Liberia—Pag-uswag sa Ginharian Walay Sapayan sang Inaway

KAPIN na sa isa ka dekada nga may inaway sibil sa Liberia. Sa tungatunga nga bahin sang 2003, ginsulod sang mga rebelde ang kapital nga siudad, nga Monrovia. Madamo nga Saksi ni Jehova ang napilitan nga magpalagyo gikan sa ila mga puluy-an, kon kaisa sing liwat kag liwat. Pirme ginakawat ang ila mga pagkabutang.

Makapasubo nga sa tion sang inaway sa kapital, linibo ang napatay. Nalakip sa ila ang duha ka Saksi, isa ka utod nga lalaki kag isa ka utod nga babayi. Paano gin-atubang sang iban nga mga kauturan ang kabudlayan, kag ano ang ginhimo agod buligan sila?

Bulig Para sa mga Nagakinahanglan

Sa tion sang krisis, ang sanga talatapan sang mga Saksi ni Jehova sa Liberia nag-organisar sing bulig para sa mga nagakinahanglan. Ginhatag ang kalan-on, importante nga kagamitan sa balay, kag mga bulong. Sang nakontrol sang mga rebelde ang pantalan, nangin maiwat ang kalan-on. Napanan-aw na nga daan sang sanga ini nga hitabo kag may suplay sila para sa duha ka libo nga Saksi nga nagdangop sa mga Kingdom Hall sa bug-os nga siudad. Ginrasyon sang mga kauturan ang kalan-on agod nga ang suplay makatapod tubtob nga magbukas liwat ang pantalan. Nagpadala ang mga sanga sa Belgium kag Sierra Leone sing medikal nga mga suplay, kag ang mga sanga sa Britanya kag Pransia nagpadala sing mga panapton.

Walay sapayan sang mabudlay gid nga kahimtangan, ang aton kauturan nagpabilin nga positibo kag malipayon. Ang komento sang isa nga nagpalagyo gikan sa iya puluy-an sing tatlo ka beses nagpalanog sa komento sang madamo. Sia nagsiling: “Amo ini ang mga kahimtangan nga aton ginabantala; nagakabuhi na kita sa katapusan nga mga adlaw.”

Reaksion sa Maayong Balita

Walay sapayan sang kagamo sa bug-os nga pungsod, ang mga Saksi padayon nga may maayo gid nga mga resulta sa latagon. May pinakataas sila nga kadamuon sang manugbantala sang Ginharian nga 3,879 sang Enero 2003, kag sang Pebrero nagdumala sila sing 15,227 ka pagtuon sa Biblia sa puluy-an.

Madasig ang reaksion sang mga tawo sa maayong balita. Ang isa ka halimbawa sini naghalin sa isa ka minuro sa nabagatnan-sidlangan nga bahin sang pungsod. Nagplano ang kongregasyon nga saulugon ang Memoryal sang kamatayon ni Cristo sa daku nga minuro sang Bewahn, nga mga lima ka oras nga lakton gikan sa masami nila nga ginatipunan. Antes magkadto ang mga kauturan sa minuro agod mag-agda sa mga tawo sa Memoryal, ginhatagan sing imbitasyon ang meyor sang Bewahn. Sang nabaton niya ini, ginkuha niya ang iya Biblia, nagkadto sa mga tagaminuro, kag ginbasa ang teksto nga makita sa imbitasyon, kag ginpalig-on niya sila nga magtambong sa Memoryal. Gani sang nag-abot ang mga manugbantala, nasapwan nila nga may naghimo na sang ila hilikuton! Ang meyor, upod sa iya mga kabataan kag duha ka asawa, nagtambong sa Memoryal. Sa kabilugan, 27 ang nagtambong. Sugod sadto, naghalin ang meyor sa Metodista nga Simbahan, nagtuon sa mga Saksi ni  Jehova, kag nagtanyag sing duta agod patindugan sing Kingdom Hall.

