Ang Pamilya ni Jesus—Sin-o Sila?

SA MADAMO nga bahin sang duta, masami mo makit-an kon Disiembre ang mga danyag sang lapsag nga si Jesus nga mapinalanggaon nga ginaatipan sang iya iloy, nga si Maria, kag sang amay nga nag-adoptar sa iya, si Jose. Mahimo maganyat sining mga danyag bisan ang wala nagapangangkon nga mga Cristiano. Sanglit nasentro kay Jesus ini nga mga danyag, ano ang ginasugid sa aton sang Kasulatan tuhoy sa tawhanon nga pamilya ni Jesus?

Interesante gid ang gindak-an nga pamilya ni Jesus. Ginbata sia sang isa ka birhen nga si Maria, gani nangin miembro sia sang tawhanon nga pamilya. Suno sa Biblia, ginliton ang iya kabuhi gikan sa langit sa taguangkan ni Maria paagi sa balaan nga espiritu. (Lucas 1:​30-​35) Antes ginpahibalo ang milagruso nga pagpanamkon kay Jesus, kalaslon si Maria sa isa ka lalaki nga si Jose, nga nian nangin amay nga nag-adoptar kay Jesus.

Pagkatapos matawo si Jesus, nakaangkon sanday Jose kag Maria sang iban pa nga mga anak, ang mga manghod-sa-iloy ni Jesus. Maathag ini gikan sa palamangkutanon sa ulihi sang mga pumuluyo sang Nasaret tuhoy kay Jesus: “Indi bala ini ang anak sang panday? Indi bala nga ang iya iloy ginatawag si Maria, kag ang iya mga utod nga lalaki si Santiago kag si Jose kag si Simon kag si Judas? Kag ang iya mga utod nga babayi, indi bala sila tanan kaupod naton?” (Mateo 1:​25; 13:​55, 56; Marcos 6:3) Makahinakop kita gikan sa sini nga ang mga katapo sang suod nga pamilya ni Jesus amo ang iya mga ginikanan, apat ka manghod nga lalaki, kag indi magkubos sa duha ka manghod nga babayi.

Apang, ang pila karon wala nagapati nga kabataan nanday Jose kag Maria ang mga utod ni Jesus. Ngaa? “Ang Simbahan,” siling sang New Catholic Encyclopedia, “nagtudlo halin sang una pa nga si Maria nagpabilin nga isa ka birhen. Gani, bangod sini, walay duhaduha nga si Maria wala na sing iban pa nga kabataan.” Ang amo man nga reperensia nangangkon nga ang mga tinaga nga “utod nga lalaki” kag “utod nga babayi” mahimo magpatuhoy sa “isa ukon pila ka tawo nga nahiusa sa isa ka relihioso ukon iban pa nga kinaandan nga kaangtanan” ukon sa mga paryente, ayhan mga pakaisa.

Matuod gid bala ini? Bisan ang pila ka Katoliko nga mga teologo, nga wala nagaugyon sa tradisyonal nga doktrina, nagapati nga may undanon nga mga utod si Jesus. Si John P. Meier, presidente anay sang Catholic Bible Association of America, nagsulat: “Sa Bag-o nga Testamento ang adelphos [Griego nga tinaga para sa “utod nga lalaki”], kon ginagamit indi lamang sing malaragwayon ukon sa pagpaanggid kundi sa baylo sa pagpatuhoy sa pila ka pisikal ukon legal nga kaangtanan, nagakahulugan lamang sing utod nga lalaki ukon utod nga lalaki sa iloy ukon amay, kag wala na sing iban pa.”⁠ * Huo, ang Kasulatan nagapakita nga may mga manghod si Jesus nga kabataan nanday Jose kag Maria.

Ginahinambitan man sa mga Ebanghelyo ang iban pa nga mga paryente ni Jesus, apang makonsentrar lang kita karon sa suod nga pamilya ni Jesus kag tan-awon naton kon ano ang aton matun-an sa ila.

[Nota]