Pamatuki ang Espiritu sang Nagabag-o nga Kalibutan

“Nabaton naton, indi ang espiritu sang kalibutan, kundi ang espiritu nga gikan sa Dios.”​​—⁠1 CORINTO 2:​12, NW.

1. Sa anong mga paagi nalimbungan si Eva?

“ANG man-ug​​—⁠gindaya ako sini.” (Genesis 3:​13, NW) Paagi sa sining malip-ot nga mga pulong, gintinguhaan sang una nga babayi nga si Eva, nga ipaathag kon ngaa nagrebelde sia batok kay Jehova nga Dios. Husto ang iya ginsiling, apang wala ini magpakamatarong sa iya ginhimo nga sala. Si apostol Pablo gin-inspirar sang ulihi sa pagsulat: “[Si Eva] nalimbungan.” (1 Timoteo 2:14) Nalimbungan sia sa pagpati nga ang isa ka buhat sang paglalis​​—⁠ang pagkaon sang ginadumilian nga bunga​​—⁠mangin maayo sa iya, nga mangin kaangay sia sang Dios. Nalimbungan man sia sa pagkilala kon sin-o ang isa nga nagpatalang sa iya. Wala gid niya mahibalui nga ang man-ug isa lamang gali ka instrumento ni Satanas nga Yawa.​​—⁠Genesis 3:​1-6.

2. (a) Paano ginapatalang ni Satanas ang mga tawo karon? (b) Ano ang “espiritu sang kalibutan,” kag anong mga pamangkot ang binagbinagon naton karon?

² Sugod pa sang panahon ni Adan kag ni Eva, padayon na nga ginapatalang ni Satanas ang mga tawo. Sa pagkamatuod, ‘ginapatalang niya ang bug-os napuy-an nga duta.’ (Bugna 12:​9, NW) Ang iya mga taktika wala magbag-o. Bisan pa wala na sia nagagamit sing isa ka literal nga man-ug, padayon niya nga ginatago ang iya identidad. Nagagamit sang kalingawan, media, kag iban pa nga mga paagi, ginapatalang ni Satanas ang mga tawo sa pagpati nga indi nila kinahanglan ukon wala sila sing mabenepisyo sa mahigugmaon nga pagtuytoy sang Dios. Ang padayon nga mga panikasog sang Yawa sa pagpangdaya nagresulta nga ang mga tawo bisan diin may yara rebelyuso nga espiritu batok sa mga kasuguan kag mga prinsipio sang Biblia. Ginatawag ini sang Biblia nga “espiritu sang kalibutan.” (1 Corinto 2:12) Ini nga espiritu nagaimpluwensia sing mabaskog sa mga pagpati, mga panimuot, kag pamatasan sadtong wala nakakilala sa Dios. Paano ginapadayag ini nga espiritu, kag paano naton mapamatukan ang makapalain nga impluwensia sini? Tan-awon naton.

Padayon nga Pagnubo sang mga Talaksan sa Moral

3. Ngaa labi nga napadayag “ang espiritu sang kalibutan” sa moderno nga mga tion?

³ “Ang espiritu sang kalibutan” labi na nga ginapadayag sa sining moderno nga mga tion. (2 Timoteo 3:​1-5) Mahimo natalupangdan mo nga  padayon nga naganubo ang mga talaksan sa moral. Ginapaathag sang Kasulatan kon ngaa amo sini ang nagakatabo. Pagkatukod sang Ginharian sang Dios sang tuig 1914, nag-inaway sa langit. Nalutos si Satanas kag ang iya demonyo nga mga anghel kag gintagbong sila sa duta. Sa iya kaakig, ginpabaskog pa gid ni Satanas ang iya bug-os globo nga mga panikasog sa pagpangdaya. (Bugna 12:​1-9, 12, 17) Ginahimo niya ang iya bug-os nga masarangan “agod nga mapatalang, kon mahimo, bisan ang mga pinili.” (Mateo 24:24) Subong katawhan sang Dios, kita ang iya panguna nga puntariya. Ginatinguhaan niya nga laglagon ang aton espirituwalidad agod madula naton ang kahamuot ni Jehova kag ang paglaum nga kabuhi nga walay katapusan.

