Sugilanon sang Kabuhi

“Ano Bala ang Ibalos Ko kay Jehova?”

PANUGIRON NI MARIA KERASINIS

Sa edad nga 18 anyos, isa gid ako ka kapaslawan para sa akon mga ginikanan, ginsikway sang akon pamilya, kag ginyaguta sa amon lugar. Gingamit ang mga pakitluoy, pagpilit, kag mga pamahog agod gub-on ang akon integridad sa Dios​​—⁠apang napaslawan sila. Nagsalig gid ako nga ang katutom sa kamatuoran sang Biblia magadala sing espirituwal nga mga kaayuhan. Samtang ginadumdom ko ang kapin sa 50 ka tuig nga pag-alagad kay Jehova, masiling ko man ang ginsiling sang salmista: “Ano bala ang ibalos ko kay Jehova tungod sa tanan nga kaayuhan niya sa akon?”​​—⁠Salmo 116:12.

NATAWO ako sang 1930, sa Aggelokastro, isa ka lugar nga mga 20 kilometros ang kalayuon gikan sa pantalan sang Cenchreae, sa sidlangan sang Isthmus sang Corinto, diin gintukod ang isa ka kongregasyon sang matuod nga mga Cristiano sang una nga siglo.​​—⁠Binuhatan 18:18; Roma 16:1.

Malinong ang pagkabuhi sang amon pamilya. Si Tatay amo ang presidente sang komunidad kag ginarespeto gid. Ikatlo ako sa lima ka kabataan. Ginpadaku kami sang amon mga ginikanan subong debotado nga mga miembro sang Greek Orthodox Church. Nagsimba ako kada Domingo. Nagpenitensia ako sa atubangan sang relihioso nga mga larawan, nagsindi sang mga kandila sa mga kapilya, kag nagtuman sang tanan nga puasa. Ginpamensar ko pirme nga magmadre. Sang ulihi, ako ang nangin pinakauna sa amon pamilya nga nagpaslaw sa akon mga ginikanan.

Nakunyag sa Kamatuoran sang Biblia

Sang mga 18 anyos ako, nahisayran ko nga si Katina, ang utod nga babayi sang isa sa akon bayaw nga mga lalaki, nga nagaistar sa kaingod nga lugar, nagabasa sang mga publikasyon sang mga Saksi ni Jehova, kag wala na sia nagakadto sa simbahan. Natublag gid ako sa sini, gani namat-od  ako nga buligan sia nga manumbalik sa ginkabig ko nga husto nga dalan. Gani, sang nagduaw sia sa amon lugar, ginpatigayon ko nga makadayandayan kami nga duha, sa tuyo nga maghapit sa balay sang pari. Ginsugdan sang pari ang paghambalanay paagi sa pagmulay sa mga Saksi ni Jehova, ginatawag sila nga mga erehes nga nagpatalang kay Katina. Nagpadayon ang paghambalanay sa sulod sang tatlo ka sunodsunod nga gab-i. Ginpamatud-an ni Katina nga sayop ang tanan nga mga alegasyon sang pari paagi sa nahanda sing maayo nga mga argumento pasad sa Biblia. Sang ulihi, ginsingganan sia sang pari nga bangod isa sia ka maanyag, maalam nga dalagita, dapat magkalipay sia samtang bata pa sia kag mangin interesado lamang sa Dios kon tigulang na.

Wala ako nanugid sa akon mga ginikanan tuhoy sa sini nga paghambalanay, apang sang masunod nga Domingo, wala ako nagkadto sa simbahan. Sang udto, ang pari nagkadto gilayon sa amon balaligyaan. Nagbalibad ako nga kinahanglan magtener ako sa balaligyaan agod buligan si Tatay.

“Amo gid bala ina ang rason, ukon naimpluwensiahan ka sang dalagita nga ato?” pamangkot sang pari sa akon.

“Mas maayo ang pagtuluuhan sinang mga tawo sangsa aton,” prangka ko nga sabat.

Nagliso sa akon amay, ang pari nagsiling: “Ginuong Economos, palayasa gilayon si Katina; daku gid sia nga peligro sa imo panimalay.”

