Mga Pamangkot Gikan sa mga Bumalasa
Mga Pamangkot Gikan sa mga Bumalasa
Bangod wala sing palanublion ang mga Levinhon sa Israel sang una, paano nakabaligya sing latagon ang Levinhon nga si Hanamel sa iya Levinhon nga pakaisa nga si Jeremias, subong sang mabasa sa Jeremias 32:7?
Tuhoy sa mga Levinhon, si Jehova nagsiling kay Aaron: “Wala ka sing panublion . . . , ukon bisan ano nga bahin sa tunga nila [sang Israel].” (Numeros 18:20) Walay sapayan sini, ginhatagan ang mga Levinhon sing 48 ka banwa, ukon siudad, pati ang mga halalban sini, nga nalapta sa bug-os nga Ginsaad nga Duta. Ang banwa ni Jeremias amo ang Anatot, nga isa sa mga banwa nga ginhatag sa “mga anak ni Aaron, ang mga saserdote.”—Josue 21:13-19; Numeros 35:1-8; 1 Cronica 6:54, 60.
Sa Levitico 25:32-34 (NW), mabasa naton ang espesipiko nga instruksion nga ginhatag ni Jehova tuhoy sa “kinamatarong sa paggawad” sang propiedad sang mga Levinhon. Mahimo gid nga may mga kinamatarong sa panublion ang indibiduwal nga Levinhon nga mga pamilya nga panag-iyahan, gamiton, kag ibaligya ang espesipiko nga mga bahin sini. Gani nalakip sa sini ang pagbaligya kag paggawad sang propiedad. * Sa madamo nga kaso, ginpanag-iyahan kag gingamit sang mga Levinhon ang ila propiedad kaanggid sa mga Israelinhon sa iban nga mga tribo.
Mahimo nga ginpanubli sang pamilya sang mga Levinhon ining propiedad. Apang, kon tuhoy sa “kinamatarong sa paggawad,” gintugutan lamang ini nga mga transaksion sa ulot sang mga Levinhon. Isa pa, daw naaplikar lamang ang pagbaligya kag paggawad sang duta nga yara sa sulod sang mga banwa, kay ang “latagon nga palahalban sa ila mga banwa” indi mabaligya bangod “kaugalingon nila ini sing dayon.”—Levitico 25:32, 34.
Gani amo sini nga sahi sang latagon ang gingawad ni Jeremias kay Hanamel kay mahimo masaylo ang pagpanag-iya sini paagi sa paggawad. Mahimo nga yara ini sa sulod sang banwa. Si Jehova mismo ang nagsiling nga ini nga “latagon” iya ni Hanamel kag si Jeremias may “kinamatarong sa paggawad.” (Jeremias 32:6, 7) Gingamit ni Jehova sing simbuliko ini nga transaksion agod palig-unon ang iya saad nga ang mga Israelinhon magabalik sa pagpanubli liwat sa duta sa tapos sila gintapok sa Babilonia.—Jeremias 32:13-15.
Wala sing pamatuod nga sayop ang pagpanag-iya ni Hanamel sang propiedad sa Anatot. Wala man sing pamatuod nga ginlapas niya ang kasuguan ni Jehova sa pag-aha kay Jeremias nga baklon ini nga latagon sa Anatot ukon sayop ang paggamit ni Jeremias sang iya kinamatarong sa paggawad sa pagbakal sini nga latagon.—Jeremias 32:8-15.
[Mga nota]
^ par. 4 Sang unang siglo C.E., ginbaligya sang Levinhon nga si Bernabe ang iya duta kag gin-amot ang kuarta para sa nagakinahanglan nga mga sumulunod ni Cristo sa Jerusalem. Ini nga propiedad mahimo nga didto sa Palestina ukon sa Cipre. Ukon mahimo nga isa lamang ini ka lote nga lulubngan nga nabakal ni Bernabe sa Jerusalem.—Binuhatan 4:34-37.
