Mga Pamatan-on, Maglakat sing Takus kay Jehova

KINAHANGLAN temporaryo nga magbiya sa ila pamilya kag sa ila namat-an nga kongregasyon ang pila ka Cristianong pamatan-on. Ang iban naghimo sini agod mapasangkad ang ila ministeryo. Ang iban naman obligado nga magbiya sa ila mga puluy-an bangod sang ila neutral nga tindog sa mga hilikuton sining kalibutan. (Isaias 2:⁠4; Juan 17:16) Sa pila ka kadutaan, ginpamatbatan ni “Cesar” ang nagahupot sing integridad nga mga pamatan-on nga mabilanggo ukon magpangabudlay para sa komunidad.⁠ *​​—⁠Marcos 12:17; Tito 3:​1, 2.

Samtang nabilanggo bangod sang ila neutralidad, mahimo mahunong sing madugay ining mga pamatan-on upod sa mga delingkwente. Napilitan man magtrabaho ang mga pamatan-on sa isa ka palibot nga imoral kay napahilayo sila sa ila puluy-an bangod sa iban pa nga mga rason. Paano atubangon sing madinalag-on sining Cristianong mga pamatan-on ukon sang iban pa nga napilitan magtrabaho sa sini nga sitwasyon ang mga pag-ipit kag mga buluhaton nga ginapilit sa ila samtang ginatinguhaan nila nga ‘padayon nga maglakat sing takus sa Dios?’ (1 Tesalonica 2:12) Paano sila mahanda sang ila mga ginikanan sa pag-atubang sa bisan ano man posible nga di-maayo nga mga kahimtangan?​​—⁠Hulubaton 22:⁠3.

Pinasahi nga mga Problema

“Nabudlayan kag ginakulbaan ako bangod malayo ako sa mapinalanggaon nga proteksion sang akon mga ginikanan subong man sa mahigugmaon nga pag-atipan sang mga gulang nga nakakilala gid sa akon,” siling sang 21-anyos nga si Tákis, nga napilitan maghinguyang sing 37 ka bulan sa lugar nga malayo sa ila puluy-an.⁠ * Sia nagsiling pa: “Kon kaisa, nabatyagan ko nga ka-inosente gid sa akon.” Ang 20 anyos nga si Pétros kinahanglan magpalayo sa ila puluy-an sing kapin sa duha ka tuig. Sia nagbaton: “Sa pinakauna nga tion sa akon kabuhi, kinahanglan ko magdesisyon tuhoy sa kalingawan kag mga kaupod, kag indi pirme maalamon ang akon mga desisyon.” Sia nagkomento dayon: “Kon kaisa daw ginakulbaan ako bangod sa mas daku nga responsibilidad nga dala sang dugang nga kahilwayan.” Si Tássos, nga isa ka Cristianong gulang nga regular nga nagapakig-angot sa Cristianong mga pamatan-on sa sini nga mga kahimtangan, nagsiling: “Mahimo maimpluwensiahan sang malaw-ay nga panghambal, pagkarebelyuso, kag kasingki sang di-tumuluo nga mga kaupod ang indi mabinantayon kag maluya nga mga pamatan-on.”

Samtang nagakabuhi kag nagatrabaho upod sa mga tawo nga wala sing respeto sa mga prinsipio sang Biblia, dapat bantayan sining Cristianong mga pamatan-on nga indi sila matentar nga sundon ang imoral kag di-Makasulatanhon nga mga pagginawi sang ila mga kaupod. (Salmo 1:⁠1; 26:⁠4; 119:⁠9) Ayhan daw mabudlay huptan ang isa ka maayo nga rutina sang personal nga pagtuon, pagtambong sa mga miting, kag pag-alagad sa latagon. (Filipos 3:16) Indi pirme mahapos magpahamtang kag maglab-ot sang espirituwal nga mga tulumuron.

