Nagaulikid Bala ang Dios sa Aton?

GINABUDLAYAN ka gid bala bangod sang imo ginapas-an nga mga problema sa pamilya, sa panglawas, sa trabaho ukon iban pa mabug-at nga mga responsibilidad? Madamo nga tawo ang ginabudlayan gid. Kag sin-o bala karon ang indi apektado sang inhustisya, krimen, kag kasingki? Husto gid ang ginasiling sang Biblia: “Ang bug-os nga tinuga nagaugayong sa kasakit sing tingob tubtob karon.” (Roma 8:22) Indi katingalahan kon ngaa madamo nga tawo ang nagapamangkot: ‘Nagaulikid bala ang Dios? Mabulig bala sia sa aton?’

Ang maalam nga si Hari Solomon nangamuyo sa Dios: “Ikaw gid lamang ang nakakilala sang mga tagipusuon sang mga anak sang mga tawo.” Nagsalig si Solomon nga indi lamang kita kilala sang Dios kundi nagaulikid man sia sa aton subong mga indibiduwal. Nangabay sia sa Dios nga ‘magpamati halin sa mga langit’ kag sabton ang mga pangamuyo sang tagsa ka mahinadlukon-sa-Dios nga indibiduwal nga nagasugid sa Dios sang “iya kaugalingon nga kalalat-an kag sang iya kaugalingon nga kalisod.”​​—⁠2 Cronica 6:​29, 30.

Karon, si Jehova nga Dios nagaulikid gihapon sa aton kag nagaagda sa aton nga magpangamuyo sa iya. (Salmo 50:15) Nagapangako sia nga sabton niya ang tinagipusuon nga mga pangamuyo nga suno sa iya kabubut-on. (Salmo 55:​16, 22; Lucas 11:​5-​13; 2 Corinto 4:7) Huo, ginapamatian ni Jehova ang “bisan ano nga pangamuyo kag pag-ampo nga himuon sang bisan sin-o nga tawo ukon sang [iya] bug-os nga katawhan.” Gani, kon magsalig kita sa Dios, mangamuyo sang iya bulig, kag magpalapit sa iya, maeksperiensiahan naton ang iya pagpalangga kag pagtuytoy. (Hulubaton 3:​5, 6) Ang manunulat sang Biblia nga si Santiago nagapasalig sa aton: “Magpalapit kamo sa Dios, kag magapalapit siya sa inyo.”​​—⁠Santiago 4:8.