“Ipakita ang Inyo Kaugalingon nga Mapinasalamaton”

“Tuguti ang paghidait ni Cristo nga maggahom sa inyo tagipusuon . . . Kag ipakita ang inyo kaugalingon nga mapinasalamaton.”​​—⁠COLOSAS 3:⁠15.

1. Ano ang kinatuhayan sa ulot sang Cristianong kongregasyon kag sang kalibutan nga ginakontrol ni Satanas?

SA 94,600 ka kongregasyon sang mga Saksi ni Jehova sa bug-os nga kalibutan, nagaluntad ang mapinasalamaton nga panimuot. Ang tagsa ka miting nagasugod kag nagatakop sa isa ka pangamuyo nga nagalakip sang mga ekspresyon sang pagpasalamat kay Jehova. Pirme naton mabatian ang “salamat,” “wala sing ano man,” ukon ang kaanggid nga mga ekspresyon sa mga bibig sang lamharon kag tigulang subong man sa mga bag-uhan kag madugay na nga mga Saksi samtang nagapakigbahin sila sa pagsimba kag sa makalilipay nga pagpakig-upod. (Salmo 133:1) Kabaliskaran gid ini sa pagkamaiyaiyahon nga nagaluntad sa tunga sang ‘mga wala nagakilala kay Jehova kag sa mga wala nagatuman sa maayong balita’! (2 Tesalonica 1:8) Nagakabuhi kita sa isa ka di-mapinasalamaton nga kalibutan. Kag indi ini katingalahan kon binagbinagon naton kon sin-o ang dios sining kalibutan​—⁠si Satanas nga Yawa, ang labing daku nga tagsakdag sang pagkamaiyaiyahon, nga ang iya bugal kag pagkarebelyuso nagalatom sa tawhanon nga katilingban!​—⁠Juan 8:​44; 2 Corinto 4:⁠4; 1 Juan 5:⁠19.

2. Ano nga paandam ang dapat naton pamatian, kag ano nga mga pamangkot ang aton binagbinagon?

² Bangod napalibutan kita sang kalibutan ni Satanas, kinahanglan maghalong kita nga indi madagtaan sang mga panimuot sini. Sang unang siglo, ginpahanumdom ni apostol Pablo ang mga Cristiano sa Efeso: “Kamo anay naglakat suno sa sistema sang mga butang sining kalibutan, suno sa manugdumala sang awtoridad sang hangin, ang espiritu nga nagapanghikot karon sa mga anak sang pagkamalalison. Huo, sa tunga nila naggawi anay kita tanan suno sa kailigbon sang aton unod, ginahimo ang mga butang nga ginahandum sang unod kag sang hunahuna, kag kinaugali nga mga anak kita sang kasingkal subong sang iban.” (Efeso  2:​2, 3) Matuod man ini sa madamo karon. Kon amo, paano naton mahuptan ang isa ka mapinasalamaton nga panimuot? Ano nga bulig ang ginaaman ni Jehova? Sa anong praktikal nga mga paagi mapakita naton nga mapinasalamaton gid kita?

Mga Rason sa Pagpasalamat

3. Ngaa dapat gid kita magpasalamat kay Jehova?

³ Dapat gid kita magpasalamat kay Jehova nga Dios, ang aton Manunuga kag Manughatag-Kabuhi, ilabi na kon ginabinagbinag naton ang pila sang bugana nga mga dulot nga ginhatag niya sa aton. (Santiago 1:17) Kada adlaw, ginapasalamatan naton si Jehova nga buhi kita. (Salmo 36:9) Sa palibot naton, makita naton ang madamo nga pamatuod sang mga binuhatan ni Jehova, subong sang adlaw, bulan, kag mga bituon. Ang bugana nga nagasakdag-kabuhi nga mga mineral sa aton planeta, ang nabalanse sing maayo nga misklada sang importante nga mga gas sa atmospera, kag ang masibod nga mga siklo sang kinaugali nagapamatuod tanan sang aton utang sa aton mahigugmaon kag langitnon nga Amay. “Madamo nga butang ang imo nahimo, O Jehova nga akon Dios,” amba ni Hari David, “bisan ang imo makatilingala nga mga binuhatan kag ang imo mga hunahuna sa amon; wala sing bisan sin-o nga mapaanggid sa imo. Handumon ko man nga magsugid kag maghambal tuhoy sa sini, mas madamo ini sangsa akon sarang masugid.”​—⁠Salmo 40:5.

