‘Gamita sing Matadlong ang Pulong sang Dios’

“Himua ang imo bug-os nga masarangan nga ipakita ang imo kaugalingon nga nahamut-an sang Dios, manugpangabudlay nga wala sing dapat ikahuya, nga nagagamit sing matadlong sang pulong sang kamatuoran.”​—⁠2 TIMOTEO 2:15.

1, 2. (a) Ngaa nagakinahanglan sing mga gamit ang mga trabahador? (b) Sa anong hilikuton nagapakigbahin ang mga Cristiano, kag paano nila ginapakita nga ginauna nila ang Ginharian?

ANG mga trabahador nagakinahanglan sing mga gamit agod mahimo nila ang ila trabaho. Apang, ang pagtigayon sing bisan ano nga gamit indi pa tuman. Ang isa ka trabahador nagakinahanglan sing husto nga gamit, kag dapat gamiton niya ini sa nagakaigo nga paagi. Halimbawa, kon nagatukod sing isa ka palasilungan, luyag mo itabid ang duha ka tapi, indi lamang martilyo kag mga lansang ang imo kinahanglan. Dapat makahibalo ka magmartilyo sing lansang sa tapi nga wala nagatiko ang lansang. Kon indi ka makahibalo maggamit sing martilyo, ang pagmartilyo sing lansang sa kahoy mangin mabudlay gid, kag makaulugot pa gani. Apang ang mga gamit nga ginagamit sing nagakaigo nagabulig sa aton nga mahimo ang trabaho nga may makalilipay nga mga resulta.

² Subong mga Cristiano, may yara kita hilikuton. Isa ini ka importante gid nga hilikuton. Ginlaygayan ni Jesucristo ang iya mga sumulunod nga ‘pangitaon anay ang ginharian.’ (Mateo 6:33) Paano naton ini mahimo? Ang isa ka paagi amo ang mangin makugi sa pagbantala sing Ginharian kag paghimo-disipulo nga hilikuton. Ang isa pa amo ang pagpasad sing malig-on sang aton ministeryo sa Pulong sang Dios. Ang maayo nga paggawi amo ang ikatlo nga paagi. (Mateo 24:14; 28:​19, 20; Binuhatan 8:​25; 1 Pedro 2:12) Agod mangin epektibo kag malipayon sa sining Cristianong buluhaton, kinahanglan naton ang nagakaigo nga mga gamit kag ihibalo kon paano ini gamiton sing nagakaigo. Si apostol Pablo nagpahamtang sing talalupangdon nga halimbawa sa sini subong isa ka Cristianong manugpangabudlay, kag ginpalig-on niya ang mga masigkatumuluo nga ilugon sia. (1 Corinto 11:⁠1; 15:10) Kon amo, ano ang matun-an naton gikan kay Pablo, nga aton masigkamanugpangabudlay?

Si Pablo​​—⁠Isa ka Makugi nga Manugbantala sang Ginharian

3. Ngaa masiling nga isa ka makugi nga manugpangabudlay sang Ginharian si apostol Pablo?

³ Ano nga sahi sang manugpangabudlay si Pablo? Makugi gid sia. Ginhugod ni Pablo ang iya kaugalingon sa pagpalapnag sing maayong balita sa malapad nga lugar sa palibot sang Mediteraneo. Nagahatag sing rason sa iya mapagsik nga pagbantala tuhoy sa Ginharian, ining daw wala ginakapoy nga apostol nagsiling: “Karon, kon ginawali ko ang maayong balita, indi ini rason agod magpabugal  ako, kay ang kinahanglanon gintugyan sa akon. Tunay, kailo ako kon indi ko pag-iwali ang maayong balita!” (1 Corinto 9:16) Interesado bala si Pablo nga luwason lamang ang iya kabuhi? Indi. Indi sia makagod nga tawo. Sa baylo, handum niya nga makabenepisyo man ang iban sa maayong balita. Sia nagsulat: “Ginahimo ko ang tanan nga butang tungod sa maayong balita, agod mangin manugpaambit ako sini sa iban.”​—⁠1 Corinto 9:23.

