“Ginuo, Tudlui Kami sa Pagpangamuyo”

“Ang isa sang iya mga gintutun-an nagsiling sa iya, ‘Ginuo, tudlui kami sa pagpangamuyo.’”​​—⁠LUCAS 11:⁠1.

1. Ngaa ang isa sa mga disipulo ni Jesus nangabay sa iya nga tudluan sila sa pagpangamuyo?

SA ISA ka hitabo sang 32 C.⁠E., ang isa ka disipulo ni Jesus nag-obserbar sa Iya samtang nagapangamuyo Sia. Indi niya mabatian kon ano ang ginapangamuyo ni Jesus sa iya Amay, kay mahimo nga indi mabaskog ini nga pagpangamuyo. Apang, sang nakatapos si Jesus, ang disipulo nagsiling sa iya: “Ginuo, tudlui kami sa pagpangamuyo.” (Lucas 11:⁠1) Ano ang rason sini nga pagpangabay? Ang pangamuyo regular nga bahin sang pagkabuhi kag pagsimba sang mga Judiyo. May madamo nga pangamuyo sa Hebreo nga Kasulatan sa tulun-an sang Salmo kag iban pa. Gani ang disipulo wala nagpangabay nga tudluan sia sang isa ka butang nga wala sia sing namang-an ukon wala pa niya mahimo. Walay duhaduha, pamilyar sia sa pormalistiko nga mga pangamuyo sang relihioso nga mga lider sang Judaismo. Apang karon naobserbahan niya ang pagpangamuyo ni Jesus, kag mahimo gid nga nakita niya ang daku nga kinatuhayan sang pakitakita nga mga pangamuyo sang mga rabbi kag sang paagi sa pagpangamuyo ni Jesus.​​—⁠Mateo 6:​5-8.

2. (a) Ano ang nagapakita nga si Jesus wala nagpanugyan nga sulitsuliton ang modelo nga pangamuyo sing letra por letra? (b) Ngaa interesado kita nga makahibalo kon paano mangamuyo?

² Mga 18 ka bulan antes sini, sa iya Sermon sa Bukid, ginhatagan ni Jesus ang iya mga disipulo sang isa ka modelo nga basihan sang ila mga pangamuyo. (Mateo 6:​9-​13) Posible nga ining disipulo wala sadto nga tion, gani mainayuhon nga ginsulit ni Jesus ang importante nga mga punto sang modelo nga pangamuyo. Talalupangdon nga wala niya ini ginsulit sing letra por letra, nga nagapakita nga wala sia naghatag sang isa ka palangadion nga dapat sauluhon kag sulitsuliton. (Lucas 11:​1-4) Kaangay sining wala nahingadlan nga disipulo, luyag man naton nga tudluan kon paano mangamuyo nga magapasuod pa gid sa aton kay Jehova. Gani binagbinagon naton ang mas kompleto nga bersion sang modelo nga pangamuyo, nga ginrekord ni apostol Mateo. May pito ini ka pangabay, ang tatlo tuhoy sa mga katuyuan sang Dios kag ang apat tuhoy sa aton materyal kag espirituwal nga mga kinahanglanon. Binagbinagon naton sa sining artikulo ang nahauna nga tatlo ka pangabay.

Isa Ka Mahigugmaon nga Amay

3, 4. Ano ang kahulugan sang pagtawag naton kay Jehova nga “Amay namon”?

³ Sa umpisa pa lang, ginpakita ni Jesus nga ang aton mga pangamuyo dapat magpabanaag sang isa ka suod apang matinahuron nga pagpakig-angot kay Jehova. Nagahambal panguna para makabenepisyo ang iya mga disipulo nga nagtipon sa palibot niya sa higad sang bukid, gintudluan sila ni Jesus nga tawgon si Jehova subong “Amay namon nga yara sa langit.” (Mateo 6:⁠9) Suno sa isa ka iskolar, nagahambal man si Jesus sa popular nga Hebreo ukon Aramaiko nga lenguahe, ang termino nga gingamit niya para sa “Amay” kaanggid sa mapinalanggaon nga pagtawag sang isa ka gamay nga bata sa iya Tatay. Ang pagtawag kay Jehova nga “Amay namon” nagapakita nga ginahigugma naton sia kag may pagsalig kita sa iya.

