‘Ang Matutom nga Ulipon’ Nakapasar sa Pagtilaw!

“Ang tion nag-abot nga ang paghukom magsugod sa panimalay sang Dios.”—1 PEDRO 4:⁠17.

1. Ano ang nasapwan ni Jesus sang gin-inspeksion niya ang “ulipon”?

SANG Pentecostes 33 C.⁠E., nagtangdo si Jesus sang isa ka “ulipon” agod mag-aman sing pagkaon sa nagakaigo nga tion para sa iya “panimalay.” Sang 1914, nangin Hari si Jesus, kag nag-abot ang tion agod inspeksionon ang “ulipon.” Nasapwan niya nga ang kalabanan nga katapo sang “ulipon” mga “matutom kag mainandamon.” Gani, ginpadumala niya ini sa “tanan niya nga pagkabutang.” (Mateo 24:45-​47) Apang, may yara man malaut nga ulipon, nga indi matutom ni mainandamon.

“Yadtong Malaut nga Ulipon”

2, 3. Sa diin naghalin “yadtong malaut nga ulipon,” kag ngaa nangin malaut sila?

² Ginpatuhuyan ni Jesus ang malaut nga ulipon pagkatapos sia maghambal tuhoy sa “matutom kag mainandamon nga ulipon.” Sia nagsiling: “Kon yadtong malaut nga ulipon magsiling sa iya tagipusuon, ‘Ang akon agalon nagapalantang,’ kag magsugod sa pagpamakol sa mga masigkaulipon niya kag magkaon kag mag-inom upod sa kilala nga mga palahubog, ang agalon sina nga ulipon magaabot sa adlaw nga wala niya pagpaabuta kag sa oras nga wala niya mahibalui, kag silutan sia sing grabe gid kag hatagan sang iya bahin upod sa mga salimpapaw. Didto magahibi sia kag magapabagrot sang iya mga ngipon.” (Mateo 24:48-​51, NW) Ang ekspresyon nga “yadtong malaut nga ulipon” nagapatalupangod sa aton sang nahauna nga mga tinaga ni Jesus tuhoy sa matutom kag mainandamon nga ulipon. Huo, ang “malaut nga ulipon” mga katapo anay sang matutom nga ulipon.⁠⁠ * Ngaa nangin malaut sila?

³ Antes sang 1914, madamo nga katapo sang matutom nga ulipon nga klase ang naglaum gid nga makaupod ang Nobyo sa langit sa amo nga tuig, apang wala ini matabo. Subong resulta sini kag sang iban pa nga mga hitabo, madamo ang nalugaw-an kag may pila nga naghinakit. Ang pila sa ila ‘nagpamakol’ sa ila mga utod anay paagi sa hambal kag nagpakig-upod sa mga “palahubog,” ukon relihioso nga mga grupo sang Cristiandad.​​—⁠⁠Isaias 28:​1-3; 32:6.

4. Paano nakig-angot si Jesus sa “malaut nga ulipon” kag sa tanan nga nagpakita sing amo man nga panimuot?

⁴ Ining mga Cristiano anay nakilala sang ulihi subong “malaut nga ulipon,” kag ginsilutan sila ni Jesus sing “grabe gid.” Paano? Ginsikway niya sila, kag nadula nila ang ila langitnon nga paglaum. Apang, wala sila gilayon ginlaglag. Mahibi anay sila kag magpabagrot sang ila ngipon sa “kadudulman sa gua” sang Cristianong kongregasyon. (Mateo 8:12) Sugod sadto, may pila pa ka hinaplas nga nagpakita sing malaut man nga panimuot, nga nagapakita nga sila bahin sang “malaut nga ulipon.” Gin-ilog sang pila ka “iban nga mga karnero” ang ila pagkadimatutom. (Juan 10:​16, NW) Ini tanan nga kaaway ni Cristo makaeksperiensia sing pareho nga espirituwal nga “kadudulman sa gua.”

