Himayaa ang Dios Indi ang Tawo

SANG nagligad lang nga binulan, ang mga mahigugmaon sa pagkamatarong sa bug-os nga kalibutan nakatuon kon paano himayaon ang Dios sang nagtipon sila sa “Himayaa ang Dios” Distrito nga mga Kombension sang mga Saksi ni Jehova. Repasuhon naton ang programa sang pagpanudlo nga ginpresentar sa sini.

Ang programa nga napasad sa Biblia naglawig sing tatlo ka adlaw para sa kalabanan nga mga kombensionista kag apat ka adlaw para sa mga nakatambong sa pinasahi nga internasyonal nga mga kombension. Sa kabug-usan, ang mga nagtambong nakabati sing kapin sa 30 ka mga bahin nga pasad sa Kasulatan, lakip ang mga pamulongpulong nga nagpatudok pa sing apresasyon sa espirituwal nga mga butang, mga eksperiensia nga nagpabakod sing pagtuo, mga pasundayag nga nagpadaku sing pag-aplikar sa mga prinsipio sang Biblia, kag de-kostyum nga drama nga nagpakita sing mga hangkat kag kabudlayan nga gin-atubang sang mga Cristiano sang unang siglo. Kon nakatambong ka sa isa sang mga kombension, ngaa indi mo repasuhon ang imo nota samtang ginabasa mo ini nga artikulo? Napat-od namon nga magapahanumdom ini sa imo sang makalilipay nga mga handurawan sang bugana nga espirituwal nga kapiestahan kag makatuon ka man gikan sa sini.

Tema sang Una nga Adlaw: “Takus Ka Jehova, . . . sa Pagbaton sing Himaya”

Pagkatapos sang nagabukas nga ambahanon kag pangamuyo, mainit nga gin-abiabi sang una nga humalambal ang tanan nga nagtambong paagi sa pamulongpulong nga nagpatalupangod sa panguna nga katuyuan sang kombension: “Nagtipon Kita Agod Maghimaya sa Dios.” Nagkutlo gikan sa Bugna 4:11, ginpadaku sang humalambal ang kabilugan nga tema sang kombension. Ginpaathag niya gilayon ang kahulugan sang paghimaya sa Dios. Naggamit sang tulun-an nga Salmo, ginpadaku niya nga ang paghimaya sa Dios nagalakip sang “pagsimba,” “pagpasalamat,” kag “pagdayaw.”—Salmo 95:6; 100:​4, 5; 111:​1, 2.

Ang masunod nga bahin gintig-uluhan “Ginapakamaayo ang mga Nagahimaya sa Dios.” Isa ka makawiwili nga punto ang ginpakita sang humalambal. Sanglit kapin sa anom ka milyon nga mga Saksi ni Jehova ang yara sa 234 ka kadutaan sa bug-os nga kalibutan, masiling gid nga sa adlaw kag gab-i may nagahimaya kay Jehova. (Bugna 7:15) Ang interbyu sa pila ka Cristianong kauturan nga lalaki kag babayi nga yara sa pila ka porma sang pinasahi nga bug-os tion nga pag-alagad gin-apresyar gid sa sini nga bahin nga nagpahalipay sa mga tumalambong.

“Ang mga Tinuga Nagapahayag Sang Himaya Sang Dios” amo ang nagsunod nga bahin. Bisan indi makahambal, ginapakita sang pisikal nga kalangitan ang pagkadaku sang Dios kag nagabulig sa aton nga magtudok ang aton apresasyon sa iya  mahigugmaon nga pag-atipan. Ginpaathag ini sing detalyado.—Isaias 40:26.

Ang paghingabot, pagpamatok, mga impluwensia sang kalibutan, kag ang makasasala nga mga huyog nagatilaw sang integridad sang matuod nga mga Cristiano. Gani, ang pamulongpulong nga “Maglakat sa Dalanon Sang Integridad” ginpamatian gid sang mga tumalambong. Ginsundan ini sang bersikulo-por-bersikulo nga pagbinagbinag sa ika-26 nga Salmo, kag interbyu sa isa ka nagaeskwela nga Saksi nga nagpanindugan sing malig-on sa moralidad kag sa isa pa nga naghinguyang sing madamo nga tion sa mapangduhaduhaan nga kalingawan apang naghimo sing mga tikang agod malikawan ang problema.