 ⁴ Paagi sa pagsiling nga “Amay namon,” ginakilala man naton nga bahin kita sang isa ka daku nga tawhanon nga pamilya nga nagakilala kay Jehova subong Manughatag-Kabuhi. (Isaias 64:⁠8; Binuhatan 17:​24, 28) Ang hinaplas sang espiritu nga mga Cristiano gin-adoptar subong “mga anak sang Dios,” kag sa iya sila makatuaw: “Abba, Amay!” (Roma 8:​14, 15) Minilyon ang ila nangin mainunungon nga kaupod. Gindedikar nila ang ila kabuhi kay Jehova kag ginsimbuluhan ang ila dedikasyon paagi sa bawtismo sa tubig. Ining tanan “iban nga mga karnero” makapalapit man kay Jehova sa ngalan ni Jesus kag makatawag sa Iya nga “Amay namon.” (Juan 10:16; 14:6) Regular kita nga makapangamuyo sa aton langitnon nga Amay agod dayawon sia, pasalamatan sia sa tanan nga kaayo sa aton, kag sugiran sia sang aton mga problema, nagasalig nga nagaulikid sia sa aton.​​—⁠Filipos 4:​6, 7; 1 Pedro 5:​6, 7.

Gugma sa Ngalan ni Jehova

5. Ano ang una nga pangabay sa modelo nga pangamuyo, kag ngaa nagakaigo ini?

⁵ Ginapakita dayon sa una nga pangabay kon ano gid ang prioridad. Ini nagasiling: “Pakabalaanon ang imo ngalan.” (Mateo 6:⁠9) Huo, dapat mangin prioridad naton ang pagpakabalaan sa ngalan ni Jehova bangod ginahigugma naton sia kag ginakaugtan naton ang madamo nga pagpakahuya sa iya ngalan. Ang pagrebelde ni Satanas kag paghaylo niya sa una nga mag-asawa agod maglalis kay Jehova nga Dios nagpasipala sa Iya ngalan paagi sa pagbutang sing pagpangduhaduha sa bug-os uniberso nga pagkasoberano sang Dios. (Genesis 3:​1-6) Dugang pa, sugod sadto, ginapakahuy-an ang ngalan ni Jehova paagi sa makahuluya nga mga binuhatan kag mga panudlo sang nagapangangkon nga mga representante niya.

6. Ano ang indi naton dapat nga himuon kon ginapangamuyo naton ang pagpakabalaan sa ngalan ni Jehova?

⁶ Ang aton pangamuyo para sa pagpakabalaan sang ngalan ni Jehova nagapakita kon kay sin-o kita nagadampig sa hulusayon sang bug-os uniberso nga pagkasoberano​​—⁠ginasuportahan naton sing bug-os ang kinamatarong ni Jehova sa paggahom sa uniberso. Luyag ni Jehova nga istaran ang uniberso sang intelihente nga mga tinuga nga kinabubut-on kag malipayon nga nagapasakop sa iya matarong nga pagkasoberano bangod ginahigugma nila sia kag ginahigugma nila ang tanan nga ginarepresentar sang iya ngalan. (1 Cronica 29:​10-​13; Salmo 8:⁠1; 148:13) Ang aton gugma sa ngalan ni Jehova magapugong sa aton nga himuon ang bisan ano nga makahatag sing kahuy-anan sa sining balaan nga ngalan. (Ezequiel 36:​20, 21; Roma 2:​21-​24) Sanglit ang paghidait sa uniberso kag sang pumuluyo sini nasandig sa pagpakabalaan sa ngalan ni Jehova kag sa mahigugmaon nga pagpasakop sa iya soberanya, ang aton pangamuyo nga “pakabalaanon ang imo ngalan” isa ka kapahayagan sang aton pagsalig nga matuman ang katuyuan ni Jehova para sa iya kadayawan.​​—⁠Ezequiel 38:23.

