Ang mga Alagad sang Dios Kaangay sang mga Kahoy—Paano?

SA PAGLARAGWAY sa isa ka tawo nga nalipay kag nagaaplikar sa mga prinsipio sang Biblia sa iya kabuhi, ang salmista nagsiling: “Mangin kaangay sia sang kahoy nga natanom sa ubay sang mga kasulgan sang tubig, nga nagapamunga sa iya panag-on, ang iya dahon man indi malaya. Ang bisan ano nga ginahimo niya nagauswag.” (Salmo 1:1-3) Ngaa nagakaigo ini nga pagpaanggid?

Mahimo mamuhi sing tuman kadugay ang mga kahoy. Halimbawa, ang pila ka kahoy nga olibo sa lugar malapit sa Mediteraneo halin isa tubtob duha ka libo ka tuig na kuno ang kagulangon. Subong man, ang mga kahoy nga baobab sa sentral nga Aprika nagapamuhi na sing tuman kadugay, kag ang isa ka bristlecone pine sa California mga 4,600 anyos na kuno. Sa kagulangan, ang gulang na nga mga kahoy masami nga mapuslanon sa palibot sini. Halimbawa, ang matag-as nga mga kahoy nagahandong sa manugbo pa nga mga kahoy, kag ang nagakadugos nga mga dahon nagapatambok sa duta.

Masami nga nagatubo sing dulungan sa mga kagulangan ang pinakamatag-as nga mga kahoy sa kalibutan, diin nagabuligay ang indibiduwal nga mga kahoy. Bangod mahimo nagasamburanay ang ila mga gamot, ang nagapunsok nga mga kahoy mas makabato sa bagyo sangsa nagaisahanon lang nga kahoy sa patag. Ang masangkad magpangalapkap nga mga gamot nagasuyop sing bastante nga tubig kag sustansia sa duta. Sa pila ka kahimtangan, mahimo nga mas madalom pa ang mga ugat kon ipaanggid sa kataason sang kahoy, ukon mas masangkad pa ang nalab-utan sang mga gamot sangsa mga dahon.

Mahimo nga ginpatuhuyan ni apostol Pablo ang isa ka kahoy sang ginpaathag niya nga dapat “maggawi [ang mga Cristiano] sa iya [kay Cristo], nga nakapanggamot kag natukod sa iya kag napalig-on sa pagtuo.” (Colosas 2:​6, 7) Sa pagkamatuod, makapabilin lamang nga malig-on sa pagtuo ang mga Cristiano kon nakapanggamot sila kay Cristo.​​—⁠⁠1 Pedro 2:21.

Sa ano pa nga mga paagi mapaanggid ang mga alagad sang Dios sa mga kahoy? Bueno, subong nga ang mga kahoy sa kagulangan ginabuligan sang mga kahoy sa palibot, ang tanan nga nagapabilin nga suod sa Cristianong kongregasyon nagabaton man sing suporta gikan sa mga masigkatumuluo. (Galacia 6:2) Ginabuligan sang matutom, hamtong nga mga Cristiano, nga may madalom nga mga gamot sa espirituwal, ang bag-o nga mga tumuluo nga magpabilin nga malig-on sa pagtuo, bisan kon nagaatubang sing tulad-bagyo nga pagpamatok. (Roma 1:​11, 12) Mahimo mag-uswag ang bag-o nga mga Cristiano sa nagaamlig nga “handong” sang mas eksperiensiado nga mga alagad sang Dios. (Roma 15:1) Kag ang tanan nga katapo sang bug-os kalibutan nga Cristianong kongregasyon nagabenepisyo sa makapabakod nga espirituwal nga pagkaon nga ginaaman sang “mga kahoy sang pagkamatarong,” ang hinaplas nga nagkalabilin.​​—⁠⁠Isaias 61:3.

Makalilipay gid nga may paglaum ang tanan nga alagad sang Dios nga maeksperiensiahan ang katumanan sang saad nga nasulat sa Isaias 65:​22, nga nagasiling: “Subong sang mga adlaw sang kahoy mangin amo ang mga adlaw sang akon katawhan.”

[Credit Line sang retrato sa pahina 28]

Godo-Foto