Ang Pagsalig Importante Gid sa Isa ka Malipayon nga Kabuhi

ANG pagkahilo sa pagkaon makaulugot gid. Ang tawo nga masami nga nagaeksperiensia sini dapat maghalong gid sa iya batasan sa pagkaon. Apang ang pag-untat sa pagkaon agod likawan ang risgo sang hilo sa pagkaon indi realistiko. Ang paghimo sini mahimo tunaan sang dugang pa nga mga problema sa baylo nga malubad ini. Kon wala sing pagkaon wala sing isa nga mabuhi sing malawig.

Sa kaanggid nga paagi, ang pagguba sa pagsalig sang isa masakit gid. Ang sulitsulit nga pagguba sa pagsalig mahimo magpahunahuna sa aton nga pilion naton sing maayo ang aton mga kaupdanan. Apang, ang bug-os nga paglikaw sa mga tawo agod malikawan ang katalagman nga paslawon indi solusyon. Ngaa? Bangod ang indi pagsalig sa iban nagakuha sang aton kalipay. Agod mangin malipayon ang kabuhi, kinahanglan naton ang mga kaangtanan nga napasad sa pagsalig sa isa kag isa.

“Ang pagsalig isa sa mga kinahanglanon para sa mahim-ong nga pagpakig-angot sa iban adlaw-adlaw,” siling sang libro nga Jugend 2002. “Ang tagsatagsa nagahandum sing pagsalig,” report sang pamantalaan nga Neue Zürcher Zeitung. “Ginapauswag sang pagsalig ang kalidad sang kabuhi” tubtob sa kasangkaron nga “importante gid ini agod mabuhi.” Sa pagkamatuod, ang pamantalaan nagsiling pa nga, kon wala sing pagsalig, “ang isa ka tawo indi makasarang sa paglandas sang kabuhi.”

Bangod may sadsaran kita nga kinahanglanon nga magsalig sa iban, sin-o ang aton masaligan nga wala sing katalagman nga mapaslawan?

Magsalig kay Jehova sa Bug-os Mo nga Tagipusuon

“Magsalig kay Jehova sa bug-os mo nga tagipusuon,” siling sang Biblia sa aton. (Hulubaton 3:5) Sa pagkamatuod, sulitsulit nga ginapalig-on kita sang Pulong sang Dios nga magsalig sa aton Manunuga, nga si Jehova nga Dios.

Ngaa masaligan naton ang Dios? Una, bangod balaan si Jehova nga Dios. Si manalagna Isaias nagsulat: “Balaan, balaan, balaan si Jehova.” (Isaias 6:3) Ang ideya bala tuhoy sa pagkabalaan wala nagaganyat sa imo? Ang matuod, dapat maganyat ka sa sini bangod ang pagkabalaan ni Jehova nagakahulugan nga sia putli, indi makahimo sing sayop, kag bug-os nga masaligan. Indi gid sia mangin malaut ukon mahingaliton, kag imposible para sa iya nga gub-on ang aton pagsalig.

 Dugang pa, masaligan naton ang Dios bangod sang iya ikasarang kag handum nga sakdagon ang mga nagaalagad sa iya. Halimbawa, ang iya supremo nga gahom, nagapaposible sa iya nga magpanghikot. Ang himpit niya nga katarungan kag kaalam nagatuytoy kon paano sia nagapanghikot. Kag ang iya indi matupungan nga gugma nagapahulag sa iya nga magpanghikot. “Ang Dios gugma,” sulat ni apostol Juan. (1 Juan 4:8) Ang gugma sang Dios nagaimpluwensia sang tanan niya nga ginahimo. Ang pagkabalaan ni Jehova kag ang iban pa niya nga talalupangdon nga mga kinaiya nagahimo sa iya nga isa ka huwaran nga Amay, isa nga masaligan naton sing bug-os. Wala na sing liwan pa nga mas masaligan sangsa kay Jehova.

Magsalig kay Jehova kag Magkalipay

Ang isa pa ka maayo nga rason sa pagsalig kay Jehova amo nga nahangpan niya kita sing mas maayo pa sangsa paghangop sang iban sa aton. Nahibaluan niya nga ang tagsa ka tawo nagakinahanglan gid sing isa ka malig-on, mapinadayunon, kag masaligan nga kaangtanan sa iya Manunuga. Ang mga may amo sini nga kaangtanan nagabatyag nga mas malig-on. “Malipayon ang mapagros nga tawo nga nagsalig kay Jehova,” hinakop ni Hari David. (Salmo 40:4) Minilyon karon ang bug-os tagipusuon nga nagapalanog sang panghunahuna ni David.