4. Ano nga gamit ang ginapabaloran gid sang Cristianong mga manugpangabudlay?

⁴ Si apostol Pablo isa ka maugdang nga manugpangabudlay nga nakahibalo nga indi sia makasalig sa iya lamang personal nga mga kalantip. Subong nga ang isa ka panday nagakinahanglan sing martilyo, kinahanglan ni Pablo ang nagakaigo nga gamit agod ipatudok ang kamatuoran tuhoy sa Dios sa tagipusuon sang iya mga tagpalamati. Ano nga gamit ang panguna niya nga gingamit? Ang Pulong sang Dios, ang Balaan nga Kasulatan. Sing kaanggid, ang Biblia amo ang aton panguna nga ginagamit agod buligan kita sa paghimo sing mga disipulo.

5. Agod mangin epektibo nga mga ministro, ano pa ang aton himuon magluwas sa pagkutlo sa mga kasulatan?

⁵ Nahibaluan ni Pablo nga ang paggamit sing nagakaigo sa Pulong sang Dios indi lamang pagkutlo gikan sa sini. Naggamit sia sing “pagbuyok.” (Binuhatan 28:23) Paano? Madinalag-on nga gingamit ni Pablo ang nasulat nga Pulong sang Dios sa pagkumbinsi sa madamo nga batunon ang kamatuoran sang Ginharian. Nangatarungan sia sa ila. Sa sulod sang tatlo ka bulan sa sinagoga sa Efeso, si Pablo ‘nagpamulongpulong kag naggamit sing pagbuyok nahanungod sa ginharian sang Dios.’ Samtang ang iban ‘nagpakatig-a kag wala magtuo,’ ang iban naman namati. Subong resulta sang ministeryo ni Pablo sa Efeso, “ang pulong ni Jehova padayon nga nagtubo kag naglandas.”​—⁠Binuhatan 19:​8, 9, 20.

6, 7. Paano ginhimaya ni Pablo ang iya ministeryo, kag paano man naton ini mahimo?

⁶ Subong isa ka makugi nga manugbantala sang Ginharian, ‘ginhimaya ni Pablo ang iya ministeryo.’ (Roma 11:13) Paano? Indi sia interesado sa pagtib-ong sang iya kaugalingon; wala man sia nahuya nga makilala sing dayag subong isa sang mga masigkamanugpangabudlay sang Dios. Sa baylo, gintamod niya ang iya ministeryo subong dungganon gid. Gingamit ni Pablo ang Pulong sang Dios sing malantipon kag sing epektibo. Ang iya mabungahon nga hilikuton nagpapagsik sa iban, nga nagbulig sa pagpahulag sa ila nga tumanon ang ila ministeryo sing labi pa. Sa sini man nga paagi, ginhimaya ang iya ministeryo.

⁷ Kaangay ni Pablo, mahimaya naton ang aton hilikuton subong mga ministro paagi sa masunson kag epektibo nga paggamit sa Pulong sang Dios. Sa tanan nga bahin sang aton ministeryo sa latagon, dapat tulumuron naton nga makapaambit sing pila ka butang gikan sa Kasulatan sa madamo nga tawo tubtob posible. Paano naton ini mahimo nga may pagbuyok? Binagbinaga ang tatlo ka importante nga paagi: (1) Ipatalupangod ang Pulong sang Dios sa paagi nga nagaresulta sa pagtahod sa sini. (2) Mataktikanhon nga ipaathag kag iaplikar ang ginasiling sang Biblia. (3) Mangatarungan gikan sa Kasulatan sa paagi nga makakumbinsi.