4. Paano ginatamod sang mga alagad ni Jehova ang Biblia, kag paano naman ini ginatamod sang kalibutan?

⁴ Ginatinguhaan ni Satanas nga pakalainon ang Biblia, ang hamili nga libro nga nagatudlo sa aton nahanungod sa aton mahigugmaon nga Manunuga. Ginahigugma kag ginapakabahandi sang mga alagad ni Jehova ang Biblia. Nahibaluan naton nga inspirado ini nga Pulong sang Dios, indi pulong sang mga tawo. (1 Tesalonica 2:​13; 2 Timoteo 3:16) Apang, luyag sang kalibutan ni Satanas nga tuhay ang aton hunahunaon. Halimbawa, siling sa introduksion sang isa ka libro nga nagamulay sa Biblia: “Wala gid sing ‘balaan’ sa Biblia, ukon nga ini ‘pulong sang Dios.’ Wala ini ginsulat sang inspirado sang Dios nga mga santos, kundi sang gutom sa gahom nga mga saserdote.” Ang magapati sa sini nga mga pangangkon madali mabiktima sang sayop nga ideya nga puede nila masimba ang Dios sa bisan ano nga paagi nga luyag nila​​—⁠ukon nga indi na gid magsimba sa iya.​​—⁠Hulubaton 14:12.

5. (a) Ano ang ginsiling sang isa ka awtor tuhoy sa mga relihion nga naangot sa Biblia? (b) Ano ang kinatuhayan sang pila sang kinaandan nga pagtamod sang kalibutan sa kon ano ang ginasiling sang Biblia? (Ilakip ang kahon sa masunod nga pahina.)

⁵ Ang direkta kag indi direkta nga mga pag-atake sa Biblia, kag ang relihioso nga pagkasalimpapaw sang mga nagapangangkon nga nagasakdag sini, nagresulta sa dugang nga pagpamatok sa relihion, lakip na sa relihion nga naangot sa Biblia. Ang relihion ginamulay sa mga balita sa media kag sang mga edukado nga mga tawo. Ang isa ka awtor nagsiling: “Ang pagtamod sa Judaismo kag Cristianismo nga nagaimpluwensia sa popular nga kultura indi maayo. Bisan pa kon tan-awon gikan sa pinakamaayo nga punto-de-vista makabig sila nga karaan na; kon tan-awon sila gikan sa pinakakubos nga punto-de-vista, makabig ang ila mga pagtamod subong sinadto na katama amo nga nagaupang ini sa pagkahamtong kag nagasablag sa pag-uswag sang siensia. Sining karon lang nga mga tinuig ining paghikay nangin mabaskog nga pagtamay kag nangin dayag nga pagpamatok.” Ini nga pagpamatok masami nga nagahalin sa mga wala nagapati nga nagaluntad ang Dios kag nangin “walay pulos sa ila mga hunahuna.”​​—⁠Roma 1:​20-​22.

6. Ano ang pagtamod sang kalibutan sa seksuwal nga mga buhat nga ginapakamalaut sang Dios?

⁶ Indi katingalahan, nian, nga ang mga tawo labi nga nagapahilayo gikan sa mga talaksan sang Dios sa paggawi. Halimbawa, ginalaragway sang Biblia ang homoseksuwal nga mga relasyon subong “makahuluya.” (Roma 1:​26, 27) Nagasiling man ini nga ang mga makihilawason kag mga makihilahion indi makapanubli sang Ginharian sang Dios. (1 Corinto 6:9) Apang, sa madamo nga kadutaan wala lamang ginabaton ining seksuwal nga mga buhat kundi ginakabig ini subong makagalanyat nga buhat sa mga libro, mga magasin, mga ambahanon, mga pelikula,  kag mga palaguaon sa TV. Ang mga nagapamatok sa sini nga mga buhat ginatamod subong makitid sing panghunahuna, mahinukmanon, kag wala nagadungan sa moderno nga nasanagan nga panghunahuna. Sa baylo nga tamdon ang mga talaksan sang Dios subong pagpabutyag sang mahigugmaon nga pag-ulikid, ginatamod ini sang kalibutan subong mga upang sa personal nga kahilwayan kag kaayawan.​​—⁠Hulubaton 17:15; Judas 4.