Pat-od nga luyag sang matutom nga Cristianong mga pamatan-on nga mapahamut-an si Jehova paagi sa ila mga paggawi kag paghambal. Matutom nila nga ginatinguhaan nga tumanon ang nagapakitluoy nga pangabay sang ila langitnon nga Amay: “Magmaalam ka, anak ko, kag pahalipaya ang akon tagipusuon, agod nga masabat ko sia nga nagayaguta sa akon.” (Hulubaton 27:11) Nahangpan  nila nga maimpluwensiahan sang ila paggawi kag ugali ang pagtamod sang iban kay Jehova kag sa iya katawhan.​​—⁠1 Pedro 2:⁠12.

Makadalayaw nga ang kalabanan sining mga pamatan-on nagatinguha gid nga mangin kaangay sang ila unang-siglo nga mga utod nga tuhoy sa ila nangamuyo si apostol Pablo: “Maglakat sing takus kay Jehova sa tuyo nga pahamut-an sia sing bug-os samtang padayon kamo nga nagapamunga sa tagsa ka maayong buhat . . . agod makabatas sing bug-os kag makaantos nga may kalipay.” (Colosas 1:​9-11) Nagahatag ang Biblia sing pila ka halimbawa sang mahinadlukon-sa-Dios nga mga pamatan-on nga madinalag-on nga naglakat sing takus sa Dios sa tunga sang di-naandan, di-mainabyanon kag idolatroso nga palibot.​​—⁠Filipos 2:⁠15.

“Si Jehova Kaupod ni Jose”

Sang lamharon pa si Jose, nga pinalangga nga anak ni Jacob kag ni Raquel, napahilayo sia gikan sa proteksion sang iya amay nga mahinadlukon sa Dios. Ginbaligya sia sa kahiulipnan sa Egipto. Si Jose naghatag sing dalayawon nga halimbawa subong isa ka mapisan, masaligan, kag may prinsipio nga pamatan-on. Bisan nagapangalagad sia kay Potifar​​—⁠isa ka tawo nga indi sumilimba ni Jehova​—⁠maukod kag mapisan si Jose, amo kon ngaa sang ulihi gintugyanan sia sang iya agalon sa pagdumala sang iya bug-os nga panimalay. (Genesis 39:​2-6) Ginhuptan ni Jose ang iya integridad kay Jehova, kag sang nabilanggo sia bangod sini, wala sia naghinakop: “Ano pa ang pulos?” Bisan sa bilangguan ginpakita niya ang maayo nga mga kinaiya, kag sa wala madugay gintugyanan sia nga atipanon ang madamo nga detalye sang pagpalakat sa prisuhan. (Genesis 39:​17-​22) Ginpakamaayo sia ni Jehova, kag subong sang ginsiling sa Genesis 39:​23, “si Jehova kaupod ni Jose.”

Mahapos lang kuntani para kay Jose, nga napahilayo sa iya mahinadlukon-sa-Dios nga pamilya, nga kopyahon ang mga paggawi sang mga pagano sa iya palibot, nga sundon ang imoral nga paagi sang pagkabuhi sa Egipto! Sa baylo, ginhuptan niya ang diosnon nga mga prinsipio kag ang iya matinlo nga tindog walay sapayan sang pinakamabaskog nga tentasyon. Sang ang asawa ni Potifar liwatliwat nga nagtentar sa iya nga makighulid, ang iya determinado nga sabat amo: “Paano ako makahimo sining daku nga kalainan kag magpakasala batok sa Dios?”​​—⁠Genesis 39:​7-9.

Sa karon, kinahanglan tumanon sang Saksi nga mga pamatan-on ang pasad-sa-Biblia nga mga paandam batok sa indi maayo nga mga kaupod, imoral nga mga kalingawan, pornograpiya, kag malaw-ay nga musika. Narealisar nila nga “ang mga mata ni Jehova yara sa tagsa ka duog, nga nagabantay sang mga malaut kag mga maayo.”​​—⁠Hulubaton 15:⁠3.

