“Gamhanan Gid ang Pulong sang Dios!”

“ANG pulong sang Dios buhi kag gamhanan.” (Hebreo 4:12) Bilang pamatuod sang indi mapamatukan nga gahom sang Pulong sang Dios, ang 2003 Calendar of Jehovah’s Witnesses nagaunod sang anom ka matuod nga mga sugilanon sang kabuhi gikan sa bug-os nga kalibutan. Sa idalom sang tig-ulo nga “Before and After,” ginpakita sang kalendaryo kon paano ang hilikuton sa pagpanudlo sang mga Saksi ni Jehova nagabulig sa mga tawo nga pauswagon ang ila moral, sikwayon ang makahalalit nga mga estilo sang pagkabuhi, pabakuron ang ila pamilya, kag palambuon ang personal nga kaangtanan sa Dios.

Pila ka sulat sang apresasyon ang nabaton tuhoy sa 2003 nga kalendaryo. Yari ang pila sining mga komento:

“Ini nga kalendaryo isa ka ebidensia sa matuod nga mga Cristiano nga may iban pa nga kaangay sa ila nga nagapakig-away sing lakas para sa pagtuo. Matan-aw nila ang mga laragway subong mga pahanumdom sang mga pagbag-o nga nahimo sang iban.”​​—⁠Steven, Estados Unidos.

“Luyag ko gid isulat ining pila ka tinaga agod ipahibalo sa inyo nga natandog gid ang akon tagipusuon sang 2003 nga kalendaryo. Wala pa gid sing kalendaryo nga may epekto sa akon kaangay sini. Ining mga sugilanon sang kabuhi nalakip sa mga butang nga ginadala ko sa akon bag kon magpanaksi ako agod ipakita sa mga tawo ang buhi kag makadalayaw nga pamatuod sang impluwensia sang Biblia sa mga indibiduwal.”​​—⁠Marc, Belgium.

“Napalig-on gid ako sang kalendaryo. Natandog gid ako sang mabasa kag makita ko kon paano ginpabag-o ni Jehova ining mga indibiduwal. Bilang resulta, determinado ako nga bag-uhon ang akon mismo kabuhi. Labi ko pa gid nga nabatyagan nga bahin ako sang aton bug-os kalibutan nga paghiliutod.”​​—⁠Mary, Estados Unidos.

“Natandog gid si Jesus sa kahimtangan sa espirituwal sang mga kadam-an. Salamat sa inyo pag-ilog sa huwaran ni Cristo paagi sa pagbalhag sing mga sugilanon sang kabuhi sa aton 2003 nga kalendaryo. Karon pa lang ako ginpahibi sang isa ka kalendaryo.”​​—⁠Cassandra, Estados Unidos.

“Sang 11 anyos ako, nagsugod ako sa pagpanigarilyo; sang ulihi nagdroga ako. Pirme ko anay ginpamensar nga utason na lang ang akon kabuhi. Sang nakilala ko si Jehova, nagbulig ini sa akon nga untatan ini nga mga bisyo. Ini nga kalendaryo importante gid sa akon. Ang mga halimbawa sang akon mga kauturan sa bug-os nga kalibutan nagapabakod sa akon. Karon nahibaluan ko nga wala ako nagaisahanon sa sini nga pagpakig-away kag nga ang labing importante nga butang amo ang gugma kay Jehova kag ang bug-os tagipusuon nga pag-alagad sa iya.”​​—⁠Margaret, Poland.

“O, gamhanan gid ang Pulong sang Dios! Sang nabaton ko ang 2003 nga kalendaryo, ginpunggan ko gid nga maghibi. Ining mga eksperiensia, upod ang mga laragway, makapalig-on gid sang pagtuo.”​​—⁠Darlene, Estados Unidos.

“Ang estilo anay sang pagkabuhi sang pila sining mga tawo halos pareho gid sa akon estilo sang pagkabuhi sadto. Ginhatagan ako ni Jehova sang kusog agod untatan ang daw indi mauntatan nga mga bisyo. Madamo gid nga salamat sa sining matuod nga mga sugilanon sang kabuhi.”​​—⁠William, Estados Unidos.