“Magpalapit Kamo sa Dios, kag Magapalapit Sia sa Inyo”

Sang Una kag Karon—Ang mga Prinsipio sang Biblia Nagbulig sa Iya nga Magbag-o

SANG pamatan-on pa si Adrian, maakigon sia kag puno sing hinakit. Ang iya pagkakutos nagdul-ong sa masingki nga mga pag-ibwal sang kaakig. Nagpahubog sia, nagpanigarilyo, kag nagkabuhi sing imoral. Si Adrian kilala nga isa ka punk kag may pika sia nga nagpabanaag sang iya pagpati sa anarkiya. Nagasaysay tuhoy sa sini nga tinuig, sia nagsiling: “Ginpaguntingan ko ang akon buhok sa estilo sang mga punk sadto, ginbutangan ini sing maisog nga gel agod magtiskog, kag kon kaisa ginlugom ini sing pula ukon iban pa nga kolor.” Si Adrian may aritos man sa ilong.

Si Adrian nagsaylo sa isa ka gabok nga balay upod sa pila pa ka rebelyuso nga mga pamatan-on. Nagpahubog sila didto kag nagdroga. “Nagshabu ako kag sa amo man nga tion nag-indyeksion sa akon kaugalingon sing Valium kag bisan ano nga mahapos ko matigayon,” hinumdom ni Adrian. “Kon wala sing mga droga ukon rugby, nagpangawat ako sing gasolina gikan sa mga salakyan sang mga tawo kag ginsinghot ini tubtob mabalong ako.” Nadalahig si Adrian sa madamo nga krimen sa kalye kag nangin makatalagam kag masingki gid. Sa masami ginlikawan sia sang mga tawo. Sa amo man nga tion, ang iya reputasyon nagganyat sa malain nga mga kaupod.

Sa amat-amat, narealisar ni Adrian nga ang iya “mga abyan” nagpakig-upod lamang sa iya bangod may makuha sila sa iya. Dugang pa, naghinakop sia nga “ang tanan nga kaakig kag kasingki wala gid sing nadangatan.” Nagbatyag sing pagkawalay padulungan kag kapaslawan, ginbiyaan niya ang iya mga barkada. Sang nakasapo sia sing isa ka kopya sang Ang Lalantawan sa isa ka duog sang konstruksion, naganyat sia sang pasad-sa-Biblia nga mensahe sini, kag nagdul-ong ini sa isa ka pagtuon sa Biblia upod sa mga Saksi ni Jehova. Si Adrian may kakunyag nga nagsabat sa pangagda: “Magpalapit kamo sa Dios, kag magapalapit sia sa inyo.” (Santiago 4:8) Subong resulta, nakita gilayon ni Adrian nga kinahanglan nga sugdan niya ang pag-aplikar sang mga prinsipio nga masapwan sa Balaan nga Kasulatan.

Ang nagauswag nga ihibalo sa Biblia may maayo nga epekto sa konsiensia ni Adrian kag ginbag-o sini ang direksion sang iya kabuhi. Nabuligan sia nga kontrolon ang iya pagkakutos kag palambuon ang pagpugong sa kaugalingon. Bangod sa gahom sang Pulong sang Dios, nangin tuhay gid ang personalidad ni Adrian.​​—⁠Hebreo 4:⁠12.

Apang, paano ang Biblia may subong sini kabaskog nga epekto? Ang ihibalo sa Kasulatan nagabulig sa aton nga ‘isuklob ang bag-o nga personalidad.’ (Efeso 4:24) Huo, ginabag-o ang aton personalidad paagi sa pag-aplikar sang sibu nga ihibalo nga masapwan sa Biblia. Apang paano ini nga ihibalo nagapabag-o sa mga tawo?

Una, espesipiko nga ginahinambitan sa Biblia ang di-kalahamut-an nga mga kinaiya nga kinahanglan dulaon. (Hulubaton 6:​16-​19) Ikaduha, ang Kasulatan nagapalig-on sa aton nga ipadayag ang kalahamut-an nga mga kinaiya nga ginpatubas sang balaan nga espiritu sang Dios. Nagalakip ini sang “gugma, kalipay, paghidait, pagkamapinasensiahon, pagkamainayuhon, pagkaayo, pagtuo, kalulo, pagpugong sa kaugalingon.”​​—⁠Galacia 5:​22, 23.