Binagbinaga ang pila ka halimbawa. Si Doris nagpuyo anay sa Dominican Republic, sa Alemanya, sa Gresya, kag sa Estados Unidos. Sia nagsiling: “Malipayon gid ako nga nagsalig ako kay Jehova. Nakahibalo sia kon paano ako atipanon sa pisikal, espirituwal, kag emosyonal. Sia ang pinakasuod nga abyan nga mahimo maangkon sang isa.” Si Wolfgang, nga isa ka legal adviser, nagapaathag: “Makalilipay nga magsalig sa isa nga interesado gid sa imo kaayuhan, ang isa nga sarang​​—⁠kag sa pagkamatuod magahimo​​—⁠sang pinakamaayo para sa imo!” Si Ham nga natawo sa Asia apang nagapuyo karon sa Europa, nagkomento: “Nagasalig ako nga kontrolado ni Jehova ang tanan nga butang, kag wala sia nagasayop, gani malipayon ako nga nagasalig sa iya.”

Sa pagkamatuod, indi lamang sa aton Manunuga dapat kita magsalig kundi subong man sa mga tawo. Busa, si Jehova subong maalam kag eksperiensiado nga abyan, nagalaygay sa aton kon ano nga sahi sang mga indibiduwal ang dapat naton saligan. Paagi sa maukod nga pagbasa sing Biblia, mahibaluan naton ang iya laygay tuhoy sa sini.

Mga Tawo nga Aton Masaligan

“Dili kamo magsalig sa mga dungganon, ukon sa anak sang dutan-on nga tawo, nga sa iya wala sing kaluwasan,” sulat sang salmista. (Salmo 146:3) Ining inspirado nga mga pulong nagabulig sa aton nga kilalahon nga madamo nga tawo ang indi naton masaligan. Bisan pa yadtong ginahangad nga “mga dungganon” sa sining kalibutan, subong sang mga eksperto sa pinasahi nga mga patag sang ihibalo ukon hilikuton, indi awtomatiko nga masaligan naton. Ang ila panuytoy masami nga nagasayop, kag ang pagsalig sa sining “mga dungganon” mahimo madasig nga mangin kalugaw-an.

Sa pagkamatuod, wala ini nagakahulugan nga indi na kita dapat magsalig kay bisan sin-o. Apang, maathag nga dapat kita mangin mapilion sa aton saligan. Ano nga talaksan ang aton gamiton? Ang  isa ka halimbawa gikan sa dumaan nga pungsod sang Israel mahimo makabulig sa aton. Sang nangin kinahanglanon nga magtangdo sing mga indibiduwal nga mag-uyat sing mabug-at nga responsabilidad sa Israel, ginsugo si Moises nga “magpili sa tunga sang katawhan sing mga tawo nga sangkol, nagakahadlok sa Dios, mga tawo nga masaligan, nagadumot sa di-bunayag nga daug.” (Exodo 18:21) Ano ang matun-an naton gikan sa sini?

Mga tawo yadto nga nagpakita sang pila ka diosnon nga mga kinaiya antes sila gintangdo sa ginasaligan nga mga posisyon. Nagpakita na sila sing pamatuod nga nagakahadlok sila sa Dios; nagatahod gid sila sa ila Manunuga kag nahadlok nga indi sia mapahamut-an. Nakita sang tanan nga ginhimo sining mga lalaki ang ila bug-os nga masarangan agod matuman ang mga talaksan sang Dios. Gindumtan nila ang di-bunayag nga daug, nga nagpakita sing kalig-on sa moral nga magapugong sa ila nga abusuhan ang ila awtoridad. Indi nila paghingalitan ang pagsalig agod pauswagon ang ila personal nga mga interes ukon sang ila mga himata ukon mga abyan.

Indi bala nga maalamon gid para sa aton nga gamiton ang amo man nga talaksan kon nagapili sang aton saligan? May mga kilala bala kita nga ang ila pamatasan nagapakita nga nagakahadlok sila sa Dios? Determinado bala sila nga huptan ang iya mga talaksan sa paggawi? May integridad bala sila nga indi paghimuon ang mga butang nga indi nagakaigo? Bunayag bala sila nga indi pagmaniobrahon ang mga kahimtangan para sa ila kaugalingon nga bentaha ukon agod makuha kon ano ang ila luyag? Sigurado gid nga ang mga lalaki kag mga babayi nga nagapakita sini nga mga kinaiya takus gid sang aton pagsalig.