5. Ano ang nangin reaksion sang “matutom kag mainandamon nga ulipon” nga tuhay sa reaksion sang “malaut nga ulipon”?

⁵ Walay sapayan, ang “matutom kag mainandamon nga ulipon” nakaagi man sing mga pagtilaw upod sa “malaut nga ulipon.” Apang sa baylo nga maghinakit, gintadlong nila ang ila mga pagtamod. (2 Corinto 13:11) Ang ila gugma kay Jehova kag sa ila mga utod napabakod. Subong resulta, sila nangin “haligi kag pamakod sang kamatuoran” sa sining magamo nga “katapusan nga mga adlaw.”​​—⁠⁠1 Timoteo 3:​15; 2 Timoteo 3:1.

 Ang Mainandamon kag Buangbuang nga mga Ulay

6. (a) Paano gin-ilustrar ni Jesus ang pagkamainandamon sang iya matutom nga ulipon nga klase? (b) Antes sang 1914, ano nga mensahe ang ginabantala sang hinaplas nga mga Cristiano?

⁶ Pagkatapos maghambal tuhoy sa “malaut nga ulipon,” naghatag si Jesus sang duha ka parabola agod ipakita kon ngaa may pila ka hinaplas nga Cristiano nga mangin matutom kag mainandamon samtang ang iban naman indi mangin subong sini.⁠⁠ * Agod iilustrar ang pagkamainandamon, sia nagsiling: “Ang ginharian sang mga langit mangin kaangay sang napulo ka ulay nga nagkuha sang ila mga suga kag nagguwa agod sugataon ang nobyo. Ang lima sa ila mga buangbuang, kag ang lima mga mainandamon. Kay gindala sang mga buangbuang ang ila mga suga apang wala sila magdala sing lana, samtang ang mga mainandamon nagdala sing lana sa ila mga tibudtibod pati sang ila mga suga.” (Mateo 25:​1-4, NW) Ang napulo ka ulay nagapahanumdom sa aton sa hinaplas nga mga Cristiano antes sang 1914. Nakalkular nila nga ang nobyo, si Jesucristo, malapit na mag-abot. Gani, ‘nagsugat’ sila sa iya, nga maisog nga nagbantala nga ang “mga panag-on sang mga Gentil” matapos sa 1914.​​​—⁠⁠Lucas 21:24.

7. San-o kag ngaa malaragwayon nga ‘natulugan’ ang hinaplas nga mga Cristiano?

⁷ Husto sila. Natapos gid man sang 1914 ang panag-on sang mga Gentil, kag nag-umpisa nga manghikot ang Ginharian sang Dios sa idalom ni Cristo Jesus. Apang natabo ini sa langit. Sa duta, ang mga tawo nag-umpisa sa pag-antos sang gintagna nga “kailo.” (Bugna 12:​10, 12) Nagsunod ang tion sang pagtilaw. Bangod wala pa nila mahangpan gid ang mga butang, nagdumdom ang hinaplas nga mga Cristiano nga “naglantang ang nobyo.” Naligban kag bangod sang paghingabot sang kalibutan, nagluya sila sa kabilugan kag halos nag-untat ang organisado nga hilikuton sa pagbantala sing dayag. Kaangay sang mga ulay sa parabola, “gintuyo kag nagtulog” sila sa espirituwal, nga pareho man sa ginhimo sang di-matutom nga nagpangangkon nga mga Cristiano pagkatapos sang kamatayon sang mga apostoles in Jesus.​​​—⁠⁠Mateo 25:⁠5; Bugna 11:​7, 8; 12:17.

8. Ano ang nangin kabangdanan sang singgit nga: “Yari karon, ang nobyo!” kag tion ini para sa hinaplas nga mga Cristiano sa paghimo sing ano?

