Ipahayag sang Tanan ang Himaya ni Jehova

“Ipahanungod sa GINUO ang himaya kag ang kusog! Ipahanungod sa GINUO ang himaya nga naigo sa iya ngalan.”​—⁠SALMO 96:​7, 8.

1, 2. Diin nagagikan ang himaya nga ginapatungod kay Jehova, kag sin-o ang ginapalig-on nga magbuylog sa sini?

SI David, nga anak ni Jesse, nagdaku nga isa ka manugbantay sing karnero sa Betlehem. Mahimo gid nga masunson sia nagatangla sa malapad nga kalangitan nga puno sing kabituunan sa malinong nga kagab-ihon samtang ginabantayan ang panong sang iya amay sa nabaw-ing nga mga halalban! Wala duhaduha nga nadumduman niya ining maathag nga talan-awon sang gin-inspirar sia sang balaan nga espiritu sang Dios nga isulat kag ambahon ang matahom nga pinamulong sa ika-19 nga Salmo: “Ang mga langit nagapahayag sang himaya sang Dios; kag ang kahawaan nagapakita sang binuhatan sang iya mga kamot. Ang ila latid naggua sa bug-os gid nga duta, kag ang ila mga pulong sa ukbong sang kalibutan.”​—⁠Salmo 19:​1, 4.

² Wala sing paghambal, wala sing pulong, wala sing tingog, ang makahalawhaw nga kalangitan nga gintuga ni Jehova nagapahayag sang iya himaya, adlaw-adlaw, kag gab-igab-i. Ang mga tinuga wala gid nagauntat sa pagpahayag sing himaya sang Dios, kag makapakubos ang paghunahuna sa sining mahipos nga testimonya nga nagapadayag “sa bug-os gid nga duta” agod makita sang mga pumuluyo sini. Apang, ang mahipos nga panaksi sang mga tinuga indi pa tuman. Ang matutom nga mga tawo ginapalig-on nga magbuylog sa paghambal subong panaksi. Ang wala mahingadlan nga salmista nagsiling sa matutom nga mga sumilimba paagi sa sining inspirado nga mga pulong: “Ipahanungod sa GINUO ang himaya kag ang kusog! Ipahanungod sa GINUO ang himaya nga naigo sa iya ngalan.” (Salmo 96:​7, 8) Ang mga may suod nga kaangtanan kay Jehova nalipay sa pagsunod sa sining laygay. Apang, ano ang nadalahig sa pagpatungod sing himaya sa Dios?

3. Ngaa ginahimaya sang mga tawo ang Dios?

³ Indi lamang mga pulong ang kinahanglan. Ang mga Israelinhon sang panahon ni Isaias naghimaya sa Dios paagi sa ila mga bibig, apang ang kalabanan indi sinsero. Paagi kay Isaias si Jehova nagsiling: “Ini nga katawhan nagapalapit sa akon sa ila baba kag sa ila mga bibig nagatahod [“nagahimaya,” NW] sa akon, apang ang ila tagipusuon malayo sa akon.” (Isaias 29:13) Ang bisan ano nga pagdayaw nga ginabungat sining mga indibiduwal wala sing pulos. Agod mangin mapuslanon,  ang pagdayaw dapat nagagikan sa tagipusuon nga puno sing gugma kay Jehova kag sa sinsero nga pagkilala sang iya tumalagsahon nga himaya. Si Jehova lamang ang Manunuga. Sia ang Labing Gamhanan, ang Labing Matarong, ang personipikasyon sang gugma. Sa iya nagagikan ang aton kaluwasan kag sia ang may kinamatarong nga Soberano nga dapat magpasakop ang tanan nga nagakabuhi sa langit kag sa duta. (Bugna 4:​11; 19:1) Kon ginapatihan gid naton ini nga mga butang, himayaon naton sia sing bug-os tagipusuon.

