Mga Pangako nga Imo Masaligan

NAHIBALUAN gid sang propeta sang Dios nga si Miqueas nga ang mga pangako mahimo nga indi masaligan. Sang iya panahon, bisan ang pinakasuod nga abyan indi gihapon masaligan sa pagtuman sang hinambalan. Gani si Miqueas nagpaandam: “Dili kamo magsalig sa isigkatawo, dili pagsaligi ang abyan; takpi ang mga ganhaan sang imo baba sa nagasaliay sa imo sabak.”​—Miqueas 7:⁠5.

Ginduhaduhaan bala ni Miqueas ang tanan nga pangako bangod sa sining masubo nga sitwasyon? Wala! Nagsalig sia sing bug-os sa mga pangako sang iya Dios, si Jehova. “Apang ako,” sulat ni Miqueas, “magatulok ako sa GINUO, magahulat ako sa Dios sang akon kaluwasan.”​—Miqueas 7:⁠7.

Ngaa may amo sini nga pagsalig si Miqueas? Bangod nahibaluan niya nga ginatuman pirme ni Jehova ang iya ginahambal. Natuman gid ang tanan nga panumpa ni Jehova sa mga katigulangan ni Miqueas. (Miqueas 7:​20) Ang katutom ni Jehova sang nagligad mabakod nga pamatuod agod patihan ni Miqueas nga tumanon Niya ang Iya saad sa palaabuton.

 “Wala sing . . . Ginsaad nga Wala Matuman”

Halimbawa, nahibaluan ni Miqueas nga ginluwas ni Jehova ang mga Israelinhon gikan sa pagkaulipon sa Egipto. (Miqueas 7:​15) Si Josue, nga nakaeksperiensia sini nga pagluwas, nagpalig-on sa iya masigka-Israelinhon nga magtuo sa tanan nga ginpangako sang Dios. Sa ano nga sadsaran? “Ang tagsatagsa sa inyo nakahibalo sa inyo tagipusuon kag kalag,” pahanumdom ni Josue sa ila, “nga ang GINOO nga inyo Dios naghatag sa inyo sang tanan nga mga maayo nga butang nga iya ginsaad. Ang tanan nga iya ginsaad natuman, kag wala sing isa sang iya mga ginsaad nga wala matuman.”​—Josue 23:⁠14, Maayong Balita nga Biblia.

Nahibaluan gid sang mga Israelinhon nga naghimo si Jehova sang makatilingala nga mga butang para sa ila. Gintuman niya ang iya pangako sa ila mahinadlukon-sa-Dios nga katigulangan nga si Abraham nga magadamo gid kaangay sang mga bituon ang iya kaanakan kag magapanag-iya sang duta sang Canaan. Si Jehova nagsiling man kay Abraham nga magaantos ang iya kaanakan sa sulod sang 400 ka tuig apang magabalik sa Canaan “sa ikap-at nga kaliwatan.” Natabo ini tanan.​—Genesis 15:​5-​16; Exodo 3:​6-8.

Gin-abiabi sing maayo sa Egipto ang mga Israelinhon sa panahon sang anak ni Jacob nga si Jose. Sang ulihi mapintas nga ginpilit sila sang mga Egiptohanon nga mangin ulipon kag ginpatrabaho, apang subong sang ginpangako sang Dios, antes matapos ang apat ka nagasundanay nga henerasyon halin sang pag-abot nila sa Egipto ining mga kaanakan ni Abraham ginhilway gikan sa pagkaulipon sa Egipto. *

Sa sulod sang masunod nga 40 ka tuig, napamatud-an pa gid sang mga Israelinhon nga ginatuman pirme ni Jehova ang iya mga pangako. Sang wala-sing-rason nga ginsalakay sang mga Amaleknon ang mga Israelinhon, nakig-away ang Dios para sa iya katawhan kag gin-amligan sila. Ginhatag niya ang ila tanan nga materyal nga kinahanglanon sa sulod sang 40 ka tuig nga ila pagpanglakaton sa kahanayakan kag sa ulihi ginpaistar sila sa Ginsaad nga Duta. Samtang ginarepaso ni Josue ang kasaysayan sang mga pagpakig-angot ni Jehova sa sining kaliwatan ni Abraham, makasiling gid sia: “Walay bisan ano nga nakulang sang bisan anong maayong butang nga napamulong sang GINUO sa balay sang Israel; nahanabo ang tanan.”​—Josue 21:45.

