Magbantay Batok sa Paglimbong

“Andam kamo nga walay maglimbong sa inyo paagi sa . . . daya nga walay pulos.”​—⁠⁠COLOSAS 2:8.

1-3. (a) Ano nga mga halimbawa ang nagapakita nga ang paglimbong nagaapektar sa halos tanan nga aspekto sang matag-adlaw nga pagkabuhi? (b) Ngaa indi kita dapat matingala sa paglimbong sa kalibutan?

PILA sa inyo ang wala gid sang kliyente nga nagbutig sa inyo?” Sang nagligad nga pila ka tuig, nagsurbe ang isa ka propesor sa abogasiya nga ginapamangkot ini. Ang resulta? Sia nagpaathag: “Sa linibo ka abogado, isa lang ang wala gid sing kliyente nga nagbutig sa iya.” Ang rason? “Bag-o lang nagsugod sa pag-obra ang abogado sa daku nga kompanya kag wala pa sia sing nahambal nga kliyente.” Ini nga eksperiensia nagapakita sang isa ka makapasubo nga kamatuoran​​—⁠⁠ang pagbutig kag paglimbong kinaandan sa kalibutan karon.

² Ang paglimbong may madamo nga porma kag nag-apektar sa halos tanan nga aspekto sang moderno nga pagkabuhi. Ang mga report sang media may madamo nga halimbawa​​—⁠⁠mga politiko nga nagabinutig sa ila mga ginahimo, mga accountant kag mga abogado nga nagapasobra sa mga kita sang korporasyon, mga manugpasayod nga nagapatalang sa mga konsumidor, mga akusado nga nagadaya sa mga kompanya sang paseguro, sa pagsambit sing pila lamang. Yara man ang paglimbong sa relihion. Ginapatalang sang klero ang mga tawo paagi sa pagtudlo sing butig nga mga doktrina, subong sang pagkadimamalatyon sang kalag, kalayuhon nga impierno, kag Trinidad.​​—⁠⁠2 Timoteo 4:​3, 4.

³ Dapat bala kita makibot sa sini tanan nga paglimbong? Indi gid man. Tuhoy sa “katapusan nga mga adlaw,” ang Biblia nagpaandam: “Ang malaut nga mga tawo kag mga malimbong magalain kag magalain pa, nga nagadaya kag ginadayaan.” (2 Timoteo 3:​1, 13) Subong mga Cristiano, dapat mangin alisto kita sa nagapatalang nga mga ideya nga makapahilayo sa aton sa kamatuoran. Duha ka  pamangkot ang nagautwas: Ngaa lapnag gid ang paglimbong karon, kag paano kita makabantay batok sa sini?

Ngaa Lapnag Gid ang Paglimbong Karon?

4. Paano ginapaathag sang Biblia kon ngaa lapnag sa kalibutan ang paglimbong?

⁴ Ginapaathag sang Biblia ang rason kon ngaa lapnag gid ang paglimbong sa sining kalibutan. Si apostol Juan nagsulat nga “ang bug-os nga kalibutan yara sa gahom sang malauton.” (1 Juan 5:19) Ini nga “malauton” amo si Satanas nga Yawa. Tuhoy sa iya, si Jesus nagsiling: “Sia . . . wala nagatindog sa kamatuoran, bangod nga walay kamatuoran sa iya. Kon nagabutig sia, nagapamulong sia suno sa iya kinaugali, kay butigon sia kag amay sang kabutigan.” Gani, katingalahan bala kon ini nga kalibutan nagapabanaag sang espiritu, mga talaksan, kag malimbungon nga mga kinaiya sang manuggahom sini?​​—⁠⁠Juan 8:​44; 14:30; Efeso 2:​1-3.

5. Paano si Satanas labi pa gid nga nagapanikasog sa pagpanglimbong sa sining tion sang katapusan, kag sin-o ang labi niya nga ginapuntariya?