4. Ngaa dapat naton pasalamatan si Jehova bangod sang malipayon nga pagpakig-upod nga natigayon naton sa aton mga kongregasyon?

⁴ Bisan pa nga wala kita nagapuyo sa pisikal nga paraiso, ang mga alagad ni Jehova karon nagakabuhi sa espirituwal nga paraiso. Sa aton mga Kingdom Hall kag sa aton mga kombension kag mga asambleya, naeksperiensiahan naton ang mga bunga sang espiritu sang Dios nga nagapanghikot sa aton mga masigkatumuluo. Sa pagkamatuod, kon nagabantala sa mga tawo nga may diutay ukon wala sing nahibaluan sa relihion, ang pila ka Saksi nagapatuhoy sa kon ano ang ginlaragway ni Pablo sa iya sulat sa mga taga-Galacia. Ginapatalupangod anay nila ang “mga buhat sang unod” kag nagapamangkot sa mga tagpalamati kon ano ang ila natalupangdan. (Galacia 5:​19-​23) Ang kalabanan nagaugyon dayon nga amo ini ang nagakatabo sa tawhanon nga katilingban karon. Sang ginlaragway ang mga bunga sang espiritu sang Dios kag sang gin-agda sa lokal nga Kingdom Hall agod makita nila mismo ini, madamo ang nagbaton dayon: “Kaupod gid ninyo ang Dios.” (1 Corinto 14:25) Kag wala lamang ini nagakatabo sa lokal nga Kingdom Hall. Bisan diin ka magkadto, kon masugilanon mo ang bisan sin-o  sa kapin sa anom ka milyon ka Saksi ni Jehova, masapwan mo man ang kaanggid nga malipayon nga espiritu. Sa pagkamatuod, ining makapalig-on nga pagpakig-upod amo ang rason sa pagpasalamat kay Jehova, ang isa nga naghatag sang iya espiritu agod mangin posible ini.​—⁠Sofonias 3:⁠9; Efeso 3:​20, 21.

5, 6. Paano naton mapakita nga mapinasalamaton kita sa labing daku nga dulot sang Dios, ang gawad?

⁵ Ang labing daku kag labing himpit nga dulot nga ginhatag ni Jehova amo ang iya Anak, si Jesus. Sia amo ang gin-aman subong halad nga gawad. “Kon amo ini ang paagi nga ang Dios naghigugma sa aton,” sulat ni apostol Juan, “nian kita mismo obligado nga maghigugmaanay.” (1 Juan 4:11) Huo, ginapakita naton nga mapinasalamaton kita sa gawad indi lamang sa pagpabutyag sang gugma kag pagpasalamat kay Jehova kundi sa pagkabuhi man sa paagi nga nagapakita sang gugma sa iban.​—⁠Mateo 22:​37-​39.

⁶ Makatuon pa kita sing dugang sa pagpakita sing pagpasalamat paagi sa pagbinagbinag sa pagpakig-angot ni Jehova sa dumaan nga Israel. Paagi sa Kasuguan, nga ginhatag niya sa pungsod paagi kay Moises, gintudluan ni Jehova ang katawhan sang madamo nga leksion. Paagi sa “balayan sang ihibalo kag sang kamatuoran sa Kasuguan,” madamo ang aton matun-an nga makabulig sa aton nga sundon ang laygay ni Pablo: “Ipakita ang inyo kaugalingon nga mapinasalamaton.”​—⁠Roma 2:​20; Colosas 3:⁠15.

Tatlo ka Leksion Gikan sa Mosaikong Kasuguan

7. Paano ang kahimusan sa paghatag sing ikapulo naghatag sing kahigayunan sa mga Israelinhon nga ipakita ang ila pagkamapinasalamaton kay Jehova?

