Mapatihan Mo ang Isa ka Paraiso nga Duta

SA BUG-OS nga maragtas, minilyon ka tawo ang nagpati nga magabiya sila sa ulihi sa duta kag magakadto sa langit. Nagpati ang iban nga indi gid tuyo sang aton Manunuga nga ang duta mangin permanente nga puluy-an naton. Sobra pa ang ginpatihan sang mga asetiko. Para sa madamo sa ila, ang duta kag ang tanan nga materyal nga mga butang malain​​—⁠isa ka balagbag sa matuod nga espirituwal nga kaayawan kag pagkasuod sa Dios.

Ang mga nagpalambo sing nasambit nga mga ideya mahimo nga wala makahibalo kon ano ang ginsiling sang Dios tuhoy sa paraiso nga duta ukon hungod nga nagpasapayan sini. Ang matuod, madamo sa karon ang indi interesado sa pag-usisa kon ano ang ginsulat sang mga tawo nga gin-inspirar sang Dios tuhoy sini nga butang sa iya Pulong, ang Biblia. (2 Timoteo 3:​16, 17) Apang indi bala maalamon nga magsalig sa Pulong sang Dios sa baylo nga patihan ang mga teoriya sang tawo? (Roma 3:4) Sa katunayan, kinahanglan gid nga magsalig kita sa Pulong sang Dios, kay ang Biblia nagapaandam sa aton nga ginbulag sa espirituwal sang isa ka gamhanan apang di-makita nga malaut nga tinuga ang mga tawo kag karon “nagapatalang sa bug-os napuy-an nga duta.”​—⁠Bugna 12:⁠9; 2 Corinto 4:4.

Ngaa May Kagumon?

Ang nagasumpakilay nga mga ideya tuhoy sa kalag nangin kabangdanan kon ngaa nagumon ang mga tawo tuhoy sa katuyuan sang Dios sa duta. Madamo ang nagapati nga may yara kita di-mamalatyon nga kalag​—⁠isa ka butang nga nagabulag sa tawhanon nga lawas kag padayon nga nagakabuhi kon mapatay ang isa. Ang iban nagapati nga ang kalag nagaluntad na antes pa gintuga ang tawhanon nga lawas. Suno sa isa ka reperensia, nagpati ang Griegong pilosopo nga si Plato nga ang kalag “nabilanggo sa lawas subong silot sa mga sala nga ginhimo sini sa langit.” Sing kaanggid, ang teologo sang ikatlo nga siglo nga si Origen nagsiling nga ang “mga kalag nagpakasala [sa langit] antes sila nahiusa sa lawas” kag “nabilanggo [sa sining lawas sa duta] subong silot bangod sang ila mga sala.” Kag minilyon ang nagapati nga ang duta isa lamang ka sahi sang duog sang pagtilaw sa paglakbay sang tawo padulong sa langit.

May yara man nanuhaytuhay nga mga ideya sa kon ano ang nagakatabo sa kalag kon ang isa ka tawo mapatay. Suno sa libro nga History of Western Philosophy, ang mga Egiptohanon nagpalambo sing ideya nga “ang mga kalag sang mga patay nagapanaug sa kalibutan sang mga patay.” Nangatarungan sang ulihi ang mga pilosopo nga ang mga kalag sang mga patay wala nagapanaug sa madulom nga kalibutan sang mga patay kundi nagasaka sa mas mataas nga duog sang mga espiritu. Ang Griegong pilosopo nga si Socrates ginasiling nga nagpati nga sa kamatayon ang kalag “nagataliwan pakadto sa [isa ka] di-makita nga duog . . . kag nagahinguyang sang nabilin nga bahin sang iya pagluntad upod sa mga dios.”

Ano ang Ginasiling sang Biblia?

Indi mabasa sa inspirado nga Pulong sang Dios, ang Biblia, nga ang mga tawo may di-mamalatyon nga kalag. Basaha ang rekord sa Genesis 2:7. Ini nagasiling: “Si Jehova nga Dios nagporma sang tawo gikan sa yab-ok sang duta kag naghuyop sa iya ilong sing ginhawa sang kabuhi, kag ang tawo nangin buhi nga kalag.” Maathag ini kag madali mahangpan. Sang gintuga sang Dios ang unang tawo, nga si Adan, wala Sia magbutang sing di-pisikal nga elemento sa iya. Wala, kay ang Biblia nagasiling nga “ang tawo nangin buhi nga kalag.” Ang tawo wala sing kalag. Sia amo ang kalag.

