Lugpay Para sa mga Nasit-an

SANG ang matutom nga mga lalaki kag mga babayi sang una nag-antos sing kasisit-an, hanuot sila nga nangamuyo sa Dios sing panuytoy. Apang, naghimo man sila sing kinahanglanon nga mga tikang agod mapahaganhagan ang kasisit-an, subong sang paggamit sing pagkamapahituon agod malikawan ang mga manugpigos. Halimbawa, nabatas ni David ang iya kalalat-an bangod sang pagsalig niya kay Jehova upod ang iya mismo pagpanikasog. Kamusta naman kita karon?

Kon ginasit-an, ayhan magahimo ka sing kinahanglanon nga tikang agod malubad ang imo problema. Halimbawa, kon wala ka sing trabaho, indi bala nagapanikasog ka sa pagpangita sing nagakaigo nga trabaho nga makasakdag sa imo kag sa imo pamilya? (1 Timoteo 5:8) Ukon kon may balatian ka, indi bala nagapabulong ka? Si Jesus, nga may gahom halin sa Dios agod mapaayo ang tanan nga sahi sang balatian, talalupangdon nga nagbaton nga ang ‘mga nagamasakit nagakinahanglan sing manugbulong.’ (Mateo 9:12) Apang, ang imo mga kapipit-an indi pirme madula; mahimo padayon nga batason mo ini tubtob sa pila ka kasangkaron.

Ngaa indi mo ini ipangamuyo kay Jehova nga Dios? Halimbawa, kon nagapangita kita sing trabaho, ang mapangamuyuon nga pagsalig sa Dios magabulig sa aton nga mapamatukan ang bisan ano nga pagsulay nga batunon ang trabaho nga nagasumpakil sa mga prinsipio sang Biblia. Malikawan man naton nga ‘mapatalang sa pagtuo’ sang kakagod ukon gugma sa kuarta. (1 Timoteo 6:10) Sa pagkamatuod, kon nagahimo sing importante nga mga desisyon tuhoy sa mga problema sa trabaho ukon pamilya ukon kapagros, masunod naton ang laygay ni David: “Itungtong sa GINUO ang imo lulan, kag sia magaalay-ay sa imo; indi sia magtugot nga malingkang ang matarong.”​​​—⁠⁠Salmo 55:22.

Ang tinagipusuon nga pangamuyo magabulig man sa aton nga huptan nga balanse ang aton hunahuna agod indi kita madaug sang aton kasisit-an. Ang isa ka matuod nga Cristiano nga si apostol Pablo nagsulat: “Sa tagsa ka butang sa pangamuyo kag pag-ampo nga may pagpasalamat ipakilala sa Dios ang inyo mga pangabay.” Sa anong paagi malugpayan kita sang hanuot nga pangamuyo? “Ang paghidait sang Dios, nga nagalabaw sa tanan nga paghangop, magatipig sang inyo mga tagipusuon kag inyo mga painuino  sa kay Cristo Jesus.” (Filipos 4:​6, 7) Ang paghidait sang Dios “nagalabaw sa tanan nga paghangop.” Busa, magapabakod ini sa aton kon ginapiutan kita. ‘Magatipig ini sang aton tagipusuon kag mga painuino,’ sa amo nagabulig sa aton nga malikawan ang padasudaso kag di-maalamon nga reaksion, nga mahimo makadugang sa aton kasisit-an.

Daku gid ang mabulig sang pangamuyo agod mabag-o ang kahimtangan. Sang nabilanggo si apostol Pablo sa Roma, mapainubuson sia nga nagpangabay sa iya mga masigka-Cristiano nga ipangamuyo sia. Ngaa ginpangabay ini ni Pablo? “Naglaygay ako sa inyo sing labi pa gid sa paghimo sini,” sulat niya sa ila, “agod nga mapabalik ako sa inyo sa labing madali.” (Hebreo 13:19) Kon sa aton pa, nahibaluan ni Pablo nga ang pagpamati ni Jehova sa dalayon nga mga pangamuyo sang iya mga masigkatumuluo mahimo makabulig sa kon san-o sia buhian.​​​—⁠⁠Filemon 22.

Mabag-o bala sang pangamuyo kon ano ang mangin resulta sang aton kasisit-an? Siguro. Apang, dapat naton mahangpan nga si Jehova nga Dios mahimo nga indi magasabat sang aton mga pangamuyo suno sa luyag naton. Si Pablo madamong beses nga nangamuyo tuhoy sa iya “ungon sa unod,” ayhan isa ka pisikal nga problema. Apang, sa baylo nga kuhaon ang kasisit-an, ang Dios nagsiling kay Pablo: “Ang akon bugay tuman sa imo, kay ang akon gahom ginahimpit sa kaluyahon.”​​​—⁠⁠2 Corinto 12:​7-9.

Kon amo, ang aton kasisit-an mahimo nga indi gilayon madula. Apang, may kahigayunan kita nga pamatud-an ang aton pagsalig sa aton langitnon nga Amay. (Santiago 1:2-4) Makasalig kita nga bisan pa indi pagdulaon ni Jehova nga Dios ang kasisit-an, “magahatag man [sia] sing lulutsan, agod nga makasarang [kita] sa pagbatas.” (1 Corinto 10:13) Talalupangdon nga si Jehova ginatawag nga “Dios sang tanan nga paglipay, nga nagalipay sa aton sa tanan naton nga kapipit-an.” (2 Corinto 1:​3, 4) Sarang mahatag sang Dios sa aton kon ano ang kinahanglanon naton agod makabatas, kag may yara kita paglaum nga kabuhi nga walay katapusan.

Ang Pulong sang Dios, ang Biblia, nagasaad nga “pahiran [ni Jehova] ang tagsa ka luha sa mga mata nila, kag wala na sing kamatayon, ukon kalisod ukon paghibi ukon kasakit pa.” (Bugna 21:​3, 4) Daw indi bala mapatihan ang isa ka kalibutan nga wala na sing kasisit-an? Siguro, kon naanad ka na sa pagkabuhi nga may kasisit-an. Walay sapayan sini, ang kahilwayan sa kahadlok kag kalamidad amo ang ginsaad sang Dios, kag ang iya katuyuan pat-od gid nga magmadinalag-on.​​​—⁠⁠Isaias 55:​10, 11.

[Mga retrato sa pahina 9]

Halin sa pagkawalay paglaum padulong sa kaumpawan