Ginkontra Ako sang Akon Pamilya

Natabo ini sang talipuspusan sang dekada 40 sang naglapuyot ang inaway sibil sa Gresya. Sa kahadlok nga basi kuhaon ako sang mga gerilya, ginpalikaw ako ni Tatay sa amon lugar kag ginpaistar sa balay sang akon magulang nga babayi sa lugar nga ginaistaran ni Katina. Sa sulod sang duha ka bulan nga pagtener ko didto, natun-an ko kon ano ang ginasiling sang Biblia tuhoy sa madamo nga mga hulusayon. Nahanusbo gid ako sang akon nahibaluan nga madamo gali sang mga doktrina sang Orthodox Church ang indi Makasulatanhon. Nahibaluan ko nga wala gali ginabaton sang Dios ang pagsimba paagi sa relihioso nga mga larawan, nga ang nanuhaytuhay nga relihioso nga mga tradisyon​​—⁠subong sang pagsimba sa krus⁠​—⁠wala sing Cristianong ginhalinan, kag dapat ang isa magsimba sa Dios “sa espiritu kag kamatuoran” agod mapahamut-an sia. (Juan 4:​23; Exodo 20:​4, 5) Labaw sa tanan, natun-an ko nga ang Biblia nagatanyag sang masanag nga paglaum sang dayon nga kabuhi sa duta! Ining bilidhon nga mga kamatuoran sang Biblia isa sa una nga personal nga mga kaayuhan nga nabaton ko halin kay Jehova.

Sa sini man nga tion, namutikan ni Manang kag sang iya bana nga wala ako nagapangurus antes magkaon, ukon nagapangamuyo sa relihioso nga mga larawan. Isa ka gab-i ginsakit nila ako. Sang masunod nga adlaw namat-od ako nga maghalin sa ila puluy-an, kag nagkadto ako sa lugar sang akon tiya. Ginpahibalo sang akon bayaw ang akon amay. Wala madugay pagkatapos sadto nag-abot si Tatay nga nagahibi kag nagtinguha nga mapabag-o pa ang akon hunahuna. Nagluhod ang akon bayaw sa akon atubangan, nga nagapangayo sing pasaylo sa akon, kag ginpasaylo ko sia. Agod mahusayan ang problema, ginpangabay nila ako nga magbalik sa simbahan, apang malig-on ako nga nanindugan.

Sang nagpauli ako sa lugar ni Tatay, nagpadayon ang mga pag-ipit. Indi ako makapakig-angot kay Katina, kag wala ako sing mabasa nga mga literatura, wala bisan Biblia. Nalipay gid ako sang ginbuligan ako sang akon pakaisa nga babayi. Sang nagkadto sia sa Corinto, may nasalapuan sia nga isa ka Saksi kag nagpauli dala ang libro nga “Pakamatuura ang Dios” kag isa ka kopya sang Cristianong Griegong Kasulatan, nga ginabasa ko sing patago.

Wala Ginalauman nga Pagbag-o sa Kabuhi

Nagpadayon ang grabe nga pagpamatok sa sulod sang tatlo ka tuig. Wala ako sing kontak sa mga Saksi, ukon nakabaton sang bisan ano man nga literatura. Apang, lipod sa akon, mahanabo ang daku nga mga pagbag-o sa akon kabuhi.

Ginsilingan ako ni Tatay nga makadto sa akon tiyo sa Tesalonica. Antes magpa-Tesalonica, nagpatahi ako sing sambra sa isa ka patahian sa Corinto. Nakibot gid ako sang nakita ko si Katina nga nagatrabaho didto! Daku gid ang amon kalipay nga nagkitaay kami liwat pagkatapos sang madugay nga tinion. Sang malakat na kami nga duha halin sa patahian, nasugata namon ang nagabisikleta nga isa ka maambong gid nga soltero nga nagapauli halin sa trabaho. Si Charalambos ang iya  ngalan. Sa tapos nga magkilalahay sing maayo, nagdesisyon kami nga magpakasal. Sa sini man nga mga tion, sang Enero 9, 1952, ginsimbuluhan ko ang akon dedikasyon kay Jehova paagi sa pagpabawtismo.