⁸ Nian sang 1919 natabo ang wala ginapaabot. Mabasa naton: “Apang sa tunga sang kagab-ihon may isa ka sininggit, ‘Yari karon, ang nobyo! Gua kamo sa pagsugat sa iya.’ Nian tanan yadtong dalaga nagbangon kag nag-aman sang ila mga suga.” (Mateo 25:​6, 7) Sa tion nga daw wala na gid sing paglaum, may panawagan nga magpanghikot! Sang 1918, si Jesus, “ang mensahero sang katipan,” nagkari sa espirituwal nga templo ni Jehova agod inspeksionon kag tinluan ang kongregasyon sang Dios. (Malaquias 3:​1, NW) Sa sining tion, ang hinaplas nga mga Cristiano kinahanglan maggua kag sugataon sia sa dutan-on nga mga luwang sini nga templo. Tion ini agod “magpasilak [sila] sing kapawa.”​​​—⁠⁠Isaias 60:​1, NW; Filipos 2:​14, 15.

9, 10. Sang 1919, ngaa ang pila ka Cristiano “mainandamon” kag ang pila “buangbuang”?

⁹ Apang hulat anay! Sa parabola, may problema ang pila ka ulay. Si Jesus nagpadayon: “Ang mga buangbuang nagsiling sa mga mainandamon, ‘Hatagi kami sang inyo lana, kay nagakapalong ang amon mga suga.’” (Mateo 25:8) Kon wala sing lana, indi magsiga ang mga suga. Gani ang lana sang suga nagapahanumdom sa aton sang matuod nga Pulong sang Dios kag iya balaan nga espiritu, nga nagapahulag sa matuod nga mga sumilimba nga mangin mga manugdala sing kapawa. (Salmo 119:130; Daniel 5:14) Antes sang 1919, gintinguhaan gid sang mainandamon nga hinaplas nga mga Cristiano nga hangpon  kon ano ang kabubut-on sang Dios para sa ila, walay sapayan sang ila temporaryo nga pagluya. Gani, sang may panawagan sa pagpasilak sing kapawa, handa sila.​​​—⁠⁠2 Timoteo 4:⁠2; Hebreo 10:​24, 25.

¹⁰ Apang, may pila ka hinaplas nga indi preparado sa pagsakripisyo ukon pagpanghikot sing maukod​​​—⁠⁠bisan pa luyag gid nila makaupod ang Nobyo. Gani sang nag-abot ang tion nga magmakugi na kuntani sila sa pagbantala sang maayong balita, indi sila handa. (Mateo 24:14) Gintinguhaan pa gani nila nga paluyahon ang ila makugi nga mga kaupod, nga daw subong bala nga nagapangayo sa ila sing lana. Sa parabola ni Jesus, paano nagsabat ang mainandamon nga mga ulay? Sila nagsiling: “Basi indi ini mag-igo sa amon kag sa inyo; maayo pa magkadto kamo sa mga nagabaligya kag magbakal nga sa inyo kaugalingon.” (Mateo 25:9) Sing kaanggid, ang mainunungon nga mga hinaplas sang 1919 nangindi sa paghimo sang bisan ano nga makapaluya sang ila kapasidad nga magpaiwag sang kapawa. Sa amo, nakapasar sila sa pagtilaw.

11. Ano ang natabo sa buangbuang nga mga ulay?

¹¹ Si Jesus naghinakop: “Samtang nagapakadto [ang buangbuang nga mga ulay] sa pagbakal, nag-abot ang nobyo, kag ang mga ulay nga nakahanda nagsulod upod sa iya sa punsion sang kasal; kag gintakop ang ganhaan. Pagkatapos nag-abot man ang iban nga mga ulay, nga nagasiling, ‘Ginuo, Ginuo, buksi kami!’ Subong sabat sia nagsiling, ‘Ginasiling ko sa inyo ang kamatuoran, wala ako makakilala sa inyo.’” (Mateo 25:10-​12, NW) Huo, may pila nga indi preparado sa pag-abot sang Nobyo. Gani, wala sila nakapasar sa pagtilaw kag nadula nila ang kahigayunan nga makatambong sa langitnon nga sinalusalo sang kasal. Masubo gid ini!

