Relihion—Isa Bala ka Maayo Ukon Malain nga Impluwensia?

“MAY utang nga kabalaslan ako sa Cristianismo, kag gani, nagapati ako nga ang kalibutan nga ginapuy-an naton sa sulod sang nagligad nga 2000 ka tuig may utang man nga kabalaslan.”​​​—⁠⁠Introduksion, Two Thousand Years​​​—⁠⁠The First Millennium: The Birth of Christianity to the Crusades.

Ina nga pag-endorso sa “Cristianismo” naghalin sa Ingles nga manunulat kag manugwaragwag sa telebisyon nga si Melvyn Bragg. Mabanaag sa iya mga pulong ang sentimiento sang minilyon ka pumuluyo sa duta nga nagabatyag sing amo man ka daku nga utang nga kabalaslan kag pagkamainunungon sa relihion. Kumbinsido sila nga ang relihion may maayo gid nga impluwensia sa ila kabuhi. Halimbawa, ang isa ka manunulat nagsiling nga ang Islam “nag-inspirar sa daku nga sibilisasyon . . . [nga] naghatag sing benepisyo sa bug-os nga kalibutan.”

Ang Papel sang Relihion​—⁠⁠Maayo Ukon Malain?

Apang, ang masunod nga pinamulong ni Bragg nagpautwas sing serioso nga pamangkot sa kon bala ang relihion sa kabilugan may maayo gid nga impluwensia. Nagdugang sia: “Ang Cristianismo dapat man magpaathag sa akon.” Bangod sang ano nga luyag niya paathagan? “Bangod sang panatisismo, kalautan, kapintas kag hungod nga pagkaignorante nga nagpakilala man sa daku nga bahin sang ‘maragtas’ sini,” siling niya.

Madamo ang mahimo magsiling nga ang kalabanan nga relihion sang kalibutan nakilal-an sa bug-os nga maragtas bangod sang panatisismo, kalautan, kapintas, kag hungod nga pagkaignorante. Nagapati sila nga ang relihion nagapakunokuno lamang nga nagabulig sa katawhan​​​—⁠⁠nga sa likod sang pagkaayo kag pagkabalaan sini, sa pagkamatuod puno ini sing pagkasalimpapaw kag kabutigan. (Mateo 23:​27, 28) “Ang labing kinaandan nga mensahe sa aton literatura amo nga ang relihion may pinasahi nga balor sa sibilisasyon,” siling sang A Rationalist Encyclopædia. “Kag sa katunayan ginahimutig ini sang mga nagakatabo sa maragtas,” padayon sini.

Basaha ang bisan ano nga pamantalaan karon, kag makita mo ang halos wala katapusan nga mga halimbawa sang relihioso nga mga lider nga nagawali sing gugma, paghidait, kag kaluoy apang nagasulsol sing pagdumot kag nagagamit sang ngalan sang Dios agod pakamatarungon ang ila mapintas nga mga binangig. Indi katingalahan nga madamo ang nagabatyag nga ang relihion masami nga may malain nga impluwensia sa kabuhi!

Mas Maayo Bala Kon Wala sing Relihion?

Naghinakop pa gani ang iban, kaangay sang Ingles nga pilosopo nga si Bertrand Russell, nga maayo pa gani kon sa ulihi “ang tanan nga sahi sang relihioso nga pagtuluuhan madula na.” Nagapati sila nga ang pagdula sa relihion amo  lamang ang mapinadayunon nga solusyon sa tanan nga problema sang katawhan. Apang, mahimo luyag nila kalimtan ang kamatuoran nga ang mga nagasikway sang relihion mahimo nga magpalambo man sing daku nga pagdumot kag panatisismo kaangay sang mga mainunungon nga nagasuportar sini. Ang manunulat tuhoy sa relihion nga si Karen Armstrong nagpahanumdom sa aton: “Sa pinakakubos, ginpakita sang Holocaust nga ang sekular nga ideolohiya [mahimo] mangin makamamatay man kaangay sang bisan ano nga relihioso nga krusada.”​​​—⁠⁠The Battle for God​​​—⁠⁠Fundamentalism in Judaism, Christianity and Islam.

Gani ang relihion isa bala ka maayo nga impluwensia, ukon ini bala ang gamot sang mga problema sang katawhan? Ang pagdula bala sa tanan nga relihion amo ang solusyon sa sining mga problema? Binagbinaga ang ginasiling sang Biblia tuhoy sa sini sa masunod nga artikulo. Mahimo makibot ka sa sabat.