Ginsikway ni Moises ang “Pagpangalipay sa Sala”

Nagdaku si Moises sa idolatroso kag mahuyugon-sa-kasadyahan nga palibot sa palasyo ni Paraon. Ang Biblia nagsiling tuhoy sa iya: “Bangod sa pagtuo si Moises . . . nagdumili nga tawgon nga anak sang anak nga babayi ni Paraon, nga nagpasulabi  pa nga pintasan upod sa katawhan sang Dios sangsa maagom ang umalagi nga pagpangalipay sa sala.”​​—⁠Hebreo 11:​24, 25.

Ang pagpakig-abyan sa kalibutan mahimo makahatag sing pila ka bentaha, apang umalagi lamang ini. Magalawig lamang ini tubtob matapos ang limitado nga tion nga nabilin sa sining kalibutan. (1 Juan 2:​15-​17) Indi bala mas maayo nga sundon ang halimbawa ni Moises? Ang Biblia nagsiling nga “nagpabilin sia nga mabakod subong nga nagatan-aw sa Isa nga di-makita.” (Hebreo 11:27) Ginsentro niya pirme ang iya pamensaron sa espirituwal nga palanublion sang iya mahinadlukon-sa-Dios nga mga katigulangan. Ginhimo niya ang katuyuan ni Jehova nga iya man katuyuan sa kabuhi, kag nangin tulumuron niya ang paghimo sang kabubut-on sang Dios.​​—⁠Exodo 2:​11; Binuhatan 7:​23, 25.

Kon masapwan sang mahinadlukon-sa-Dios nga mga pamatan-on nga yara sila sa di-diosnon kag di-maayo nga palibot, mapalig-on nila ang ila personal nga kaangtanan kay Jehova paagi sa personal nga pagtuon, nga ginapangilala sing maayo ang “Isa nga di-makita.” Mabuligan ining mga pamatan-on nga magsentro sang ila pamensaron sa espirituwal nga mga butang paagi sa isa ka kompleto nga programa sang Cristiano nga mga hilikuton, lakip na ang regular nga pagtambong sa mga miting kag pag-alagad sa latagon. (Salmo 63:⁠6; 77:⁠12) Dapat maninguha sila nga palambuon ang mabakod nga pagtuo kag paglaum kaangay sang iya ni Moises. Dapat maninguha sila nga isentro ang ila pamensaron kag mga hilikuton kay Jehova, nga nalipay nga mangin abyan niya.

Gingamit Niya ang Iya Dila Agod Dayawon ang Dios

Ang isa pa ka pamatan-on nga nangin huwaran samtang malayo sa iya puluy-an amo ang Israelinhon nga dalagita nga ginbihag sang mga Sirianhon sang panahon sang propeta sang Dios nga si Eliseo. Nangin suluguon sia sang asawa sang aruon nga pinuno sang Sirianhon nga kasuldadusan, nga si Naaman. Ining dalagita nagsiling sa iya agalon nga babayi: “Kon ang akon agalon yara lamang sa atubangan sang manalagna sa Samaria! Nian ayuhon niya ang iya aro.” Bangod sang iya pagpanaksi, nagkadto si Naaman kay Eliseo sa Israel kag naayo ang iya aro. Dugang pa, si Naaman nangin sumilimba ni Jehova.​​—⁠2 Hari 5:​1-3, 13-​19.