Ang Parabola Tuhoy sa mga Talanton

12. (a) Ano ang gingamit ni Jesus sa pag-ilustrar sang pagkamatutom? (b) Sin-o ang tawo nga “nagpanlakatan”?

¹² Pagkatapos mailustrar ang pagkamainandamon, masunod nga gin-ilustrar ni Jesus ang pagkamatutom. Sia nagsiling: “Subong sang isa ka tawo nga sang magapanlakatan sa malayo nga duta nagtawag sa iya mga ulipon kag nagtugyan sa ila sang iya pagkabutang; sa isa naghatag sia sing lima ka talanton, sa isa duha, sa isa isa, sa tagsatagsa suno sa iya ikasarang. Nian nagpanlakatan sia.” (Mateo 25:​14, 15) Ang tawo sa parabola amo mismo si Jesus, nga “nagpanlakatan” sang nagkayab sia sa langit sang tuig 33 C.⁠E. Apang antes sia magkayab, gintugyan ni Jesus ang “iya pagkabutang” sa iya matutom nga mga disipulo. Paano?

13. Paano ginpreparar ni Jesus ang isa ka daku nga hilikuton kag gin-awtorisahan ang iya mga “ulipon” sa pagpatikang?

¹³ Sa tion sang iya dutan-on nga ministeryo, gin-umpisahan ni Jesus ang pagpreparar sing isa ka daku nga hilikuton paagi sa pagbantala sang Ginharian sa bug-os nga pungsod sang Israel. (Mateo 9:​35-​38) Antes sia “nagpanlakatan,” gintugyan niya ini nga hilikuton sa iya matutom nga mga disipulo, nga nagasiling: “Busa lakat kamo kag maghimo sing mga disipulo sa mga tawo sa tanan nga kapungsuran, nagabawtismo sa ila sa ngalan sang Amay kag sang Anak kag sang balaan nga espiritu, nagatudlo sa ila nga tumanon ang tanan nga butang nga ginsugo ko sa inyo.” (Mateo 28:18-​20, NW) Paagi sa sini nga pinamulong, gin-awtorisahan ni Jesus ang iya mga “ulipon” nga magpatikang tubtob sa iya  pagbalik, ang “tagsatagsa suno sa iya ikasarang.”

14. Ngaa wala ginalauman nga palareho ang mahimo nga pagpatikang sang tanan?

¹⁴ Ini nga ekspresyon nagapakita nga indi tanan nga Cristiano sang nahaunang siglo may palareho nga mga kahimtangan ukon kapasidad. Ang iban, kaangay nanday Pablo kag Timoteo, makahinguyang sing daku gid nga tion sa pagbantala kag pagpanudlo nga hilikuton bangod sang ila mga kahimtangan. Ang iban naman mahimo nga limitado gid ang kahilwayan sa pagpanghikot bangod sang ila mga sirkunstansia. Halimbawa, ang pila ka Cristiano mga ulipon, kag ang iban masakiton, may edad na, ukon may mga responsibilidad sa pamilya. Kag, indi tanan nga pribilehiyo sa kongregasyon bukas para sa tanan nga disipulo. Ang mga hinaplas nga babayi kag pila ka hinaplas nga lalaki wala nagpanudlo sa kongregasyon. (1 Corinto 14:34; 1 Timoteo 3:⁠1; Santiago 3:1) Apang, bisan ano ang ila personal nga kahimtangan, ang tanan nga hinaplas nga mga disipulo ni Cristo​​—⁠⁠mga lalaki kag babayi⁠—gintangduan agod magpatikang, nga ginagamit sing maayo ang ila mga oportunidad kag mga kahimtangan sa Cristianong pagministeryo. Ginahimo man ini karon sang moderno nga mga disipulo ni Cristo.

Nag-umpisa ang Pag-inspeksion!

15, 16. (a) San-o ang tion sang pagpakighusay? (b) Ano nga bag-o nga mga oportunidad sa ‘pagpatikang’ ang ginhatag sa mga matutom?

