Ngaa Pirme Ka Ginaduaw sang mga Saksi ni Jehova?

SA BUG-OS nga kalibutan, kilala ang mga Saksi ni Jehova sa ila padayon nga pagpamalaybalay. Natingala ang iban nga mga tawo kon ngaa pirme sila ginaduaw sang mga Saksi, ilabi na kon wala sila anay nagpakita sing interes sa mensahe sang mga Saksi. Ginpaathag sang duha ka sulat halin sa Rusya ang rason kon ngaa.

“Ang matuod,” pag-ako ni Masha, isa ka 19-anyos nga lin-ay sa Khabarovsk, “sang una, ginalikawan ko gid ang mga Saksi ni Jehova.” Apang, sang nabasa niya ang pila ka kopya sang mga magasin nga ginbalhag sang mga Saksi, nagbag-o ang iya panimuot. “Makawiwili kag makatudlo gid ang tanan ko nga nabasa,” sulat ni Masha, “apang labaw sa tanan, ginabag-o sini ang imo pagtamod sa kalibutan. Amat-amat ko nga nahangpan kon ngaa nahatagan ang mga tawo sing katuyuan sa kabuhi.”

Halin sa siudad sang Ussuriysk, mga 80 kilometros sa aminhan sang Vladivostok, si Svetlana nagsulat: “Bag-o ko lang nabasa Ang Lalantawan kag Magmata! Kinahanglanon gid ini nga mga magasin sa tion naton karon. Nanamian ako sa tanan nga artikulo. Makawiwili, impormatibo, kag makatudlo gid ini. Salamat! Salamat gid sa inyo kag sa paghimo ninyo sining maayo kag importante nga hilikuton.”

Ginahunahuna sing serioso sang mga Saksi ni Jehova sa bug-os nga kalibutan ang pamangkot ni apostol Pablo: “Paano bala ang pagkabati [sang mga tawo] kon walay manugwali?” (Roma 10:14) Tilawi lang bala nga mamati sing pila lamang ka minuto kon duawon ka liwat sang mga Saksi. Mahimo manamian ka man sa mensahe sang paglipay nga makita sa Pulong sang Dios, ang Biblia.