Isa ka Walay Krimen nga Kalibutan sa Palaabuton

HANDURAWA, kon mahimo mo, ang isa ka kalibutan nga wala sing mga kriminal! Indi na kinahanglan ang mga pulis, mga prisuhan, ukon magasto kag masibod nga mga sistema sang hustisya sa krimen. Mangin isa ini ka kalibutan diin ang tagsa ka indibiduwal magatahod sa kabuhi kag pagkabutang sang iban. Daw imposible bala ini? Ayhan amo ina sa banta mo, apang ining dalayawon nga pagbag-o amo gid ang ginasaad sang Biblia. Ngaa indi pagbinagbinagon kon ano ang ginatagna sang Kasulatan tuhoy sa krimen kag iban pa nga mga kalautan sa sini nga duta?

Sa tulun-an sang mga Salmo, mabasa naton: “Dili ka magpanginit bangod sa mga manughikot sing malaut. Dili ka mahisa sa mga nagahimo sing di-matarong. Kay kaangay sang hilamon malaya sila sing madali, kag kaangay sing malagtom nga bag-o nga hilamon madula sila. Apang ang mga mahagop magapanag-iya sang duta, kag makasapo gid sila sing daku nga kalipay sa kabuganaan sang paghidait.” (Salmo 37:​1, 2, 11) Sa pagkamatuod, wala sing makapugong sa Dios sa pagtuman sining saad kag sang tanan niya nga makapalig-on nga mga saad.

Paluntaron sang Dios ining mga pagpakamaayo paagi sa iya Ginharian. Sa Pangamuyo sang Ginuo, gintudluan ni Jesucristo ang iya mga sumulunod nga mangamuyo agod magkari ining Ginharian kag agod matuman ang kabubut-on sang Dios, ‘kon paano sa langit, subong man sa duta.’ (Mateo 6:​9, 10) Sa dili madugay, sa idalom sini nga Ginharian, wala na sing bisan isa sa duta ang maingganyo sa paghimo sing krimen bangod sang kaimulon, pagpamigos, ukon kakagod. Sa baylo, ang Pulong sang Dios nagasiling: “May bugana nga uyas sa duta; sa putukputukan sang kabukiran magahapayhapay ini.” (Salmo 72:16) Sa pagkamatuod, ang tanan sa duta amanan ni Jehova nga Dios sing di-mahubsan nga abiyo sang maayong mga butang. Labaw ka importante, ang tawhanon nga katilingban pahulagon sang gugma sa Dios kag sa isigkatawo, kag ang kalibutan indi na gid pagtublagon pa sing krimen.