¹⁵ Ang parabola nagapadayon: “Sa tapos ang malawig nga tion nag-abot ang agalon sadtong mga ulipon kag nagpakighusay sa ila.” (Mateo 25:19) Sang 1914​​​—⁠⁠malawig matuod nga tion pagkatapos sang 33 C.⁠E.​​​—⁠⁠nagsugod ang harianon nga presensia ni Cristo Jesus. Tatlo ka tuig kag tunga sang ulihi, sang 1918, nagkadto sia sa espirituwal nga templo sang Dios kag nagtuman sang mga pinamulong ni Pedro: “Ang tion nag-abot nga ang paghukom nagsugod sa panimalay sang Dios.” (1 Pedro 4:17; Malaquias 3:1) Nag-abot ang tion sang pagpakighusay.

¹⁶ Ano ang ginhimo sang mga ulipon, ang hinaplas nga mga utod ni Jesus, sa “mga talanton” sang Hari? Sugod sang 33 C.⁠E. padayon, lakip ang mga tuig antes mag-abot ang 1914, madamo ang lakas nga nagapangabudlay  sa “patikang” ni Jesus. (Mateo 25:16) Bisan sa tion sang nahauna nga inaway sa bug-os nga kalibutan, nagpakita sila sing daku nga handum nga mag-alagad sa Agalon. Karon, nagakaigo lang nga hatagan ang mga matutom sang bag-o nga mga oportunidad agod ‘magpatikang.’ Nag-abot na ang tion sang katapusan sining sistema sang mga butang. Dapat ibantala sa bug-os nga kalibutan ang maayong balita. “Ang alanyon sang duta” dapat na anihon. (Bugna 14:​6, 7, 14-​16) Kinahanglan pangitaon ang nagkalabilin nga mga katapo sang trigo nga klase kag tipunon ang “dakung kadam-an” sang iban nga mga karnero.​​​—⁠⁠Bugna 7:⁠9; Mateo 13:24-​30.

17. Paano ang matutom nga hinaplas nga mga Cristiano ‘nagsulod sa kalipay sang ila agalon’?

¹⁷ Ang tig-alani malipayon nga tion. (Salmo 126:6) Nian, nagakaigo gid nga sang ginhatagan ni Jesus sing dugang pa nga responsibilidad ang iya matutom hinaplas nga mga utod sang 1919, sia nagsiling: “Sa diutay nangin matutom ka, padumalahon ko ikaw sa madamo. Sulod ka sa kalipay sang imo agalon.” (Mateo 25:​21, 23) Dugang pa, ang kalipay sang Agalon subong bag-o nakoronahan nga Hari sang Ginharian sang Dios daku gid. (Salmo 45:​1, 2, 6, 7) Naeksperiensiahan man sang matutom nga ulipon nga klase ini nga kalipay paagi sa pagtiglawas sa Hari kag pagpasangkad pa sang iya mga intereses sa duta. (2 Corinto 5:20) Ang ila kalipay gintagna sa Isaias 61:10 (NW): “Pat-od gid nga magahugyaw ako kay Jehova. Magakalipay ang akon kalag sa akon Dios. Kay ginpanaptan niya ako sing mga panapton sang kaluwasan.”

18. Ngaa ang iban wala makapasar sa inspeksion, kag upod ang ano nga resulta?

¹⁸ Kanugon nga may pila nga wala makapasar sa inspeksion. Mabasa naton: “Sia man nga nakabaton sing isa ka talanton nagpalapit, nga nagasiling, ‘Agalon, nakilala ko nga ikaw tawo nga matig-a, nga nagaani didto sa wala mo masab-ugi kag nagatipon sa wala mo mapahangini; gani nahadlok ako, kag naglakat kag gintago ko ang imo talanton sa duta. Yari ang imo kaugalingon.’” (Mateo 25:​24, 25) Sing kaanggid, ang pila ka hinaplas nga mga Cristiano wala ‘magpatikang.’ Antes sang 1914 wala nila ginpaambit nga may kapagsik ang ila paglaum sa iban, kag indi man nila luyag nga himuon ini sang 1919. Ano ang reaksion ni Jesus sa ila pagkadimatinumanon? Ginkuha niya ang tanan nila nga pribilehiyo. Ginhaboy sila ‘sa kadudulman nga sa gua, diin magahibi sila kag magapabagrot sang ila mga ngipon.’​​​—⁠⁠Mateo 25:​28, 30.