7. Anong mga pamangkot ang dapat naton ipamangkot sa aton kaugalingon?

⁷ Bangod yara kita sa kalibutan nga labi nga nagabaskog sa pagpamatok sini sa Dios, maalamon nga tan-awon naton ang aton panimuot kag mga paggawi. Sa pulupanag-on, dapat naton usisaon sing mapangamuyuon kag sing bunayag ang aton kaugalingon agod mapat-od nga wala kita amat-amat nga nagapalayo sa panghunahuna kag mga talaksan ni Jehova. Halimbawa, mahimo naton pamangkuton ang aton kaugalingon: ‘Nawili na bala ako sa mga butang nga ginalikawan ko sang una? Nangin matinuguton na bala ako sa mga buhat nga ginapakamalaut sang Dios? Nahuyog na bala ako nga tamdon ang espirituwal nga mga butang sing indi tanto ka serioso sangsa ginahimo ko sang una? Ang akon bala paagi sang pagkabuhi nagapakita nga ginauna ko ang mga intereses sang Ginharian sa akon kabuhi?’ (Mateo 6:33) Ini nga mga pagbinagbinag makabulig sa aton nga mapamatukan ang espiritu sang kalibutan.

‘Indi Magpaanod Palayo’

8. Paano ang isa magpaanod palayo kay Jehova?

⁸ Si apostol Pablo nagsulat sa mga masigka-Cristiano: “Amo kon ngaa kinahanglan naton hatagan sing labi pa sangsa kinaandan nga igtalupangod ang mga butang nga nabatian naton, agod indi kita maanod palayo.” (Hebreo 2:​1, NW) Kon ang isa ka barko nagapaanod lamang, indi ini makalab-ot sa iya kaladtuan. Kon indi talupangdon sang kapitan ang direksion sang hangin kag ang sulog sang tubig, ang iya barko mahimo maglampas sa pantalan kag magsayad sa batuhon nga baybayon. Sing kaanggid, kon indi naton talupangdon ang hamili nga mga kamatuoran sang Pulong sang Dios, madali kita maanod palayo kay Jehova kag magaagom sing espirituwal nga kalaglagan. Ang espirituwal nga kalaglagan wala nagakahulugan sing bug-os nga pagsikway sa kamatuoran. Sa katunayan, diutay lang ang nagasikway kay Jehova sing hinali kag sing hungod. Sa masami, amat-amat sila anay nga nadalahig sa isa ka butang nga nagatublag sa ila sa pagtalupangod sa Pulong sang Dios. Halos indi nila matalupangdan nga nadaldal na gali sila sa pagpakasala. Kaangay sang isa ka kapitan nga nagakatulog, ini nga mga indibiduwal wala nagamata tubtob ulihi na ang tanan.

9. Sa anong mga paagi ginpakamaayo ni Jehova si Solomon?

⁹ Binagbinaga ang kabuhi ni Solomon. Ginsaligan sia ni Jehova nga mangin hari sang Israel. Gintugutan sang Dios si Solomon sa pagtukod sang templo kag gintuytuyan sia sa pagsulat sang pila ka bahin sang Biblia. Nakigsugilanon si Jehova sa iya sa duha ka okasyon kag ginhatagan sia sing manggad, dungog, kag mahidaiton nga paggahom. Labaw sa tanan, ginpakamaayo ni Jehova si Solomon sing daku nga kaalam. Ang Biblia nagsiling: “Kag ang Dios padayon nga naghatag kay Solomon sing daku gid nga kaalam kag paghangop kag pagkadaku sing tagipusuon, kaangay sang balas sa baybayon. Kag ang kaalam ni Solomon mas daku pa sang sa kaalam sang tanan nga taga-Sidlangan kag sa tanan nga kaalam sang Egipto.” (1 Hari 4:​21, 29, 30; 11:​9, NW) Sing pat-od, mahimo hunahunaon sang isa, kon may isa nga magapabilin nga matutom sa Dios,  sigurado si Solomon gid. Apang, si Solomon nahulog sa apostasya. Paano ina natabo?