⁷ Sa Mosaikong Kasuguan, ginpakita ni Jehova ang tatlo ka paagi nga sarang mapakita sang mga Israelinhon ang ila matuod nga apresasyon sa iya kaayo. Una, yara ang paghatag sing ikapulo. Ang ikapulo nga bahin sang patubas sang duta, lakip ang “ikapulo nga bahin sang panong,” mangin “butang nga balaan kay Jehova.” (Levitico 27:​30-​32) Sang nagtuman ang mga Israelinhon, ginpakamaayo sila sing bugana ni Jehova. “‘Dalha ninyo ang bug-os nga ikapulo sa tambubo, agod may pagkaon sa akon balay; kag tilawi ako, palihug, sa sini nga butang,’ siling ni Jehova sang mga kasuldadusan, ‘kon indi ko pagbuksan sa inyo ang mga talambuan sang langit kag iula sa inyo ang pagpakamaayo tubtob nga wala na sing kakulang.’”​—⁠Malaquias 3:10.

8. Ano ang kinatuhayan sang boluntaryo nga mga amot gikan sa paghatag sing ikapulo?

⁸ Ikaduha, bilang dugang sa kahimusan sa paghatag sang ikapulo, gin-organisar ni Jehova ang mga Israelinhon nga mag-amot sing kinabubut-on. Ginsugo niya si Moises nga silingan ang mga Israelinhon: “Sa pag-abot ninyo sa duta nga dal-an ko sa inyo, mahanabo nga kon magkaon kamo sang bisan ano nga tinapay sang duta, dapat kamo mag-amot para kay Jehova.” Ang pila sang unang mga bunga sang ila “mabahol nga harina nga ginhimo nga matipulon nga tinapay” ipresentar subong ‘amot para kay Jehova’ sa tanan nila nga kaliwatan. Talupangda nga wala sing espesipiko nga kadamuon sining unang mga bunga ang ginsambit. (Numeros 15:18-21) Apang sang naghatag ang mga Israelinhon sang amot sa pagpasalamat, pat-od  ang pagpakamaayo ni Jehova sa ila. Ang kaanggid man nga kahimusan makita may kaangtanan sa templo sa palanan-awon ni Ezequiel. Aton mabasa: “Ang una nga mga bunga sang bisan ano kag sang tagsa ka amot sa tanan ninyo nga mga amot​—⁠ini makadto sa mga saserdote; kag ang nahaunang mga bunga sang inyo mabahol nga harina dapat ihatag ninyo sa saserdote, agod pakamaayuhon ang inyo puluy-an.”​—⁠Ezequiel 44:⁠30.

9. Ano ang gintudlo ni Jehova paagi sa kahimusan sang pagpanaghaw?

⁹ Ikatlo, ginpahanugot ni Jehova ang pagpanaghaw. “Kon mag-ani kamo sang alanyon sang inyo duta,” sugo sang Dios, “indi mo pag-uruton sing ani ang mga higad sang imo uma, kag indi mo pagkuhaon ang salaghawon sang imo alanyon. Subong man, indi mo pag-ipuon ang mga nabilin sang imo ulubasan, kag indi mo pagpuluton ang naglinapta nga mga ubas sang imo ulubasan. Ibilin mo ini para sa nasit-an kag sa dumuluong nga pumuluyo. Ako amo si Jehova nga inyo Dios.” (Levitico 19:​9, 10) Sa liwat, wala sing pat-od nga kadamuon ang ginsugo. Nagadepende ini sa pamat-od sang tagsa ka Israelinhon kon daw ano kadamo ang ila ibilin sa mga imol. Ang maalam nga si Hari Solomon nagakaigo nga nagpaathag: “Sia nga nagapakita sing kaluoy sa imol nagapahulam kay Jehova, kag bayaran Niya sia sa iya ginabuhat.” (Hulubaton 19:17) Sa amo si Jehova nagtudlo sing kaluoy kag konsiderasyon para sa mga kubos.

10. Ano ang nangin resulta para sa katawhan sang Israel sang nangin di-mapinasalamaton sila?

¹⁰ Ginpakamaayo ni Jehova ang mga Israelinhon sang ginsunod nila sing matutom ang paghatag sing ikapulo, boluntaryo nga mga amot, kag pag-aman sa mga imol. Apang sang nangin di-mapinasalamaton ang katawhan sang Israel, nadula nila ang kahamuot ni Jehova. Nagresulta ini sang kalaglagan kag sang ulihi sang pagkatapok. (2 Cronica 36:​17-​21) Ano nian ang mga leksion para sa aton?

