Dapat Bala Kita Magpanawag sa mga Anghel Para sa Bulig?

NAGAKAIGO bala nga magpanawag sa mga anghel sa tion sang kalisdanan? Madamo nga tawo ang nagahunahuna nga nagakaigo ini. Sa katunayan, ang New Catholic Encyclopedia nagasiling: “Ang isa nagapangamuyo sa . . . mga anghel . . . apang sa kahulugan lamang nga magapatunga sila sa Dios para sa aton.” Dapat bala kita magpanawag sa mga anghel agod magpatunga para sa aton?

Ang Pulong sang Dios nagahatag sing mga ngalan sang duha lamang ka matutom nga mga anghel sang Dios, si Miguel kag si Gabriel. (Daniel 8:​16; 12:⁠1; Lucas 1:​26; Judas 9) Sanglit ini nga mga ngalan ginsambit sa Biblia, nahangpan naton nga ang tagsa ka anghel isa ka pinasahi nga espiritu nga persona nga may ngalan, indi lamang isa ka wala sing personalidad nga puersa. Apang, ang iban nga mga anghel wala magsugid sang ila ngalan. Halimbawa, sang ginpangabay ni Jacob ang isa ka anghel nga nagduaw sa iya nga isugid ang iya ngalan, wala niya ini ginsugid. (Genesis 32:29; Hukom 13:​17, 18) Sa Biblia, wala sing listahan sang mga ngalan sang mga anghel, sa amo indi sila mahatagan sing sobra nga atension sang mga tawo.

Nalakip sa mga katungdanan sang mga anghel amo ang pagpaalinton sing mga mensahe sang Dios sa mga tawo. Sa katunayan, ang orihinal nga Hebreo kag Griegong mga tinaga nga ginbadbad “anghel” literal nga nagakahulugan sing “mensahero.” Apang, ang mga anghel wala nagaalagad subong mga manugpatunga nga nagadul-ong sing mga pangamuyo sang mga tawo sa trono sang Labing Mataas. Ginpat-od sang Dios nga ang mga pangamuyo ipatungod sa iya sa ngalan sang iya Anak, si Jesucristo, nga nagsiling: “Bisan ano ang inyo pangayuon sa Amay sa akon ngalan, ihatag niya sa inyo.”​—⁠Juan 15:16; 1 Timoteo 2:5.

Si Jehova nga Dios indi gid masako agod magpamati sa aton kon magdangop kita sa iya sing nagakaigo. Ang Biblia nagapasalig: “Ang GINUO malapit sa tanan nga nagapanawag sa iya, sa tanan nga nagapanawag sa iya sa kamatuoran.”​—⁠Salmo 145:18.