Maathag nga ginapakita sang Kasulatan nga indi gid ini kinaandan. Bisan pa ginluwas sang Dios ang tatlo ka Hebreong mga pamatan-on gikan sa kamatayon sa kalayuhon nga hurno kag si propeta Daniel gikan sa lungib sang mga leon, wala niya pagluwasa ang iban pa nga mga propeta gikan sa kamatayon.  (2 Cronica 24:​20, 21; Daniel 3:​21-​27; 6:⁠16-⁠22; Hebreo 11:37) Milagruso nga ginluwas si Pedro gikan sa pagkabilanggo sa iya ni Herodes Agripa I. Apang, ginpapatay sini man nga hari si apostol Santiago, kag wala ang Dios nagpatunga agod punggan ining krimen. (Binuhatan 12:​1-​11) Bisan ginhatagan sang Dios ang mga apostoles sang gahom agod ayuhon ang mga masakiton kag banhawon ang mga patay, wala sia nagpahanugot nga kuhaon ang “ungon sa unod” nga nagatublag kay apostol Pablo, nga ayhan isa ka balatian sa pisikal.​​—⁠2 Corinto 12:​7-9; Binuhatan 9:​32-​41; 1 Corinto 12:28.

Wala nagpatunga ang Dios agod punggan ang mapintas nga pagsalakay sang Romano nga Emperador nga si Nero sa paghingabot sa mga disipulo ni Cristo. Ginpaantos ang mga Cristiano, ginsunog nga buhi, kag ginhaboy sa mabangis nga mga sapat. Apang wala matingala ang mga Cristiano sang una sa sini nga pagpamatok, kag wala gid ini makapaluya sang ila pagtuo sa pagluntad sang Dios. Kay kon aton hunahunaon, ginpaandaman ni Jesus ang iya mga disipulo nga dal-on sila sa atubangan sang mga korte kag dapat sila mangin handa nga mag-antos kag bisan pa gani mapatay para sa ila pagtuo.​​—⁠Mateo 10:​17-​22.

Subong sa ginhimo niya sang una, ang Dios karon makaluwas gid sa iya mga alagad gikan sa mga katalagman, kag indi dapat mulayon yadtong nagabatyag nga ginproteksionan sila sang Dios. Apang, mabudlay gid pat-uron kon bala nagpatunga ukon wala ang Dios sa sini nga mga kaso. Madamo sang matutom nga mga alagad ni Jehova ang nasamaran sang paglupok sa Toulouse, kag linibo ka matutom nga mga Cristiano ang napatay sa Nazi kag Komunista nga mga kampo ukon sa iban pa nga mga trahedya nga wala sing pagpatunga sang Dios agod mapunggan ini. Ngaa wala pirme nagapatunga ang Dios agod amligan ang iya mga ginkahamut-an?​​—⁠Daniel 3:​17, 18.

“Ang Tion kag Wala Ginapaabot nga Hitabo”

Kon mag-abot ang kalamidad, mahimo maapektuhan ang bisan sin-o, bisan pa matutom sila sa Dios. Sang paglupok sa Toulouse, diin nakalampuwas si Alain kag si Liliane, 30 ka tawo ang napatay kag ginatos ang nasamaran, indi bangod nakahimo sila sing malain. Sa mas masangkad pa, linibo ka tawo ang nabiktima sang krimen, huroshuros nga pagmaneho sing salakyan, ukon mga inaway, kag ang Dios indi mahimo nga basulon sa ila masubo nga nadangatan. Ginapahanumdom sa aton sang Biblia nga “ang tion kag wala ginapaabot nga hitabo nagakahanabo” sa tagsatagsa.​​—⁠Manugwali 9:⁠11.

Dugang pa, ang tawo nagabalatian, nagatigulang, kag nagakapatay. Bisan pa ang iban nga nagpati nga milagruso sila nga ginluwas sang Dios ukon gin-ayo sa ila balatian mapatay sa ulihi. Ang pagkadula sang balatian kag kamatayon kag ang ‘pagpahid sa tagsa ka luha’ sa mga mata sang tawo matabo pa sa palaabuton.​​—⁠Bugna 21:​1-4.