Ang mga Pagpasalamat Naton

11. Ano ang panguna nga paagi nga sarang naton mapasalamatan si Jehova?

¹¹ Ang panguna nga paagi nga madayaw naton si Jehova kag mapasalamatan sia nagalakip man sang “halad.” Matuod, subong mga Cristiano wala na kita napaidalom sa Mosaikong Kasuguan, nga obligado sa paghalad sing mga sapat ukon mga patubas. (Colosas 2:14) Walay sapayan, si apostol Pablo nagpalig-on sa Hebreong mga Cristiano: “Maghalad kita pirme sa Dios sing halad sang pagdayaw, nga amo, ang bunga sang mga bibig nga nagapahayag sing dayag sang iya ngalan.” (Hebreo 13:15) Paagi sa paggamit sang aton mga ikasarang kag mga pagkabutang agod maghalad sing pagdayaw kay Jehova, sa dayag man nga ministeryo ukon sa “nagatipon nga katilingban” sang mga masigka-Cristiano, sarang naton mapabutyag ang tinagipusuon nga pagpasalamat sa aton langitnon kag mahigugmaon nga Amay, si Jehova nga Dios. (Salmo 26:12) Sa paghimo sini, ano ang matun-an naton gikan sa mga paagi diin ang mga Israelinhon nagpabutyag sang ila pagpasalamat kay Jehova?

12. Kon tuhoy sa aton responsabilidad subong mga Cristiano, ano ang matun-an naton gikan sa kahimusan sang paghatag sing ikapulo?

¹² Una sa tanan, subong sang aton nakita, ang kahimusan sang paghatag sing ikapulo indi boluntaryo; ang tagsa ka Israelinhon may obligasyon tuhoy sa sini. Subong mga Cristiano, may responsabilidad kita nga makigbahin sa ministeryo kag magtambong sa Cristianong mga miting. Ining mga hilikuton indi boluntaryo. Sa iya daku nga tagna tuhoy sa tion sang katapusan, si Jesus maathag nga nagsiling: “Ining maayong balita sang ginharian ibantala sa bug-os napuy-an nga duta subong panaksi sa tanan nga kapungsuran; kag ugaling magaabot ang katapusan.” (Mateo 24:14; 28:​19, 20) Tuhoy sa Cristianong mga miting, si apostol Pablo gin-inspirar nga magsulat: “Binagbinagon naton ang isa kag isa agod pukawon sa gugma kag sa maayong mga buhat, nga wala ginapabay-an ang aton pagtilipon, subong sang kinabatasan sang iban, kundi nagapalig-unay sa isa kag isa, kag labi na gid samtang ginatan-aw ninyo nga nagapalapit ang adlaw.” (Hebreo 10:​24, 25) Sarang naton mapakita ang aton pagkamapinasalamaton kay Jehova kon malipayon nga ginabaton naton ang responsabilidad nga magbantala kag magtudlo kag subong man makig-upod sa aton mga kauturan sing regular sa mga miting sang kongregasyon, nagatamod sa sini subong isa ka pribilehiyo kag isa ka kadungganan.