Indi Maluyahan sing Buot sa Panalagsa nga Kapaslawan

Sa pagpili kon sin-o ang aton saligan, dapat kita mangin mapailubon, bangod ang pagsalig mapalambo sa sulod sang madugay nga tion. Maalamon nga saligan naton ang isa sing amat-amat. Paano? Bueno, mahimo nakita naton ang paggawi sang isa ka tawo sa sulod sang madugay nga tion, nakita kon paano siya nagapanghikot sa pila ka kahimtangan. Masaligan bala sia sa magagmay nga mga butang? Halimbawa, ginauli bala niya ang iya ginhulam subong sang iya ginpangako kag ginatuman bala niya gilayon ang iya hinambalan? Kon amo, mahimo kita magbatyag nga masaligan naton sia sa mas dalagku pa nga mga butang. Nahisuno ini sa prinsipio nga: “Ang tawo nga matutom sa diutay gid matutom man sa madamo.” (Lucas 16:10) Ang pagkamapilion kag pagkamapailubon magabulig sa aton nga malikawan ang dalagku nga mga kapaslawan.

Apang, ano naman kon may isa nga magpaslaw sa aton? Madumduman sang mga estudyante sa Biblia nga sang gab-i nga gindakop sia, ginpaslaw gid si Jesucristo sang iya mga apostoles. Ginluiban sia ni Judas Iscariote, kag nagtal-as ang iban bangod sa kahadlok. Ginpanghiwala pa sia gani ni Pedro sing tatlo ka beses. Apang nahantop ni Jesus nga si Judas lamang ang naghulag sing hungod. Ang pagpaslaw sa iya sa sining ital-ital nga tion wala magpugong kay Jesus nga ihambal liwat ang iya pagsalig sa nabilin nga 11 ka apostoles mga pila lamang ka semana sang ulihi. (Mateo 26:45-47, 56, 69-​75; 28:16-​20) Sing kaanggid, kon nagbatyag kita nga ginluiban sang isa nga aton ginasaligan, dapat naton binagbinagon kon bala ang pagluib tuga sang pagkadimasaligan ukon isa ka umalagi lamang nga kaluyahon sa unod.

Masaligan Bala Ako?

Ang isa nga namat-od nga mangin mapilion kon sin-o ang iya saligan dapat mangin bunayag kag mamangkot sa iya kaugalingon: ‘Masaligan bala ako? Anong rasonable nga mga talaksan sang pagkamasaligan ang akon dapat paabuton sa akon kaugalingon kag sa iban?’

Sa pagkamatuod, ang isa ka tawo nga masaligan pirme nagapamulong sing kamatuoran. (Efeso 4:25) Wala niya ginabagay ang iya ginahambal sa iya ginasugilanon agod maagom ang personal nga kaayuhan. Kag kon nagasaad sia, ang masaligan nga tawo nagahimo sang iya bug-os nga masarangan agod matuman ang iya ginhambal. (Mateo 5:37) Kon may isa nga magtu-ad sa iya, ginatipigan ini sang masaligan nga tawo kag wala ginapangutsokutso. Ang isa ka masaligan nga tawo matutom sa iya tiayon. Wala sia nagalantaw sing pornograpiya, wala sia nagahunahuna sang mga undanon nga pantasya, kag wala sia nagapakiat. (Mateo 5:​27, 28) Ang isa nga aton masaligan mapisan nga nagapangabudlay agod makasaplid para sa iya kaugalingon kag sa iya  pamilya kag wala nagapahapos sa pagpangita sing kuarta paagi sa pagpamentaha sa iban. (1 Timoteo 5:8) Ang pagdumdom sining makatarunganon kag Makasulatanhon nga mga talaksan makabulig sa aton nga makilala ang mga tawo nga sarang naton masaligan. Dugang pa, ang pagsunod sa pareho nga mga talaksan sa paggawi makabulig sa tagsatagsa sa aton nga mangin takus nga saligan sang iban.

Makalilipay gid ang magkabuhi sa isa ka kalibutan nga ang tanan nga tawo masaligan kag diin wala na ang mga kapaslawan paagi sa pagguba sa pagsalig! Dalamguhanon lamang bala ini? Indi para sa mga tawo nga nagapati gid sa mga saad sang Biblia, bangod ang Pulong sang Dios nagatagna tuhoy sa pag-abot sang isa ka matahom nga “bag-ong duta” nga wala na sing pagpangdaya, pagbinutig, kag paghingalit kag wala na sing kasubo, balatian, kag bisan ang kamatayon! (2 Pedro 3:​13; Salmo 37:​11, 29; Bugna 21:​3-5) Indi bala mapuslanon nga mahibaluan ang dugang pa tuhoy sa sining palaabuton? Nalipay ang mga Saksi ni Jehovah sa pagsugid sa imo sang dugang pa nga mga impormasyon tuhoy sa sini kag sa iban pa nga importante nga mga topiko.

[Retrato sa pahina 4]

Ang pagkadimasinaligon nagakuha sang aton kalipay

[Retrato sa pahina 5]

Si Jehova masaligan gid naton

[Mga retrato sa pahina 7]

Tanan kita nagakinahanglan sang mga kaangtanan nga napasad sa pagsalig sa isa kag isa