⁵ Sa sining tion sang katapusan, labi pa gid nga nagapanikasog si Satanas. Gintagbong na sia sa duta. Nahibaluan niya nga malip-ot na lang ang iya tion, kag may ‘daku sia nga kaakig.’ Determinado nga laglagon ang madamo nga mga tawo tubtob masarangan niya, ‘ginapatalang niya ang bug-os napuy-an nga duta.’ (Bugna 12:​9, 12, NW) Si Satanas wala nagalimbong sing panalagsa lamang. Sa baylo, maukod sia nga nagapanikasog nga patalangon ang katawhan.⁠⁠ * Ginagamit niya ang tanan nga malimbungon nga paagi​​—⁠⁠pati na ang pagpangdaya kag pagluib​​—⁠⁠agod bulagon ang painuino sang mga di-tumuluo kag ipahilayo sila sa Dios. (2 Corinto 4:4) Ining agalon sang paglimbong determinado nga tukbon ang mga nagasimba sa Dios “sa espiritu kag kamatuoran.” (Juan 4:​24; 1 Pedro 5:8) Indi pagkalimti nga si Satanas nagsiling: ‘Mapatalikod ko ang bisan sin-o sa Dios.’ (Job 1:​9-​12) Binagbinagon naton ang pila sang “malimbungon nga mga taktika” ni Satanas kag kon paano kita makabantay batok sa sini.​​—⁠⁠Efeso 6:​11, Jewish New Testament.

Magbantay Batok sa Paglimbong sang mga Apostata

6, 7. (a) Ano ang ginasiling sang mga apostata? (b) Paano ginapakita sing maathag sang Kasulatan ang tulumuron sang mga apostata?

⁶ Madugay na nga ginagamit ni Satanas ang mga apostata agod sulayon ang mga alagad sang Dios. (Mateo 13:36-39) Mahimo nagasiling ang mga apostata nga nagasimba sila kay Jehova kag nagapati sa Biblia, apang ginasikway nila ang kitaon nga bahin sang iya organisasyon. Nagabalik pa gani ang iban sa wala nagapadungog sa Dios nga mga doktrina sang “Babilonia nga Daku,” ang bug-os kalibutan nga emperyo sang butig nga relihion. (Bugna 17:⁠5; 2 Pedro 2:19-​22) Sa idalom sang pag-inspirar sang Dios, gingamit sang mga manunulat sang Biblia ang matigdas nga mga pulong agod ibuyagyag ang mga motibo kag mga pamaagi sang mga apostata.

⁷ Ano ang tulumuron sang mga apostata? Ang kalabanan sa ila indi kontento nga biyaan lamang ang relihion nga ayhan gintamod nila anay nga matuod. Sa masami, luyag nila nga ulamiron ang iban. Sa baylo nga mangita kag maghimo sang ila kaugalingon nga mga disipulo, madamo nga apostata ang nagatinguha nga ‘pasundon sa ila ang mga gintutun-an’ nga amo ang mga disipulo ni Cristo. (Binuhatan 20:​29, 30) Tuhoy sa butig nga mga manunudlo, ginpahibalo ni apostol Pablo ining hilingagawon nga paandam: “Andam kamo nga walay maglimbong sa inyo.” (Colosas 2:8) Indi bala amo gid sini ang ginatinguhaan sang madamo nga mga apostata? Kaangay sang isa ka kidnaper nga nagadala palayo sang wala nagasuspetsa nga biktima gikan sa iya pamilya, ginabiktima sang mga apostata ang mga katapo sang kongregasyon nga may huyog nga magpati sa ila pagkasinsero, agod ipahilayo sila sa panong.

8. Ano nga mga pamaagi ang ginagamit sang mga apostata agod matuman ang ila tulumuron?

⁸ Ano nga mga pamaagi ang ginagamit sang mga apostata agod matuman ang ila tulumuron? Masami nila ginagamit ang pagpatiko, mga pinamulong nga indi bug-os nga matuod, kag talangkod nga kabutigan. Nahibaluan ni Jesus nga ang iya mga sumulunod biktimahon sang mga ‘magahambal sang tanan nga sahi sang malaut nga kabutigan batok’ sa ila. (Mateo 5:​11, Today’s English Version) Ining malaut nga mga manugpamatok  magahambal sing indi matuod agod malimbungan ang iban. Si apostol Pedro nagpaandam tuhoy sa mga apostata nga magagamit sing “pinahituhito nga mga pulong,” magapalapnag sang “limbong” kag ‘magapatiko sang Kasulatan’ agod matuman ang ila mga tulumuron. (2 Pedro 2:​3, 13; 3:16) Sing makapasubo, nagmadinalag-on ang mga apostata sa “pagguba sa pagtuo sang iban.”​​—⁠⁠2 Timoteo 2:​18, NW.