Ginapadaku sang halimbawa sining dalagita ang kinahanglanon nga gamiton sang mga pamatan-on ang ila mga dila sa pagpadungog sa Dios, bisan pa malayo sila sa ila mga ginikanan. Kon nangin batasan sining dalagita ang ‘paghambal sing  binuang’ ukon ‘paglahog sing malaw-ay,’ mangin komportable ayhan sia nga gamiton ang iya dila sing subong ka epektibo sa ginhimo niya sang nag-utwas ang kahigayunan? (Efeso 5:⁠4; Hulubaton 15:2) Si Níkos, nga isa ka pamatan-on nga beintehon ang edad kag ginbilanggo bangod sang iya neutral nga tindog naghinumdom: “Sang kaupod ko ang iban pa lamharon nga mga utod nga lalaki sa isa ka uma nga prisuhan, nga malayo sa poder sang mga ginikanan kag sang kongregasyon, natalupangdan ko nga nagnubo ang kalidad sang amon panghambal. Wala gid ini naghatag sing kadayawan kay Jehova.” Maayo lang kay nabuligan si Níkos kag ang iban pa nga sundon ang laygay ni Pablo tuhoy sini: “Ang pagkamakihilawason kag ang tanan nga sahi sang kahigkuan ukon paghamkon dili gid paghingadlan sa tunga ninyo, subong nga nagakaigo sa mga tawo nga balaan.”​​—⁠Efeso 5:⁠3.

Si Jehova Matuod Gid sa Ila

Ang eksperiensia sang tatlo ka Hebreo nga kaupod ni Daniel sa dumaan nga Babilonia nagapamatuod nga husto ang prinsipio nga ginhambal ni Jesus nga ang matutom sa magagmay nga mga butang mangin matutom man sa dalagku nga mga butang. (Lucas 16:10) Sang nag-utwas ang problema tuhoy sa mga pagkaon nga ginadumilian sang Kasuguan ni Moises, mahimo mangatarungan sila nga mga bihag sila sa iban nga pungsod kag gani wala sila sing mahimo sa sini. Apang ginpakamaayo sila bangod ginsunod gid nila bisan ang daw magagmay lang nga mga butang! Nangin mas mapagros sila kag mas maalam sangsa iban pa nga mga bihag nga nagkaon sang manamit nga pagkaon sang hari. Ang katutom sa sining magagmay nga mga butang pat-od nga nagpabakod sa ila, amo nga sang nag-atubang sila sa mas daku pa nga pagtilaw nga magyaub sa idolatroso nga imahen, wala sila nagkompromiso.​​—⁠Daniel 1:​3-​21; 3:​1-​30.

Para sa sining tatlo ka pamatan-on nga lalaki, si Jehova matuod gid. Bisan malayo sila sa ila puluy-an kag sa sentro sang pagsimba sa Dios, determinado sila nga magpabilin nga indi nadagtaan sang kalibutan. (2 Pedro 3:14) Para sa ila, importante gid ang ila kaangtanan kay Jehova amo nga handa sila nga isakripisyo ang ila kabuhi para sa sini.

Indi Kamo Pagtalikdan ni Jehova

Kon ang mga pamatan-on mapahilayo sa ila mga ginahigugma kag mga ginasaligan, indi makatilingala kon makabatyag sila sing pagkawalay kalig-unan, pagpangduhaduha, kag kakulba. Apang, maatubang nila ang mga pagtilaw nga may bug-os nga pagsalig nga ‘indi gid sila pagtalikdan ni Jehova.’ (Salmo 94:14) Kon ining mga pamatan-on ‘magaantos tungod sa pagkamatarong,’ buligan  sila ni Jehova agod padayon sila nga maglakat sa “banas sang pagkamatarong.”​​—⁠1 Pedro 3:⁠14; Hulubaton 8:⁠20.

Si Jehova mapinadayunon nga nagpabakod kag bugana nga nagpadya kay Jose, kay Moises, sa nabihag nga Israelinhon nga dalagita, kag sa tatlo ka matutom nga Hebreo nga mga pamatan-on. Sa karon, ginagamit niya ang iya balaan nga espiritu, ang iya Pulong, kag ang iya organisasyon agod palig-unon ang mga ‘nagapakig-away sang maayong pagpakig-away sang pagtuo,’ nga nagapahamtang sa atubangan nila sing padya nga “kabuhi nga walay katapusan.” (1 Timoteo 6:​11, 12) Huo, posible nga maglakat sing takus kay Jehova, kag amo ini ang maalamon nga himuon.​​—⁠Hulubaton 23:​15, 19.