8. Anong mga gamit sa pagbantala sing Ginharian ang magamit naton karon, kag paano mo ini ginagamit?

⁸ Ang mga manugbantala sang Ginharian karon may mga gamit nga wala anay si Pablo sa iya ministeryo. Nagalakip ini sing mga libro, magasin, brosyur, handbill, tract, kag audio kag video nga mga rekord. Sang nagligad nga siglo, gingamit man ang testimony card, mga ponograpo, mga salakyan nga nagaanunsio, kag mga pagwaragwag sa radyo. Sa pagkamatuod, ang aton labing maayo nga gamit amo ang Biblia, kag kinahanglan gamiton naton sing maayo kag sing nagakaigo ining importante gid nga gamit.

Ang Aton Ministeryo Dapat Napasad sa Pulong sang Dios

9, 10. May kaangtanan sa paggamit sing Pulong sang Dios, ano ang matun-an naton gikan sa laygay ni Pablo kay Timoteo?

⁹ Paano naton magamit ang Pulong sang Dios sing epektibo? Paagi sa pagsunod sining pinamulong ni Pablo sa iya kaupod nga manugpangabudlay nga si Timoteo: “Himua ang imo bug-os nga masarangan nga ipakita ang imo kaugalingon nga nahamut-an sang Dios, manugpangabudlay nga wala sing dapat ikahuya, nga nagagamit sing matadlong sang pulong sang kamatuoran.” (2 Timoteo 2:15) Ano ang nadalahig sa ‘paggamit sing matadlong sa pulong sang kamatuoran’?

¹⁰ Ang Griegong tinaga nga ginbadbad  “nagagamit sing matadlong” literal nga nagakahulugan sing “tadlong nga pag-utod” ukon “paghimo sing banas sa tadlong nga direksion.” Sa laygay lamang ni Pablo kay Timoteo nga gingamit ini nga termino sa Cristianong Griegong Kasulatan. Ini nga tinaga magamit man sa paglaragway sa pag-arado sing tadlong nga idas sa latagon. Ang tiko nga idas makahuluya para sa isa ka eksperiensiado nga mangunguma. Agod mangin “manugpangabudlay nga wala sing dapat ikahuya,” ginpahanumdom kay Timoteo nga wala ginatugot ang paglisa gikan sa matuod nga mga panudlo sang Pulong sang Dios. Indi dapat pagtugutan ni Timoteo nga impluwensiahan sang iya personal nga mga pagtamod ang iya panudlo. Dapat ipasad gid niya sa Kasulatan ang iya pagbantala kag pagpanudlo. (2 Timoteo 4:​2-4) Sa sini nga paagi, ang bunayag-sing-tagipusuon nga mga indibiduwal matuytuyan sang pagtamod ni Jehova sa mga butang, kag indi pagbatunon ang kalibutanon nga pilosopiya. (Colosas 2:​4, 8) Amo man sa karon.

Ang Aton Paggawi Dapat Maayo

11, 12. Ano ang epekto sang aton paggawi sa paggamit naton sing matadlong sa Pulong sang Dios?

¹¹ Indi lamang naton dapat gamiton sing husto ang Pulong sang Dios paagi sa pagbantala sing mga kamatuoran sini. Ang aton paggawi dapat nahisanto sa sini. ‘Kita mga masigkamanugpangabudlay sang Dios,’ gani indi kita dapat mangin salimpapaw nga mga manugpangabudlay. (1 Corinto 3:9) Ang Pulong sang Dios nagasiling: “Apang, ikaw bala nga nagatudlo sa iban, wala nagatudlo sa imo kaugalingon? Ikaw, nga nagabantala nga ‘Dili magpangawat,’ nagapangawat ka bala? Ikaw nga nagasiling ‘Dili magpanghilahi,’ nagapanghilahi ka bala? Ikaw nga nagakangil-ad sa mga idolo, nagapangawat ka bala sa mga templo?” (Roma 2:​21, 22) Gani, subong modernong-adlaw nga mga manugpangabudlay sang Dios, ang isa ka paagi nga magamit naton sing matadlong ang Pulong sang Dios amo ang pagtuman sini nga laygay: “Magsalig kay Jehova sa bug-os mo nga tagipusuon kag indi magsandig sa imo kaugalingon nga paghangop.  Sa tanan mo nga dalanon talupangda sia, kag tadlungon niya ang imo mga banas.”​—⁠Hulubaton 3:​5, 6.