Pagbag-o sing Panimuot

Ang paggawi sang aton mga kauturan nangin epektibo man sa pagpabag-o sa panimuot sang pila nga nagpamatok sa kamatuoran. Binagbinaga ang halimbawa sang isa ka tawo nga si Opoku. Ang isa ka espesyal payunir nga ministro nga nagaalagad sa latagon nakigsugilanon sa iya kag gintanyagan sia sing magasin nga Lalantawan. Interesado si Opoku sa isa ka artikulo sa magasin apang wala sia sing kuarta. Ginpaathag nga wala ini sing bayad, ginbilin sang payunir ang magasin sa iya kag naghimo sing kahimusan nga magduaw liwat. Sa pagduaw liwat, ginpamangkot ni Opoku ang payunir: “Kilala mo bala ako? Ang kalabanan sa inyo sa banwa sang Harper nakakilala sa akon. Pirme ko anay ginapahalin sa eskwelahan ang inyo mga kabataan!” Dayon ginpaathag niya nga prinsipal sia anay sa isa ka eskwelahan sa banwa kag ginhingabot niya ang mga kabataan sang mga Saksi ni Jehova bangod wala sila nagasaludo sa bandera.

Apang, bangod sang tatlo ka halimbawa sang Cristianong gugma nga ginpakita sang mga Saksi ni Jehova, gin-usisa liwat ni Opoku ang iya panimuot. Una, nakita niya ang pag-atipan sang mga Saksi sa ila utod sa espirituwal nga nagmasakit sing malubha. Ginpatigayon pa gani nila ang pagpabulong sa iya sa malapit nga pungsod. Abi anay ni Opoku ang nagmasakit nga utod nga lalaki isa ka prominente nga tawo sa tunga sang mga Saksi apang nahibal-an niya nga isa lamang sia ka ordinaryo nga Saksi. Ikaduha, sang katuigan 1990, nangin refugee si Opoku sa Côte d’Ivoire. Isa ka adlaw sang gin-uhaw sia, nagbakal sia sing tubig sa isa ka lamharon nga lalaki. Bilog ang kuarta ni Opoku kag wala sing kambio ang lamharon nga lalaki, gani wala na lang niya ginpabayaran ang tubig kay Opoku. Sang gindaho niya kay Opoku ang tubig, namangkot ang lamharon nga lalaki: “Sa banta mo magaabot pa ayhan ang tion nga ang mga tawo kaangay mo kag sa akon magahatagay sing mga butang nga wala nagapabayad?” Ginpakotpakot ni Opoku nga isa sia ka Saksi ni Jehova, kag ginkompirmar ini sang lamharon nga lalaki. Ang kaalwan kag kaayo sining utod nagpadayaw sa iya. Sang ulihi, ang kahanda sang espesyal payunir nga ihatag sa iya ang magasin nga wala sing bayad nagkumbinsi kay Opoku nga sayop ang pagtamod niya sa mga Saksi kag nga kinahanglan niya nga magbag-o. Nag-uswag sia sa espirituwal kag isa na karon ka di-bawtismado nga manugbantala.

Bisan pa ang mga kauturan sa Liberia padayon nga nagaatubang sang mabudlay nga mga kahimtangan, nagasalig sila sa Dios kag matutom nga nagabantala sing maayong balita tuhoy sa maayo nga mga kahimtangan sa idalom sang matarong nga paggahom sang Ginharian sang Dios. Indi gid pagkalimtan ni Jehova ang ila lakas nga pagpangabudlay kag ang gugma nga ginapakita nila tungod sa iya ngalan.​—⁠Hebreo 6:10.

[Mapa on page 30]

(For fully formatted text, see publication)

MONROVIA

[Mga retrato sa pahina 31]

Sa tion sang krisis, ang katawhan ni Jehova nagaaman sing espirituwal kag pisikal nga bulig sa mga nagakinahanglan