Ang Pag-inspeksion Nagapadayon

19. Sa ano nga paagi nagapadayon ang proseso sang inspeksion, kag ang tanan nga hinaplas nga Cristiano determinado sa paghimo sing ano?

¹⁹ Ang kalabanan nga mangin katapo sang hinaplas nga ulipon ni Cristo sa tion sang katapusan wala pa nagaalagad kay Jehova sang gin-umpisahan ni Jesus ang iya pag-inspeksion sang 1918. Nawasi bala nila ang kahigayunan nga mainspeksion? Wala gid. Ang inspeksion sang 1918/19, diin ang matutom kag mainandamon nga ulipon subong isa ka klase nakapasar sa pagtilaw, panugod lamang sang proseso. Ang indibiduwal nga hinaplas nga mga Cristiano padayon nga ginainspeksion tubtob permanente na sila nga mapat-inan. (Bugna 7:1-3) Bangod narealisar nila ini, ang hinaplas nga mga utod ni Jesus determinado nga magpadayon sa matutom nga ‘pagpatikang.’ Determinado sila nga mangin mainandamon, nga nagahupot sing bugana nga suplay sang lana agod masanag nga mag-iwag ang kapawa. Nahibaluan nila nga kon ang tagsa mapatay nga matutom, abiabihon sia ni Jesus sa langitnon nga  puluy-an.​​—⁠⁠Mateo 24:13; Juan 14:​2-4; 1 Corinto 15:​50, 51.

20. (a) Ano ang determinado nga himuon karon sang iban nga mga karnero? (b) Ano ang nahibaluan sang hinaplas nga mga Cristiano?

²⁰ Gin-ilog man sang dakung kadam-an sang iban nga mga karnero ang ila hinaplas nga mga utod. Nahibaluan nila nga ang ila ihibalo tuhoy sa mga katuyuan sang Dios nagahatag sa ila sing daku nga responsibilidad. (Ezequiel 3:​17-​21) Gani, sa bulig sang Pulong kag balaan nga espiritu ni Jehova, ginahuptan man nila nga bugana ang ila suplay sang lana paagi sa personal nga pagtuon kag pagtambong sa Cristianong mga miting. Kag ginapaiwag nila ang ila kapawa, nga nagapakigbahin sa hilikuton nga pagbantala kag pagpanudlo kag gani “nagapatikang” upod sa ila hinaplas nga mga utod. Apang, nahibaluan gid sang mga hinaplas nga ang mga talanton gintugyan mismo sa ila. Dapat manabat sila sa ila pagdumala sa pagkabutang sang Ginuo sa duta. Bisan diutay lang sila, indi nila matugyan ang ila responsibilidad sa dakung kadam-an. Bangod sini, ang matutom kag mainandamon nga ulipon nagapadayon sa pagpanguna sa pagtatap sang palatikangan sang Hari, nga mapinasalamaton sa suportar sang matutom nga mga katapo sang dakung kadam-an. Ginakilala sang mga katapo sang dakung kadam-an ang responsibilidad sang ila hinaplas nga mga utod kag pribilehiyo nila nga magpanghikot sa idalom sang ila pagdumala.