Ang keynote address, “Ang Mahimayaon nga Matagnaon nga mga Palanan-awon Nagapapagsik sa Aton!” nagtapos sang programa sa aga. Ginsambit sang humalambal ang mga halimbawa nanday manalagna Daniel, apostol Juan kag apostol Pedro subong mga tawo nga ang pagtuo ginpalig-on sang mahimayaon kag matagnaon nga mga palanan-awon nahanungod sa pagtukod kag pagpanghikot sang Mesianikong Ginharian sang Dios. Ginapatuhuyan ang bisan sin-o nga mahimo nalipat sa maathag nga pamatuod nga yara na kita sa tion sang katapusan, ang humalambal nagsiling: “Sinsero nga nagalaum kita nga ini sila magasentro liwat sang ila igtalupangod sa pagkamatuod sang paggahom ni Cristo sa Ginharian kag mabuligan nga makatigayon liwat sing espirituwal nga kusog.”

Ang programa sa hapon nagsugod paagi sa diskurso nga natig-uluhan “Ang Himaya ni Jehova Ginapahayag sa mga Mapainubuson.” Ginpakita sang humalambal kon paano si Jehova nagpahamtang sing halimbawa sa pagkamapainubuson, bisan pa sia ang pinakamataas nga Persona sa uniberso. (Salmo 18:35) Ginakahamut-an ni Jehova ang tunay nga mapainubuson, apang ginapamatukan niya ang mga nagapakunokuno lamang nga mapainubuson kon nagapakig-angot sa ila mga katubotubo ukon sa mga may mataas nga posisyon sangsa ila apang indi maayo ang pagpakig-angot nila sa mga yara sa idalom sang ila pagdumala.—Salmo 138:6.

Masunod, ginpaathag ang tagna sa Biblia sa isa ka simposium nga nagpadaku sa nanuhaytuhay nga aspekto sang panguna nga tema: “Ang Tagna ni Amos—Ang Mensahe Sini sa Aton Adlaw.” Ginpatuhuyan ang halimbawa ni Amos, ginpatalupangod sang una nga humalambal ang aton salabton sa pagpaandam sa mga tawo tuhoy sa nagapakari nga paghukom ni Jehova. Ang tema sang iya pamulongpulong amo, “Ibantala ang Pulong Sang Dios nga May Kasidla.” Ang ikaduha nga humalambal nagpamangkot: “Dulaon bala ni Jehova ang kalautan kag pag-antos sa duta?” Ginpakita sang iya bahin, “Ang Paghukom Sang Dios Batok sa Malauton,” nga ang paghukom sang Dios pirme nagakadapat, indi malikawan, kag may ginapili. Ang katapusan nga humalambal sa simposium nagpatalupangod sa tema nga “Si Jehova Nagausisa Sang Tagipusuon.” Ang mga nagahandum nga pahamut-an si Jehova magatuman sa mga pulong sa Amos 5:15: “Dumti ang malaut, kag higugmaa ang maayo.”

Ang alkoholiko nga mga ilimnon, subong sang alak nga nagapahalipay sa tagipusuon, mahimo nga gamiton sing indi nagakaigo. Sa iya pamulongpulong nga “Likawi ang Siod Sang Pag-abuso sa Alkohol,” ginsambit sang humalambal ang mga katalagman sa pisikal kag espirituwal sang sobra nga pag-inom, bisan pa wala nagakahubog ang isa. Naghatag sia sing panuytoy nga prinsipio: Sanglit ang epekto sang alkohol nanuhaytuhay sa mga tawo, ang bisan ano nga kadamuon nga nagaguba sang imo “maayo nga kaalam kag pagbinagbinag” sobra para sa imo.—Hulubaton 3:​21, 22.