Ang mas madalom nga paghangop sa mga ginapatuman sang Dios nagbulig kay Adrian nga usisaon ang iya kaugalingon kag tan-awon kon ano nga mga kinaiya  ang kinahanglan niya palambuon kag kon ano naman ang iya dapat dulaon. (Santiago 1:​22-​25) Apang umpisa lamang ina. Dugang sa ihibalo, kinahanglan ang motibasyon​​—⁠isa ka butang nga magapahulag kay Adrian agod magbag-o.

Natun-an ni Adrian nga ang kalahamut-an nga bag-ong personalidad gindihon “suno sa larawan sang Isa nga nagtuga sini.” (Colosas 3:10) Narealisar niya nga ang personalidad sang isa ka Cristiano dapat mag-anggid sa personalidad sang Dios. (Efeso 5:1) Paagi sa isa ka pagtuon sa Biblia, natun-an ni Adrian ang mga pagpakig-angot ni Jehova sa katawhan kag gintalupangod niya ang maayo nga mga kinaiya sang Dios, kaangay sang iya gugma, pagkamainayuhon, pagkaayo, kaluoy, kag pagkamatarong. Ini nga ihibalo nagpahulag kay Adrian nga higugmaon ang Dios kag magpanikasog nga mangin sahi sang persona nga ginakahamut-an ni Jehova.​​—⁠Mateo 22:37.

Sa pagligad sang tinion, kag upod sa bulig sang balaan nga espiritu sang Dios, nakontrol ni Adrian ang iya masingki nga kaakig. Sia kag ang iya asawa masako karon sa pagbulig sa iban nga bag-uhon man ang ila kabuhi paagi sa bulig sang ihibalo sa Biblia. “Indi kaangay sang madamo sa mga abyan ko sadto anay nga karon patay na, buhi ako kag may malipayon nga pamilya,” siling ni Adrian. Sia isa ka buhi nga pamatuod sang gahom sang Biblia sa pagbag-o sang mga kabuhi para sa kaayuhan.

[Blurb sa pahina 25]

“Ang tanan nga kaakig kag kasingki wala gid sing nadangatan”

[Kahon sa pahina 25]

Epektibo nga mga Prinsipio sang Biblia

Ang masunod amo ang pila ka prinsipio sa Biblia nga nagbulig sa maakigon kag masingki nga mga tawo nga mangin mahidaiton:

“Magpakighidait sa tanan nga tawo. Dili kamo magtimalos, mga hinigugma, kundi pabayai ang kasingkal.” (Roma 12:​18, 19) Itugyan sa Dios ang pagpamat-od kon san-o kag kon kay sin-o magtimalos. Mahimo niya ini nga may bug-os nga ihibalo sing mga hitabo, kag ang bisan ano nga pagtimalos gikan sa iya magapabanaag sang iya himpit nga katarungan.

“Magpangakig, apang indi magpakasala; indi pagpatunuri sing adlaw ang inyo kaakig, ni maghatag sing lugar sa Yawa.” (Efeso 4:​26, 27) Ayhan ang isa ka tawo may rason kon kaisa nga magpangakig. Kon matabo ini, indi sia dapat magpabilin ‘nga akig.’ Ngaa? Bangod makabuyok ini sa iya nga maghimo sing malain, busa nagahatag sing “lugar sa Yawa,” nga nagaresulta sa di-kahamuot ni Jehova nga Dios.

“Likawi ang kaakig kag bayai ang kasingkal; dili ka magpanginit nga magadul-ong lamang sa paghimo sing malaut.” (Salmo 37:8) Ang di-mapunggan nga mga emosyon nagadul-ong sa di-makontrol nga mga buhat. Kon ang isa ka tawo magapadaug sa kaakig, mahimo gid nga makahambal sia ukon makahimo sing mga butang nga magasaklaw sa tanan nga nadalahig.