9, 10. (a) Paano kita makabantay batok sa paglimbong sang mga apostata? (b) Ngaa wala kita natublag kon may mga pag-athag pa sa aton paghangop tuhoy sa katuyuan sang Dios?

⁹ Paano kita makabantay batok sa paglimbong sang mga apostata? Paagi sa pagpamati sa laygay sang Pulong sang Dios, nga nagasiling: “Tandai ninyo ang mga ginakabangdanan sang pagbinahinbahin kag mga kabudlayan, batok sa pagtulun-an nga inyo natun-an; magpahilayo kamo sa ila.” (Roma 16:17) ‘Nagapahilayo kita sa ila’ paagi sa pagsikway sang ila mga pangatarungan​​—⁠⁠direkta man nila ini nga ginahambal sa imo, sa naimprinta nga porma, ukon sa Internet. Ngaa amo sini ang aton panindugan? Una, bangod amo sini ang ginasiling sang Pulong sang Dios, kag nagasalig kita nga nagaulikid gid pirme si Jehova sa aton kaayuhan.​​—⁠⁠Isaias 48:​17, 18.

¹⁰ Ikaduha, ginahigugma naton ang organisasyon nga nagtudlo sa aton sang hamili nga mga kamatuoran nga nagpahamulag sa aton gikan sa Babilonia nga Daku. Subong man, ginakilala naton nga ang aton ihibalo tuhoy sa katuyuan sang Dios indi himpit; ang aton paghangop nagaathag pa sa sulod sang mga tinuig. Ang matutom nga mga Cristiano nagahulat kay Jehova sa sining tanan nga pag-athag pa. (Hulubaton 4:18) Sa amo man nga tion, indi naton pagtalikdan ang organisasyon nga nahamut-an sang Dios nga gamiton, kay nakita naton ang maathag nga pamatuod sang iya pagpakamaayo sa sini.​​—⁠⁠Binuhatan 6:⁠7; 1 Corinto 3:6.

Magbantay Batok sa Paglimbong sa Kaugalingon

11. Ngaa ang di-himpit nga mga tawo may huyog nga limbungan ang ila kaugalingon?

¹¹ Ang di-himpit nga mga tawo may huyog nga madali gamiton ni Satanas​​—⁠⁠ang paglimbong sa kaugalingon. “Ang tagipusuon malimbungon labaw sa tanan nga butang, kag lakas gid ka dunot,” siling sang Jeremias 17:9. Kag si Santiago nagsulat: “Ang tagsa ka tawo ginasulay kon ginabuyok sia kag ginahaylo sang iya kaugalingon nga kailigbon.” (Santiago 1:14) Kon mahaylo ang aton tagipusuon, mahimo kita mabuyok sa makasasala nga handum, nga ginahimo ini nga daw makagalanyat kag indi makahalalit. Ini nga pagtamod malimbungon, kay ang pagpadala sa sala nagadul-ong sa ulihi sa kalaglagan.​​—⁠⁠Roma 8:6.

12. Sa ano nga mga paagi nga mahimo kita masiod sang paglimbong sa kaugalingon?

 ¹² Ang paglimbong sa kaugalingon mahapos magsiod sa aton. Ang malimbungon nga tagipusuon mahimo mangatarungan agod apinan ang daku nga kasawayan sa personalidad ukon maghimo sing balibad sa mabug-at nga sala. (1 Samuel 15:13-​15, 20, 21) Ang aton desperado nga tagipusuon mahimo man magpangita sing mga paagi agod pakamatarungon ang kwestionable nga mga paggawi. Binagbinaga, halimbawa, ang tuhoy sa kalingawan. Ang iban nga kalingawan maayo kag makalilipay. Apang, ang kalabanan nga ginahatag sining kalibutan​​—⁠⁠sa mga sine kag mga programa sa telebisyon kag sa Internet​​—⁠⁠malaw-ay kag imoral. Mahapos kumbinsihon ang aton kaugalingon nga makatan-aw kita sing malaw-ay nga kalingawan nga indi mahalitan. Ang iban nagapangatarungan pa gani, “Wala sini ginatublag ang akon konsiensia, gani ano ang problema?” Apang ini nga mga tawo ‘nagadaya sang ila kaugalingon paagi sa butig nga pangatarungan.’​​—⁠⁠Santiago 1:​22, NW.