Palambua ang Pagsalig sa mga Pangako sang Dios

Paano mo mapalambo ang pagtuo sa mga pangako ni Jehova, subong nanday Miqueas kag Josue? Ti, paano mo ginapalambo ang pagsalig sa iban? Ginakilala mo sila sing maayo. Halimbawa, mahibaluan mo nga masaligan sila kon makita mo nga ginatinguhaan gid nila nga tumanon ang tanan nila nga mga pangako. Samtang nagadamo ang imo ihibalo tuhoy sa sining mga tawo, amat-amat nga nagasalig ka sa ila. Amo man sini ang himuon mo kon tuhoy sa pagpalambo sing pagtuo sa mga pangako sang Dios.

Isa ka paagi nga mahimo mo ini amo ang pagpamalandong sa mga tinuga kag sa mga kasuguan nga nagakontrol sa sini. Nagasalig ang mga sientipiko sa sining mga kasuguan, kaangay sa kasuguan nga nagakontrol sa pagbahinbahin kag pagdamo sang isa ka tawhanon nga selula tubtob mangin trilyones nga mga selula nga nagahuman sa imo lawas. Sa katunayan, ang mga kasuguan nga nagakontrol sa pagpanghikot sang  mga butang kag enerhiya sa bug-os nga uniberso pat-od nga ginhimo sang isa ka masaligan gid nga Lehislador. Sigurado nga masaligan mo ang iya mga pangako, subong nga masaligan mo ang mga kasuguan nga nagakontrol sa iya mga tinuga.​—Salmo 139:​14-​16; Isaias 40:26; Hebreo 3:⁠4.

Paagi kay propeta Isaias, nga kadungan ni Miqueas, gingamit ni Jehova ang pagkaregular sang mga panahon kag ang makatilingala nga siklo sang tubig agod ipakita ang pagkamasaligan sang iya pulong. Kada tuig nagaulan. Nagapanalupsop ini sa duta kag nangin posible para sa mga tawo nga magsab-ug sang ila binhi kag mag-ani sing patubas. Tuhoy sini, si Jehova nagsiling: “Subong sang ulan nga nagakahulog kag sang niebe gikan sa langit, kag wala nagabalik didto kundi nagatubig sang duta, nga nagapabunga sini kag nagapasalingsing, nga nagahatag sing binhi sa manugsab-ug kag kalan-on sa manugkaon, mangin subong sini ang akon pulong nga nagagua sa akon baba; indi magbalik ini sa akon sa wala sing pulos, kundi magatigayon ini sang akon nahamut-an, kag magauswag ini sa butang nga akon ginpadal-an sini.”​—Isaias 55:⁠10, 11.

Masaligan nga mga Pangako Tuhoy sa Paraiso

Ang pag-usisa sa mga tinuga makapalambo sang pagsalig sa Manunuga, apang indi lamang ini ang kinahanglan kon luyag mo matun-an ang mga pangako nga bahin sang “pulong nga nagagua sa [iya] baba.” Agod matun-an mo ining mga pangako kag magsalig sa sini, kinahanglan usisaon mo ang inspirado sang Dios nga rekord sa Kasulatan tuhoy sa katuyuan sang Dios para sa duta kag sa iya mga pagpakig-angot sa katawhan.​—2 Timoteo 3:​14-​17.