Sanglit nagakabuhi kita sa ital-ital nga mga tion, ang masunod nga topiko, “Si Jehova, ang Aton ‘Pamakod sa Tion Sang Kalisdanan,’” makalulugpay gid. Ang pangamuyo, balaan nga espiritu, kag ang mga masigka-Cristiano makabulig sa aton nga maatubang ini.

Ang katapusan nga pamulongpulong sa amo nga adlaw, “‘Ang Maayo nga Duta’—Laragway Sang Paraiso,” naghingapos paagi sa makalilipay nga sorpresa para sa tanan—isa ka bag-o nga publikasyon nga may madamo nga mapa sang Biblia! Ini natig-uluhan See the Good Land.

Tema sang Ikaduha nga Adlaw: “Ipahayag ang Iya Himaya sa Tunga sang mga Pungsod”

Sa tapos mabinagbinag ang matag-adlaw nga teksto, ginpresentar ang ikaduha nga simposium sang kombension, nga may tema “Ipabanaag Kaangay Sang Salaming ang Himaya ni Jehova.” Ginbinagbinag sang una nga bahin ang “Pagpalapnag Sing Maayong Balita Bisan Diin” kag ginlakip ang mga pag-akto sa aktual nga mga eksperiensia sa pag-alagad sa latagon. Ginlakip sa ikaduha nga bahin ang isa ka pasundayag tuhoy sa isa ka pagduaw  liwat samtang ginapresentar sang humalambal ang tema nga “Paghukas Sing Tabon sa mga Nabulagan.” Ang katapusan nga bahin, nga natig-uluhan “Paghimo Sing Dugang Pa sa Aton Ministeryo,” ginlakipan sang makawiwili nga mga interbyu tuhoy sa mga eksperiensia sa latagon.

Ang masunod nga bahin sang programa gintig-uluhan “Ginadumtan nga Wala Sing Kabangdanan.” Naglakip ini sang makapalig-on gid nga mga interbyu sa matutom nga mga indibiduwal nga bangod sa kusog sang Dios nahuptan nila ang integridad sa idalom sang pagpamatok.

Ang ginpaabot gid nga bahin sang kombension amo ang pamulongpulong sa bawtismo nga ginsundan sang bug-os nga pagtum-oy sa tubig sang tanan nga kalipikado nga kandidato. Ang bawtismo sa tubig nagasimbulo sang bug-os nga dedikasyon sang isa kay Jehova. Gani, nagakaigo gid ang tema: “Ang Pagtuman sa Aton Dedikasyon Nagahimaya sa Dios.”

 Ang programa sa hapon nagsugod paagi sa isa ka pamulongpulong nga nagpalig-on sang pag-usisa sa kaugalingon, ang “Pagpalambo Sing Tulad-Cristo nga Pagtamod sa Pagkadaku.” Ginsambit sang humalambal ining makawiwili nga punto: Ang pagkadaku nagahalin sa pag-ilog sa pagkamapainubuson ni Cristo. Sa amo, ang isa ka Cristiano indi dapat magtinguha sang responsabilidad agod malab-ot ang personal nga ambisyon. Dapat niya pamangkuton ang iya kaugalingon, ‘Handa bala ako nga himuon ang makabulig nga mga hilikuton nga indi matalupangdan?’

Ginkapoy ka na bala? Siempre, ang tanan nagabatyag sing kakapoy kon kaisa. Ang pamulongpulong nga “Ginakapoy Apang Wala Ginalapyo” gin-apresyar gid sang tanan. Ang mga interbyu sa madugay na nga mga Saksi nagpakita nga si Jehova ‘makapabaskog sa aton paagi sa iya espiritu.’—Efeso 3:16.

Ang kaalwan isa ka kinaiya nga indi duna sa aton apang dapat ini tun-an. Ining importante nga punto ginpadaku sa bahin nga “Mangin Maalwan, Handa sa Pagpaambit.” Kag ginpautwas ining nagapahunahuna nga pamangkot: “Handa bala kita nga ipaambit ang pila ka minuto sa aton mga kauturan nga tigulang, masakiton, ginapung-awan, ukon ginasubuan?”