¹² Anong mga resulta ang mapaabot naton gikan sa paggamit sing matadlong sa Pulong sang Dios? Binagbinaga ang gahom sang nasulat nga Pulong sang Dios sa kabuhi sang bunayag-sing-tagipusuon nga mga tawo.

Ang Pulong sang Dios May Nagapabag-o nga Gahom

13. Ano ang epekto sang pag-aplikar sing Pulong sang Dios sa isa ka tawo?

¹³ Kon ginabaton nga may awtoridad, ang mensahe sang Pulong sang Dios may mabaskog nga impluwensia nga nagabulig sa mga tawo sa paghimo sing talalupangdon nga mga pagbag-o sa ila kabuhi. Nakita ni Pablo ang pagpanghikot sang pulong sang Dios kag nasaksihan niya ang maayo nga epekto sini sa nangin mga Cristiano sa dumaan nga Tesalonica. Gani ginsilingan niya sila: “Ginapasalamatan man namon ang Dios sing wala-untat, bangod sang mabaton ninyo ang pulong sang Dios, nga nabatian ninyo sa amon, ginbaton ninyo ini, indi subong pulong sang mga tawo, kundi, kon ano gid ini sa pagkamatuod, subong pulong sang Dios, nga nagapanghikot man sa inyo nga mga nagatuo.” (1 Tesalonica 2:13) Para sa sining mga Cristiano​—⁠sa pagkamatuod, para sa tanan nga matuod nga mga sumulunod ni Cristo⁠​—⁠ang kubos nga pangatarungan sang tawo indi mapaanggid sa supremo nga kaalam sang Dios. (Isaias 55:9) Ang mga taga-Tesalonica ‘nagbaton sang pulong sa idalom sang daku nga kapipit-an nga may kalipay sa balaan nga espiritu’ kag nangin mga halimbawa sa iban nga mga tumuluo.​—⁠1 Tesalonica 1:5-7.

14, 15. Daw ano ka gamhanan ang mensahe sang Pulong sang Dios, kag ngaa?

¹⁴ Ang Pulong sang Dios dinamiko, subong sang Tuburan sini, nga si Jehova. Nagagikan ini sa “buhi nga Dios,” sa isa nga paagi sa pulong niya “nahimo ang kalangitan,” kag ini nga pulong pirme ‘nagamadinalag-on sa butang nga tungod sini ginpadala ini.’ (Hebreo 3:​12; Salmo 33:⁠6; Isaias 55:11) Ang isa ka iskolar sa Biblia nagkomento: “Wala ginahamulag sang Dios ang iya kaugalingon sa iya Pulong. Wala niya ginapanghiwala ini subong bala nga daw wala sia sing labot sa sini. . . . Busa indi gid ini patay nga butang, kag apektado gid ini sa kon ano ang matabo sa sini sa tapos nga mahambal ini; kay isa ini ka higot sang paghiusa upod sa buhi nga Dios.”

¹⁵ Daw ano ka gamhanan ang mensahe nga nagagikan sa Pulong sang Dios? May daku gid ini nga gahom. Sing nagakaigo, si Pablo nagsulat: “Ang pulong sang Dios buhi kag gamhanan kag matalom pa sa bisan ano nga espada nga duha sing sulab kag nagalapus tubtob sa nautlan sang kalag kag espiritu, kag sang mga lutalutahan kag ila utok, kag may ikasarang sa paghantop sang mga hunahuna kag mga tinutuyo sang tagipusuon.”​—⁠Hebreo 4:12.

