Isa ka Pagsaulog nga Nagaapektar sa Imo

SANG si Jesucristo yari sa duta, ginsugdan niya ang isa ka pagsaulog nga nagapadungog sa Dios. Amo lamang ini ang relihioso nga seremonya nga direkta nga ginsugo niya nga saulugon sang iya mga sumulunod. Amo ini ang Panihapon sang Ginuo, nga ginatawag man nga Katapusan nga Panihapon.

Handurawa nga nasaksihan mo ang mga hitabo nga nagdul-ong sa sini nga okasyon. Si Jesus kag ang iya mga apostoles nagtipon sa naibabaw nga hulot sa Jerusalem agod saulugon ang Judiyong Paskua. Nakatapos na sila kaon sang kinaandan nga panihapon sa Paskua, nga nagalakip sang inasal nga kordero, mapait nga gamhon, tinapay nga wala sing tapay, kag pula nga alak. Ang di-matutom nga si apostol Judas Iscariote ginpahalin na kag sa indi madugay luiban niya ang iya Agalon. (Mateo 26:17-​25; Juan 13:​21, 26-​30) Ang kaupod lamang ni Jesus amo ang iya 11 ka matutom nga apostoles. Isa sa ila si Mateo.

Suno sa rekord sang nasaksihan ni Mateo, ginsugdan ni Jesus ang Panihapon sang Ginuo sing subong sini: “Nagkuha si Jesus sing tinapay [nga wala sing tapay], kag ginpakamaayo, kag gintipiktipik ini, kag ginhatag sa mga gintutun-an kag nagsiling, ‘Kuha kamo, kaon kamo; ini amo ang akon lawas.’ Kag nagkuha sia sang tagayan [nga may alak], kag sang nakapasalamat, ginhatag niya ini sa ila, nga nagasiling, ‘Inom kamo tanan sini; kay ini amo ang akon dugo sang bag-ong katipan, nga ginaula tungod sa madamo sa kapatawaran sang mga sala.’”​​—⁠⁠Mateo 26:26-​28.

Ngaa ginsugdan ni Jesus ang Panihapon sang Ginuo? Sang ginhimo ini, ngaa naggamit sia sang tinapay nga wala sing tapay kag pula nga alak? Dapat bala makig-ambit sa sining mga emblema ang tanan nga mga sumulunod ni Cristo? Daw ano kasunson dapat saulugon ini nga panihapon? Kag may kahulugan gid bala ini sa imo?