Ginapalambo Mo bala ang Pagbatyag sing Katingala?

NATALUPANGDAN mo bala nga sulitsulit nga ginapukaw sang mga manunulat sang Biblia ang pagkatingala kon ginakilala nila ang mga buhat kag mga kinaiya sang Dios? “Ginhimo ako sing makatilingala,” siling sang salmista. (Salmo 139:14) “O Jehova,” sulat ni manalagna Isaias, “ikaw ang akon Dios. Ginapakataas ko ikaw, ginadayaw ko ang imo ngalan, kay naghimo ka sing makatilingala nga mga butang.” (Isaias 25:1) Ukon hunahunaa ang katingala kag kahayanghag nga ginpabutyag sa mga pulong ni apostol Pablo: “O pagkadalom sang kamanggaran kag kaalam kag ihibalo sang Dios!”​​—⁠Roma 11:33.

Ginahatag sang The Oxford Encyclopedic English Dictionary ang kahulugan sang “katingala” subong “isa ka emosyon nga napukaw sang isa ka butang nga wala ginapaabot, indi pamilyar, ukon indi mapaathag, ilabi na sang kakibot nga may lakip nga pagdayaw ukon pagkamausisaon, kag iban pa.”

Indi bala makalilipay nga makita ang magamay nga mga kabataan nga nagamurahag ang mga mata sa katingala kon sila makakita, makabatyag, ukon makabati sang mga butang nga bag-o sa ila? Sing makapasubo, ini nga katingala nga napasad sa pagkamausisaon ukon namag-o lamang masami nga nagatahaw pagligad sang tinuig.

Apang, para sa mga manunulat sang Biblia nga ginkutlo bag-o lang, ang pagbatyag sing kahayanghag bahin sang ila kinaugali. Mapinadayunon ini. Ngaa? Bangod ginpalambo nila ang pagbatyag sing katingala paagi sa mainapresyahon nga pagpamalandong sa mga binuhatan sang Dios. Ang salmista nangamuyo: “Ginhunahuna ko ang mga tinuig nga nagligad, ang handumanan sang tanan mo nga hinimuan; ginahunahuna ko ang mga kalatingalahan sang imo tinuga.”​​—⁠Salmo 143:​5, The New English Bible.

Dalayawon gid nga ining pagkatingala makita sa modernong-adlaw nga mga sumilimba sang Dios! Yara man bala ini sa imo? Ginapalambo mo bala ini?