Mas nauna nga nabawtismuhan si Charalambos. Ginpamatukan man sia sang iya pamilya. Makugi gid si Charalambos. Nag-alagad sia subong kabulig nga alagad sa kongregasyon kag nagdumala sang madamo nga pagtuon sa Biblia. Wala madugay, ang iya mga magulang nga lalaki nagbaton sang kamatuoran, kag karon kalabanan sa ila pamilya nagaalagad man kay Jehova.

Nagustuhan gid sang akon amay si Charalambos, gani nagpasugot sia sa amon kasal, apang si Nanay nagpaganot. Walay sapayan sini, nakasal kami ni Charalambos sang Marso 29, 1952. Ang akon pinakamagulang nga lalaki lamang kag isa sa akon mga pakaisa ang nagtambong sa amon kasal. Wala ko marealisar sadto nga si Charalambos mangin isa ka di-mapaanggid nga pagpakamaayo​​—⁠isa ka tunay nga regalo halin kay Jehova! Subong iya kaupod, nasentro ko ang akon kabuhi sa pag-alagad kay Jehova.

Pagpalig-on sa Amon mga Kauturan

Sang 1953, nagdesisyon kami ni Charalambos nga magsaylo sa Atenas. Bangod luyag nga himuon ang kapin pa sa pagbantala nga hilikuton, naghalin si Charalambos sa negosyo sang ila pamilya kag nangita sing part-time nga trabaho. Magkaupod kami kada hapon sa Cristianong pagministeryo kag nagdumala sing madamo nga pagtuon sa Biblia.

Bangod sa mga pagdumili sang awtoridad sa amon ministeryo, dapat kami mangin mapahituon. Halimbawa, namat-od kami nga magbutang sang isa ka kopya sang Lalantawan nga magasin sa bintana sang isa ka kiosko, sa sentro sang Atenas, diin nagtrabaho sing part-time ang akon bana. Isa ka mataas sing ranggo nga pulis ang nagmuno sa amon nga ginadilian ang magasin. Apang, nagpangayo sia sing isa ka kopya kag namangkot sia sa opisina sang seguridad tuhoy sa sini. Sang ginpat-od nila sa iya nga legal ang magasin, nagbalik sia agod sugiran kami. Sang nabatian ini sang mga kauturan nga may mga kiosko, sila man nagbutang sang mga kopya sang Ang Lalantawan sa mga bintana sang ila kiosko. Ang isa ka tawo nga nagkuha sang Ang Lalantawan sa amon kiosko, nangin isa ka Saksi, kag nagaalagad karon subong isa ka gulang.

Nalipay man kami sang ang akon kinagot nga manghod nga lalaki nagtuon sang kamatuoran. Nagkadto sia sa Atenas agod mag-eskwela sa kolehiyo para sa mga marinero, kag gin-upod namon sia sa isa ka kombension. Ang amon mga kombension ginhiwat sing patago sa mga kagulangan. Naluyagan niya ang iya nabatian, apang wala madugay pagkatapos sadto nagpanakayon sia subong marinero. Sa isa sang iya mga paglakbay, nagdungka sila sa isa ka pantalan sa Argentina. Didto, ang isa ka misyonero nagsaka sa barko agod magbantala, kag ang akon manghod nangabay sang mga magasin. Daku gid ang amon kalipay sang nabaton namon ang iya sulat nga nagasiling: “Nakita ko na ang kamatuoran. Gusto ko magsuskribe.” Sa karon, sia kag ang iya pamilya matutom nga nagaalagad kay Jehova.

Sang 1958 gin-agda ang akon bana nga mag-alagad subong isa ka nagalakbay nga manugtatap. Bangod ang amon hilikuton ginadumilian kag mabudlay gid ang mga kahimtangan, ang mga nagalakbay nga manugtatap masami nga nagaalagad nga indi kaupod ang ila mga asawa. Sang Oktubre 1959, ginpangabay namon ang may katungdanan nga mga kauturan sa sanga talatapan nga kon puede updan ko sia. Nagpasugot sila. Magaduaw kami kag magapalig-on sa mga kongregasyon sa sentro kag naaminhan nga Gresya.