Sang gintuga ang duta kag ang tawhanon nga panimalay, indi gid tuyo ni Jehova nga ang mga tawo mapatay. Tuyo sang Dios nga ang mga tawo magkabuhi sing dayon sa duta sa Paraiso nga mga  kahimtangan. Napatay lang si Adan bangod ginlapas niya ang kasuguan sang Dios. (Genesis 2:​8, 15-​17; 3:​1-6; Isaias 45:18) Sang ang nahauna nga tawo napatay, nagkadto bala sia sa duog sang mga espiritu? Wala! Sia​​—⁠ang kalag nga si Adan⁠​—⁠nagbalik sa walay kabuhi nga yab-ok nga gikan sa sini gintuga sia.​​—⁠Genesis 3:​17-​19.

Kita tanan nakapanubli sing sala kag kamatayon gikan sa aton katigulangan nga si Adan. (Roma 5:12) Ining kamatayon amo ang pagdulog sa pagluntad, kaangay sang natabo kay Adan. (Salmo 146:​3, 4) Sa katunayan, sa bug-os nga 66 ka tulun-an sini, wala gid ginaangot sang Biblia ang mga termino nga “di-mamalatyon” ukon “walay katapusan” sa tinaga nga “kalag.” Sa kabaliskaran, ang Kasulatan maathag nga nagasiling nga ang kalag​​—⁠ang tawo⁠​—⁠mamalatyon. Ang kalag nagakapatay.​​—⁠Manugwali 9:​5, 10; Ezequiel 18:4.

Ang Materyal nga mga Butang Duna Bala nga Malain?

Kamusta naman ang ideya nga ang materyal nga mga butang, pati na ang duta, malain? Ini nga pagtamod ginpatihan sang mga nagasakdag sa Manichaeism, isa ka relihioso nga hublag nga ginpatok ni Mani sa Persia sang ikatlo nga siglo C.⁠E. Ang The New Encyclopædia Britannica nagsiling: “Ang Manichaeism amo ang sabat sa kalisang nga duna sa tawhanon nga kahimtangan.” Nagpati si Mani nga ang mangin tawo “indi kinaugali, indi mabatas, kag bug-os nga malain.” Nagpati man sia nga ang lamang nga paagi agod makalikaw sa sining “kalisang” amo nga ang kalag magpalagyo sa lawas, magbiya sa duta, kag magtigayon sing espirituwal nga pagluntad sa kalibutan sang mga espiritu.

Sa kabaliskaran, ang Biblia nagasugid sa aton nga sa pagtamod sang Dios “ang tanan nga butang nga ginhimo niya” sang gintuga ang duta kag katawhan “tama gid kaayo.” (Genesis 1:31) Sa amo man nga tion, wala sing balagbag sa tunga sang mga tawo kag sang Dios. Si Adan kag si Eva may suod nga kaangtanan kay Jehova, subong man nga ang himpit nga tawo nga si Jesucristo may suod nga kaangtanan sa iya langitnon nga Amay.​​—⁠Mateo 3:⁠17.

Kon ang aton nahauna nga mga ginikanan, nga si Adan kag si Eva, wala magpakasala, may yara kuntani sila suod nga kaangtanan kay Jehova nga Dios sing dayon sa isa ka paraiso nga duta. Nagsugod sila nga magkabuhi sa Paraiso, kay ang Kasulatan nagasugid sa aton: “Si Jehova nga Dios nagtanom sing isa ka hardin sa Eden, nayon sa sidlangan, kag didto ginbutang niya ang tawo nga ginporma niya.” (Genesis 2:8) Si Eva gintuga sa sining paraiso nga hardin. Kon si Adan kag si Eva wala magpakasala, sila kag ang ila himpit nga mga anak nagbuligay kuntani  sing malipayon tubtob mangin paraiso ang bug-os nga duta. (Genesis 2:21; 3:​23, 24) Ang dutan-on nga Paraiso nangin puluy-an kuntani sang katawhan sing dayon.

Ngaa ang Iban Nagakadto sa Langit?

‘Apang,’ mahimo isiling mo, ‘indi bala nga ang Biblia nagapamulong tuhoy sa pagkadto sa langit sang mga tawo?’ Huo. Sang napatay si Adan, katuyuan ni Jehova nga magtukod sing isa ka langitnon nga Ginharian diin ang pila sa mga kaliwat ni Adan ‘magagahom subong mga hari sa ibabaw sang duta’ kaupod ni Jesucristo. (Bugna 5:​10; Roma 8:17) Banhawon sila sa di-mamalatyon nga kabuhi sa langit. Ang ila kabug-usan nga kadamuon amo ang 144,000, kag ang nahauna sa tunga nila amo ang matutom nga mga disipulo ni Jesus sang unang siglo.​​—⁠Lucas 12:32; 1 Corinto 15:42-​44; Bugna 14:​1-5.