Ang Ginharian nga Ginapangamuyo Naton

7, 8. (a) Ano ang Ginharian nga gintudlo ni Jesus nga ipangamuyo naton? (b) Ano ang matun-an naton gikan sa mga tulun-an sang Daniel kag Bugna tuhoy sa sini nga Ginharian?

⁷ Ang ikaduha nga pangabay sa modelo nga  pangamuyo amo: “Magkari ang imo ginharian.” (Mateo 6:10) Ini nga pangabay may kaangtanan gid sa nahauna nga pangabay. Ang instrumento ni Jehova sa pagpakabalaan sa iya ngalan amo ang Mesianikong Ginharian, ang iya langitnon nga gobierno, diin ang iya Anak, nga si Jesucristo, amo ang gintangdo nga Hari. (Salmo 2:​1-9) Ginalaragway sang tagna ni Daniel ang Mesianikong Ginharian subong “bato” nga natiphag gikan sa isa ka “bukid.” (Daniel 2:​34, 35, 44, 45) Ang bukid nagalaragway sang bug-os uniberso nga pagkasoberano ni Jehova, gani ang bato sang Ginharian amo ang isa ka bag-o nga kapahayagan sang bug-os uniberso nga pagginahom ni Jehova. Sa tagna, ang bato ‘nangin daku nga bukid nga naghil-ub sa bug-os nga duta,’ nga nagapakita nga ang paggahom sang Mesianikong Ginharian magarepresentar sa soberanya sang Dios sa duta.

⁸ Kaupod pa ni Jesus ang 144,000 sa iya gobierno sang Ginharian, nga “mga tinubos gikan sa mga tawo” agod maggahom subong mga hari kag mga saserdote. (Bugna 5:​9, 10; 14:​1-4; 20:6) Ginapatuhuyan sila ni Daniel subong “mga balaan sang Labing Mataas,” nga, upod ni Cristo bilang ila Ulo, nagbaton sang ‘ginharian kag sang pagbulut-an kag sang pagkadaku sang mga ginharian sa idalom sang bug-os nga langit. Ang ila ginharian dayon nga ginharian, kag ang tanan nga ginsakpan magaalagad kag magatuman sa ila.’ (Daniel 7:​13, 14, 18, 27) Amo ini ang langitnon nga gobierno nga gintudlo ni Jesus nga ipangamuyo sang iya mga sumulunod.

Ngaa Mangamuyo Gihapon Para sa Pagkari sang Ginharian?

9. Ngaa nagakaigo nga ipangamuyo naton ang pagkari sang Ginharian sang Dios?

⁹ Sa iya modelo nga pangamuyo, gintudluan kita ni Cristo nga ipangamuyo ang pagkari sang Ginharian sang Dios. Ang katumanan sang mga tagna sa Biblia nagapakita nga ang Mesianikong Ginharian gintukod sa langit sang 1914.⁠ * Nian, nagakaigo pa bala nga ipangamuyo naton nga “magkari” ini nga Ginharian? Nagakaigo gid. Kay sa tagna ni Daniel, dugmukon sang Mesianikong Ginharian, nga ginasimbuluhan sang bato, ang politikal nga mga gobierno sang tawo, nga ginasimbuluhan sang daku nga larawan. Wala pa maigo sang bato ang imahen agod dugmukon gid ini. Ang tagna ni Daniel nagasiling: ‘Ang pagbulut-an sang ginharian dili gid ibilin sa iban nga katawhan. Kundi dugmukon sini kag papason ini tanan nga ginharian kag ini magapadayon sa gihapon.’​​—⁠Daniel 2:⁠44.