Agod matabo ini, kinahanglan ang isa ka mas masangkad kag mas bug-os sangsa talagsa lang nga pagpatunga. Ang Biblia nagasugid sang isa ka hitabo nga ginatawag “ang dakung adlaw ni Jehova.” (Sofonias 1:14) Sa sining mas masangkad nga pagpatunga, dulaon sang Dios ang tanan nga kalautan. Hatagan sang oportunidad ang mga tawo nga mabuhi sing dayon sa himpit nga mga kahimtangan, nga sa diin “ang nagligad nga mga butang indi na pagdumdumon, ni mag-utwas pa ini sa tagipusuon.” (Isaias 65:⁠17) Bisan ang mga patay buhion, gani baliskaron ang epekto sang pinakadaku nga trahedya sa tawo. (Juan 5:​28, 29) Sa sina nga tion nasolbar na sing bug-os sang Dios, nga may walay latid nga gugma kag kaayo, ang mga problema sang tawo.

Kon Paano Nagapatunga ang Dios Karon

Apang, wala ini nagakahulugan nga ang Dios wala sing balatyagon nga nagatulok lamang samtang nagaantos ang iya mga tinuga karon. Ginatanyag karon sang Dios sa tanan nga tawo, bisan ano man ang ila rasa kag sosyal nga kahimtangan, ang oportunidad nga makilala sia kag mapalambo ang isa ka personal nga kaangtanan  sa iya. (1 Timoteo 2:​3, 4) Ginlaragway ni Jesus ini nga proseso sa sini nga mga pinamulong: “Wala sing tawo nga makakari sa akon luwas kon buyukon sia sang Amay, nga nagpadala sa akon.” (Juan 6:44) Ginabuyok sang Dios palapit sa iya ang bunayag sing tagipusuon nga mga tawo paagi sa mensahe sang Ginharian nga ginapahayag sang iya mga alagad sa bug-os nga kalibutan.

Dugang pa, direkta nga ginaimpluwensiahan sang Dios ang kabuhi sang mga handa magpaubay sa iya. Paagi sa iya balaan nga espiritu, ‘ginabuksan sang Dios ang ila tagipusuon’ agod mahangpan ang iya kabubut-on kag himuon ang iya mga ginapatuman. (Binuhatan 16:14) Huo, paagi sa paghatag sing oportunidad nga makilala sia, ang iya Pulong, kag ang iya mga katuyuan, nagahatag sing pamatuod ang Dios sang iya mahigugmaon nga interes sa aton tanan.​​—⁠Juan 17:⁠3.

Sa hingapusan, ginabuligan sang Dios ang iya mga alagad karon, indi paagi sa milagruso nga pagluwas sa ila, kundi paagi sa paghatag sa ila sang iya balaan nga espiritu kag sang “gahom nga labaw sa kinaandan” agod malandas nila ang ano man nga sitwasyon nga mahimo mag-abot sa ila. (2 Corinto 4:⁠7) Si apostol Pablo nagsulat: “Sa tanan nga butang may kusog ako bangod sa iya [Jehova nga Dios] nga nagahatag sing gahom sa akon.”​​—⁠Filipos 4:⁠13.

Nian may rason gid kita nga magpasalamat sa Dios kada adlaw tungod sa aton kabuhi kag tungod sa ginhatag niya nga paglaum nga mabuhi sing dayon sa kalibutan nga wala na sing pag-antos. “Ano bala ang ibalos ko kay Jehova tungod sa tanan niya nga kaayo sa akon?” ang salmista namangkot. “Kuhaon ko ang kopa sang dakung kaluwasan, kag sa ngalan ni Jehova ako magapanawag.” (Salmo 116:​12, 13) Paagi sa regular nga pagbasa sini nga magasin, mahangpan mo kon ano ang ginhimo sang Dios sang una, kon ano ang iya ginahimo karon, kag kon ano ang iya himuon sa palaabuton nga makahatag sa imo sing kalipay karon kag mabakod nga paglaum para sa palaabuton.​​—⁠1 Timoteo 4:8.

[Blurb sa pahina 6]

“Ang nagligad nga mga butang indi na pagdumdumon, ni mag-utwas pa ini sa tagipusuon.”​​—⁠Isaias 65:17

[Retrato sa pahina 5]

Sa panahon sang Biblia, wala ginpunggan ni Jehova ang pagbato kay Zacarias . . .

ukon ang pagmasaker ni Herodes sa mga inosente

[Retrato sa pahina 7]

Malapit na ang tion nga dulaon ang pag-antos; bisan ang mga patay banhawon