Ang “Mag-andam sa ‘Tingog Sang mga Estranghero’” nagkuha sang igtalupangod sang mga tumalambong. Ginpaanggid sini nga pamulongpulong ang mga sumulunod ni Jesus sa mga karnero nga nagapamati lamang sa iya tingog subong ang “maayo nga manugbantay” kag wala nagapamati sa “tingog sang mga estranghero” nga ginabungat paagi sa madamo nga mga ahensia nga naimpluwensiahan sang Yawa.—Juan 10:​5, 14, 27, NW.

Ang isa ka koro dapat mag-amba nga may harmoniya agod mahangpan. Agod mahimaya ang Dios, ang matuod nga mga sumilimba sa bug-os nga kalibutan dapat nahiusa. Gani, ang “Himayaa ang Dios ‘sa Isa ka Tingog’” naghatag sing mapuslanon nga instruksion kon paano kita tanan makahambal sing isa ka “putli nga bibig [“hambal,”NW] kag alagaron si Jehova nga may “paghilisugot.”—Sofonias 3:9.

Nalipay gid ang mga ginikanan, ilabi na ang may magamay pa nga mga kabataan, sa katapusan nga pamulongpulong sa amo nga adlaw, “Ang Aton mga Kabataan—Isa ka Hamili nga Palanublion.” Isa ka bag-o nga 256-pahina nga publikasyon ang ginpagua, nga nagsorpresa sa mga tumalambong. Ang Magtuon Gikan sa Daku nga Manunudlo isa ka libro nga magabulig sa mga ginikanan sa paghinguyang sing mapuslanon sa espirituwal nga tion upod sa ila mga kabataan, nga regalo sang Dios sa ila.

Tema sang Ikatlo nga Adlaw: “Himua ang Tanan nga Butang sa Kahimayaan sang Dios”

Ang mga pahanumdom sang matag-adlaw nga teksto nagbukas sang katapusan nga adlaw sang kombension paagi sa espirituwal nga mga panghunahuna. Ang una nga bahin sang programa sini nga adlaw naghatag sing dugang nga igtalupangod sa mga pamilya. Ang una nga pamulongpulong, “Mga Ginikanan, Pabakura ang Inyo Pamilya,” naghanda sa mga hunahuna sang mga tumalambong. Sa tapos ginrepaso ang mga salabton sang mga  ginikanan sa pag-aman sing materyal sa ila pamilya, ginpamatud-an sang humalambal nga ang panguna nga salabton sang mga ginikanan amo ang pag-aman sing espirituwal nga mga kinahanglanon sang ila mga kabataan.

Ginpatuhuyan sang masunod nga humalambal ang mga kabataan kag ginbinagbinag ang topiko nga “Kon Paano Ginadayaw Sang mga Pamatan-on si Jehova.” Nagsiling sia nga ang mga pamatan-on kaangay sang mga “tun-og” bangod madamo sila kag ang ila kakugi subong mga pamatan-on makapapagsik. Ang mga hamtong malipayon sa pagpanghikot upod sa ila sa pag-alagad kay Jehova. (Salmo 110:3) Ini nga bahin naglakip sang makalilipay nga mga interbyu sa huwaran nga mga pamatan-on.

Ang de-kostyum nga mga drama makakulunyag nga bahin pirme sang mga distrito nga kombension, kag pati na sini nga kombension. Ang drama nga “Pagpanaksi nga May Kaisog Walay Sapayan Sang Pagpamatok” naglaragway sa mga sumulunod ni Jesus sang unang siglo. Indi lamang ini makalilingaw kundi, sing labi pa ka importante, may gintudlo ini. Ang nagsunod sa drama nga diskurso nga, “Ibantala ang Maayong Balita Sing ‘Walay Untat,’” nagpadaku sa importante nga mga punto sang drama.