10. Anong instruksion ang wala gintuman ni Solomon, kag ano ang nangin resulta?

¹⁰ Nahibaluan sing bug-os kag nahangpan ni Solomon ang Kasuguan sang Dios. Walay duhaduha nga ginhatagan niya sing labi nga igtalupangod ang mga instruksion nga ginhatag para sa mga mangin hari sa Israel. Isa sa sadtong mga instruksion nagasiling: “Dili [ang hari] magpadamo nga sa iya sing mga asawa, agod nga indi magahilayo ang iya tagipusuon.” (Deuteronomio 17:​14, 17, NW) Walay sapayan sinang maathag nga instruksion, si Solomon nagtigayon sing pito ka gatos ka asawa kag tatlo ka gatos ka babayi. Madamo sa sining mga babayi ang nagsimba sa pagano nga mga dios. Wala naton mahibaluan kon ngaa nagtigayon si Solomon sing tuman kadamo nga asawa, ukon kon paano niya ginpakamatarong ang paghimo sini. Apang nahibaluan naton nga wala niya gintuman ang maathag nga instruksion sang Dios. Ang resulta amo gid ang ginpaandam ni Jehova. Aton mabasa: “Ang mga asawa ni [Solomon] amat-amat . . . nga nagpatalang sang iya tagipusuon sa pagsunod sa iban nga mga dios.” (1 Hari 11:​3, 4, NW) Sing “amat-amat”​​—⁠apang sing pat-od​​—⁠ang iya diosnon nga kaalam nadula. Nagpaanod sia. Sang ulihi, ginbuslan sang handum ni Solomon nga pahamut-an ang iya pagano nga mga asawa ang iya handum nga tumanon kag pahamut-an ang Dios. Makapasubo gid, kay si Solomon amo anay ang nagsulat sang mga pulong: “Magmaalam ka, anak ko, kag pahalipaya ang akon tagipusuon, agod nga masabat ko sia nga nagayaguta sa akon”!​​—⁠Hulubaton 27:​11, NW.

Gamhanan ang Espiritu sang Kalibutan

11. Paano ang ginapasulod naton sa aton hunahuna nagaapektar sa aton panghunahuna?

¹¹ Ang halimbawa ni Solomon nagatudlo sa aton nga makatalagam ang mangatarungan nga bangod nahibaluan na naton ang kamatuoran, ang kalibutanon nga mga impluwensia indi na magaapektar sa aton panghunahuna. Subong nga ang pisikal nga pagkaon nagaapektar sa aton lawas, ang ginapasulod naton sa aton hunahuna kaangay sang pagkaon nagaapektar man sa aton hunahuna. Kon ano ang ginapasulod naton sa aton hunahuna nagaimpluwensia sa aton panghunahuna kag panimuot. Nakahibalo sa sini ang mga korporasyon amo nga nagagasto sila sing bilyones dolyares kada tuig agod ipasayod ang ila mga produkto. Ang epektibo nga mga pasayod amo ang mga pasayod nga nagagamit sing makagalanyat nga mga pulong kag mga laragway agod pukawon ang handum kag luyag sang mga manugbakal. Ang mga manugpasayod nakahibalo man nga ang paglantaw sa pasayod sing makaisa ukon makaduha lamang indi makahaylo sa tawo nga magbakal gilayon sang produkto. Apang, sa pagligad sang tion, ang sulitsulit nga paglantaw masami nga nagaresulta nga pabaloran sang mga manugbakal ang isa ka produkto. Epektibo gid ang pasayod​​—⁠kay kon indi wala sing mamuhunan sa sini. Mabaskog ini nga nagaimpluwensia sa panghunahuna kag mga panimuot sang publiko.

12. (a) Paano ginaimpluwensiahan ni Satanas ang panghunahuna sang mga tawo? (b) Ano ang nagapakita nga ang mga Cristiano sarang maimpluwensiahan?

¹² Kaangay sang isa ka manugpasayod, ginapasanyog ni Satanas ang iya mga ideya paagi sa paghimo sini nga makagalanyat, nakahibalo nga sa pagligad sang tion mabuyok niya ang mga tawo sa iya panghunahuna. Paagi sa kalingawan kag sa iban pa nga mga paagi, ginapatalang ni Satanas ang mga tawo sa pagpati nga ang maayo malaut kag ang malaut maayo. (Isaias 5:20) Bisan gani ang matuod nga mga Cristiano nangin biktima sang padayon  nga panikasog ni Satanas nga pasanyugon ang sayop nga impormasyon. Ang Biblia nagapaandam: “Ang inspirado nga pinamulong nagasiling sing pat-od nga sa ulihi nga mga hut-ong sang tion ang iban magatalikod sa pagtuo, nga nagahatag sing igtalupangod sa nagapatalang nga inspirado nga mga pinamulong kag mga panudlo sang mga demonyo, paagi sa pagkasalimpapaw sang mga tawong butigon namarkahan ang ila konsiensia subong sang salsalon nga inugmarka.”​—⁠1 Timoteo 4:​1,  2, NW; Jeremias 6:⁠15.