4. Ano nga mga instruksion ang ginhatag ni Jesus tuhoy sa kon paano himayaon ang Dios, kag paano naton ini matuman?

⁴ Ginsugiran kita ni Jesucristo kon paano himayaon ang Dios. Sia nagsiling: “Paagi sini ginahimaya ang akon Amay, nga magpamunga kamo sing madamo, kag sa amo magpamatuod nga kamo mga gintutun-an ko.” (Juan 15:8) Paano kita makapamunga sing madamo? Una, paagi sa pagpakigbahin sing bug-os kalag sa pagwali sing “maayong balita sang ginharian” kag sa amo nagabuylog sa tanan nga tinuga sa pagsugid tuhoy sa “di-makita nga mga pagkahimpit” ukon di-makita nga mga kinaiya sang Dios. (Mateo 24:14; Roma 1:20) Dugang pa, sa sining paagi tanan kita nagapakigbahin​—⁠sing direkta ukon di-direkta​—⁠sa paghimo sing bag-o nga mga disipulo nga nagapabaskog sa ambahanon sang pagdayaw kay Jehova nga Dios. Ikaduha, ginapalambo naton ang mga bunga nga ginapatubas sa aton sang balaan nga espiritu kag nagatinguha nga ilugon ang superlatibo nga mga kinaiya ni Jehova nga Dios. (Galacia 5:​22, 23; Efeso 5:⁠1; Colosas 3:10) Bilang resulta, ang aton paggawi sa adlaw-adlaw nagahimaya sa Dios.

“Sa Bug-os nga Duta”

5. Ipaathag kon paano ginpadaku ni Pablo ang salabton sang mga Cristiano sa paghimaya sa Dios paagi sa pagpaambit sang ila pagtuo sa iban.

⁵ Ginpadaku ni Pablo sa iya sulat sa mga taga-Roma ang salabton sang mga Cristiano nga himayaon ang Dios paagi sa pagpaambit sang ila pagtuo sa iban. Ang panguna nga tema sang tulun-an nga Roma amo nga ang mga nagatuo lamang kay Jesucristo ang maluwas. Sa kapitulo 10 sang iya sulat, ginpakita ni Pablo nga ang kinaugali nga Israel sang panahon niya nagtinguha gihapon nga maangkon ang matarong nga tindog paagi sa pagsunod sa Mosaikong Kasuguan, samtang “si Cristo amo ang katapusan sang Kasuguan.” Gani, si Pablo nagsiling: “Kon itu-ad mo sang imo baba nga si Jesus Ginuo kag magtuo sa imo tagipusuon nga ang Dios nagbanhaw sa iya, maluwas ka.” Sugod sadto, “walay ginkalainan sa Judiyo kag Griego; kay ang amo nga Ginuo man Ginuo sang tanan kag nagahatag sang iya mga manggad sa tanan nga nagapanawag sa iya. Kay, ‘ang bisan sin-o nga magtawag sa ngalan sang Ginuo maluwas.’”​—⁠Roma 10:​4, 9-​13.

6. Paano gin-aplikar ni Pablo ang Salmo 19:4?

⁶ Nian namangkot si Pablo: “Paano bala ang pagpanawag nila sa iya nga wala nila matuuhi? Kag paano bala ang pagtuo nila sa iya nga wala nila mabatii? Kag paano bala ang pagkabati nila kon walay manugwali?” (Roma 10:​14) Tuhoy sa Israel si Pablo nagsiling: “Indi ang tanan sa ila nagtuman sang maayong balita.” Ngaa wala magtuman ang Israel? Bangod wala sila sing pagtuo, indi bangod wala sila sing kahigayunan. Ginpakita ini ni Pablo paagi sa pagkutlo sa Salmo 19:4 kag gin-aplikar ini sa Cristianong hilikuton nga pagbantala sa baylo nga sa mahipos nga panaksi sang mga tinuga. Sia nagsiling: “Huo sa pagkamatuod; kay ‘ang ila tingog naglapnag sa bug-os nga duta, kag ang ila mga pulong tubtob sa mga ukbong sang kalibutan.’” (Roma 10:​16, 18) Huo, subong nga ang wala-kabuhi nga tinuga nagahimaya kay Jehova, ang mga Cristiano sang unang siglo nagbantala sing maayong balita sang kaluwasan bisan diin kag sa amo nagdayaw sa Dios sa “bug-os nga duta.” Sa iya sulat sa mga taga-Colosas, ginlaragway man ni Pablo kon daw ano kasangkad ang paglapnag sing maayong balita. Nagsiling sia nga ang maayong balita nabantala na “sa bug-os nga tinuga sa idalom sang langit.”​—⁠Colosas 1:23.