13, 14. (a) Ano nga halimbawa sa Kasulatan ang nagapakita nga ang aton konsiensia indi pirme masaligan nga tuytoy? (b) Paano kita makabantay batok sa paglimbong sa kaugalingon?

¹³ Paano kita makabantay batok sa paglimbong  sa kaugalingon? Una sa tanan, dapat dumdumon naton nga ang tawhanon nga konsiensia indi pirme masaligan. Binagbinaga ang halimbawa ni apostol Pablo. Antes mangin Cristiano, ginhingabot niya ang mga sumulunod ni Cristo. (Binuhatan 9:​1, 2) Mahimo nga wala sia gintublag sang iya konsiensia sa amo nga tion. Apang maathag nga sayop ini. “Ginhimo ko ini sa pagkadimatinuuhon nga wala ako makahibalo,” siling ni Pablo. (1 Timoteo 1:13) Gani ang katunayan nga ang pila ka kalingawan wala nagatublag sang aton konsiensia indi garantiya nga husto ang aton ginahimo. Ang maayo nga konsiensia lamang nga nagakaigo nga nahanas sang Pulong sang Dios ang masaligan nga tuytoy.

¹⁴ Agod malikawan naton ang paglimbong sa kaugalingon, may pila ka makabulig nga panugda nga dapat naton dumdumon. Usisaa ang imo kaugalingon sing mapinangamuyuon. (Salmo 26:⁠2; 2 Corinto 13:5) Mahimo ipakita sa imo sang bunayag nga pag-usisa sa kaugalingon ang kinahanglanon nga mga pagbag-o sa imo pagtamod ukon paggawi. Mamati sa iban. (Santiago 1:19) Sanglit ang pag-usisa sa kaugalingon mahimo impluwensiahan sang imo opinyon, maalamon nga magpamati sa tampad nga mga pulong sang hamtong nga mga masigka-Cristiano. Kon nagadesisyon ukon nagahimo ka sing mga butang nga kwestionable sa atubangan sang timbang kag eksperiensiado nga mga masigkatumuluo, mahimo mo pamangkuton ang imo kaugalingon, ‘Mahimo ayhan nga ang akon konsiensia wala mahanas sing nagakaigo ukon ayhan ginadayaan ako sang akon tagipusuon?’ Basaha sing regular ang Biblia kag ang mga publikasyon nga pasad sa Biblia. (Salmo 1:2) Ang paghimo sini magabulig sa imo nga mapahisuno ang imo mga panghunahuna, panimuot, kag balatyagon sa diosnon nga mga prinsipio.

Magbantay Batok sa Kabutigan ni Satanas

15, 16. (a) Sa panikasog ni Satanas nga limbungan kita, ano nga mga kabutigan ang iya ginagamit? (b) Paano naton malikawan nga malimbungan sang sini nga mga kabutigan?

¹⁵ Nagagamit si Satanas sing nanuhaytuhay nga kabutigan agod limbungan kita. Ginatinguhaan niya nga kumbinsihon kita nga ang materyal nga pagkabutang nagahatag sing kalipay kag kaayawan, apang masami nga ang kabaliskaran sini ang matuod. (Manugwali 5:​10-​12) Luyag niya nga magpati kita nga ining malaut nga kalibutan magapadayon tubtob san-o, bisan pa maathag ang pamatuod nga nagakabuhi na kita sa “katapusan nga mga adlaw.” (2 Timoteo 3:​1-5) Ginapasanyog ni Satanas ang ideya nga wala sing halit ang imoral nga estilo sang pagkabuhi, bisan pa ang mga mahuyugon sa kalipayan masami nga nagaani sing mapait nga mga bunga. (Galacia 6:7) Paano naton malikawan nga malimbungan sini nga mga kabutigan?

