Ang Katahom sang Mga Tinuga ni Jehova

‘Labi Pa Ikaw ka Halangdon Sangsa Kabukiran’

ANG pagtan-aw sa pagsubang sang adlaw sa putukputukan sang Mount Fuji indi gid malipatan. Ang duag-kalayo nga adlaw nagabutlak sa gintaipan, nga nagasilak sa puti nga niebe kag abuabuhon nga lava nga bato. Sa pag-umpisa sang isa naman ka adlaw, ang maathag nga landong sang bukid madasig nga nagalapad sing kinilometro sa mga pukatod kag mga nalupyakan.

Subong sang Mount Fuji​​—⁠⁠nga ginsulat anay sa mga karakter nga nagakahulugan sing “wala kaangay”​​—⁠⁠ang matahom nga kabukiran nagapadayaw gid sa aton. Ang matuod, mahimo mangin kubos lang kita kon ipaanggid sa kadakuon kag kataason sini! Ang mga bukid matahom gid kag mataas amo nga madamo nga tawo ang nagapati nga ang pinakamataas nga mga putukputukan, nga masami natabunan sang mga alipuop kag mga panganod, amo ang nahamtangan sang mga dios.

Ang lamang Dios nga ginahatagan sang kadayawan sang mga bukid amo ang sampaton nga Manunuga sini, si Jehova. Sia lamang ang “nagahuman sang kabukiran.” (Amos 4:13) Halos ikap-at nga bahin sang duta mga bukid, kag sang gintuga sang Dios ang aton planeta, nagpahamtang sia sing mga puersa nga nagresulta sa mga kabukiran. (Salmo 95:4) Halimbawa, ginapatihan nga ang mga kabukiran sang Himalayas kag sang Andes naporma paagi sa mabaskog kaayo nga mga paglupok sa idalom sang duta kag paagi sa paggiho sang matig-a nga mga bahin sang duta.

Wala naton mahangpan sing bug-os kon paano kag kon ngaa nagluntad ang mga kabukiran. Matuod, indi gid naton masabat ining mga ginpamangkot sa matarong nga si Job: “Diin ka bala sang ako [si Jehova] nagpasad sang mga sadsaran sang duta? . . . Sa ibabaw sang ano bala matakod ang iya mga sadsaran?”​​—⁠⁠Job 38:​4-6.

Apang, nahibaluan gid naton nga ang aton kabuhi nasandig sa mga kabukiran. Gintawag ini nga kinaugali nga mga tuburan sang tubig, sanglit ang tanan dalagku nga mga suba nagahalin sa mga tuburan sa bukid kag katunga sang mga tawo sa duta nagasandig sa kabukiran para sa tubig. (Salmo 104:13) Suno sa magasin nga New Scientist, “anom sa 20 ka panguna nga kalan-on nga mga tanom sa kalibutan naghalin sa kabukiran.” Sa ginsaad sang Dios nga bag-ong kalibutan diin may balanse nga ekolohiya, “may bugana nga uyas sa duta; sa putukputukan sang kabukiran magahapayhapay ini.”​​—⁠⁠Salmo 72:16; 2 Pedro 3:⁠13.

Para sa madamo, ang pagsambit sa kabukiran nagapahanumdom sang Alps sa Europa. Ini nga mga bukid, pati na ang Mount Civetta nga ginapakita diri, makalilipay nga pamatuod nga may isa ka Manunuga sini. (Salmo 98:8) Nagahatag ini sing kadayawan kay Jehova, ang isa nga “tungod sa iya kusog ginapalig-on ang mga kabukiran.”​​—⁠⁠Salmo 65:6.⁠⁠ *

Makahalawhaw gid ang katahom sang Alps, nga may mga putukputukan nga nakulapan sing yelo, mga banglid nga nakulapan sang niebe, mga nalupyakan kag mga linaw, kag mga kapatagan. Ginkilala ni Hari David si Jehova subong ang Isa nga “nagapatubo sing hilamon sa kabukiran.”​​—⁠⁠Salmo 147:8.

Ang nagainiping nga mga pukatod​​—⁠⁠kaangay sining mga pukatod sa Guilin, China​​​—⁠⁠mahimo nga indi tanto ka dalayawon kon ipaanggid sa Alps, apang may pinasahi man ini nga katahom. Nagapangalihid sa Li River, ang matahom  nga nagailidas kag nagabuklodbuklod sing mataas nga mga apog nga mga bato nagapadayaw sa mga bisita. Ang pagtan-aw sa matin-aw nga katubigan nga nagailig sa sining maalipuop nga mga pukatod magapahanumdom sa isa sang pinamulong sang salmista: “Nagapatubod sia [si Jehova] sing mga tuburan sa mga nalupyakan; nagailig sila sa tunga sang kabukiran.”​​—⁠⁠Salmo 104:10.

Nagakaigo nga magdayaw kita sa mga kabukiran bangod ginakilala naton ini subong isa ka halangdon nga bahin sang mahigugmaon nga aman sang Manunuga para sa kaayuhan kag kalipayan sang katawhan. Apang, bisan daw ano pa ini ka makahalawhaw, ang kabukiran indi makatupong sa pagkahalangdon ni Jehova. ‘Labi gid sia ka halangdon sangsa kabukiran.’​​—⁠⁠Salmo 76:4.

[Mga nota]

[Kahon/Retrato sa pahina 9]

Napulo ka porsiento sang populasyon sang kalibutan ang nagapuyo sa kabukiran. Apang indi ini isa ka di-malandas nga sablag sa mga nagabantala sing maayong balita sang Ginharian sang Dios. Ining Cristianong mga ministro masako gid sa madamo nga mataas nga mga lugar. Kag “daw ano katahom sa mga bukid ang mga tiil sang nagadala sang maayong mga balita, nga nagabantala sang paghidait, nga nagadala sang maayong mga balita sang kaayuhan, nga nagabantala sang kaluwasan!”​​—⁠⁠Isaias 52:7.

“Ang mataas nga mga bukid naigo sa mga kanding nga talunon,” amba sang salmista. (Salmo 104:18) Ang mga kanding nga talunon ukon kanding sa bukid, subong sang may matahom sing sungay nga Nubian ibex, nalakip sa labing mabakod magpangubong nga mga sapat nga nagapuyo sa bukid. Nagalakat ini sa tuman kakitid nga mga bahin nga daw indi maagyan. Ang ibex nasangkapan sing maayo sa pagpuyo sa indi makadtuan nga mga lugar. Ang isa ka rason sini amo ang pagkahuman sang mga kuko sini. Bangod sa kabug-aton sang kanding, nagahitad ang mga tiil sini amo nga makapangubong ini sing malig-on kon nagatindog ukon nagalakat ini sa makitid nga kabatuhan. Ang ibex isa gid ka obra-maestra nga desinyo!

[Retrato sa pahina 9]

Mount Fuji, sa Honshu, Japan