 Makugi nga mga Saksi

7. Suno kay Jesus, ano ang salabton sang mga Cristiano?

⁷ Mahimo nga ginsulat ni Pablo ang iya sulat sa mga taga-Colosas mga 27 ka tuig pagkatapos sang kamatayon ni Jesucristo. Paano naglapnag ang hilikuton nga pagbantala tubtob sa Colosas sa malip-ot lamang nga tion? Natabo ini bangod makugi ang mga Cristiano sang unang siglo, kag ginpakamaayo ni Jehova ang ila kakugi. Gintagna ni Jesus nga ang iya mga sumulunod mangin aktibo nga mga manugbantala sang nagsiling sia: “Ang maayong balita kinahanglan ibantala anay sa tanan nga kapungsuran.” (Marcos 13:10) Sa sini nga tagna, gindugang ni Jesus ang sugo nga nasulat sa katapusan nga mga bersikulo sang Ebanghelyo ni Mateo: “Busa lakat kamo kag himuon nga mga gintutun-an ang tanan nga kapungsuran, nga nagabawtismo sa ila sa ngalan sang Amay kag sang Anak kag sang Espiritu Santo [“balaan nga espiritu,” NW], nga nagapanudlo sa ila sa pagtuman sang tanan nga ginsugo ko sa inyo.” (Mateo 28:​19, 20) Wala madugay pagkatapos nga nagkayab si Jesus sa langit, gintuman sang iya mga sumulunod ini nga mga pulong.

8, 9. Suno sa Binuhatan, ano ang reaksion sang mga Cristiano sa mga sugo ni Jesus?

⁸ Sa tapos mapasagahay ang balaan nga espiritu sa Pentecostes 33 C.⁠E., ang una nga ginhimo sang matutom nga mga sumulunod ni Jesus amo ang paggua kag magbantala, nga nagasugid sa mga kadam-an sa Jerusalem tuhoy sa “dalagkung mga buhat sang Dios.” Epektibo gid ang ila pagbantala, kag “mga tatlo ka libo ka kalag” ang nabawtismuhan. Ang mga gintutun-an ukon disipulo nagpadayon sa pagdayaw sa Dios sing dayag kag sing makugi, kag may maayo ini nga mga resulta.​—⁠Binuhatan 2:​4, 11, 41, 46, 47.

⁹ Natalupangdan sang ulihi sang relihiosong mga lider ang mga hilikuton sining mga Cristiano. Nahangawa tungod sa kasidla ni Pedro kag ni Juan, ginmanduan nila ang duha ka apostoles nga mag-untat sa pagbantala. Ang mga apostoles nagsabat: “Kami indi makahimo kundi magpamulong sang amon nakita kag nabatian.” Pagkatapos nga ginpahog kag ginbuhian, nagkadto si Pedro kag si Juan sa ila mga kauturan, kag ang tanan nagbuylog sa pagpangamuyo kay Jehova. Maisog sila nga nagpangabay kay Jehova: “Itugot sa imo mga ulipon ang pagpamulong sang imo pulong sa bug-os nga kasidla.”​—⁠Binuhatan 4:​13, 20, 29.

