Kon Paano Naton Mapakita ang Aton Gugma sa Dios

ANG pagpalambo sing gugma sa Dios indi lamang pagtuon tuhoy sa iya. Subong mapamatud-an sang mga alagad sang Dios sa bug-os nga kalibutan, ang matuod nga gugma sa Dios nagatubo kon mahibaluan sang isa ang iya personalidad, kag nagabakod pa ini kon mangin pamilyar ang isa sa kon ano ang iya mga ginahigugma, ginadumtan, kag kon ano ang iya mga ginakahamut-an kag mga ginapatuman.

Sing mahigugmaon, ginhatag ni Jehova sa aton ang iya Pulong, ang Biblia, nga sa sini ginpahayag niya ang iya kaugalingon. Sa sini, matun-an naton kon ano ang ginhimo ni Jehova sa nanuhaytuhay nga mga kahimtangan. Subong nga ang sulat gikan sa isa ka hinigugma nagahatag sa aton sing daku nga kalipay, ang Biblia nagapahalipay man sa aton samtang ginapahayag sa aton ang bag-o nga mga aspekto sang personalidad ni Jehova.

Apang, matalupangdan naton kon kaisa sa aton publiko nga ministeryo nga ang pagtuon tuhoy sa Dios wala pirme nagapahulag sa isa ka tawo nga higugmaon sia. Si Jesus nagsiling sa pila ka di-mainapresyahon nga mga Judiyo sang adlaw niya: “Ginausisa ninyo ang mga kasulatan, bangod nga nagahunahuna kamo nga sa ila may kabuhi kamo nga walay katapusan; .  . . apang nakilala ko kamo nga wala kamo sang gugma sang Dios sa inyo kaugalingon.” (Juan 5:​39, 42) Ang iban tinuig nga nagtuon nahanungod sa mahigugmaon nga mga buhat ni Jehova apang may diutay lang nga gugma sa iya. Ngaa? Wala nila ginbinagbinag ang kahulugan sang ila natun-an. Sa kabaliskaran, minilyon sang sinsero nga mga tawo nga aton ginatudluan sa Biblia ang nakaeksperiensia nga ang ila gugma sa Dios padayon nga nagatubo. Ngaa? Bangod, subong sang ginhimo naton, ginsunod nila ang halimbawa ni Asaf. Sa anong paagi?

Magpamalandong sing Mainapresyahon

Determinado si Asaf nga palambuon ang gugma kay Jehova sa iya tagipusuon. Sia nagsulat: “Magakabalaka ako sa akon tagipusuon . . . Dumdumon ko ang mga binuhatan ni Jah; kay dumdumon ko ang imo makatilingala nga hinimuan sang una.  Kag magapamalandong ako sa tanan mo nga binuhatan, kag sa imo mga pagpakig-angot magatalupangod ako.” (Salmo 77:​6, 11, 12, NW) Ang gugma sa Dios magatubo sa tagipusuon sang isa nga nagapamalandong sa mga dalanon ni Jehova subong sang ginhimo sang salmista.

Dugang pa, ang paghinumdom sang aton mga naeksperiensiahan samtang nagaalagad kay Jehova nagapabakod sang aton kaangtanan sa iya. Si apostol Pablo nagsiling nga kita “mga masigkamanugpangabudlay” sang Dios, kag ang pag-abyanay nga magatubo sa tunga sang mga masigkamanugpangabudlay pinasahi gid. (1 Corinto 3:9) Kon ginapabutyag naton ang aton gugma kay Jehova, ginaapresyar niya ini, kag nagapahalipay ini sa iya tagipusuon. (Hulubaton 27:11) Nian, kon ginapangayo naton ang bulig ni Jehova kag ginabuligan niya kita nga malubad ang aton mga problema, nakahibalo kita nga sia kaupod naton, kag nagadalom pa gid ang aton gugma sa iya.