13. Ano nga leksion ang natigayon gikan sa mga kahimusan sang boluntaryo nga mga amot kag pagpanaghaw?

¹³ Dugang pa, makabenepisyo kita gikan sa pagbinagbinag sang duha pa ka kahimusan nga sarang mapakita sang mga Israelinhon ang ila  apresasyon​—⁠boluntaryo nga mga amot kag pagpanaghaw. Kabaliskaran sa paghatag sing ikapulo, nga ginapatuman nga may maathag nga kasuguan, ang boluntaryo nga mga amot kag ang kahimusan sang pagpanaghaw wala nagakinahanglan sang pat-od nga kadamuon. Sa baylo, ginapahulag ini sang tagipusuon depende sa kadalumon sang apresasyon sang isa ka alagad ni Jehova. Sing kaanggid, bisan pa nahangpan naton nga ang panguna nga responsabilidad sang tagsa ka alagad ni Jehova amo ang pagpakigbahin sa ministeryo kag pagtambong sa Cristianong mga miting, nagapakigbahin bala kita sing bug-os tagipusuon kag sing kinabubut-on? Ginatamod bala naton ini subong kahigayunan agod mapabutyag ang tinagipusuon nga apresasyon sa tanan nga nahimo sa aton ni Jehova? Pirme bala kita nagapakigbahin sa sining mga hilikuton, tubtob ginatugot sang aton kahimtangan? Ukon ginatamod lang bala naton ini subong isa lamang ka obligasyon nga dapat naton himuon? Sa pagkamatuod, ining mga pamangkot dapat naton sabton sing personal. Ginpabutyag ini ni apostol Pablo sa sining paagi: “Pamatud-an sang kada isa kon ano ang iya kaugalingon nga binuhatan, kag nian ang rason niya sa pagpabugal mangin sa iya kaugalingon lamang, kag indi sa pagpaanggid sa iban.”​—⁠Galacia 6:4.

14. Ano ang ginapaabot ni Jehova sa aton pag-alagad sa iya?

¹⁴ Nahibaluan gid ni Jehova nga Dios ang aton mga kahimtangan. Nahibaluan niya ang aton mga limitasyon. Ginapabaloran niya ang mga halad, daku ukon gamay, nga ginahatag sing kinabubut-on sang iya mga alagad. Wala niya ginapaabot nga pareho ang kadamuon sang aton ginahatag, ukon sarang naton ini mahimo. Sang nagahambal tuhoy sa paghatag sing materyal, si apostol Pablo nagsiling sa mga Cristiano sa Corinto: “Kon ang pagkahanda yara na nga daan, labi ini nga kalahamut-an suno sa yara sa isa ka tawo, indi suno sa wala sa iya.” (2 Corinto 8:12) Ini nga prinsipio naaplikar man sa aton pag-alagad sa Dios. Indi ang kadamuon sang aton ginahimo ang rason agod kahamut-an ni Jehova ang aton pag-alagad kundi kon paano naton ini ginahimo​—⁠sing malipayon kag bug-os tagipusuon.​—⁠Salmo 100:​1-5; Colosas 3:⁠23.

Palambua kag Hupti ang Espiritu sa Pagpayunir

15, 16. (a) Ano ang kaangtanan sa ulot sang pagpayunir kag pagkamapinasalamaton? (b) Paano mapakita sang mga indi makapayunir ang espiritu sa pagpayunir?

¹⁵ Ang isa ka makapaladya nga paagi agod ipakita ang aton pagkamapinasalamaton kay Jehova  amo ang pagsulod sa bug-os tion nga ministeryo. Napahulag sang gugma kay Jehova kag pagpasalamat sa iya di-bagay nga kaayo, madamo sang dedikado nga mga alagad ang nagbag-o sing daku sang ila kabuhi agod dugang pa nga tion ang mahinguyang nila sa pag-alagad kay Jehova. Ang iban nangin regular payunir, nga nagahinguyang sing 70 ka oras sa promedyo kada bulan sa pagbantala sing maayong balita kag pagtudlo sing kamatuoran sa mga tawo. Ang iban, nga ayhan limitado ang mahimo bangod sang nagkalainlain nga mga kahimtangan, nagahinguyang sa pulupanag-on sing 50 ka oras sa isa ka bulan subong auxiliary payunir.

¹⁶ Apang kamusta naman yadtong madamo nga mga alagad ni Jehova nga indi makaregular ukon makaauxiliary payunir? Mapakita nila ang pagkamapinasalamaton paagi sa pagpalambo kag paghupot sing espiritu sa pagpayunir. Paano? Paagi sa pagpalig-on sa mga sarang makapayunir, paagi sa pagpatudok sa ila kabataan sing handum nga himuon nga karera ang bug-os tion nga pag-alagad, kag paagi sa pagpakigbahin sing makugi sa pagbantala suno sa ila mga kahimtangan. Ang aton mahimo sa ministeryo nagadepende sa kadalumon sang aton apresasyon sa kon ano ang nahimo, ginahimo, kag himuon pa ni Jehova para sa aton.