[Mga nota]

[Kahon sa pahina 25]

MGA GINIKANAN​​—⁠IHANDA ANG INYO MGA KABATAAN!

“Subong sang mga baslay sa kamot sang isa ka gamhanan nga lalaki, amo man ang mga anak sang pagkapamatan-on.” (Salmo 127:⁠4) Ang baslay indi makaigo sa target sini nga natabuan lamang. Kinahanglan masipat nga ipuntirya ini. Subong man, indi mangin handa ang mga kabataan sa pag-atubang sa mga realidad sang pagkabuhi nga malayo sa ila namat-an nga mga puluy-an kon wala sing nagakaigo nga panuytoy sang mga ginikanan.​​—⁠Hulubaton 22:⁠6.

May huyog ang mga pamatan-on nga magpanghikot sing padasudaso ukon magpadaug sa “mga kailigbon nga pinamatan-on.” (2 Timoteo 2:22) Ang Biblia nagapaandam: “Ang bilugon kag ang pagtadlong nagahatag sing kaalam; apang ang bata nga ginapabayaan nagahatag sing kahuy-anan sa iya iloy.” (Hulubaton 29:⁠15) Ang indi paglimite sa paggawi sang mga pamatan-on magahimo sa bata nga indi handa sa mga butang nga pilit nga ginapahimo sa ila kag sa mga pag-ipit sang pagpangabuhi nga malayo sa puluy-an.

Sa maathag kag responsable nga paagi, dapat repasuhon sang Cristianong mga ginikanan sa ila mga kabataan ang mga kabudlayan, mga pag-ipit, kag mga realidad sang kabuhi sa sining sistema sang mga butang. Mahimo nila isaysay, sa indi pesimistiko ukon negatibo nga paagi, ang indi maayo nga mga kahimtangan nga posible nga atubangon sang isa ka pamatan-on kon kinahanglan sia mag-istar nga malayo gikan sa iya mga ginikanan. Ini nga paghanas, lakip ang hatag-Dios nga kaalam, ‘makahatag sing kaalam sa mga walay eksperiensia, sing ihibalo kag ikasarang sa paghunahuna sa pamatan-on nga lalaki.’​​—⁠Hulubaton 1:⁠4.

Ang mga ginikanan nga nagapatudok sang diosnon kag moral nga mga prinsipio sa tagipusuon sang ila mga bata nagabulig sa ila nga malandas ang mga problema sa kabuhi. Daku gid ang mahimo sa kadalag-an ukon kapaslawan sang isa ka pamatan-on sang regular nga pagtuon sang pamilya sa Biblia, bukas nga komunikasyon, kag tunay nga interes sa kaayuhan sang ila kabataan. Dapat mag-aman sing diosnon nga paghanas ang mga ginikanan sa balanse apang positibo kag rasonable nga paagi, sa amo ginahanda ang ila mga kabataan nga magkinaugalingon sa ulihi. Paagi sa personal nga halimbawa, matudluan sang mga ginikanan ang ila mga kabataan nga posible nga mangin yara sa kalibutan apang indi mangin bahin sini.​​—⁠Juan 17:​15, 16.

[Retrato sa pahina 23]

Kinahanglan biyaan sang pila ka Cristianong mga pamatan-on ang ila puluy-an

[Mga retrato sa pahina 24]

Paagi sa pagpakigbato sa tentasyon, mailog sang mga pamatan-on si Jose kag makapabilin nga matinlo sa moral

[Mga retrato sa pahina 26]

Sunda ang halimbawa sang suluguon nga Israelinhon nga dalagita nga naggamit sang iya dila agod mahimaya si Jehova