Indi mahapos yadto nga mga paglakbay. Malaka  lamang ang sementado nga dalan. Bangod wala kami sing salakyan, pirme kami nagasakay sa publiko nga transportasyon ukon sa pick-up nga mga trak, upod sa mga manok kag iban pa nga mga baligya. Nagasuksok kami sing botas agod makaagi sa lunangon nga mga dalan. Sanglit may armado nga mga grupo sa tagsa ka minuro, dapat gab-i kami magsulod sa mga minuro agod malikawan ang interogasyon.

Gin-apresyar gid sang mga kauturan ining mga pagduaw. Bisan ang kalabanan sa ila hago sa pag-obra sa ila mga ulumhan, nagapanikasog gid sila nga makatambong sa mga miting nga ginhiwat sa kagab-ihon sa nanuhaytuhay nga mga puluy-an. Maabiabihon gid ang mga kauturan kag naghatag sila sa amon sang ila pinakamaayo, bisan pa pigado sila. Kon kaisa sa isa ka kuarto lang kami nagatulog upod sa bug-os nga pamilya. Ang pagtuo, pagkamabinatason, kag kakugi sang mga kauturan nangin isa pa ka daku gid nga kaayuhan sa amon.

Pagpasangkad sang Amon Ministeryo

Sang Pebrero 1961, samtang nagaduaw sa sanga talatapan sa Atenas, ginpamangkot kami kon bala luyag namon mag-alagad sa Bethel. Nagsabat kami kaangay ni Isaias: “Yari ako! Ipadala ako.” (Isaias 6:8) Duha ka bulan pagkatapos sadto, nakabaton kami sang sulat nga nagapakadto sa amon gilayon sa Bethel. Gani, sang Mayo 27, 1961, nagsugod kami sa pag-alagad sa Bethel.

Nalipay gid kami sa amon bag-o nga asaynment, kag nakasaho kami gilayon. Ang akon bana nagtrabaho sa Service kag Subscription nga mga departamento kag sang ulihi nag-alagad sia sa pila ka tion subong katapo sang Komite sang Sanga. Madamo ang akon asaynment sa puluy-an. May 18 ka katapo ang pamilya sadto, apang sa sulod sang halos lima ka tuig, may mga 40 ka tawo sa Bethel bangod ginhiwat diri ang eskwelahan para sa mga gulang. Kon aga, nanghugas ako sang mga pinggan, nagbulig sa kusinero, naghimos sang 12 ka katre, kag naghanda sang mga lamesa para sa panyaga. Kon hapon, nagpamalantsa ako kag nagpaninlo sang mga kasilyas kag mga kuarto. Makaisa kada semana nagtrabaho man ako sa departamento sang pagpanglaba. Madamo gid sing ulubrahon, apang nalipay ako sa pagbulig.

Masako gid kami sa amon asaynment sa Bethel subong man sa pag-alagad sa latagon. Madamo nga higayon nga nagdumala kami sing tubtob sa pito ka pagtuon sa Biblia. Sa mga talipuspusan sang semana, gin-updan ko si Charalambos kon nagapamulongpulong sia sa nanuhaytuhay nga mga kongregasyon. Magkaupod gid kami pirme.

Nakadumala kami sing pagtuon sa Biblia upod sa mag-asawa nga suod gid sa Greek Orthodox Church kag personal nga mga abyan sang pari nga pangulo sang kontra-erehes nga ahensia sang simbahan. Sa ila balay, may kuarto sila nga puno sing relihioso nga mga larawan, diin ang incienso tayuyon nga ginasunog kag ang Byzantine nga mga himno ginapatokar sa bug-os nga adlaw. Sa sulod sang pila ka tion, nagduaw kami sa ila kada Huebes agod magtuon sa Biblia, kag nagduaw sa ila kada Biernes ang ila abyan nga pari. Isa ka adlaw, ginpakadto gid nila kami sa ila puluy-an bangod may sorpresa sila sa amon. Ang una nga ginpakita nila sa amon amo ang ina nga kuarto. Wala na ang tanan nga larawan kag ginpakay-o ini. Nag-uswag ining mag-asawa kag ginbawtismuhan. Sa kabilugan, nalipay kami nga makita ang mga 50 sa mga tawo nga amon gindumalahan sing pagtuon sa Biblia nga nagdedikar sang ila kabuhi kay Jehova kag nagpabawtismo.

