Ang Matuod nga Cristianismo Nagauswag

ANG ministeryo ni Jesucristo may mabaskog nga epekto sa kalibutan sang unang siglo. Ang iya mensahe makapapagsik, makapasanag, kag makapalig-on sa paagi nga nagpakibot sa mga tawo. Madamo sa mga nakabati sa iya nga nagahambal ang natandog gid sang iya mga pulong.​​—⁠⁠Mateo 7:​28, 29.

Wala kahadlok nga ginsikway ni Jesus ang pagpakigbahin sa mapiguson nga mga sistema sang relihion kag politika sang panahon niya apang nangin madali sia palapitan sang kinaandan nga mga tawo. (Mateo 11:25-​30) Dayag niya nga ginkilala ang lapnag nga impluwensia sang malaut nga mga espiritu sa duta kag ginpakita niya ang hatag-Dios nga gahom batok sa ila. (Mateo 4:​2-​11, 24; Juan 14:30) Malantipon nga ginhatagan ni Jesus sing kasanagan ang daku nga koneksion sang pag-antos sa sala, kag mahigugmaon nga ginpatuhuyan niya ang Ginharian sang Dios para sa dayon nga kaumpawan. (Marcos 2:​1-​12; Lucas 11:​2, 17-​23) Sing maathag kag sa katapusan, ginkuha niya ang tabon sang kadulom nga madugay nga nagtabon sa matuod nga personalidad sang iya Amay, nga ginpakilala ang ngalan sang Dios sa tanan nga interesado nga magtigayon sing personal nga kaangtanan sa Iya.​​—⁠⁠Juan 17:​6, 26.

Busa, indi katingalahan nga walay sapayan sang mabaskog nga paghingabot sang relihion kag politika, madasig nga ginpalapnag sang mga disipulo ni Jesus ang iya makapahulag nga mensahe. Sa sulod lamang sang mga 30 ka tuig, ang mauswagon nga Cristianong mga kongregasyon naporma sa Aprika, Asia, kag Europa. (Colosas 1:23) Ang simple nga mga kamatuoran nga gintudlo ni Jesus naghatag sing kasanagan sa mga mapainubuson kag matarong sing tagipusuon nga mga tawo sa bug-os nga Emperyo sang Roma.​​—⁠⁠Efeso 1:​17, 18.

Apang, paano ining tanan nga bag-ong disipulo gikan sa nagkalainlain nga kahimtangan sang kabuhi, kultura, lenguahe, kag relihion nagatingob sa nahiusa gid nga “isa ka pagtuo,” subong sang pagtawag sa sini ni apostol Pablo? (Efeso 4:5) Ano ang nagahupot sa ila nga “maghilisugot” agod indi sila mapahilayo? (1 Corinto 1:10) Bangod wala gid sing paghiusa sa tunga sang nagapangangkon nga mga Cristiano karon, maayo nga usisaon naton kon ano ang gintudlo ni Jesus mismo.

Ang Sadsaran sang Cristianong Paghiusa

Sang ginkasaba si Jesus sa atubangan ni Poncio Pilato, ginpakilala ni Jesus ang sadsaran sang Cristianong paghiusa. Sia nagsiling: “Tungod sini natawo ako, kag tungod sini nagkari ako sa kalibutan, agod nga magsaksi ako sa kamatuoran. Ang tagsatagsa nga yara sa kamatuoran nagapamati sang akon tingog.” (Juan 18:37) Busa, ang pagbaton sa mga panudlo ni Jesus pati na ang tanan  nga iban pa nga bahin sang inspirado nga Pulong sang Dios, ang Biblia, may mabaskog kag nagapahiusa nga epekto sa matuod nga mga disipulo ni Cristo.​​—⁠⁠1 Corinto 4:⁠6; 2 Timoteo 3:​16, 17.