¹⁶ Magbenepisyo gikan sa mga halimbawa sa Biblia. Ang Biblia may nagapaandam nga mga halimbawa sang mga indibiduwal nga nalimbungan sang mga kabutigan ni Satanas. Ginhigugma nila ang materyal nga mga butang, wala nila gintalupangod ang tion nga nagakabuhi sila, ukon nagpadala sila sa imoralidad​​—⁠⁠ang tanan may malain nga mga resulta. (Mateo 19:16-​22; 24:36-​42; Lucas 16:14; 1 Corinto 10:​8-​11) Magtuon gikan sa modernong-adlaw nga mga halimbawa. Makapasubo nga ang pila ka Cristiano wala na magbatyag sing pagkahilingagawon kag nagpati nga bangod sang pag-alagad sa Dios may nawasi sila nga maayo nga butang. Mahimo sila magbiya sa kamatuoran agod himud-usan ang malipayon kuno nga kabuhi. Apang, ini nga mga indibiduwal yara sa “madanlog nga mga duog,” kay sa ulihi anihon nila ang bunga sang ila di-diosnon nga paggawi. (Salmo 73:​18, 19) Maalamon nga magtuon kita gikan sa mga sayop sang iban.​​—⁠⁠Hulubaton 22:3.

17. Ngaa ginapasanyog ni Satanas ang kabutigan nga wala kita ginahigugma ukon ginapabaloran ni Jehova?

¹⁷ May isa pa ka kabutigan nga ginagamit ni Satanas sing epektibo​​—⁠⁠ang kabutigan nga wala kita ginahigugma ukon ginapabaloran ni Jehova. Linibo ka tuig na nga ginatun-an ni Satanas ang di-himpit nga mga tawo. Nahibaluan gid niya nga ang pagluya sing buot makapaluya sang aton espirituwalidad. (Hulubaton 24:10) Gani ginapasanyog niya ang kabutigan nga wala kita sing kabilinggan sa Dios. Kon ‘mapukan’ kita kag makumbinsi nga si Jehova wala nagaulikid sa aton, mahimo kita masulay nga mag-untat. (2 Corinto 4:​9, NW) Amo gid sini ang luyag sang dakung Manuglimbong! Kon amo, paano kita makabantay agod indi malimbungan sining kabutigan ni Satanas?

18. Paano kita ginapasalig sang Biblia tuhoy sa gugma ni Jehova sa aton?

¹⁸ Pamalandungi ang ginasiling sang Biblia tuhoy sa gugma sang Dios sa aton. Ang Pulong sang Dios nagagamit sing makatalandog kag maathag nga  mga ilustrasyon agod pasaligon kita nga ginatalupangod kag ginahigugma kita ni Jehova subong mga indibiduwal. Ginasulod niya ang imo mga luha sa iya “suludlan,” nga nagakahulugan nga nakita kag ginadumdom niya ang imo pagluha sa pagpanikasog nga magpabilin nga matutom. (Salmo 56:8) Nahibaluan niya kon ikaw “buong sing tagipusuon” kag malapit sia sa imo sa sini nga mga tion. (Salmo 34:18) Nahibaluan niya ang tanan nga detalye tuhoy sa imo, pati na ang kadamuon sang “mga buhok sa [imo] ulo.” (Mateo 10:29-​31) Labaw sa tanan, “ginhatag [sang Dios] ang iya bugtong nga Anak” tungod sa imo. (Juan 3:​16; Galacia 2:20) Kon kaisa, mahimo mabudlayan ka sa pagpati nga ini nga mga kasulatan personal nga naaplikar sa imo. Apang, dapat naton patihan ang pulong ni Jehova. Luyag niya nga magpati kita nga ginahigugma niya kita indi lamang subong isa ka grupo kundi subong mga indibiduwal.

19, 20. (a) Ngaa importante nga kilalahon kag sikwayon ang kabutigan ni Satanas nga si Jehova wala nagahigugma sa imo? (b) Paano ginabuligan sang isa ka nagalakbay nga manugtatap ang mga naluyahan sing buot?