Ang pagpakig-upod sa hinaplas nga mga kauturan isa ka pinasahi nga kaayuhan nga akon naangkon. Ang mga pagduaw sang mga katapo  sang Nagadumala nga Hubon, kaangay nanday Utod Knorr, Franz, kag Henschel, makapalig-on gid. Pagligad sing kapin sa 40 ka tuig, ginakabig ko gihapon ang pag-alagad sa Bethel subong isa ka daku nga kadungganan kag pribilehiyo.

Paglandas sa Balatian kag Kamatayon sang Hinigugma

Sang 1982 may mga sintoma sang balatian nga Alzheimer’s ang akon bana. Sang 1990 nagpigaw ang iya panglawas, kag sang ulihi kinahanglan niya ang dalayon nga pag-atipan. Sa hingapusan nga walo ka tuig sang iya kabuhi, indi gid kami makahalin sa Bethel. Madamo sang pinalangga nga kauturan sa pamilya Bethel, subong man responsable nga mga manugtatap, ang naghimo sing kahimusan agod magbulig sa amon. Apang, walay sapayan sang ila mainayuhon nga bulig, kinahanglan gihapon nga atipanon ko sia sa adlaw kag gab-i. Kon kaisa mabudlay gid ang mga kahimtangan, kag madamo sing gab-i nga indi ako makatulog.

Sang Hulyo 1998 napatay ang akon hinigugma nga bana. Bisan pa nahidlaw gid ako sa iya, nalugpayan gid ako sa ihibalo nga yara sia sa maayo nga mga kamot, kag nakahibalo ako nga dumdumon sia ni Jehova upod ang minilyon pa sa pagkabanhaw.​​—⁠Juan 5:​28, 29.

Nagapasalamat Bangod sa mga Kaayuhan Gikan kay Jehova

Bisan pa nabalo ako, wala ako nagaisahanon. May pribilehiyo gihapon ako nga mag-alagad sa Bethel, kag nabatyagan ko ang gugma kag pag-ulikid sang bug-os nga pamilya Bethel. Pamilya ko man ang espirituwal nga mga kauturan sa bug-os nga Gresya. Bisan pa kapin sa 70 anyos na ako karon, makatrabaho gihapon ako sa bug-os nga adlaw sa kusina kag sa kalan-an.

Sang 1999 natuman ang handum ko nga makaduaw sa bug-os kalibutan nga ulong-talatapan sang mga Saksi ni Jehova sa New York. Indi ko gid malaragway ang akon nabatyagan. Isa gid yadto ka makapalig-on kag halandumon nga eksperiensia.

Samtang ginadumdom ko ang mga nagligad, kumbinsido ako nga nagamit ko ang akon kabuhi sa pinakamaayo nga paagi. Ang pinakamaayo nga karera nga maangkon sang isa amo ang bug-os tion nga pag-alagad kay Jehova. May pagsalig nga makasiling ako nga wala gid sing nakulang sa akon. Mahigugmaon nga gin-atipan ni Jehova kami nga mag-asawa sa espirituwal kag sa pisikal. Gikan sa personal nga eksperiensia, nahangpan ko kon ngaa namangkot ang salmista: “Ano bala ang ibalos ko kay Jehova tungod sa tanan nga kaayuhan niya sa akon?”​​—⁠Salmo 116:12.

[Retrato sa pahina 26]

Magkaupod gid kami pirme ni Charalambos

[Retrato sa pahina 27]

Ang akon bana sa iya opisina sa sanga talatapan

[Retrato sa pahina 28]

Ginakabig ko nga daku gid nga kadungganan ang pag-alagad sa Bethel