10. Ngaa handum naton nga magkari ang Ginharian sang Dios?

¹⁰ Handum naton nga magkari ang Ginharian sang Dios batok sa malauton nga sistema sang mga butang ni Satanas bangod magakahulugan ini sang pagpakabalaan sa balaan nga ngalan ni Jehova kag pagdula sa tanan nga nagapamatok sa soberanya sang Dios. Hanuot kita nga nagapangamuyo: “Magkari ang imo ginharian,” kag upod kay apostol Juan, ginasiling naton: “Kabay pa. Kari, Ginuong Jesus.” (Bugna 22:20) Huo, kabay nga magkari si Jesus agod pakabalaanon ang ngalan ni Jehova kag ibindikar ang Iya pagkasoberano, agod nga mangin matuod ang ginasiling sang salmista: “Kag pagakilalahon nila nga ikaw  lamang, nga ang imo ngalan amo si Jehova, amo lamang ang Labing Mataas sa ibabaw sang bug-os nga duta.”​​—⁠Salmo 83:⁠18, Balaan nga Kasulatan, American Bible Society.

“Paghimuon ang Imo Kabubut-on”

11, 12. (a) Ano ang aton ginapangabay kon nagapangamuyo kita nga himuon ang kabubut-on sang Dios, “sa duta, subong sang sa langit”? (b) Ano pa ang buot silingon sang aton pagpangamuyo nga himuon ang kabubut-on ni Jehova?

¹¹ Masunod nga gintudlo ni Jesus sa iya mga disipulo nga mangamuyo: “Paghimuon ang imo kabubut-on, sa duta subong sang sa langit.” (Mateo 6:10) Nagluntad ang uniberso bangod sa kabubut-on ni Jehova. Ang gamhanan langitnon nga mga tinuga nagaamba: “Takus ka, GINUO kag Dios namon, sa pagbaton sang himaya kag dungog kag gahom, kay ikaw ang nagtuga sang tanan nga butang, kag bangod sang imo kabubut-on nangin amo kag gintuga sila.” (Bugna 4:11) May katuyuan si Jehova para sa “mga butang sa langit kag mga butang sa duta.” (Efeso 1:​8-​10) Paagi sa pagpangamuyo nga himuon ang kabubut-on sang Dios, kita, sa pagkamatuod, nagapangabay kay Jehova nga himuon niya ang iya katuyuan. Dugang pa, ginapakita man naton nga luyag naton matuman ang kabubut-on sang Dios sa bug-os nga uniberso.

¹² Paagi sa sini nga pangamuyo ginapakita man naton ang aton pagkahanda nga ipahisuno ang aton kabuhi sa kabubut-on ni Jehova. Si Jesus nagsiling: “Ang akon kalan-on amo ang paghimo sang kabubut-on sang nagpadala sa akon, kag ang pagtuman sang iya buluhaton.” (Juan 4:34) Kaangay ni Jesus, kita subong mga dedikado nga Cristiano, nagakalipay sa paghimo sing kabubut-on sang Dios. Ang aton gugma kay Jehova kag sa iya Anak nagapahulag sa aton nga magkabuhi “indi . . . sa unod sa kailigbon sang mga tawo kundi sa kabubut-on sang Dios.” (1 Pedro 4:​1, 2; 2 Corinto 5:​14, 15) Ginatinguhaan naton nga likawan ang mga butang nga supak sa kabubut-on ni Jehova. (1 Tesalonica 4:​3-5) Paagi sa paghimulos ukon pagbakal sing kahigayunan para magbasa kag magtuon sang Biblia, ‘padayon naton nga ginahangop kon ano ang kabubut-on ni Jehova,’ nga nagalakip sa aton aktibo nga pagpakigbahin sa pagbantala sining “maayong balita sang ginharian.”​​—⁠Efeso 5:​15-​17; Mateo 24:14.