16. Sa ano nga kasangkaron mapabag-o sang Pulong sang Dios ang isa ka tawo?

¹⁶ Ang mensahe sa nasulat nga Pulong sang Dios “matalom pa sa bisan ano nga espada nga duha sing sulab.” Busa, may daku gid ini nga nagatudok nga gahom amo nga nagalabaw gid ini sa bisan ano nga instrumento ukon gamit sang tawo. Ang Pulong sang Dios nagalapus sa pinakanasulod nga mga bahin sang tawo kag makapabag-o sa iya sa sulod, nga nagaapektar sa kon paano sia nagahunahuna kag kon ano ang iya ginahigugma, nga nagahimo sa iya nga isa ka kalahamut-an kag diosnon nga manugpangabudlay. Daw ano ka gamhanan nga galamiton!

17. Ipaathag ang nagapabag-o nga gahom sang Pulong sang Dios.

¹⁷ Ginapadayag sang Pulong sang Dios ang nasulod gid nga pagkatawo sang isa kon ipaanggid sa kon ano ang iya ginahunahuna sa iya kaugalingon ukon sa kon ano ang ginatugot niya sa iban nga makita sa iya. (1 Samuel 16:7) Bisan ang malaut nga tawo makahinago kon kaisa sang iya nasulod nga pagkatawo paagi sa pagpakita nga mabuot ukon relihioso sia. Ang mga malauton nagapakunokuno tungod sa malaut nga mga rason. Ang matinaastaason nga mga tawo nagapakunokuno nga mapainubuson samtang nagahandum nga dayawon sang mga tawo. Apang, paagi sa pagpadayag sa kon ano gid ang yara sa tagipusuon, gamhanan nga mapahulag sang Pulong sang Dios ang mapainubuson nga indibiduwal nga ubahon ang daan nga personalidad kag “magsuklob sing bag-o nga personalidad nga gintuga suno sa kabubut-on sang Dios sa matuod nga pagkamatarong kag pagkamainunungon.” (Efeso 4:22-24) Ang mga panudlo sang Pulong sang Dios makapabag-o man sa mahuluy-on nga mga tawo nga mangin maisugon nga mga Saksi ni Jehova kag makugi nga mga manugbantala sang Ginharian.​—⁠Jeremias 1:​6-9.

18, 19. Pasad sa sining mga parapo ukon sa personal nga eksperiensia sa pag-alagad sa latagon, ipakita kon paano ang kamatuoran gikan sa Kasulatan makapabag-o sang panimuot sang isa ka tawo.

¹⁸ Ang nagapabag-o nga gahom sang Pulong sang  Dios may maayo nga epekto sa mga tawo bisan diin. Halimbawa, ang mga manugbantala sang Ginharian gikan sa Phnom Penh, Cambodia, nagbantala sa probinsia sang Kompong Cham sing duha ka beses sa isa ka bulan. Sang mabatian ang iban nga mga klerigo nga nagapakalain sa mga Saksi ni Jehova, nagplano ang isa ka lokal nga pastora nga makigkita sa mga Saksi sa masunod nila nga pagduaw sa probinsia. Ginpaulanan niya sila sing mga pamangkot tuhoy sa pagsaulog sing mga kapiestahan kag namati sia sing maayo samtang nagapangatarungan sila gikan sa Kasulatan. Nian nagsiling sia: “Nahibaluan ko na karon nga ang ginasiling sang akon mga kaupod nga mga pastor tuhoy sa inyo indi matuod! Nagsiling sila nga wala kamo nagagamit sing Biblia, apang karon nga aga amo lang gid ini ang inyo gingamit!”

¹⁹ Ginpadayon sini nga babayi ang pagbinagbinag niya sing Biblia upod sa mga Saksi kag wala mag-untat bisan pa ginpahog nga pahalinon sia sa pagkapastora. Ginsugid niya ang pagbinagbinag niya sa Kasulatan sa isa niya ka amiga, nga nagsugod man sa pagtuon sing Biblia upod sa mga Saksi. Nakunyag gid ang iya amiga sa iya natun-an amo nga sa isa sang iya mga serbisyo sa simbahan, napahulag sia sa pagsiling, “Sige, magtuon kamo sing Biblia upod sa mga Saksi ni Jehova!” Wala magdugay pagkatapos sadto, naghalin sia sa simbahan. Ang anay pastora, ang iya amiga, kag ang iban pa nagsugod sa pagtuon sing Biblia upod sa mga Saksi ni Jehova.

