666—Indi Lamang Isa ka Tanhaga

“Wala sing sarang makabakal ukon makabaligya luwas kon sia may pat-in, nga amo, ang ngalan sang sapat ukon ang numero sang ngalan sini. Ini nagatawag sang kaalam: ang may paghangop mag-isip sia sang numero sang sapat, kay ini numero sang tawo, ang iya numero anom ka gatos kag kan-uman kag anom.”—Bugna 13:17, 18.

PILA lamang ka topiko sa Biblia ang nakapukaw sing daku nga interes kag kabalaka subong sang tagna tuhoy sa makatalanhaga nga pat-in, marka, ukon ngalan, sang “sapat nga mapintas”​​—⁠ang numero nga 666. Sa telebisyon kag Internet, subong man sa mga pelikula, mga libro, kag mga magasin, ang marka sang sapat nangin sentro sang walay katapusan nga mga ispekulasyon.

Ang iban nagapati nga ang 666 marka sang anticristo nga ginasambit sa Biblia. Ang iban naman nagasiling nga nagasimbulo ini sa pila ka porma sang obligado nga identipikasyon, subong sang pika ukon gintanom sa lawas nga microchip nga may digital code nga nagapakilala sa tawo subong alagad sang sapat. Ang iban pa gid nagapati nga ang 666 marka sang papado sang mga Katoliko. Ginaislan nila sing numero ang mga letra sa opisyal nga titulo sang papa nga Vicarius Filii Dei (Tiglawas sang Anak sang Dios) kag paagi sa pagpasigusigo sa mga numero, nakuha nila ang 666. Ang iban nagasiling man nga ang numero nga 666 sarang makuha gikan sa Latin nga ngalan sang Romanong emperador nga si Diocletian kag gikan sa Hebreo nga bersion sang ngalan nga Nero Cesar.⁠ *

Apang, ini nga imahinasyon kag gin-imbento nga mga interpretasyon tuhay gid sa ginasiling mismo sang Biblia tuhoy sa marka sang sapat, subong makita pa naton sa masunod nga artikulo. Ginapakita sang Biblia nga ang mga may marka sang sapat magaagom sang kasingkal sang Dios pag-abot sang tion nga laglagon na niya ang sistema sang mga butang karon. (Bugna 14:​9-​11; 19:20) Busa, ang paghangop sa kahulugan sang 666 indi lamang paglubad sa isa ka makapulukaw-interes nga tanhaga. Makalilipay nga ang ihibalo sa sining importante nga butang wala gintago ni Jehova nga Dios, ang personipikasyon sang gugma kag Tuburan sang espirituwal nga kapawa, sa iya mga alagad.​​—⁠2 Timoteo 3:​16; 1 Juan 1:⁠5; 4:8.

[Mga nota]