10. Ano nga pagpamatok ang nag-utwas, kag ano ang reaksion sang matuod nga mga Cristiano?

¹⁰ Yadto nga pangamuyo nahisanto sa kabubut-on ni Jehova, nga nangin maathag sa natabo sang ulihi. Ang mga apostoles gindakop apang milagruso nga ginbuhian sang isa ka anghel. Ginsilingan sila sang anghel: “Kadto kamo kag magtindog sa templo kag magpamulong sa katawhan sang tanan nga pulong sining Kabuhi.” (Binuhatan 5:​18-20) Bangod nagtuman ang mga apostoles, padayon sila nga ginpakamaayo ni Jehova. Gani, “sa adlaw-adlaw sa templo kag sa puluy-an wala sila mag-untat sa pagpanudlo kag pagwali  [tuhoy] kay Jesus subong nga Cristo.” (Binuhatan 5:42) Maathag nga ang mabaskog nga pagpamatok indi gid makapauntat sa mga sumulunod ni Jesus sa paghimaya sing dayag sa Dios.

11. Ano ang panimuot sang mga Cristiano sang una sa hilikuton nga pagbantala?

¹¹ Wala madugayi, gindakop si Esteban kag ginbato tubtob mapatay. Ang pagpatay sa iya ginsundan sang mabaskog nga paghingabot sa Jerusalem, kag ang tanan nga mga disipulo magluwas sa mga apostoles napilitan nga mag-alaplaag malayo sa Jerusalem. Naluyahan bala sila bangod sang paghingabot? Wala gid. Aton mabasa: “Ang mga nag-aplaag nagpanglakatan nga nagawali sang pulong.” (Binuhatan 8:​1, 4) Liwat kag liwat nga nakita ining kakugi sa pagpahayag sing himaya sang Dios. Sa Binuhatan kapitulo 9, mabasa naton nga ang Fariseo nga si Saulo nga taga-Tarso, samtang nagapadulong sa Damasco agod hingabuton ang mga disipulo ni Jesus didto, nakakita sing isa ka palanan-awon tuhoy kay Jesus kag nabulag sia. Sa Damasco, milagruso nga gin-ayo ni Ananias ang pagkabulag ni Saulo. Ano ang una nga butang nga ginhimo ni Saulo, nga nakilal-an sang ulihi nga si apostol Pablo? Ang rekord nagasiling: “Sa gilayon ginbantala niya sa mga sinagoga si Jesus, nga nagasiling, ‘Sia amo ang Anak sang Dios.’”​—⁠Binuhatan 9:20.

Ang Tanan Nakigbahin sa Pagbantala

12, 13. (a) Suno sa mga istoryador, ano ang talalupangdon nga butang tuhoy sa Cristianong kongregasyon sang una? (b) Paano ang tulun-an nga Binuhatan kag ang pinamulong ni Pablo nagaugyon sa mga pinamulong sang mga istoryador?

¹² Ginabaton sang madamo nga ang tagsatagsa sa unang Cristianong kongregasyon nakigbahin sa hilikuton nga pagbantala. Tuhoy sa mga Cristiano sadto, si Philip Schaff nagsulat: “Ang tagsa ka kongregasyon isa ka katilingban sang mga misyonero, kag ang tagsa ka Cristianong tumuluo isa ka misyonero.” (History of the Christian Church) Si W. S. Williams nagsiling: “Ang kabilugan nga testimonya amo nga ang tanan nga mga Cristiano sa dumaan nga Simbahan, ilabi na yadtong may dulot nga karisma [mga dulot sang espiritu], nagbantala sing ebanghelyo.” (The Glorious Ministry of the Laity) Nagsiling man sia: “Wala gintuyo ni Jesucristo nga ang pagbantala mangin pribilehiyo lamang sang pila nga may ranggo sa ministeryo.” Bisan si Celsus, ang dumaan nga kaaway sang Cristianismo, nagsulat: “Ang mga nagahabol sing lana, manughimo sapatos, nagaproseso sing panit, ang indi edukado kag kinaandan nga mga tawo, makugi nga mga manugbantala sang ebanghelyo.”