Ang pag-abyanay sang duha ka tawo nagatubo samtang ginapabutyag nila ang ila mga balatyagon sa isa kag isa. Sing kaanggid, kon ginasugid naton kay Jehova kon ngaa debotado kita sa iya, nagabakod ang aton gugma sa iya. Masapwan naton ang aton kaugalingon nga nagabinagbinag sang mga pulong ni Jesus: “Higugmaa si Jehova nga imo Dios sa bug-os mo nga tagipusuon kag sa bug-os mo nga kalag kag sa bug-os mo nga hunahuna kag sa bug-os mo nga kusog.” (Marcos 12:​30, NW) Ano ang mahimo naton agod mapat-od nga padayon naton nga mahigugma si Jehova sa aton bug-os nga tagipusuon, kalag, hunahuna, kag kusog?

Paghigugma kay Jehova sa Aton Bug-os nga Tagipusuon

Ang Kasulatan nagapatuhoy sa malaragwayon nga tagipusuon, nga amo ang nasulod nga pagkatawo​​—⁠⁠ang aton mga handum, panimuot, kag balatyagon. Gani ang paghigugma kay Jehova sa aton bug-os nga tagipusuon nagakahulugan nga labaw sa tanan, handum naton nga pahamut-an ang Dios. (Salmo 86:11) Mapakita naton nga may amo kita sini nga sahi sang gugma paagi sa paghimo sang aton personalidad nga kalahamut-an sa iya. Nagapanikasog kita nga ilugon ang Dios paagi sa ‘pagkangil-ad sa malaut kag pagkapyot sing malig-on sa maayo.’​​—⁠⁠Roma 12:9.

Ang aton gugma sa Dios nagaapektar sang aton balatyagon sa tanan nga butang. Halimbawa, mahimo nga makahalangkat ukon makawiwili ang aton trabaho, apang diri bala nahuyog ang aton tagipusuon? Indi. Sanglit ginahigugma naton si Jehova sing bug-os tagipusuon, una sa tanan mga ministro kita sang Dios. Subong man, luyag naton nga pahamut-an ang aton mga ginikanan, tiayon, kag amo, apang ginapamatud-an naton ang aton bug-os tagipusuon nga gugma kay Jehova paagi sa pagtinguha labaw sa tanan nga pahamut-an sia. Kay man, takus sia nga unahon sa aton tagipusuon.​​—⁠⁠Mateo 6:24; 10:37.

Paghigugma kay Jehova sa Aton Bug-os nga Kalag

Sa Kasulatan ang tinaga nga “kalag” nagapatuhoy sa aton bug-os nga persona kag sa aton man kabuhi. Busa ang paghigugma kay Jehova sa aton bug-os nga kalag nagakahulugan nga ginagamit naton ang aton kabuhi sa pagdayaw sa iya kag sa pagpamatuod sang aton gugma sa iya.

 Sa pagkamatuod, mahimo nga may iban pa kita nga mga intereses sa kabuhi, subong sang pagtuon sing isa ka obra, pagpatikang sing negosyo, ukon pagtatap sa pamilya. Apang sa amo man nga tion, mapamatud-an naton ang aton bug-os kalag nga gugma kay Jehova paagi sa paghimo sing mga butang suno sa iya dalanon kag paagi sa paghupot sing iban nga mga butang sa ila nagakaigo nga duog sa aton kabuhi, sa amo ‘ginapangita anay ang ginharian kag ang iya pagkamatarong.’ (Mateo 6:33) Ang bug-os kalag nga pagsimba nagakahulugan man sing pagkamakugihon. Ginapakita naton nga ginahigugma naton si Jehova paagi sa makugi nga pagbantala sa mensahe sang Ginharian, paghatag sing makapalig-on nga mga komento sa mga miting, ukon pagbulig sa aton Cristianong mga kauturan, lalaki man ukon babayi. Sa tanan nga butang, padayon naton nga ‘ginahimo ang kabubut-on sang Dios sing bug-os kalag.’​​—⁠⁠Efeso 6:​6, NW.

Ginpakita ni Jesus ang bug-os kalag nga gugma sa Dios paagi sa pagsikway sa iya kaugalingon. Gin-una niya ang kabubut-on sang Dios kag ikaduha lamang ang iya personal nga mga kinahanglanon. Gin-agda kita ni Jesus nga sundon ang iya halimbawa. Sia nagsiling: “Kon ang bisan sin-o luyag magsunod sa akon, isikway niya ang iya kaugalingon kag pas-anon ang iya usok sang pag-antos kag padayon nga magsunod sa akon.” (Mateo 16:​24, 25, NW) Ang pagsikway sa aton kaugalingon nagakahulugan sing pagdedikar. Nagakahulugan ini nga ginahigugma gid naton ang Dios amo nga ginatugyan naton ang aton kaugalingon sa iya, subong sang isa ka Israelinhon sa panahon sang Biblia nga naghigugma gid sa iya agalon amo nga nagpaulipon sia sa iya sing permanente. (Deuteronomio 15:​16, 17) Ang pagdedikar sang aton kabuhi kay Jehova isa ka makakumbinsi nga pamatuod nga ginahigugma naton sia.

