“Handa Para sa Tagsa Ka Maayong Buhat”

“PADAYON sila nga pahanumduma nga magpasakop kag mangin matinumanon sa mga panguluhan kag sa mga awtoridad subong mga gumalahom, nga mangin handa para sa tagsa ka maayong buhat.” (Tito 3:1) Anong maayong buhat ang ginahunahuna ni apostol Pablo sang ginsulat niya ini sa iya mga masigkatumuluo? Ang iskolar sa Biblia nga si E. F. Scott nagpatuhoy sa isa ka sahi sang maayong buhat, nga nagasiling: “Indi lamang dapat tumanon sang mga Cristiano ang awtoridad, apang dapat sila mangin handa sa tagsa ka maayong buhat. . . . Kon kinahanglanon, ang mga Cristiano dapat lakip sa pinakauna nga magpakita sing pag-ulikid sa komunidad. May matabo pirme nga sunog, kalalat-an, nanuhaytuhay nga mga kalamidad, nga sa amo nga tion luyag sang tanan nga maayong banwahanon nga magbulig sa ila mga isigkatawo.”

Nagapakigbahin ang mga Cristiano sa pila ka hilikuton para sa kaayuhan sang publiko kon wala ini nagasumpakil sa mga kasuguan sang Dios. (Binuhatan 5:29) Halimbawa, bilang pagsunod sa direktiba sang lokal nga departamento sa sunog, ang sanga talatapan sang mga Saksi ni Jehova sa Japan, nga yara sa Ebina, nagahiwat kada tuig sing isa ka fire drill. Sa sini nga mga okasyon, ang tanan nga katapo sang pamilya Bethel nagatipon sa pagpamati sa instruksion sang isa ka representante sang lokal nga departamento sa sunog.

Dugang pa, sa sulod na sang kapin sa isa ka dekada, ang sanga talatapan nagkooperar sa eksibisyon nga gin-organisar sang lokal nga mga awtoridad agod mapalapnag ang ihibalo tuhoy sa pagtapna sang sunog. Sa eksibisyon, ang mga kompanya kag mga establisimiento gikan sa siudad nagpasundayag sang ila kahanda sa pagpalong kag pagtapna sa sunog. Ang sanga masami ginahatagan sing award bangod sa ikasangkol kag kooperasyon sang talapuanan sini. Sang 2001, ginhatagan sila sing award para sa una nga premyo sa amo nga eksibisyon. Handa sila sa paghimo sing maayong buhat nga makasalbar sing kabuhi kon may sunog.

Isa ka Mapuslanon nga Serbisyo

Apang, interesado ang mga Saksi ni Jehova sa isa pa ka mas importante nga sahi sang maayong buhat, nga makasalbar man sing kabuhi. Regular nila nga ginaduaw ang ila mga kaingod agod ipaambit ang maayong balita sang Ginharian sang Dios. (Mateo 24:14) Ang mga Saksi nagapalig-on sa mga tawo nga tun-an kag iaplikar ang mga prinsipio sang Biblia sa ila kabuhi agod pauswagon ang kalidad sang ila kabuhi karon kag maagom ang paglaum nga kabuhi nga wala sing katapusan sa isa ka kalibutan diin ang matuod nga paghidait kag kalig-unan magaluntad.

Mahimo indi maapresyar sang iban ang importansia sang serbisyo sang mga Saksi ni Jehova, kag ginakabig sila nga masabad. Apang, si Hukom Jean Crepeau sang Mataas nga Korte sang Quebec sa Canada may tuhay nga opinyon. Ginprotestahan sa korte sang mga Saksi ni Jehova didto ang isa ka regulasyon sang siudad sang Blainville, Quebec, nga nagapagawad sang permiso sa ila pagpamalaybalay. Sa desisyon sang korte, si Hukom Crepeau nagsiling: “Ang mga pagduaw sang mga Saksi ni Jehova isa ka Cristianong serbisyo sa komunidad kag . . . ang mga balasahon nga ginatanyag sang mga Saksi sa interesado nga mga pumuluyo mapuslanon nga mga literatura, nagabinagbinag sang  mga topiko tuhoy sa relihion, Biblia, droga, alkoholismo, edukasyon sang mga pamatan-on, mga problema sa pag-asawahay kag diborsio.” Ang desisyon padayon nga nagsiling: “Makahinakop gid ang korte nga ang pagpaanggid sa mga Saksi ni Jehova sa mga manuglibod pagpang-insulto, pagpakanubo, pagpakahuya, kag pagpasipala.”

Nagaamot ang mga Saksi ni Jehova sa kaayuhan sang komunidad sa ila lugar paagi sa pagbulig sa mga tawo nga malandas ang mga problema sa ila adlaw-adlaw nga pagkabuhi kag sa pagdala sa ila sing paglaum para sa palaabuton. Ginasangkapan sila sang Biblia sa pagtuman sini nga hilikuton. “Ang bug-os nga Kasulatan inspirado sang Dios kag mapuslanon sa pagpanudlo, sa pagsabdong, sa pagtadlong sang mga butang, sa pagdisiplina sa pagkamatarong, agod nga ang tawo sang Dios may lubos nga ikasarang, nga nasangkapan sing bug-os para sa tagsa ka maayong buhat.”​​—⁠2 Timoteo 3:​16, 17.

Luyag mo bala mahibaluan kon paano ang mga Saksi ni Jehova nangin “handa para sa tagsa ka maayong buhat”? Ginaagda ka namon nga batunon ang ila bulig sa pagtuon sing dugang pa tuhoy sa Biblia agod makapanginpulos ka sa sining importante gid nga serbisyo sa komunidad nga ila ginahimo sa inyo lugar kag sa bug-os nga kalibutan.

[Mga retrato sa pahina 30, 31]

Ang mga Saksi ni Jehova nagapanikasog nga magkooperar sa sekular nga mga awtoridad

[Retrato sa pahina 31]

Ang mga Saksi kilala sa pagbulig sa ila mga kaingod