May pagsalig si propeta Miqueas sa mga pangako ni Jehova. May mas madamo ka nga mabasahan nga inspirado sang Dios nga rekord sangsa kay Miqueas sang una. Samtang ginabasa mo ang Biblia kag nagapamalandong sa sini, mapalambo mo man ang pagtuo sa katumanan sang mga pangako sang Dios. Ining mga pangako nagadalahig indi lamang sa kinaugali nga kaliwatan ni Abraham kundi sa tanan nga katawhan. Nangako si Jehova sa sining mahinadlukon-sa-Dios nga patriarka: “Sa imo mga kaliwatan [paagi sa imo binhi, NW] pakamaayuhon ang tanan nga pungsod sang duta, bangod nagtuman ka sa akon tingog.” (Genesis 22:⁠18) Ang panguna nga bahin sang “binhi,” ukon kaliwatan ni Abraham amo si Jesucristo, ang Mesias.​—Galacia 3:​16.

Paagi kay Jesucristo, pat-uron ni Jehova nga pakamaayuhon ang matinumanon nga katawhan. Kag ano ang ginpangako nga himuon sang Dios karon? Ang Miqueas 4:​1, 2 nagasabat sa sining matagnaon nga pinamulong: “Sa ulihi nga mga adlaw mahanabo nga ang bukid sang balay sang GINUO patindugon sa putukputukan sang mga bukid, kag bayawon ini labaw sa kabakuluran; kag ang mga katawhan magadugok sa iya, kag ang madamo nga pungsod magakadto, kag magasiling: ‘Kari kamo, kag magtukad kita sa bukid sang GINUO, sa balay sang Dios ni Jacob; kag tudluan kita niya sang iya mga dalanon, kag magalakat kita sa iya mga banas.’”

Salsalon sang mga nagatuon tuhoy sa mga dalanon ni Jehova ang ila mga espada nga mangin mga punta sang arado, kag ang ila mga bangkaw nga mangin mga galab nga inughagbas. Wala na sila sing ano man nga huyog sa pagpakig-away. Sa dili madugay ang duta mapuno sang matarong nga mga tawo, kag wala na sing magapakurog sa ila sa kahadlok. (Miqueas 4:​3, 4) Huo, ginapangako sang Pulong sang Dios nga sa idalom sang paggahom sang Ginharian ni Jesucristo, dulaon ni Jehova ang tanan nga nagapamigos sa duta.​—Isaias 11:​6-9; Daniel 2:​44; Bugna 11:18.

Bisan ang nag-antos kag napatay bangod sa pagrebelde sang tawo batok sa Dios pagabanhawon nga may paglaum nga mabuhi sing dayon  sa duta. (Juan 5:​28, 29) Si Satanas kag ang iya mga demonyo, nga mga manugsugyot sang kalautan, wala na, kag ang mga epekto sang sala ni Adan pagadulaon paagi sa halad gawad ni Jesus. (Mateo 20:28; Roma 3:​23, 24; 5:​12; 6:​23; Bugna 20:​1-3) Kag ano ang mangin kahimtangan sang matinumanon nga mga tawo? Aba, pakamaayuhon sila sang kabuhi nga dayon nga may himpit nga panglawas sa paraiso nga duta!​—Salmo 37:​10, 11; Lucas 23:43; Bugna 21:​3-5.

Matahom gid nga mga pangako! Apang mapatihan mo bala ini? Siempre. Indi ini mga pangako sang mga tawo nga ayhan may maayo nga tuyo apang wala sing ikasarang sa pagtuman sini. Mga pangako ini sang Labing Gamhanan nga Dios, nga indi makabutig kag “wala nagapalantang nahanungod sa iya saad.” (2 Pedro 3:9; Hebreo 6:​13-​18) Masaligan mo sing bug-os ang tanan nga pangako sang Biblia, bangod naghalin ini kay “Jehova nga Dios sang kamatuoran.”​—Salmo 31:5, Balaan nga Kasulatan, American Bible Society.

[Mga nota]

[Blurb on page 6]

“Ang GINUO nga inyo Dios naghatag sa inyo sang tanan nga mga maayo nga butang nga iya ginsaad.”​—JOSUE 23:14

[Mga retrato sa pahina 4, 5]

Gintuman ni Jehova ang iya mga pangako sa Israel sa Dagat nga Mapula kag sa kahanayakan

[Mga retrato sa pahina 7]

Gintuman ni Jehova ang iya pangako kay Abraham. Ang iya Binhi, nga si Jesucristo, magadala sang mga pagpakamaayo sa katawhan