¹³ Ang pagkasibu sini nga mga pinamulong makita sa maragtason nga rekord sang Binuhatan. Sang Pentecostes 33 C.⁠E., sa tapos mapasagahay ang balaan nga espiritu, ang tanan nga mga disipulo, lalaki kag babayi, dayag nga nagpahayag sang dalagku nga mga butang sang Dios. Sang may paghingabot pagkatapos sang pagpatay kay Esteban, ang tanan nga mga Cristiano nga nag-alaplaag sa iban nga lugar nagpalapnag sing maayong balita. Pagligad sang mga 28 ka tuig, nagsulat si Pablo sa tanan nga Hebreong Cristiano, indi lamang sa diutay nga klero nga klase, sang nagsiling sia: “Paagi sa iya maghalad kita sing dalayon sa Dios sing halad sang pagdayaw, nga amo, ang bunga sang mga bibig nga nagatu-ad sang iya ngalan.” (Hebreo 13:15) Nagalaragway sang iya pagtamod sa hilikuton nga pagbantala, si Pablo nagsiling: “Kay kon nagawali ako sang maayong balita, wala ako sing ipabugal. Kay ginakinahanglan gid nga magwali ako. Kailo ako kon indi ko pag-iwali ang maayong balita!” (1 Corinto 9:16) Maathag nga amo man sini ang ginbatyag sang tanan matutom nga mga Cristiano sang unang siglo.

14. Ano ang kaangtanan sang pagtuo sa pagbantala?

¹⁴ Sa pagkamatuod, ang tunay nga Cristiano dapat magpakigbahin sa hilikuton nga pagbantala bangod naangot gid ini sa pagtuo. Si Pablo nagsiling: “Sa tagipusuon ang tawo nagatuo nga sa pagkamatarong, kag sa baba ang pagtu-ad ginahimo nga sa kaluwasan.” (Roma 10:10) Diutay lamang bala sa sulod sang kongregasyon​—⁠kaangay sang klero nga klase​—⁠ang nagatuo kag sa amo may salabton sa pagbantala?⁠ * Indi gid! Ang tanan nga matuod nga Cristiano nagapalambo sing mabakod nga pagtuo kay Ginuong Jesucristo kag napahulag nga ipahayag sing dayag ini  nga pagtuo sa iban. Kay kon indi, ang ila pagtuo patay. (Santiago 2:26) Bangod ang tanan nga matutom nga mga Cristiano sang unang siglo sa aton Kumon nga Dag-on nagpakita sang ila pagtuo sa sining paagi, nabatian ang mabaskog nga singgit sang pagdayaw sa ngalan ni Jehova.

15, 16. Maghatag sing mga halimbawa agod ipakita nga ang hilikuton nga pagbantala nag-uswag walay sapayan sang mga problema.

¹⁵ Sang unang siglo, ginpakamaayo ni Jehova ang iya katawhan paagi sa pag-uswag walay sapayan sang mga problema sa sulod kag sa gua sang kongregasyon. Halimbawa, mabasa sa Binuhatan kapitulo 6 ang indi pag-ugyunay sa ulot sang nagahambal-sing-Hebreo kag nagahambal-sing-Griego nga mga nakumbertir. Ginlubad sang mga apostoles ang problema. Bilang resulta, aton mabasa: “Ang pulong sang Dios nagtubo; kag ang kadamuon sang mga gintutun-an nagdugang sing tama gid sa Jerusalem, kag isa ka daku nga kadam-an sang saserdote nagmatinumanon sa pagtuo.”​—⁠Binuhatan 6:7.

