Malandas Mo ang Pagkawalay Kapat-uran

“PAT-OD gid!” “Sigurado!” “Garantisado!” Ayhan madamo na nga beses mo ini nabatian. Apang, sa aton matag-adlaw nga pagkabuhi, pila lang ka butang ang mapat-od naton. Indi gid mapaktan ang kabuhi amo nga masami kita nagapalibog kon bala may butang pa nga mapat-od naton. Daw kinaandan na sa kabuhi ang pagduhaduha kag pagkawalay kapat-uran.

Halangpunon nga handum sang kalabanan nga tawo ang kalig-unan kag kalipay para sa ila kag sa ila pamilya. Nagapangabudlay sila sing lakas agod matigayon ang mga butang nga para sa ila makapahalipay kag makahatag sing kalig-unan​—⁠nga sa masami amo ang kuarta kag mga pagkabutang. Apang, mahimo madula sing hinali ini nga mga pagkabutang bangod sang linog, bagyo, aksidente, ukon masingki nga krimen. Mahimo magbag-o gulpi ang kabuhi bangod sang grabe nga balatian, diborsio, ukon pagkadula sing trabaho. Matuod, mahimo nga indi gid man ini matabo sa imo. Apang, ang paghibalo lamang nga mahimo may malain nga matabo sa bisan anong tion makatulublag na kag makapasubo. Kag indi lang amo sini.

Ang pagkawalay kapat-uran may pareho nga kahulugan sa pagduhaduha, kag ginpaathag sang isa ka diksionaryo ang “pagduhaduha” subong di-pat-od nga ginapatihan ukon opinyon nga masami nagapabudlay sa pagdesisyon. Isa pa, suno sa libro nga Managing Your Mind, “ang pagduhaduha sa isa ka importante nga butang isa ka panguna nga kabangdanan sang kabalaka kag kahangawa.” Ang indi madula nga pagduhaduha mahimo bangdan sang kabalaka, kalugaw-an, kag kaakig. Huo, ang pagkahangawa kon ano ang mahimo matabo ukon indi matabo makahalit sa aton hunahuna kag panglawas.

Bangod sini, kabaliskaran naman ang ginahimo sang iban. Kaangay sila sang pamatan-on nga taga-Brazil nga nagsiling: “Ngaa magkabalaka sa mahimo matabo? Dapat lang naton kabalak-an ang karon, indi ang palaabuton.” Ining bahala na ukon “magkaon kita kag mag-inom” nga panimuot magadul-ong lamang sa kapaslawan, kasubo, kag kamatayon sa ulihi. (1 Corinto 15:32) Maayo pa nga magsalig kita kay Jehova nga Dios, ang Manunuga, nga sa iya, siling sang Biblia, “walay pagliwanliwan ukon landong sang pagbalhin.” (Santiago 1:17) Kon usisaon naton ang Pulong sang Dios, ang Biblia, masapwan naton ang malig-on nga mga laygay kag panuytoy kon paano malandas ang wala sing kapat-uran nga mga kahimtangan sa kabuhi. Mabuligan man kita sini nga mahangpan kon ngaa madamo gid ang nagabatyag sing pagkawalay kapat-uran.

Kabangdanan sang Pagkawalay Kapat-uran

Ang Kasulatan nagapakita sing realistiko nga pagtamod sa kabuhi kag nagabulig sa aton nga  mapalambo ang nagakaigo nga panimuot sa indi pat-od nga mga butang ukon kahimtangan kag sa pagbag-o. Bisan pa mahimo maghatag sing pila ka kalig-unan ang pamilya, kahimtangan sa katilingban, kaalam, maayong panglawas, kag iban pa, ginapakita sang Biblia nga indi naton paghunahunaon nga indi ini magbag-o ukon mangin matawhay lang ang kabuhi. Siling sang maalam nga si Hari Solomon: “Ang palumba indi sa madasig, ukon ang inaway sa makusog, kag indi man ang kalan-on sa maalam, ukon ang manggad man sa mga tawo nga mahangpunon, ukon ang kahamuot man sa mga tawo nga sampaton.” Ngaa? Kay “ang tion kag ang kahigayunan nagakahanabo sa ila tanan.” Gani, si Solomon nagpaandam: “Subong sang mga isda nga ginadakop sa malaut nga mga pukot, kag subong sang mga pispis nga ginadakop sa siod, amo man ang mga anak sang mga tawo ginasiod sa malaut nga tion, kon ini mahanabo sa ila sing hinali.”​—⁠Manugwali 9:​11, 12.