Malangkagon nga ginpaabot sang tanan nga tumalambong ang talalupangdon nga bahin sang programa sa Domingo, ang pamulongpulong publiko nga, “Sin-o sa Karon ang Nagahimaya sa Dios?” Ginpamatud-an sang humalambal kon paano ang siensia kag mga relihion sa kabilugan wala maghimaya sa Dios. Ang mga tawo lamang sa iya ngalan, nga nagabantala kag nagatudlo sing kamatuoran tuhoy kay Jehova, ang matuod nga nagahimaya sang iya ngalan karon.

Ang diskurso publiko ginsundan sang sumaryo sa pagtinuon sa Lalantawan nga magasin sa amo nga semana. Dayon ginhatag ang katapusan nga pamulongpulong nga, “‘Padayon Kamo nga Magpamunga Sing Madamo’ sa Kahimayaan ni Jehova.” Ginpresentar sang humalambal ang napulo-ka-punto nga resolusyon nga ginbaton sang mga tumalambong. Nasentro ini sa nanuhaytuhay nga paagi nga mahimaya si Jehova, ang Manunuga. Naglanog ang sabat nga “Huo” sa tanan nga kombension sa bug-os nga kalibutan.

Sa amo, natapos ang kombension diin ang tagsa ka tumalambong nagsentro sang ila igtalupangod sa tema nga “Himayaa ang Dios.” Kag sa bulig sang espiritu ni Jehova kag sang kitaon nga bahin sang iya organisasyon, kabay nga pirme naton hatagan sing himaya ang Dios kag indi ang tawo.

[Kahon/Mga retrato sa pahina 23]

Internasyonal nga mga Kombension

Ang apat-ka-adlaw nga internasyonal nga kombension ginhiwat sa Aprika, Asia, Australia, Europa, kag Aminhan kag Bagatnan nga Amerika. Ang mga Saksi gikan sa bug-os nga kalibutan gin-agda nga mangin delegado sa sini nga mga pagtilipon. Sa sining paagi may “pagbayluhanay sing pagpalig-on” sa ulot sang mga bisita kag sang nag-amuma sa ila. (Roma 1:12, NW) Nagkit-anay ang madugay na nga kilalahay, kag may bag-o nga mga nakilala. Ang espesyal nga bahin sa programa sang internasyonal nga mga kombension natig-uluhan “Mga Report Gikan sa Iban nga mga Pungsod.”

[Kahon/Mga retrato sa pahina 25]

Bag-o nga mga Publikasyon nga Nagahatag sing Himaya sa Dios

Duha ka bag-o nga publikasyon ang ginpagua sa “Himayaa ang Dios” Distrito nga mga Kombension. Ang atlas sa Biblia nga See the Good Land may mabakod nga panghapin kag 36 ka pahina sang mga mapa kag mga laragway sang mga duog sa Biblia. Ang tagsa ka pahina dekolor kag may mga mapa sang mga emperyo sang Asiria, Babilonia, Medo-Persia, Gresya, kag Roma. May tuhay nga mga mapa nga nagatuptop sa ministeryo ni Jesus kag sa pagsangkad sang Cristianismo.

Ang Magtuon Gikan sa Daku nga Manunudlo isa ka 256-pahina nga libro nga may mga 230 ka laragway. Madamong makalilipay nga sesyon ang mahimo ihinguyang upod sa mga kabataan sa pagtan-aw lamang sa mga laragway kag pagsabat sa nagapahunahuna nga mga pamangkot nga yara sa libro. Ining bag-o nga publikasyon gindesinyo agod balabagan ang pagsalakay ni Satanas sa aton mga kabataan, nga tuyo nga palainon ang ila moralidad.

[Retrato sa pahina 23]

Ginsaysay sang mga misyonero ang makapabakod-pagtuo nga mga eksperiensia

[Mga retrato sa pahina 24]

Ang bawtismo isa ka importante nga bahin sang “Himayaa ang Dios” nga mga kombension

[Retrato sa pahina 24]

Naluyagan gid sang mga bata kag tigulang ang mga drama sa Biblia