Paghigugma kay Jehova sa Aton Bug-os nga Hunahuna

Ang paghigugma kay Jehova sa aton bug-os nga hunahuna nagakahulugan nga himuon naton ang tagsa ka panikasog nga kinahanglanon agod mahangpan ang personalidad, mga katuyuan, kag mga ginapatuman ni Jehova. (Juan 17:⁠3; Binuhatan 17:11) Ginapabutyag naton ang aton gugma kay Jehova paagi sa paggamit sang bug-os nga ikasarang sang aton panghunahuna sa pagbulig sa iban nga higugmaon man si Jehova kag paagi sa pagpauswag sang aton arte sa pagpanudlo. “Ihanda ninyo ang inyo hunahuna para sa hilikuton,” laygay ni apostol Pedro. (1 Pedro 1:​13, NW) Subong man, nagapanikasog kita nga mangin interesado sa iban, ilabi na sa aton mga masigkaalagad sa Dios. Nahibaluan naton ang ila mga kahimtangan kag nagapanilag kita kon san-o nagakaigo nga hatagan sila sing komendasyon ukon kon san-o kinahanglanon ang lugpay.

Ginapakita naton kay Jehova nga ginahigugma naton sia sa aton bug-os nga hunahuna paagi sa pagpasakop sang aton hunahuna sa iya. Ginatinguhaan naton nga tamdon ang mga butang suno sa iya pagtamod, ginabinagbinag sia kon nagahimo kita sing mga desisyon, kag nagasalig nga ang iya dalanon amo ang pinakamaayo. (Hulubaton 3:​5, 6; Isaias 55:⁠9; Filipos 2:3-7) Apang, samtang padayon naton nga ginapakita ang aton gugma sa Dios, paano naton magamit ang aton kusog?

Paghigugma kay Jehova sa Aton Bug-os nga Kusog

Madamong pamatan-on sa Cristianong kongregasyon ang nagagamit sang ila kusog sa pagdayaw kay Jehova. (Hulubaton 20:29; Manugwali 12:1) Ang isa ka paagi nga ginapakita sang madamo nga pamatan-on nga mga Cristiano nga ginahigugma nila si Jehova sa ila bug-os nga kusog amo ang pagpayunir, ang bug-os tion nga ministeryo. Madamo nga mga iloy ang nagapakigbahin sa sini nga ministeryo samtang nagaeskwela ang ila mga kabataan. Ang matutom nga mga gulang nga nagaduaw subong manugbantay sa ila mga masigka-Cristiano dugang sa pag-atipan sa kaayuhan sang ila mga pamilya nagapakita nga ginahigugma nila si Jehova sa ila bug-os nga kusog. (2 Corinto 12:15) Si Jehova nagahatag sing kusog sa mga nagalaum sa iya, agod mapakita nila ang ila gugma paagi sa pagdayaw sa iya, nagagamit sang bisan ano nga kusog nga yara sa ila.​​—⁠⁠Isaias 40:29; Hebreo 6:​11, 12.

Ang gugma magatubo kon palambuon sing nagakaigo. Busa, padayon kita nga maghinguyang sing tion sa pagpamalandong. Ginadumdom naton ang nahimo ni Jehova sa aton kag kon ngaa takus sia sang aton debosyon. Subong di-himpit nga mga anak ni Adan, indi gid kita mangin takus sa “mga butang nga gin-aman sang Dios sa sadtong nagahigugma sa iya,” apang mapakita naton nga ginahigugma naton si Jehova sa aton bug-os nga pagkatawo. Padayon naton nga himuon ini!​​—⁠⁠1 Corinto 2:9.

[Retrato sa pahina 20]

Ginapakita naton ang gugma sa Dios paagi sa mga buhat