13. Ano ang malain nga kaupdanan, kag paano nagaapektar sa aton ang aton pagpakig-upod?

¹³ Tanan kita mahimo maapektuhan sang espiritu sang kalibutan. Ang mga hangin kag mga sulog sang sistema ni Satanas tuman ka baskog. Ang Biblia maalamon nga nagalaygay sa aton: “Indi kamo magtalang. Ang malain nga kaupdanan nagadunot sang mapuslanon nga mga batasan.” (1 Corinto 15:​33, NW) Ang malain nga kaupdanan mahimo nga maglakip sang bisan ano ukon bisan sin-o​​—⁠bisan sa sulod sang kongregasyon​​—⁠nga nagapadayag sang espiritu sang kalibutan. Kon mangatarungan kita nga ang malain nga kaupdanan indi makahalit sa aton, buot bala silingon nga ang maayo nga kaupdanan indi man makabulig sa aton? Daku gid ina nga sayop! Maathag katama ang ginsiling sang Biblia: “Sia nga nagalakat upod sa maalam nga mga tawo magaalam, apang sia nga nagapakig-angot sa mga buangbuang magaantos.”​​—⁠Hulubaton 13:​20, NW.

14. Sa anong mga paagi naton mapamatukan ang espiritu sang kalibutan?

¹⁴ Agod mapamatukan ang espiritu sang kalibutan, dapat kita makig-upod sa maalam nga mga tawo​—⁠sa mga nagaalagad kay Jehova. Dapat naton pun-on ang aton hunahuna sing mga butang nga magapabakod sang aton pagtuo. Si apostol Pablo nagsulat: “Ang bisan ano man nga butang nga matuod, bisan ano man nga butang nga serioso nga hunahunaon, bisan ano man nga butang nga matarong, bisan ano man nga butang nga putli, bisan ano man nga butang nga hiligugmaon, bisan ano man nga butang nga ginahambal nga maayo, bisan ano man nga halangdon kag bisan ano man nga dalayawon, padayon nga binagbinaga ini nga mga butang.” (Filipos 4:​8, NW) Subong mga persona nga gintuga nga may ikasarang sa pagpili sing husto kag sayop, makapili kita sing mga butang nga aton binagbinagon. Kabay nga pilion naton pirme ang mga butang nga magapasuod sa aton kay Jehova.

Mas Gamhanan ang Espiritu sang Dios

15. Ano ang kinatuhayan sang mga Cristiano sa dumaan nga Corinto sa iban nga mga pumuluyo sinang siudad?

¹⁵ Indi kaangay sang mga ginapatalang sang espiritu sang kalibutan, ang matuod nga mga Cristiano ginatuytuyan sang balaan nga espiritu sang Dios. Ginsulatan ni Pablo ang kongregasyon sang Corinto sadto: “Nabaton naton, indi ang espiritu sang kalibutan, kundi ang espiritu nga gikan sa Dios, agod mahangpan naton ang mga butang nga mainayuhon nga ginhatag sa aton sang Dios.” (1 Corinto 2:​12, NW) Ang dumaan nga Corinto isa ka siudad nga bug-os nga napalibutan sang espiritu sang kalibutan. Tuman ka mapinatuyangon ang mga pumuluyo sini amo nga ang ekspresyon sa Ingles nga “to Corinthianize” nagakahulugan sing “paghimo sang imoralidad.” Ginabulag ni Satanas ang hunahuna sang mga tawo. Gani, diutay lamang ukon wala gid sila sing nahangpan nahanungod sa matuod nga Dios. (2 Corinto 4:4) Apang, paagi sa iya balaan nga espiritu, ginbuksan ni Jehova ang mga mata sang pila sang mga taga-Corinto nga nagpaposible sa ila nga matigayon ang ihibalo sang kamatuoran. Ang iya espiritu nagpahulag kag nagtuytoy sa ila agod maghimo sing dalagku nga mga pagbag-o sa ila kabuhi agod mabaton nila ang iya kahamuot kag pagpakamaayo. (1 Corinto 6:​9-​11) Bisan pa gamhanan ang espiritu sang kalibutan, mas gamhanan ang espiritu ni Jehova.

16. Paano naton mabaton kag mahuptan ang espiritu sang Dios?

¹⁶ Amo man sa karon. Ang balaan nga espiritu ni Jehova amo ang labing gamhanan nga puersa sa uniberso, kag ginahatag niya ini sing hilway kag sing bugana sa tanan nga nagapangayo sini nga may pagtuo. (Lucas 11:13) Apang, agod mabaton ang  espiritu sang Dios, indi lamang naton pamatukan ang espiritu sang kalibutan. Dapat man naton tayuyon nga tun-an kag iaplikar ang Pulong sang Dios sa aton kabuhi agod nga ang aton espiritu​​—⁠ang aton panimuot​​—⁠maghisanto sa iya panghunahuna. Kon himuon naton ini, pabakuron kita ni Jehova agod mabatuan naton ang bisan ano nga taktika nga mahimo gamiton ni Satanas sa paglaglag sang aton espirituwalidad.