Ang Kabubut-on ni Jehova sa Langit

13. Paano ginahimo ang kabubut-on sang Dios antes pa sang pagrebelde ni Satanas?

¹³ Ginahimo na ang kabubut-on ni Jehova sa langit antes pa sang pagrebelde sang isa sa iya espirituwal nga kaanakan kag nangin Satanas. Ginpersonipikar sa tulun-an nga Hulubaton ang panganay nga Anak sang Dios subong kaalam. Nagapakita ini nga sa sulod sang tuman kalawig nga tion nga indi matakus, ang bugtong nga Anak sang Dios ‘nagkasadya sing dayon sa atubangan niya,’ nga nagkalipay sa paghimo sang kabubut-on sang iya Amay. Sang ulihi, nangin “pangulo nga manugpangabudlay” sia ni Jehova sa pagtuga sang tanan nga butang “sa langit kag sa duta, ang makita kag di-makita.” (Hulubaton 8:​22-​31; Colosas 1:​15-​17) Gingamit ni Jehova si Jesus subong iya Pulong, ukon Humalambal.​​—⁠Juan 1:​1-3.

14. Ano ang matun-an naton gikan sa Salmo 103 tuhoy sa kon paano ginahimo sang mga anghel ang kabubut-on ni Jehova sa kalangitan?

¹⁴ Ginapakita sang salmista nga ang soberanya ni Jehova pinakamataas sa tanan nga tinuga kag ang mga anghel nagapamati sa iya mga instruksion kag mga sugo. Mabasa naton: “Ang GINUO nagpalig-on sang iya trono sa kalangitan, kag ang iya ginharian nagagahom sa tanan. Pakamaayuha ang GINUO, kamo nga iya mga manugtunda, nga mga gamhanan sa kusog nga nagatuman sang iya pulong, nga nagapamati sa tingog sang iya pulong! Pakamaayuha ang GINUO, tanan kamo nga iya kasuldadusan, kamo nga mga manug-alagad niya nga nagahimo sang iya nahamut-an! Pakamaayuha ang GINUO, tanan kamo nga iya binuhatan, sa tanan nga duog sang iya ginsakpan [ukon, “soberanya”].”​​—⁠Salmo 103:​19-​22.

15. Paano ang pagbaton ni Jesus sang paggahom sa Ginharian nag-apektar sa paghimo sang kabubut-on sang Dios sa langit?

¹⁵ Pagkatapos sang iya pagrebelde, makapalapit pa si Satanas sa langit, subong ginpakita sa tulun-an nga Job. (Job 1:​6-​12; 2:​1-7) Apang, gintagna sa tulun-an sang Bugna ang pag-abot sang tion nga palayason si Satanas kag ang iya mga demonyo gikan sa langit. Maathag nga nag-abot ining tion wala madugay pagkatapos nabaton ni Jesucristo ang paggahom sa Ginharian sang 1914.  Halin sadto, ining mga rebelde wala na sing duog sa langit. Ginlimitehan sila sa palibot sang duta. (Bugna 12:​7-​12) Wala na sing nagapamatok sa pagkasoberano ni Jehova sa langit, kundi mga nahiusa na lamang nga nagadayaw sa “Kordero,” kay Cristo Jesus, kag mga mapinasakupon nga nagadayaw kay Jehova. (Bugna 4:​9-​11) Ginahimo gid ang kabubut-on ni Jehova sa langit.

Ang Kabubut-on ni Jehova Para sa Duta

16. Paano ang modelo nga pangamuyo nagpamatuod nga sayop ang panudlo sang Cristiandad tuhoy sa paglaum sang mga tawo?

¹⁶ Wala ginalakip sang mga relihion sa Cristiandad ang duta sa mga katuyuan sang Dios, nagapangangkon nga ang tanan nga maayo nga tawo mapalangit. Apang gintudluan kita ni Jesus sa pagpangamuyo: “Magkari ang imo ginharian. Paghimuon ang imo kabubut-on, sa duta subong sang sa langit.” (Mateo 6:10) Masiling gid bala naton nga sa kabilugan ginahimo karon ang kabubut-on ni Jehova sa duta nga puno sang kasingki, inhustisya, balatian, kag kamatayon? Indi gid! Gani dapat gid naton hanuot nga ipangamuyo nga himuon ang kabubut-on sang Dios sa duta, suno sa saad nga ginrekord ni apostol Pedro: “Suno sa iya saad nagahulat kita sing bag-ong mga langit [ang gobierno sang Mesianikong Ginharian nga panguluhan ni Cristo] kag bag-ong duta [ang matarong nga katilingban sang mga tawo] diin nagapuyo ang pagkamatarong.”​​—⁠2 Pedro 3:⁠13.