20. Paano ginapakita sang eksperiensia sang isa ka babayi sa Ghana ang gahom sang Pulong sang Dios?

²⁰ Ang gahom sang Pulong sang Dios ginpakita man sa halimbawa ni Paulina, isa ka babayi nga taga-Ghana. Nagtuon sia sing Biblia upod sa isa ka bug-os tion nga manugbantala sang Ginharian sa libro nga Ang Ihibalo nga Nagadul-ong sa Kabuhi nga Walay Katapusan.⁠ * Nadalahig si Paulina sa isa ka poligamya nga pag-asawahay kag nakita niya nga kinahanglan ang pagbag-o, apang masingki nga nagpamatok ang iya bana kag ang tanan niya nga mga paryente. Ang iya lolo, nga isa ka huwes sa mataas nga hukmanan kag isa ka gulang sa simbahan, nagpalas-ay sa iya paagi sa pag-aplikar sing sayop sang Mateo 19:​4-6. Daw husto ang huwes, apang gilayon nga narealisar ni Paulina nga kaanggid ini sa pagpatiko ni Satanas sa Kasulatan sang ginsulay niya si Jesucristo. (Mateo 4:​5-7) Nadumduman niya ang maathag nga pinamulong ni Jesus tuhoy sa pag-asawahay, nga nagasiling nga gintuga sang Dios ang mga tawo nga lalaki kag babayi, indi lalaki kag mga babayi, kag nga ang duha, indi ang tatlo, mangin isa ka unod. Nanindugan sia sa iya desisyon kag ginhatagan sang ulihi sing kinaandan nga diborsio gikan sa poligamya nga pag-asawahay. Wala magdugay, nangin isa sia ka malipayon kag bawtismado nga manugbantala sang Ginharian.

Padayon nga Gamita sing Matadlong ang Pulong sang Dios

21, 22. (a) Ano dapat ang aton determinasyon subong mga manugbantala sang Ginharian? (b) Ano ang binagbinagon naton sa masunod nga artikulo?

²¹ Ang nasulat nga Pulong sang Dios isa gid ka gamhanan nga gamit nga magamit naton sa pagbulig sa iban nga maghimo sing mga pagbag-o sa ila kabuhi agod makapalapit sing suod kay Jehova. (Santiago 4:8) Subong nga ang lantip nga mga trabahador nagagamit sing mga gamit agod matigayon ang maayo nga mga resulta, kabay nga mangin determinasyon naton nga manikasog sing hanuot sa paggamit sa Pulong sang Dios, ang Biblia, sing malantipon sa aton hatag-Dios nga hilikuton subong mga manugbantala sang Ginharian.

²² Paano naton magamit sing labi pa ka epektibo ang Kasulatan sa aton paghimo-disipulo nga hilikuton? Ang isa ka paagi amo ang pagpauswag sa aton ikasarang subong makapakumbinsi nga mga manunudlo. Palihug talupangda ang masunod nga artikulo, kay nagapanugda ini sing mga paagi agod matudluan kag mabuligan ang iban nga batunon ang mensahe sang Ginharian.

[Nota]

Madumduman Mo Bala?

• Ano ang mga gamit nga magamit sang mga manugbantala sang Ginharian?

• Sa anong mga paagi nga si Pablo isa ka halimbawa subong manugpangabudlay sang Ginharian?

• Ano ang nadalahig sa paggamit sing nagakaigo sa Pulong sang Dios?

• Daw ano ka gamhanan nga gamit ang nasulat nga Pulong ni Jehova?

[Mga Pamangkot sa Pagtinuon]

[Mga retrato sa pahina 10]

Pila ka gamit nga ginagamit sang mga Cristiano sa pagbantala sing Ginharian