Mga Pamangkot Gikan sa mga Bumalasa

Ano nga mga sirkunstansia ang nangin kabangdanan sang pagpakigsekso ni Juda sa isa ka babayi nga abi niya isa ka pampam, subong narekord sa Genesis 38:15, 16?

Bisan si Juda nakapakigsekso sa isa ka babayi nga abi niya isa ka pampam, ang matuod indi sia isa ka pampam. Suno sa Genesis kapitulo 38, amo sini ang natabo.

Antes makatigayon ang panganay nga anak nga lalaki ni Juda sing mga anak nga lalaki sa iya asawa, si Tamar, ginpatay sia bangod ‘malaut sia sa itululok sang GINUO.’ (Genesis 38:7) Kinabatasan sadto ang pagminyo sa bayaw nga lalaki. Ginpatuman sini nga kon ang isa ka lalaki napatay nga walay manunubli, obligasyon sang iya utod nga lalaki nga pangasaw-on ang nabalo agod makapanganak sia sing isa ka manunubli. Apang ang ikaduha nga anak nga lalaki ni Juda, si Onan, namalibad nga tumanon ang iya obligasyon. Gani, napatay man sia bilang resulta sang paghukom sang Dios. Nian ginpapauli ni Juda si Tamar nga iya umagad sa balay sang iya amay tubtob nga puede na sia pangasaw-on sang ikatlo nga anak nga lalaki ni Juda, si Sela. Apang, sa pagligad sang tinuig, wala ginpaasawa ni Juda kay Sela si Tamar. Gani sang nabalo si Juda, nagplano si Tamar agod makatigayon sang isa ka manunubli paagi kay Juda, ang Israelinhon nga nangin ugangan niya sadto. Ginhimo niya ini paagi sa pagpakunokuno nga isa sia ka pampam sa templo kag nag-istambay sia sa dalan nga nahibal-an niya nga ginaagihan ni Juda.

Bangod wala makakilala kay Tamar, si Juda nakighulid sa iya. May pagkatuso nga nakakuha si Tamar sing mga garantiya gikan kay Juda bilang kabaylo sa pabor nga iya ginhimo, kag paagi sini ginpamatud-an niya sang ulihi nga nagbusong sia paagi sa iya. Sang mabuyagyag ang kamatuoran, wala sia ginbasol ni Juda kundi mapainubuson nga nagsiling: “Labi pa katarong sia sa akon, sanglit nga wala ko sia ginhatag kay Sela nga akon anak.” Kag sing nagakaigo gid, “wala na gid sia maghiusa sa iya.”​—Genesis 38:26.

Sayop ang ginhimo ni Juda kay wala sia magtuman sa iya saad nga ipaasawa si Tamar sa iya anak nga si Sela. Nakighulid man sia sa isa ka babayi nga abi niya isa ka pampam sa templo. Supak ini sa katuyuan sang Dios, nga ang isa ka lalaki makighulid lamang sa iya asawa. (Genesis 2:​24) Apang, ang matuod, wala nakighulid si Juda sa isa ka pampam. Sa baylo, di-hungod nga ginbuslan niya ang iya anak nga si Sela sa pagtuman sing kahimusan nga pagminyo sa bayaw nga lalaki kag busa nangin amay sang isa ka lehitimo nga anak.

Kon tuhoy kay Tamar, ang ginhimo niya indi imoralidad. Ang iya kapid nga mga anak nga lalaki wala ginkabig nga mga anak sa pagpakighilawas. Sang ginpangasawa ni Boaz sang Betlehem ang Moabita nga si Rut sa pagminyo sa bayaw nga lalaki nga kahimusan, ang mga gulang sa Betlehem naghambal nga may kahamuot tuhoy sa anak ni Tamar nga si Perez, nga nagasiling kay Boaz: “Magmangin kaangay ang imo balay sa balay ni Perez, nga gin-anak ni Tamar kay Juda, bangod sa kaliwat nga ihatag sang GINUO sa imo paagi sini nga pamatan-on nga babayi.” (Rut 4:​12) Si Perez ginsambit man nga isa sa mga katigulangan ni Jesucristo.​—Mateo 1:​1-3; Lucas 3:​23-​33.