Sa pagkamatuod, ang mga disipulo ni Jesus may sinsero nga mga pamangkot ukon pagsinuay sa tunga nila kon kaisa. Ano ang nagbulig sa ila? Si Jesus nagpaathag: “Kon ang Espiritu sang kamatuoran mag-abot, magatuytoy sia sa inyo sa bug-os nga kamatuoran; kay indi sia magahambal gikan sa iya kaugalingon, kundi ang bisan anong butang nga iya mabatian ipamulong niya kag ipahayag niya sa inyo ang mga butang nga maabot.” (Juan 16:​12, 13) Sa amo, ang balaan nga espiritu sang Dios magabulig sa matuod nga mga disipulo ni Jesus agod mahangpan ang kamatuoran samtang progresibo ini nga ginapahayag sang Dios. Ini nga espiritu magapatubas man sing mga bunga, subong sang gugma, kalipay, kag paghidait, nga nagapalambo sing paghiusa sa tunga nila.​​—⁠⁠Binuhatan 15:28; Galacia 5:​22, 23.

Wala gintugutan ni Jesus ang pagbinahinbahin sa tunga sang iya mga disipulo; kag wala man sia nag-awtorisar sa ila nga patpaton ang mga kamatuoran sang Biblia agod pauyonan ang kultura ukon relihioso nga mga tradisyon sang mga masugilanon nila. Sa baylo, sa iya katapusan nga gab-i upod sa ila, hanuot sia nga nangamuyo: “Indi tungod sini lamang ako nagapangamuyo, kundi tungod man sa mga magatuo sa akon paagi sa ila pulong, nga sila tanan mangin isa; subong nga ikaw, Amay, sa akon, kag ako sa imo, nga sila man mangin sa aton, agod nga ang kalibutan magtuo nga ikaw nagpadala sa akon.” (Juan 17:​20, 21) Kon amo, ang matuod nga paghiusa sa espiritu kag kamatuoran mangin isa ka nagapakilala nga tanda sang mga disipulo ni Cristo halin sa ginsuguran tubtob sa aton panahon. (Juan 4:​23, 24) Apang, ang Cristiandad karon wala nagahiusa, kundi nabahinbahin. Ngaa?

Kon Ngaa Nabahinbahin ang Cristiandad

Ang tampad nga paathag tuhoy sa pagkananuhaytuhay sang mga pagpati kag mga buhat sa tunga sang nagapangangkon nga mga Cristiano karon amo nga wala nila ginasunod ang mga panudlo ni Jesus. Ang isa ka manunulat nagsiling: “Subong sang nagligad, ang bag-o nga mga Cristiano karon may huyog nga batunon lamang gikan sa Biblia ang nagasibu sa ila mga kinahanglanon​​—⁠⁠kag ginasikway ang wala nagasanto sa ila tumandok nga relihiosong mga tradisyon.” Amo gid sini ang gintagna ni Jesus kag sang iya mga apostoles nga matabo.

Halimbawa, sa idalom sang pag-inspirar nagsulat si apostol Pablo sa iya masigkamanugtatap nga si Timoteo: “Magaabot ang tion nga ang katawhan indi magbatas sang maayong pagtulun-an, kundi sa may nagakalam nga mga dulunggan magatipon sa ila kaugalingon sing mga manunudlo suno sa ila kaugalingon nga mga kaluyag, kag magapahilayo sang ila mga dulunggan sa kamatuoran kag magaliso sa patopato nga mga sugilanon.” Mapatalang bala ang tanan nga mga Cristiano? Indi. Si Pablo nagpadayon: “Apang magmalig-on ka sa walay langan, batasa ang pag-antos, himua ang buluhaton sang ebanghelista, tumana ang imo pagpangalagad.” (2 Timoteo 4:​3-5; Lucas 21:⁠8; Binuhatan 20:​29, 30; 2 Pedro 2:​1-3) Si Timoteo kag ang iban pa nga mga Cristiano nag-aplikar sining inspirado nga laygay.

Ang Matuod nga mga Cristiano Nahiusa Gihapon

Kaangay ni Timoteo, ginahuptan sang mga Cristiano karon ang ila kaligdong paagi sa pagsikway sa tawhanon nga pangatarungan kag pagbaton lamang sa awtoridad sang Kasulatan sa ila mga doktrina. (Colosas 2:⁠8; 1 Juan 4:1) Bilang pag-ilog sa unang-siglo nga mga Cristiano, ginatuman sang mga Saksi ni Jehova ang ila pagpangalagad ukon ministeryo sa kapin sa 230 ka pungsod, nga ginadala sa mga tawo bisan diin ang orihinal nga mensahe ni Jesus, ang maayong balita sang Ginharian. Binagbinaga ang apat ka importante nga paagi nga nahiusa nga ginailog nila si Jesus kag nagabuhat sing matuod nga Cristianismo bisan diin man sila nagapuyo.