May ginsambit man si Jesucristo nga tion sang tuman nga kabalaka kag pagkawalay kapat-uran nga mahanabo sa isa ka kaliwatan sang tawo. Sa maathag nga paglaragway, sia nagsiling: “May mga tanda sa adlaw kag sa bulan kag sa mga bituon, kag sa duta kasisit-an sang kapungsuran sa kalisang bangod sang dinaguhob sang dagat kag sang mga balod, ang mga tawo nagakapunaw sa kahadlok kag sa kalangkag sa magaabot sa kalibutan; kay ang mga kagamhanan sang mga langit uyugon.” Apang, ginpalig-on ni Jesus ang bunayag sing tagipusuon nga mga tawo karon: “Kon makita ninyo nga nagakahanabo ining mga butang, makilala ninyo nga malapit na ang ginharian sang Dios.” (Lucas 21:​25, 26, 31) Sing kaanggid, sa baylo nga mahangawa sa indi pat-od nga palaabuton, ang aton pagtuo sa Dios nagabulig sa aton nga mahanduraw ang isa ka matahom kag malig-on nga palaabuton, walay sapayan sang nagaluntad nga pagkawalay kapat-uran.

“May Bug-os nga Kapat-uran sang Paglaum”

Bisan pa indi naton mapat-od ang tagsa ka butang nga aton mabatian, mabasa, ukon makita, may mabakod kita nga rason sa pagsalig sa Manunuga. Indi lamang sia ang Supremo kundi mahigugmaon man sia nga Amay nga nagaulikid sa iya dutan-on nga mga anak. Nahanungod mismo sa iya pulong, ang Dios nagsiling: “Indi ini magabalik sa akon nga wala sing mga resulta, kundi himuon gid sini ang akon nahamut-an, kag pat-od nga magamadinalag-on ini sa butang nga tungod sina ginpadala ko ini.”​—⁠Isaias 55:​11, NW.

Si Jesucristo nagtudlo sang kamatuoran halin sa Dios, kag madamo sang mga nagpamati sa iya ang nangin kumbinsido. Halimbawa, ang isa ka grupo sang bunayag sing tagipusuon nga mga Samariahanon nagsiling sa babayi nga una nga nakabati kay Jesus: “Karon nagatuo kami indi bangod sang imo hambal, kay kami gid nakabati, kag nakakilala nga ini amo gid ang Manluluwas sang kalibutan.” (Juan 4:42) Amo man sa karon, bisan nagakabuhi kita sa tion nga wala sing kalig-unan, mapat-od naton ang aton dapat patihan.

Nahanungod sa relihioso nga pagtuluuhan, madamo ang nagabatyag nga tama na ang magpati na lang sa baylo nga hangpon pa ini. Apang, indi amo sina ang ginbatyag sang manunulat sang Biblia nga si Lucas. Nagpanalawsaw sia kag naghatag sing sibu nga impormasyon agod “mahibaluan [sang iban] ang bug-os nga kamatuoran sadtong mga butang” nga iya ginsulat. (Lucas 1:​4, Maayong Balita nga Biblia) Bangod basi mahangawa ang aton kapamilya kag mga abyan nga tuhay sa aton sing pagtuluuhan nga mapaslawan kag malugaw-an kita sa ulihi, importante nga mapangapinan naton ang aton pagtuo. (1 Pedro 3:15) Mabuligan lamang naton ang iban nga magsalig sa Dios kon nahibaluan naton sing sibu ang rason sang aton ginapatihan. Ang Biblia nagalaragway kay Jehova sing subong sini: “Ang Igang, ang iya binuhatan himpit; kay ang tanan niyang dalanon katarungan. Dios sang  katutom kag walay kalautan, matadlong kag matarong sia.”​—⁠Deuteronomio 32:4.

