Report sang mga Manugbantala sang Ginharian

Ang Isa ka Programa sa Telebisyon Nagtuytoy sa Iya nga Himayaon ang Dios

SI APOSTOL Pablo nagsiling nga “ginawali sang iban si Cristo bangod sa kahisa kag pagpaindisanay, apang ang iban naman bangod sa maayong kabubut-on.” (Filipos 1:15) Kon kaisa, bisan yadtong luyag magpakalain sa katawhan ni Jehova indi hungod nga nagganyat sa mga matarong sing tagipusuon nga usisaon ang kamatuoran.

Sang Nobiembre 1998, isa ka programa nga nagapakita sing mga laragway sang Bethel, ang mga pasilidad sang sanga sang mga Saksi ni Jehova sa Louviers, Pransia, ang ginpasalida sa pungsudnon nga telebisyon sang Pransia. Walay sapayan sang nanuhaytuhay nga reaksion sa sini, ang programa nakatigayon sing maayo nga mga resulta sa wala ginpaabot nga mga paagi.

Ang isa sa mga nagtan-aw sa programa amo si Anna-Paula, nga nagapuyo mga 60 ka kilometro lamang gikan sa Bethel. Si Anna-Paula, nga isa ka diborsiada nga may duha ka kabataan, nagapangita sing obra. Gani sang masunod nga aga, ginteleponohan niya ang Bethel agod mamangkot tuhoy sa pag-obra didto. “Ang programa sa telebisyon naghatag sa akon sing impresyon nga isa ini ka maayo nga lugar kag mapuslanon ang ginahimo didto,” siling niya. Nakibot gid sia sang mahibal-an niya nga ang tanan nga nagaalagad sa Bethel mga ministro nga nagaboluntaryo sang ila tion! Pagkatapos sang isa ka malip-ot nga paghambalanay tuhoy sa mga hilikuton sang mga Saksi ni Jehova, nagsugot sia nga duawon sang isa ka Saksi.

Sang ginduaw sia ni Léna, isa ka bug-os tion nga ministro sa isa ka malapit nga kongregasyon, naghambalanay sila sing malawig, kag ginbaton ni Anna-Paula ang libro nga Ang Ihibalo nga Nagadul-ong sa Kabuhi nga Walay Katapusan.⁠ * Sang masunod nga pagduaw, nabasa na ni Anna-Paula ang bug-os nga libro kag may madamo sia nga pamangkot. Ginbaton niya gilayon ang isa ka pagtuon sa Biblia. Si Anna-Paula nagsiling: “Para sa akon, kahigayunan yadto agod matun-an ko ang Pulong sang Dios. Wala pa gid ako makabasa sing Biblia sang una.”

Sang Enero 1999, nagduaw si Anna-Paula sa Bethel, kag pagkadason nga semana nagtambong sia sa iya unang Cristianong miting. Wala madugay pagkatapos sini, nagsugod sia sa pagtuon sa Biblia upod sa iya mga kabataan kag sa pagpanaksi sa iya mga abyan. “Indi ko mahinago sa akon kaugalingon ang akon natun-an,” siling niya. “Luyag ko nga ipaambit sa mga tawo ang mga kamatuoran sa Biblia kag lugpayan sila.” Sa tapos manikasog agod malandas ang pila ka personal nga mga problema, si Anna-Paula nagsugod sa pagtambong sing tayuyon sa mga miting. Madasig sia nga nag-uswag kag nabawtismuhan sia sang Mayo 5, 2002.

Dugang pa, bilang resulta sang maayo nga halimbawa kag makugi nga pagbantala ni Anna-Paula, ang iya iloy nagtuon sa Biblia kag nabawtismuhan sang ulihi. “Ang akon kalipay indi mapabutyag sa mga tinaga,” siling ni Anna-Paula. “Ginapasalamatan ko si Jehova kada adlaw tungod sa pagtugot niya sa akon nga makilala ko sia kag maalagad kag tungod sa mga pagpakamaayo nga ginhatag niya sa akon.”

[Nota]

[Retrato sa pahina 8]

Sa ibabaw: Si Anna-Paula

Sa ubos: Ang ganhaan pasulod sa sanga talatapan sa Pransia