Ang ila pagtuluuhan napasad sa Pulong sang Dios. (Juan 17:17) Ang isa ka pari sa parokya sa Belgium nagsulat tuhoy sa ila: “Ang isa ka butang nga matun-an naton sa ila [mga Saksi ni Jehova] amo ang ila kahanda sa pagpamati sa Pulong sang Dios kag ang ila kaisog sa pagpanaksi tuhoy sini.”

Nagalaum sila sa Ginharian sang Dios nga magahatag sing kaumpawan gikan sa mga problema sa bug-os nga kalibutan. (Lucas 8:1)  Sa Barranquilla, Colombia, isa ka Saksi ang nakighambal kay Antonio, nga isa ka sumalakdag sang lihok sa politika. Wala magdampig sa iya ang Saksi, kag wala man sia magsakdag sa iban pa nga mga ideolohiya sa politika. Sa baylo, gintanyagan niya si Antonio kag ang iya mga manghod nga babayi sing wala bayad nga pagtuon sa Biblia. Wala magdugay narealisar ni Antonio nga ang Ginharian sang Dios gid lamang ang malauman sang imol nga mga tawo sa Colombia kag sa iban pa nga bahin sang kalibutan.

Ginapadunggan nila ang ngalan sang Dios. (Mateo 6:9) Sang una nga nasugilanon sang mga Saksi ni Jehova si Maria, isa ka debotada nga Katoliko sa Australia, gintugutan niya ang mga Saksi nga ipakita sa iya ang ngalan sang Dios sa Biblia. Ano ang iya reaksion? “Sang una ko nga nakita ang ngalan sang Dios sa Biblia, naghibi ako. Natandog gid ako sang mahibaluan ko nga mahimo ko makilala kag magamit ang personal nga ngalan sang Dios.” Ginpadayon ni Maria ang pagtuon sa Biblia, kag sa una gid nga tion sa iya kabuhi, nakilala niya si Jehova subong isa ka persona kag nakapalambo sing dayon nga kaangtanan sa iya.

Nahiusa sila sa gugma. (Juan 13:​34, 35) Ang editoryal sa The Ladysmith-Chemainus Chronicle, sa Canada, nagkomento: “May relihion ka man ukon wala, madayaw mo gid ang 4,500 ka Saksi ni Jehova nga nag-obra sing bug-os adlaw kag gab-i sang nagligad nga isa ka semana kag tunga sa pagpatindog sing 2,300-metros-kuadrados nga Assembly Hall sa Cassidy . . . Ang paghimo sini sing malipayon nga wala sing pagsinuay, pagbahinbahin ukon pagtinguha sing himaya sa kaugalingon isa ka tanda sang matuod nga Cristianismo.”

Gani binagbinaga ang mga pamatuod. Samtang ang mga teologo, misyonero, kag mga sumilimba sang Cristiandad padayon nga nagatinguha nga mapunggan ang nagahilapit nga kontrobersiya sa ila mga simbahan, ang matuod nga Cristianismo nagauswag sa bug-os nga kalibutan. Sa pagkamatuod, ang matuod nga mga Cristiano nagatuman sa gintangdo sa ila nga hilikuton nga pagbantala kag pagpanudlo sing Pulong sang Dios. (Mateo 24:14; 28:​19, 20) Kon isa ka sa mga “nagapanghayhay kag nagabakho” bangod sang makangilil-ad nga mga butang nga nagakahanabo karon kag natublag bangod sang indi paghiusa sa tunga sang mga relihion sang Cristiandad, ginaagda ka namon nga magbuylog sa mga Saksi ni Jehova sa nahiusa nga Cristianong pagsimba sa lamang matuod nga Dios, si Jehova.​​—⁠⁠Ezequiel 9:⁠4; Isaias 2:​2-4.