17. Ano ang katuyuan ni Jehova para sa duta?

¹⁷ May katuyuan si Jehova sa pagtuga sang duta. Gin-inspirar niya si propeta Isaias nga magsulat: “Kay amo ini ang ginasiling sang GINUO, nga nagtuga sang mga langit, (sia amo ang Dios!), nga naghuman sang duta kag naghimo sini (nga nagpalig-on sini; wala sia magtuga sini nga walay pulos, nga naghuman sini nga pagapuy-an!): ‘Ako amo ang GINUO, kag wala na gid sing iban.’” (Isaias 45:18) Ginbutang sang Dios ang una nga mag-asawa sa isa ka paraiso nga hardin kag ginsugo sila: “Magmabungahon kag magbuad, kag magtugob sang duta kag magpakaagalon sa iya.” (Genesis 1:​27, 28; 2:15) Maathag nga ang katuyuan sang Manunuga amo nga puy-an ang duta sang isa ka himpit nga rasa sang matarong nga mga tawo nga malipayon nga nagapasakop sa pagkasoberano ni Jehova kag magakabuhi sing dayon sa Paraiso nga ginpangako ni Cristo.​​—⁠Salmo 37:​11, 29; Lucas 23:⁠43.

18, 19. (a) Ano anay ang himuon antes matuman sing bug-os ang kabubut-on sang Dios sa duta? (b) Ano ang iban pa nga mga aspekto sang modelo nga pangamuyo ni Jesus ang usisaon sa masunod nga artikulo?

¹⁸ Indi bug-os nga matuman ang kabubut-on ni Jehova sa duta kon ginapuy-an pa ini sang mga tawo nga nagapamatok sa iya pagkasoberano. Paagi sa gamhanan nga espiritu nga hubon sa idalom sang pagpanguna ni Cristo, laglagon sang Dios ang “mga nagalaglag sang duta.” Ang bug-os nga malauton nga sistema sang mga butang ni Satanas, lakip ang butig nga relihion sini, garok nga politika, sakon kag madaya nga komersio, kag malaglagon nga militar, pagadulaon sing dayon. (Bugna 11:18; 18:21; 19:​1, 2, 11-​18) Mabindikar ang pagkasoberano ni Jehova kag mapakabalaan ang iya ngalan. Ini tanan ginapangabay naton kon kita nagasiling: “Amay namon nga yara sa langit, pakabalaanon ang imo ngalan. Magkari ang imo ginharian. Paghimuon ang imo kabubut-on, sa duta subong sang sa langit.”​​—⁠Mateo 6:​9, 10.

¹⁹ Apang, sa iya modelo nga pangamuyo, ginpakita ni Jesus nga makapangamuyo man kita tuhoy sa personal nga mga butang. Usisaon naton ining aspekto sang iya instruksion sa pagpangamuyo sa masunod nga artikulo.

[Mga nota]

Sa Pagrepaso

• Ngaa nagakaigo nga tawgon naton si Jehova nga aton “Amay”?

• Ngaa importante gid nga ipangamuyo naton ang pagpakabalaan sa ngalan ni Jehova?

• Ngaa ginapangamuyo naton ang pagkari sang Ginharian sang Dios?

• Ano ang ginapahangop kon ginapangamuyo naton nga himuon ang kabubut-on sang Dios sa duta subong sang sa langit?

[Mga Pamangkot sa Pagtinuon]

[Retrato sa pahina 9]

Ang mga pangamuyo ni Jesus tuhay gid sa pakitakita nga mga pangamuyo sang mga Fariseo

[Retrato sa pahina 10]

Ginapangamuyo sang mga Cristiano ang pagkari sang Ginharian sang Dios, ang pagpakabalaan sa iya ngalan, kag ang paghimo sang iya kabubut-on