¹⁹ Kilalaha kag sikwaya ang kabutigan. Kon nahibaluan mo nga nagabinutig ang isa, magaandam ka agod indi ka niya malimbungan. Gani man, ang paghibalo nga ginapapati ka ni Satanas nga si Jehova wala nagahigugma sa imo isa na mismo ka daku nga bulig. Bilang reaksion sa isa ka artikulo sa Ang Lalantawan nga nagapaandam tuhoy sa mga taktika ni Satanas, ang isa ka Cristiano nagsiling: “Wala ko gid anay mahisayran nga ginagamit gali ni Satanas ang akon balatyagon agod paluyahon ang akon buot. Bangod nahibaluan ko ini, napahulag ako nga pakigbatuan ini nga balatyagon.”

²⁰ Binagbinaga ang eksperiensia sang isa ka nagalakbay nga manugtatap sa isa ka pungsod sa Bagatnan nga Amerika. Kon nagaduaw subong isa ka manugbantay sa mga masigkatumuluo nga naluyahan, masami niya sila ginapamangkot, ‘Nagapati ka bala sa Trinidad?’ Ang ginaluyahan sing buot masami nagasabat, ‘Siempre wala,’ bangod nahibaluan niya nga isa ini sa mga kabutigan ni Satanas. Pagkatapos ang nagalakbay nga gulang nagapamangkot, ‘Nagapati ka bala sa kalayuhon nga impierno?’ Sa liwat ang sabat amo, ‘Siempre wala!’ Ginasugiran sila dayon sang nagalakbay nga gulang nga may isa pa ka kabutigan si Satanas nga masami indi hilmunon nga butig gali. Ginapatalupangod niya ang pahina 249, parapo 21, sang libro nga Mangin Suod kay Jehova,⁠⁠ * diin ginapakita ang kabutigan nga si Jehova wala nagahigugma sa aton subong mga indibiduwal. Ginareport sang nagalakbay nga manugtatap ang positibo nga mga resulta sang pagbulig sa mga naluyahan sing buot nga kilalahon kag sikwayon ini nga kabutigan ni Satanas.

Bantayi ang Imo Kaugalingon Batok sa Paglimbong

21, 22. Ngaa indi kita ignorante tuhoy sa malimbungon nga mga taktika ni Satanas, kag ano dapat ang aton determinasyon?

²¹ Sa sining hingapusan nga bahin sang ulihi nga mga adlaw, ginapaabot nga si Satanas padayon nga magapabaha sing mga kabutigan kag paglimbong. Nagapasalamat kita nga wala kita ginpabay-an ni Jehova nga ignorante sa malimbungon nga mga taktika ni Satanas. Ang Biblia kag ang mga publikasyon nga pasad-sa-Biblia sang “matutom kag mainandamon nga ulipon” maathag nga nagabuyagyag sang malaut nga mga pamaagi sang Yawa. (Mateo 24:​45, NW) Bangod nahibaluan na naton ini, makahanda kita kag malandas ini.​​—⁠⁠2 Corinto 2:⁠11.

²² Gani, magbantay kita batok sa mga pangatarungan sang mga apostata. Kabay nga mangin determinado kita nga likawan ang di-hilmunon nga siod sang paglimbong sa kaugalingon. Kag kilalahon kag sikwayon naton ang tanan nga kabutigan ni Satanas. Sa paghimo sini, matipigan naton ang aton kaangtanan sa “Dios sang kamatuoran,” nga nagakangil-ad sa paglimbong.​​—⁠⁠Salmo 31:⁠5; Hulubaton 3:⁠32.

[Mga nota]

Madumduman Mo Bala?

• Ngaa lapnag gid ang paglimbong sa kalibutan karon?

• Paano kita makabantay batok sa paglimbong sang mga apostata?

• Paano kita makabantay batok sa bisan anong huyog sa paglimbong sa kaugalingon?

• Paano naton malikawan nga malimbungan sang mga kabutigan ni Satanas?

[Mga Pamangkot sa Pagtinuon]

[Retrato sa pahina 17]

Indi paglimbungi ang imo kaugalingon tuhoy sa kalingawan

[Mga retrato sa pahina 18]

Agod makabantay batok sa paglimbong sa kaugalingon, usisaa ang imo kaugalingon sing mapinangamuyuon, mamati sa iban, kag basaha sing regular ang Pulong sang Dios