Report sang Mga Manugbantala sang Ginharian

Pagpanaksi sa mga Tawo sa Ila Ulubrahan

SA ANO magkapareho ang mga apostoles nga sanday Mateo, Pedro, Andres, Santiago, kag Juan? Sila tanan yara sa ila ulubrahan sang gintawag sila ni Jesus. Sanday Pedro, Andres, Santiago, kag Juan masako sa ila pagpangisda sang gin-agda sila ni Jesus, nga nagasiling: “Sunod kamo sa akon.” Si Mateo nagalingkod sa buluhisan sang gin-agda sia nga mangin disipulo ni Jesus.​​—⁠Mateo 4:​18-​21; 9:9.

Mahimo mangin makapaladya ang pagpanaksi sa mga tawo sa ila ulubrahan. Narealisar ini, nagpanikasog gid ang mga Saksi ni Jehova sa Japan kasan-o lang nga himuon ini nga sahi sang pagministeryo. Ano ang nangin mga resulta? Sa sulod lamang sang pila ka bulan, linibo ka pagduaw liwat ang nahimo, kag mga 250 ka pagtuon sa Biblia ang nasugdan. Binagbinaga ang masunod nga mga eksperiensia.

Nasumalang sang isa ka bug-os tion nga ministro sa Tokyo ang isa ka manedyer sang restawran nga nakapakighambal anay sa isa ka Saksi sang nagligad nga mga 30 ka tuig sang isa pa sia ka bata nga nagabutho. Bisan pa wala tanto mahangpan sang manedyer ang ginhambal sa iya sadto, nangin interesado sia sa Biblia. Sini nga tion nga napukaw liwat ang iya interes, ginbaton niya dayon ang isa ka pagtuon sa Biblia nga ginagamit ang libro nga Ang Ihibalo nga Nagadul-ong sa Kabuhi nga Walay Katapusan.⁠ * Dugang pa, ginsugdan niya ang personal nga programa sang pagbasa sing Biblia kada gab-i antes magtulog.

Ang isa ka espesyal payunir nga ministro nagduaw sa isa ka opisina. Bisan pa wala sadto ang manedyer, ang lin-ay nga nagsabat sa telepono sang manedyer namangkot: “Luyag mo bala makighambal sa akon?” Pagkatapos sang malip-ot nga paghambalanay sa telepono, naggua ang lin-ay kag nagsiling nga interesado sia sa pagbasa sing Biblia. Nanaad ang espesyal payunir nga dalhan sia sing Biblia pagbalik niya kag isa ka pagtuon sa Biblia ang ginsugdan upod sa iya, nga ginahiwat sa isa ka malapit nga parke sing aga pa antes sia mag-obra.

Sa isa pa ka opisina, nakita sang isa ka tawo nga ginbaton sang iya katrabaho ang Lalantawan kag Magmata! nga mga magasin kag pagkatapos ginhaboy ini dayon paghalin sang Saksi. Pagpauli sini nga tawo, ginsugid niya sa iya Saksi nga asawa ang natabo kag nagkomento nga kon sia ang gintanyagan sing mga magasin namati sia kuntani. Ginsugid ini sang iya anak nga babayi, nga nakabati sang iya ginkomento, sa isa ka Saksi nga nagapanaksi sa sining partikular nga duog sang negosyo. Ginduaw sa gilayon sini nga Saksi ang bana sa iya opisina kag ginsugdan ang isa ka pagtuon sa Biblia upod sa iya. Wala madugay, ang tawo nagsugod sa pagtambong sa mga miting kon Domingo sing regular.

Ang pagpanaksi sa mga tawo sa ila ulubrahan nagdala sing iban pa nga mga benepisyo. Madamo nga mga manugbantala sa Japan ang nangin lantip sa paghimo sing mga pagduaw liwat sa mga shopping area, mga pabrika, kag mga opisina. Dugang pa, bangod sini nga paagi sang pagpanaksi, madamo nga mga indi aktibo ang nasapwan kag nasugdan ang pagtuon upod sa ila. Talalupangdon gid ang nangin mga resulta. Ang isa ka kongregasyon sa sentral nga Tokyo nagreport kasan-o lang sing 108 ka pagtuon sa Biblia sa puluy-an, kapin sa doble nga kadamuon sang ginreport sang nagligad nga tuig.

[Mga nota]