21. Ano nga laygay ang naaplikar sa mga Cristiano antes sang 1919 tubtob karon?

²¹ Gani, bisan ining duha ka parabola nagapaathag sang mga hitabo sang mga tuig 1919, ang prinsipio sini naaplikar sa tanan nga Cristiano sa bug-os nga katapusan nga mga adlaw. Gani, bisan pa ang laygay nga ginhatag ni Jesus sa hingapusan sang parabola tuhoy sa napulo ka ulay una nga naaplikar sa hinaplas nga mga Cristiano sang mga 1919, ang prinsipio sini naaplikar gihapon sa tagsa ka Cristiano. Nian, kabay nga tanan kita magtuman sa ginsiling ni Jesus: “Busa bantay kamo, kay wala kamo makahibalo sang adlaw ukon sang takna.”​​​—⁠⁠Mateo 25:13.

[Mga nota]

Mapaathag Mo Bala?

• San-o gin-inspeksion ni Jesus ang iya mga sumulunod, kag ano ang iya nasapwan?

• Ngaa napalambo sang pila ka hinaplas nga mga Cristiano ang panimuot sang “malaut nga ulipon”?

• Paano naton mapakita nga kita mismo mainandamon sa espirituwal nga paagi?

• Bilang pag-ilog sa matutom nga hinaplas nga mga utod ni Jesus, sa ano nga paagi kita makapadayon sa ‘pagpatikang’?

[Mga Pamangkot sa Pagtinuon]

[Kahon sa pahina 16]

SAN-O ANG PAGKARI NI JESUS?

Sa Mateo kapitulo 24 kag 25, si Jesus ginpatuhuyan nga ‘nagakari’ sa nanuhaytuhay nga mga konteksto. Indi niya kinahanglan magkadto diri agod ‘magkari.’ Sa baylo, ‘nagakari’ sia sa kahulugan nga nagahatag sia sing igtalupangod sa katawhan ukon sa iya mga sumulunod, sing masami agod maghukom. Gani, sang 1914 ‘nagkari’ sia agod umpisahan ang iya presensia subong ginkoronahan nga Hari. (Mateo 16:28; 17:⁠1; Binuhatan 1:11) Sang 1918 ‘nagkari’ sia subong mensahero sang katipan kag ginsugdan ang paghukom sa mga nagapangangkon nga nagaalagad kay Jehova. (Malaquias 3:​1-3; 1 Pedro 4:17) Sa Armagedon, ‘magakari’ sia agod hukman ang mga kaaway ni Jehova.​​—⁠⁠Bugna 19:11-​16.

Ang pagkari (ukon, pag-abot) nga ginpatuhuyan pila ka beses sa Mateo 24:29-​44 kag 25:31-​46 matabo sa “dakung kapipit-an.” (Bugna 7:​14, NW) Sa pihak nga bahin, ang pagkari nga ginpatuhuyan sing madamo nga beses sa Mateo 24:45 tubtob 25:30 may kaangtanan sa iya paghukom sa nagapangangkon nga mga disipulo sugod sang 1918 padayon. Halimbawa, indi rasonable ang pagsiling nga ang pagpadya sa matutom nga ulipon, ang paghukom sa buangbuang nga mga ulay, kag ang paghukom sa matamad nga ulipon, nga nagtago lang sang talanton sang Agalon, matabo sa “pagkari” ni Jesus sa dakung kapipit-an. Ini magapahangop nga madamo sang hinaplas ang mangin di-matutom kag dapat islan sa sina nga tion. Apang, ginapakita sang Bugna 7:3 nga ang tanan nga hinaplas nga mga ulipon ni Cristo permanente na nga “napat-inan” sa pag-abot sina nga tion.

[Retrato sa pahina 14]

Ang “malaut nga ulipon” wala sing nabaton nga pagpakamaayo sang 1919

[Retrato sa pahina 15]

Ang maalam nga mga ulay handa sang nag-abot ang nobyo

[Retrato sa pahina 17]

Ang matutom nga mga ulipon “nagpatikang”

Ang matamad nga ulipon wala “nagpatikang”

[Retrato sa pahina 18]

Ang hinaplas kag ang “dakung kadam-an” padayon nga nagapaiwag sang ila kapawa