¹⁶ Sang ulihi, nag-utwas ang tension sa politika sa ulot ni Hari Herodes Agripa sang Judea kag sang mga tawo sa Tiro kag Sidon. Ang mga pumuluyo sadto nga siudad nagpang-uloulo nga nagpangabay nga makighidait, kag bilang sabat nagpamulongpulong si Herodes sa publiko. Ang nagtipon nga kadam-an nagsinggit: “Tingog sang isa ka dios, kag indi iya sang tawo!” Gilayon nga ginpatay sang anghel ni Jehova si Herodes Agripa “bangod nga wala niya paghimayaa ang Dios.” (Binuhatan 12:20-​23) Nakibot gid ang mga nagalaum sa tawhanon nga mga manuggahom! (Salmo 146:​3, 4) Apang, ang mga Cristiano padayon nga naghimaya kay Jehova. Kag “ang pulong sang Dios nagtubo kag nagdugang” walay sapayan sadtong wala-kalig-unan sa politika.​—⁠Binuhatan 12:24.

Sadto kag Karon

17. Sang unang siglo, sa ano nagbuylog ang madamo nga mga tawo?

¹⁷ Huo, ang Cristianong kongregasyon sa bug-os nga kalibutan sang unang siglo ginatapuan sang makugi kag aktibo nga mga dumalayaw ni Jehova nga Dios. Ang tanan nga matutom nga Cristiano nagpakigbahin sa pagpalapnag sing maayong balita. Ang iban nakasumalang sang mga nagapamati kag, subong sang ginsiling ni Jesus, gintudluan sila sa pagtuman sa tanan nga butang nga ginsugo niya. (Mateo 28:19, 20) Bilang resulta, nagtubo ang kongregasyon, kag madamo pa nga mga indibiduwal ang nagbuylog kay Hari David sadto sa pagdayaw kay Jehova. Ginpalanog sang tanan ang inspirado nga mga pulong: “Dayawon ko ikaw, O GINUO nga Dios nakon, sa bug-os ko nga tagipusuon, kag himayaon ko ang imo ngalan sa gihapon. Kay daku ang imo malig-on nga paghigugma sa akon.”​—⁠Salmo 86:​12, 13.

18. (a) Ano nga kinatuhayan ang natalupangdan sa ulot sang unang siglo nga Cristianong kongregasyon kag sang Cristiandad karon? (b) Ano ang pagabinagbinagon sa masunod nga artikulo?

¹⁸ Bangod sini, ang mga pinamulong sang propesor sa teolohiya nga si Allison A. Trites makapahunahuna gid. Ginapaanggid ang modernong-adlaw nga Cristiandad sa unang-siglo nga Cristianismo, nagsiling sia: “Ang mga simbahan karon masami nga nagatubo paagi sa biolohiko nga pagtubo (kon ang mga kabataan sa pamilya sang lokal nga simbahan maghimo sing personal nga pagpangangkon sa pagtuo) ukon paagi sa pagsaylo nga pagtubo (kon ang isa ka bag-uhan nagasaylo sang iya pagkamiembro gikan sa isa pa ka lokal nga simbahan). Apang, sa Binuhatan, ang pagtubo paagi sa pagkumbertir, kay ang kongregasyon nagasugod pa lang sa pagpanghikot.” Nagakahulugan bala ini nga ang matuod nga Cristianismo wala na nagatubo suno sa paagi nga ginsiling ni Jesus? Siempre indi. Ang matuod nga mga Cristiano karon kaangay gid sa mga Cristiano sang unang siglo nga makugi sa dayag nga pagdayaw sa Dios. Makita naton ini sa masunod nga artikulo.

[Mga nota]

Mapaathag Mo Bala?

• Sa ano nga mga paagi mahimaya naton ang Dios?

• Paano gin-aplikar ni Pablo ang Salmo 19:4?

• Ano ang kaangtanan sang pagtuo sa pagbantala?

• Ano ang talalupangdon nga butang tuhoy sa Cristianong kongregasyon sang unang siglo?

[Mga Pamangkot sa Pagtinuon]

[Retrato sa pahina 8, 9]

Ang kalangitan padayon nga nagapamatuod sang himaya ni Jehova

[Credit Line]

Courtesy of Anglo-Australian Observatory, photograph by David Malin

[Mga retrato sa pahina 10]

Ang hilikuton nga pagbantala naangot gid sa pangamuyo