Mga Pamangkot Gikan sa mga Bumalasa

Ngaa ginpangayo ni Eliseo ang “duha ka bahin” sang espiritu ni Elias?

Antes lang gid natapos ni Elias ang iya katungdanan subong isa ka manalagna sa Israel, ang mas lamharon nga manalagna nga si Eliseo nagpangabay sa iya: “Palihug, nga duha ka bahin sang imo espiritu ang mangin yari sa akon.” (2 Hari 2:9) Sa espirituwal nga paghambal, maathag nga ginaangkon ni Eliseo ang doble nga bahin kaangay sa ginhatag sa isa ka panganay nga anak nga lalaki. (Deuteronomio 21:17) Ang malip-ot nga pagbinagbinag sa kasaysayan magapaathag sini kag magabulig sa aton nga makatuon sing mga leksion gikan sa natabo.

Suno sa panuytoy ni Jehova, ginhaplas ni manalagna Elias si Eliseo bilang iya tal-us. (1 Hari 19:19-​21) Sa sulod sang halos anom ka tuig, si Eliseo matutom nga nag-alagad kay Elias kag determinado sia nga himuon ini tubtob sa katapusan. Bisan sa katapusan nga adlaw ni Elias bilang isa ka manalagna sa Israel, si Eliseo nagpanghikot gihapon kaupod sa iya manunudlo kag manuglaygay. Bisan pa ginpilit ni Elias si Eliseo nga mag-untat sa pagsunod sa iya, ang mas lamharon nga manalagna tatlo ka beses nga nagsiling: “Indi ako magbiya sa imo.” (2 Hari 2:​2, 4, 6; 3:11) Sa pagkamatuod, gintamod ni Eliseo ang mas tigulang nga manalagna subong iya espirituwal nga amay.​​—⁠2 Hari 2:⁠12.

Apang, indi lamang si Eliseo ang espirituwal nga anak nga lalaki ni Elias. Si Elias kag si Eliseo nakig-upod sa isa ka grupo sang mga lalaki nga kilala subong “mga anak nga lalaki sang mga manalagna.” (2 Hari 2:3) Ang kasaysayan sa Ikaduhang Hari nagapakita nga ining “mga anak nga lalaki” may suod man nga kaangtanan sa ila espirituwal nga amay, si Elias. (2 Hari 2:​3, 5, 7, 15-​17) Apang, subong ang hinaplas nga tal-us, si Eliseo amo ang nagapanguna sa tunga sang espirituwal nga mga anak nga lalaki ni Elias​​—⁠daw subong nga sia ang panganay. Sa dumaan nga Israel, ang literal nga panganay nga anak nga lalaki nagbaton sing duha ka bahin sang palanublion sang iya amay, samtang ang iban nga anak nga lalaki nagbaton sing tig-isa ka bahin. Busa, ginpangayo ni Eliseo ang duha ka bahin sang espirituwal nga palanublion ni Elias.

Ngaa nagpangabay sini si Eliseo sa sadtong partikular nga tion? Bangod sugdan na niya ang isa ka mabug-at nga hilikuton​​—⁠nga amo ang pagtal-us kay Elias subong manalagna sa Israel. Narealisar ni Eliseo nga agod matuman niya ang mga responsibilidad may kaangtanan sa sining makahalawhaw nga asaynment, kinahanglan niya ang espirituwal nga kusog nga labaw pa sa iya kaugalingon nga mga ikasarang, ang kusog nga si Jehova lamang ang makaaman. Kinahanglan mangin maisog sia kaangay kay Elias. (2 Hari 1:​3, 4, 15, 16) Gani, ginpangayo niya ang duha ka bahin sang espiritu ni Elias, isa ka espiritu sang kaisog kag sang mangin ‘bug-os nga maimon para kay Jehova’​​—⁠kalahamut-an nga mga kinaiya nga ginpatubas sang espiritu sang Dios. (1 Hari 19:​10, 14) Ano ang sabat ni Elias?

Nahibal-an ni Elias nga si Eliseo nagpangayo sing butang nga wala sia sing kinamatarong sa paghatag kundi ang Dios lamang. Gani si Elias maugdang nga nagsabat: “Nagpangayo ka sing mabudlay nga butang. Kon makita mo ako nga kuhaon gikan sa imo, amo sina ang matabo sa imo.” (2 Hari 2:10) Kag, sa pagkamatuod, gintugutan ni Jehova si Eliseo nga makita si Elias nga nagpaibabaw sa isa ka buhawi. (2 Hari 2:​11, 12) Ginhatag ang pangabay ni Eliseo. Ginhatag ni Jehova ang ginkinahanglan niya nga espiritu agod masugdan niya ang iya bag-o nga hilikuton kag maatubang ang magaabot nga mga pagtilaw.

Sa karon, ini nga rekord sang Biblia makapalig-on gid sa hinaplas nga mga Cristiano (ginatawag kon kaisa nga Eliseo nga klase) kag sa mga alagad sang Dios sa kabilugan. Kon kaisa, ayhan nagabatyag kita nga nabug-atan kag di-sangkol kon ginahatagan sing bag-o nga asaynment, ukon ayhan nadulaan kita sang aton kaisog nga padayunon ang aton pagbantala-sing-Ginharian nga hilikuton samtang ginaatubang naton ang nagadugang nga di-pagsapak ukon pagpamatok sa aton teritoryo. Apang, kon makitluoy kita sing pagsakdag ni Jehova, hatagan niya kita sing kinahanglan naton nga balaan nga espiritu agod malandas ang mga hangkat kag ang nagabulubag-o nga mga kahimtangan. (Lucas 11:13; 2 Corinto 4:⁠7; Filipos 4:13) Huo, subong nga ginpabakod ni Jehova si Eliseo para sa iya mas mabug-at nga mga responsibilidad, buligan man niya kita tanan, lamharon man ukon tigulang, nga tumanon ang aton ministeryo.​​—⁠2 Timoteo 4:5.