Binagbinaga ang katapusan nga pinamulong: “Matadlong kag matarong sia.” Paano naton mapat-od ini? Kumbinsido gid si apostol Pedro sa sini. Ginsilingan niya ang isa ka Romanong opisyal kag ang iya panimalay: “Matuod gid ginahantop ko nga ang Dios walay ginapasulabi sa mga tawo, apang sa tagsa ka pungsod ang nagakahadlok sa iya kag nagahimo sang katarungan kalahamut-an sa iya.” (Binuhatan 10:​34, 35) Nasiling ini ni Pedro bangod bag-o lang niya masaksihan kon paano gintuytuyan sang Dios ang mga butang agod nga ang isa ka Gentil nga pamilya, nga ginkabig anay nga di-matinlo kag di-kalahamut-an, nangin kalahamut-an sa Iya. Kaangay ni Pedro, mapat-od man naton ang pagkawalay pinasulabi kag pagkamatarong sang Dios kon makita naton mismo ang “dakung kadam-an” sang mga tawo​—⁠kapin na sa anom ka milyon karon⁠​—⁠halin sa kapin sa 230 ka kadutaan sa bug-os nga kalibutan nga nagbiya sang ila una nga pagkabuhi kag nagalakat sa banas sang pagkamatarong.​—⁠Bugna 7:⁠9; Isaias 2:2-4.

Subong matuod nga mga Cristiano, indi naton luyag nga mangin panatiko ukon dogmatiko, kundi mangin mapainubuson kag rasonable. Apang, wala kita nagaduhaduha sa aton ginapatihan kag sa aton ginalauman sa palaabuton. Nagsulat si apostol Pablo sa mga Cristiano sang unang siglo: “Ginahandum namon nga ang kada isa sa inyo magpakita sang amo man nga kapisan agod may bug-os nga kapat-uran sang paglaum tubtob sa katapusan.” (Hebreo 6:​11, NW) Sing kaanggid, ang maayong balita gikan sa Biblia naghatag sa aton sing “bug-os nga kapat-uran sang paglaum.” Sa sini nga paglaum, nga napasad sing malig-on sa Pulong sang Dios, “indi kita mapaslawan,” paathag man ni Pablo.​—⁠Roma 5:​5, MB.

Dugang pa, kumbinsido gid kita nga kon tudluan naton ang iban sang maayong balita sang Biblia, makahatag ini sa ila sing kalig-unan kag kapat-uran sa espirituwal, kag bisan pa gani sa emosyon kag sa pisikal. Makasiling man kita kaangay ni Pablo: “Ang maayong balita nga ginabantala namon indi masapwan sa tunga ninyo paagi sa hambal lamang kundi paagi sa gahom man kag paagi sa balaan nga espiritu kag malig-on nga pagsalig.”​—⁠1 Tesalonica 1:​5, NW.

Mga Pagpakamaayo Karon Bangod sang Espirituwal nga Kalig-unan

Bisan pa indi naton mapaabot ang bug-os nga kalig-unan sa kabuhi karon, may mahimo kita agod mangin malig-on gawa ang kabuhi. Halimbawa, ang regular nga pagpakig-upod sa Cristianong kongregasyon sa mga miting nagahatag sing kalig-unan bangod ginatudluan kita diri sing husto kag malig-on nga mga prinsipio. Si Pablo nagsulat: “Tulini ang mga manggaranon sa sining kalibutan, nga indi sila magmatinaastaason, ukon magbutang sang ila paglaum sa di-masaligan nga mga manggad kundi sa Dios nga nagahatag sa aton sing bugana sang tanan nga butang nga pagkalipayan.” (1 Timoteo 6:17) Paagi sa pagsalig kay Jehova kag indi sa umalagi nga materyal nga mga butang ukon kalipayan, nadula sang madamo ang kabalaka kag kapaslawan nga ila anay ginaantos.​—⁠Mateo 6:19-21.

Sa sulod sang kongregasyon, may yara man kita mapinalanggaon nga paghiliutod, nga nagabulig kag nagasuportar sa madamong paagi. May tion sa pagministeryo ni apostol Pablo nga nakabatyag sia kag ang iya mga kaupod sa paglakbay sing ‘palas-anon nga tama gid kadaku kag kabug-at’ kag “wala na [sila] magdumdom nga mabuhi pa.” Diin si Pablo nakakita sing suporta kag bulig? Siempre pa, wala gid magluya ang iya pagsalig sa Dios. Walay sapayan sina, ginpalig-on kag ginlugpayan sia sang mga masigka-Cristiano nga nagbulig sa iya. (2 Corinto 1:​8, 9; 7:5-7, MB) Sa karon, kon mag-abot ang kinaugali nga mga kalamidad ukon iban pa nga mga trahedya, una pirme ang aton Cristianong kauturan sa pagbulig sa materyal kag sa espirituwal sa mga masigka-Cristiano kag sa iban pa nga nagakinahanglan.

