‘Ang Dios Wala Nagapuyo sa mga templo nga Ginhimo sang tawo’

WALAY duhaduha nga pamilyar kay apostol Pablo ang mga templo ni Atena, kay makita ini sa madamo nga siudad nga ginduaw niya sa tion sang iya misyonero nga mga paglakbay. Suno sa The Encyclopædia Britannica, si Atena kilala indi lamang bilang isa ka diosa sang inaway kag kaalam kundi subong man “sang de-mano nga buluhaton [paghabol kag paglala] kag malantipon nga mga hilikuton.”

Ang labing bantog nga templo ni Atena amo ang Parthenon, gintukod sa Atenas, ang siudad nga ginhingalanan sunod sa diosa. Ginkabig nga isa sa labing daku nga mga templo sa dumaan nga kalibutan, ang Parthenon amo ang ginahamtangan sang isa ka 12 ka metro nga bulawan-kag-tiposo nga istatwa ni Atena. Sang ginduaw ni Pablo ang Atenas, ining puti nga marmol nga templo amo ang labing prominente nga tinukod sa siudad sa mga 500 na ka tuig.

Lantawon ang Parthenon, ginbantalaan ni Pablo ang isa ka grupo sang mga taga-Atenas tuhoy sa ‘Dios nga wala nagapuyo sa mga templo nga ginhimo sang tawo.’ (Binuhatan 17:​23, 24) Ayhan sa pagtamod sang pila sa mga tagpalamati ni Pablo ang pagkahalangdon sang templo ni Atena ukon ang pagkadungganon sang iya mga idolo naghimo sa iya nga daw mas dalayawon sangsa di-makita nga Dios nga wala nila makilala. Apang, subong ginpakita ni Pablo, indi dapat paghunahunaon nga ang Manunuga sang katawhan “kaangay sa bulawan, ukon pilak, ukon bato, nga tinigib . . . sang tawo.”​—Binuhatan 17:29.

Ang mga dios kag mga diosa kaangay ni Atena​—nga ang himaya nasandig sa mga templo kag mga istatwa​—nagatuhaw kag nagakadula. Ang istatwa ni Atena nadula sa Parthenon sang ikalima nga siglo C.E., kag pila na lamang ka guba niya nga mga templo ang nagaluntad pa. Sin-o ang nagadangop kay Atena karon para sa kaalam kag pagtuytoy?

Tuhay gid ini kay Jehova, ‘ang Dios nga walay katapusan’ nga walay tawo nga nakakita. (Roma 16:26; 1 Juan 4:​12) Ang mga anak ni Kore nagsulat: “Ini amo ang Dios, ang aton Dios sa gihapon kag sa gihapon. Sia mangin aton tuytoy nga dayon.” (Salmo 48:⁠14) Ang isa ka paagi agod matigayon ang pagtuytoy ni Jehova nga Dios amo ang pagtuon sa iya Pulong, ang Biblia, kag pag-aplikar sing mga laygay sini sa aton kabuhi.