Pagpakita sing Pagkamapinasalamaton Paagi sa Aton “Bilidhon nga mga Butang”

17, 18. (a) Paano naton mapakita ang pagkamapinasalamaton paagi sa aton “bilidhon nga mga butang”? (b) Ano nga pagbinagbinag ang ginhimo ni Jesus sa amot sang balo nga babayi, kag ngaa?

¹⁷ “Padunggi si Jehova paagi sa imo bilidhon nga mga butang,” siling sang Hulubaton 3:​9, “kag paagi sa nahauna nga mga bunga sang tanan mo nga patubas.” Ang mga alagad ni Jehova indi na kinahanglan maghatag sing ikapulo. Sa baylo, si Pablo nagsulat sa kongregasyon sa Corinto: “Maghimo ang kada isa suno sa ginpamat-od niya sa iya tagipusuon, indi sing paganot ukon ginapilit, kay ang Dios nagahigugma sa malipayon nga nagahatag.” (2 Corinto 9:7) Ang pag-amot sing boluntaryo agod sakdagon ang bug-os kalibutan nga hilikuton sa pagbantala sing Ginharian nagapakita man sang aton pagkamapinasalamaton. Ang tinagipusuon nga apresasyon nagapahulag sa aton nga himuon ini sing regular, ayhan nagapain sing pila ka butang kada semana, subong sang ginhimo sang mga Cristiano sang una.​—⁠1 Corinto 16:​1, 2.

¹⁸ Indi ang kadamuon sang aton ginaamot ang nagapakita sang aton pagkamapinasalamaton kay Jehova. Sa baylo, ini amo ang espiritu sang aton paghatag. Amo sini ang ginpanilagan ni Jesus sang nagtan-aw sia sa mga tawo nga naghulog sang ila mga dulot sa bahandian sang templo. Sang makita ni Jesus ang imol nga balo nga babayi nga naghulog sang “duha ka gamay nga sensilyo nga diutay gid sing balor,” sia nagsiling: “Sa pagkamatuod, nagasiling ako sa inyo, Ining balo nga babayi, walay sapayan nga imol, naghulog sing labi pa sangsa ila tanan. Kay sila tanan naghulog sing mga dulot gikan sa ila kabuganaan, apang ining babayi gikan sa iya kinawad-on naghulog sang tanan nga inugpangabuhi niya.”​—⁠Lucas 21:​1-4.

19. Ngaa maayo nga binagbinagon liwat ang mga paagi nga ginapakita naton ang aton pagkamapinasalamaton?

¹⁹ Kabay nga ining pagtinuon sa kon paano naton mapakita ang pagkamapinasalamaton magapahulag sa aton nga binagbinagon liwat ang mga paagi nga sarang naton mapakita ang aton pagpasalamat. Sarang pa bala naton mapauswag ang aton halad sang pagdayaw kay Jehova kag ang aton pagsakdag sa bug-os kalibutan nga hilikuton sa materyal nga paagi? Tubtob sa kasangkaron nga mahimo naton ini, makasalig kita nga ang aton maalwan kag mahigugmaon nga Amay, si Jehova, mahamuot gid nga ginapakita naton ang aton pagkamapinasalamaton.

Madumduman Mo Bala?

• Sa anong mga rason nga dapat kita mangin mapinasalamaton kay Jehova?

• Ano nga mga leksion ang aton matun-an gikan sa paghatag sing ikapulo, sa boluntaryo nga mga amot, kag sa pagpanaghaw?

• Paano naton mapalambo ang espiritu sa pagpayunir?

• Paano naton magamit ang aton “bilidhon nga mga butang” agod pasalamatan si Jehova?

[Mga Pamangkot sa Pagtinuon]

[Mga retrato sa pahina 15]

“Ang tagsa ka maayong dulot kag tagsa ka himpit nga regalo nagagikan sa hitaas”

[Mga retrato sa pahina 16]

Anong tatlo ka leksion gikan sa Kasuguan ang ginapakita diri?

[Mga retrato sa pahina 18]

Ano nga mga halad ang sarang naton mahimo?