17. Sa anong mga paagi makapalig-on sa aton ang eksperiensia ni Lot?

¹⁷ Bisan pa ang mga Cristiano indi bahin sang kalibutan, yara sila sa kalibutan. (Juan 17:​11, 16) Wala sing isa sa aton nga bug-os nga makalikaw sa espiritu sang kalibutan, kay mahimo nga nagatrabaho kita ukon nagapuyo pa gani upod sa mga wala nagahigugma sa Dios ukon sa iya mga dalanon. Nagabatyag bala kita kaangay ni Lot, nga “natublag sing daku,” nag-antos pa gani, bangod sang malinapason nga paggawi sang mga tawo sang Sodoma, nga iya ginapuy-an sadto? (2 Pedro 2:​7, 8, NW) Kon amo, magpakalig-on kita. Gin-amligan kag ginluwas ni Jehova si Lot, kag amo man ang himuon niya sa aton. Nakita kag nahibaluan sang aton mahigugmaon nga Amay ang aton mga kahimtangan, kag sarang niya mahatag sa aton ang bulig kag ang kusog nga kinahanglan naton agod nga mahuptan naton ang aton espirituwalidad. (Salmo 33:​18, 19) Kon magsandig kita sa iya, magsalig sa iya, kag magtawag sa iya, buligan niya kita agod mapamatukan naton ang espiritu sang kalibutan, bisan daw ano man kabudlay ang aton kahimtangan.​​—⁠Isaias 41:10.

18. Ngaa dapat naton tipigan ang aton kaangtanan kay Jehova?

¹⁸ Sa kalibutan nga nahamulag sa Dios kag ginpatalang ni Satanas, kita subong katawhan ni Jehova ginpakamaayo sing ihibalo sang kamatuoran. Busa, may kalipay kag paghidait kita nga wala sa kalibutan. (Isaias 57:​20, 21; Galacia 5:22) Ginapakabahandi naton ang makalilipay nga paglaum nga mabuhi sing walay katapusan sa Paraiso, diin ang espiritu sining nagatagumatayon nga kalibutan wala na. Busa, kabay nga tipigan naton ang aton hamili nga kaangtanan sa Dios kag tadlungon gilayon ang bisan ano nga huyog nga magpaanod sa espirituwal. Magpalapit pa gid kita kay Jehova, sa amo buligan niya kita agod mapamatukan naton ang espiritu sang kalibutan.​​—⁠Santiago 4:​7, 8.

Mapaathag Mo Bala?

• Sa anong mga paagi ginadaya kag ginapatalang ni Satanas ang mga tawo?

• Paano naton malikawan nga maanod palayo kay Jehova?

• Ano ang mga ebidensia nga ang espiritu sang kalibutan gamhanan?

• Paano naton mabaton kag mahuptan ang espiritu nga gikan sa Dios?

[Mga Pamangkot sa Pagtinuon]

[Tsart sa pahina 11]

KALIBUTANON NGA KAALAM KONTRA SA DIOSNON NGA KAALAM

Ang kamatuoran relatibo​​—⁠ang mga tawo amo ang nagahimo sang ila kaugalingon nga kamatuoran.

‘Ang pulong sang Dios kamatuoran.’​​—⁠Juan 17:17.

Agod mahibaluan ang husto sa sayop, magsalig sa imo balatyagon.

“Ang tagipusuon malimbungon labaw sa tanan nga butang kag makatalagam.”​​—⁠Jeremias 17:​9, NW.

Himua ang luyag mo.

“Wala sa tawo nga nagalakat bisan ang pagtuytoy sa iya tikang.—⁠Jeremias 10:​23, NW.

Ang manggad amo ang yabi sa kalipay.

“Ang gugma sa kuarta amo ang gamot sang tanan makahalalit nga mga butang.”​​—⁠1 Timoteo 6:​10, NW.

[Retrato sa pahina 10]

Si Solomon nadaldal palayo sa matuod nga pagsimba kag nagliso sa butig nga mga dios

[Retrato sa pahina 12]

Kaangay sang isa ka manugpasayod, ginapasanyog ni Satanas ang espiritu sang kalibutan. Ginapamatukan mo bala ini?