Ang isa pa ka bulig agod maatubang ang wala sing kapat-uran nga mga kahimtangan sa kabuhi amo ang pangamuyo. Makadangop kita pirme sa aton mahigugmaon nga langitnon nga Amay kon makaeksperiensia kita sing wala ginapaabot nga pag-ipit. “Ang GINUO mangin mataas nga torre tungod  sa mga pinigos, mataas nga torre sa mga tion sang kagamo.” (Salmo 9:9) Mahimo nga indi maamligan sang tawhanon nga mga ginikanan ang ila kabataan. Apang, handa ang Dios sa pagbulig sa aton nga malandas ang aton kahadlok kag pagbatyag sing pagkawalay kapat-uran. Kon ihaboy naton ang aton mga kabalaka kay Jehova paagi sa pangamuyo, mapat-od naton nga makapanghikot sia “sing lakas kabugana labaw sa tanan nga aton ginapangayo ukon ginahunahuna.”​—⁠Efeso 3:20.

Pirme ka bala nagapangamuyo sa Dios? Kumbinsido ka bala nga ginapamatian sang Dios ang imo mga pangamuyo? “Ginsilingan ako sang akon iloy nga dapat ako mangamuyo sa Dios,” siling sang isa ka lin-ay sa São Paulo. “Apang nagpalibog ako: ‘Ngaa abi sugilanunon ko ang isa nga wala ko gani makilala?’ Apang, ang Hulubaton 18:10 nagbulig sa akon nga mahangpan nga kinahanglan naton ang bulig sang Dios kag dapat kita mangamuyo sa iya.” Ini nga kasulatan nagasiling: “Ang ngalan ni Jehova torre nga mabakod. Ang matarong nagadalagan pasulod sini kag ginahatagan sing pangamlig.” (NW) Paano naton mapalambo ang pagsalig kay Jehova kon indi naton batasan nga mangamuyo sa iya? Agod matigayon ang mga pagpakamaayo sang espirituwal nga kalig-unan, dapat batasan naton nga mangamuyo sing tinagipusuon adlaw-adlaw. Si Jesus nagsiling: “Magbantay kamo sa tagsa ka dag-on, nga nagaampo nga makasarang kamo sa pagpalagyo sa sini tanan nga butang nga mahanabo, kag sa pagtindog sa atubangan sang Anak sang tawo.”​—⁠Lucas 21:36.

Ang isa pa ka butang nga mapat-od naton amo ang aton paglaum sa Ginharian sang Dios. Talupangda ang pinamulong sa Daniel 2:44: “Magapatindog ang Dios sang langit sing ginharian nga dili gid malaglag, ukon ang pagbulut-an sini ibilin sa iban nga katawhan. Kundi dugmukon sini kag papason ini tanan nga ginharian kag ini magapadayon sa gihapon.” Ini nga paglaum malig-on kag mapat-od naton. Masami nagakapaslawan ang mga saad sang mga tawo, apang pirme kita makasalig sa pulong ni Jehova. Ang Dios kaangay sang igang nga masaligan naton. Mabatyagan naton ang ginsiling ni David: “Ang akon Dios, akon igang, sa iya magadangop ako, akon taming kag ang sungay sang akon kaluwasan, akon mataas nga torre kag akon dalangpan, akon manluluwas; ikaw nagaluwas sa akon gikan sa panglugos.”​—⁠2 Samuel 22:3.

Ang ginsambit kaina nga libro nga Managing Your Mind nagsiling pa: “Kon pirme ginahunahuna sang isa ang malain nga mga butang nga mahimo matabo, labi ini nga daw nagamatuod sa hunahuna, kag labi nga nagabudlay ang paglandas sa sini.” Kon amo, ngaa abi pabug-atan naton ang aton kaugalingon sang mga kabalaka kag pagduhaduha sang kalibutan? Sa baylo, magsalig, indi sa di-pat-od nga mga butang sa kalibutan, kundi sa pat-od nga mga saad sang Dios. Kon mabakod ang aton pagtuo sa pat-od nga mga saad ni Jehova, makasalig kita sa sini: “Ang nagatuo sa iya indi mapaslawan.”​—⁠Roma 10:​11, MB.

[Blurb sa pahina 29]

Ginapasalig sang Pulong sang Dios nga pakamaayuhon ang katawhan sa palaabuton

[Blurb sa pahina 30]

“Ang nagatuo sa iya indi mapaslawan”

[Retrato sa pahina 31]

Ang maayong balita sang Ginharian nagahatag sing kalig-unan sa mga tawo