Apang, indi orihinal nga katuyuan sang Dios nga ang matarong nga mga tawo magbiya sa duta kag magkadto sa langit. Sa katunayan, sang si Jesus yari sa duta, sia nagsiling: “Wala sing tawo nga nakasaka sa langit kundi sia nga nanaug gikan sa langit, ang Anak sang tawo.” (Juan 3:13) Paagi sa “Anak sang tawo,” nga si Jesucristo, ang Dios nag-aman sing gawad agod posible nga matigayon sang mga nagatuo sa halad ni Jesus ang kabuhi nga walay katapusan. (Roma 5:8) Apang diin magapuyo sing dayon ang minilyon sini nga mga tawo?

Ang Orihinal nga Katuyuan sang Dios Matuman

Bisan pa katuyuan sang Dios nga ang iban kuhaon gikan sa tawhanon nga panimalay agod maggahom kaupod ni Jesucristo sa langitnon nga Ginharian, wala ini nagakahulugan nga ang tanan nga maayo nga mga tawo magakadto sa langit. Gintuga ni Jehova ang duta nga mangin Paraiso nga puluy-an sang tawhanon nga panimalay. Sa dili madugay, tumanon sang Dios ining orihinal nga katuyuan.​—⁠Mateo 6:​9, 10.

Sa idalom sang paggahom ni Jesucristo kag sang iya langitnon nga kaupod nga mga manuggahom, ang paghidait kag kalipay magapangibabaw sa bug-os nga duta. (Salmo 37:​9-​11) Ang mga yara sa handumanan sang Dios banhawon kag magaagom sing himpit nga kapagros. (Binuhatan 24:15) Bangod sang ila katutom sa Dios, ihatag sa matinumanon nga katawhan ang gindula sang aton una nga mga ginikanan​​—⁠ang kabuhi nga walay katapusan nga may tawhanon nga pagkahimpit sa paraiso nga duta.​​—⁠Bugna 21:​3, 4.

Si Jehova nga Dios wala gid nagakapaslawan sa pagtuman sa tuyo niya nga himuon. Paagi sa iya manalagna nga si Isaias, sia nagsiling: “Subong nga ang nagabubo nga ulan nagatupa, kag ang niebe, gikan sa mga langit kag wala nagabalik sa sina nga duog, luwas kon mahupog sini ang duta kag mapabunga kag mapasalingsing ini, kag ang binhi mahatag sa manugsab-ug kag ang tinapay sa manugkaon, mangin amo man ang pulong nga nagagua sa akon baba. Indi ini magabalik sa akon nga wala sing mga resulta, kundi himuon gid sini ang akon nahamut-an, kag pat-od nga magamadinalag-on ini sa butang nga tungod sina ginpadala ko ini.”​​—⁠Isaias 55:​10, 11.

Sa tulun-an sang Isaias sa Biblia, mabasa naton kon ano ang mangin kabuhi sa Paraiso nga duta. Wala sing pumuluyo sang Paraiso ang magasiling, “Nagamasakit ako.” (Isaias 33:24) Ang mga sapat indi magahalit sa tawo. (Isaias 11:​6-9) Ang mga tawo magapatindog sing matahom nga mga puluy-an kag magapuyo sa sini kag magatanom kag magakaon nga may kaayawan. (Isaias 65:21-​25) Dugang pa, “lamunon [sang Dios] ang kamatayon sing dayon, kag pat-od nga pahiran sang Soberanong Ginuong Jehova ang mga luha gikan sa tanan nga nawong.”​​—⁠Isaias 25:8.

Sa dili madugay, ang matinumanon nga katawhan magapuyo sa idalom sining maayo gid nga mga kahimtangan. “Hilwayon [sila] gikan sa pagkaulipon sa pagkamadinulunton kag magaagom sing mahimayaon nga kahilwayan sang mga anak sang Dios.” (Roma 8:21) Daw ano gid ka makalilipay nga mabuhi sing dayon sa ginsaad nga Paraiso sa duta! (Lucas 23:43) Magakabuhi ka didto kon iaplikar mo ang sibu nga ihibalo sang Kasulatan kag magtuo kay Jehova nga Dios kag kay Jesucristo. Kag makasalig ka nga makatarunganon gid nga patihan ang isa ka paraiso nga duta.

[Retrato sa pahina 5]

Si Adan kag si Eva gindesinyo nga magkabuhi sing dayon sa paraiso nga duta

 [Mga retrato sa pahina 7]

Sa Paraiso sa duta . . .

magapatindog sila sing mga balay

magatanom sila sing mga ulubasan

pakamaayuhon sila ni Jehova

[Picture Credit Line on page 4]

U.⁠S. Fish & Wildlife Service, Washington, D.C./NASA