Ginahimo Bala ang Kabubut-on sang Dios?

“Paghimuon ang imo kabubut-on, sa duta subong sang sa langit.”​—⁠Mateo 6:10.

NAGATULOK sa kakugmat si Julio kag si Christina samtang apat sa ila kabataan ang napatay sa sunog. Nabungguan sang isa ka hubog nga drayber ang ila nagapundo nga salakyan, kag naglupok ini kag nagkalayo. Naluwas ang ila ikalima nga bata nga si Marcos, apang nasunog ang iya lawas kag nahalitan ini sing permanente. Nuebe anyos sia. Tuman gid ang kasubo sang iya amay. Ginlugpayan niya ang iya kaugalingon kag ang iya pamilya sa pagsiling: “Pagbuot ini sang Dios, dapat naton ini mahangpan, maayo man ini, malain, ukon ano man.”

Kon mahanabo ang kaanggid nga trahedya, pareho man ang reaksion sang madamo. ‘Kon ang Dios labing gamhanan kag nagaulikid sa aton,’ siling nila, ‘para siguro sa aton kaayuhan ang natabo, bisan pa nga daw kabudlay gid sini hangpon.’ Ugyon ka bala sa sini?

Ang pagpati nga pagbuot sang Dios kon ano man ang matabo, maayo man ini ukon malain, masami ginapasad sa mga pulong ni Jesus sa ginatawag nga Pangamuyo sang Ginuo, nga ginkutlo kaina. Indi bala nga kabubut-on sang Dios ang ginahimo sa langit? Sa pagpangamuyo nga ‘Himuon ang imo kabubut-on sa duta,’ wala bala kita nagaugyon nga pagbuot sang Dios ang nagakatabo sa duta?

Madamo ang wala nagaugyon sa sini nga pagpati. Para sa ila, ginapakita sini nga indi sensitibo ang Dios sa ginabatyag sang mga tawo nga iya gintuga. ‘Paano nga luyag sang isa ka mahigugmaon nga Dios nga matabo ang makakulugmat nga butang sa inosente nga mga tawo?’ pamangkot nila. ‘Kon may luyag sia itudlo sa aton, ano ayhan ini nga leksion?’ Mahimo nga amo man sini ang ginabatyag mo.

Tuhoy sa sini, ang utod ni Jesus sa iloy, nga si disipulo Santiago, nagsulat: “Walay tawo nga sang ginasulay sia magsiling, ‘Ginasulay ako sang Dios’; kay ang Dios indi masulay sang malaut kag sia gid wala nagasulay sa bisan kay sin-o nga tawo.” (Santiago 1:13) Indi sa Dios naghalin ang malain. Gani, maathag nga indi tanan nga nagakatabo sa duta karon kabubut-on sang Dios. Ginasambit man sa Kasulatan ang kabubut-on sang tawo, ang kabubut-on sang mga pungsod, kag bisan pa gani ang kabubut-on sang Yawa. (Juan 1:13; 2 Timoteo 2:26; 1 Pedro 4:3) Nagaugyon ka bala nga ang natabo sa pamilya nanday Julio kag Christina indi kabubut-on sang isa ka mahigugmaon nga langitnon nga Amay?

Kon amo, ano ang buot silingon ni Jesus sang gintudluan niya ang iya mga disipulo nga ipangamuyo: ‘Himuon ang imo kabubut-on’? Isa lamang bala ini ka pangabay sa Dios nga magpasilabot sa pila ka kahimtangan, ukon gintudluan bala kita ni Jesus nga ipangamuyo ang isa ka mas importante nga butang, isa ka pagbag-o nga malauman sang tanan? Usisaon pa naton ang ginasiling sang Biblia.

[Credit Lines sang retrato sa pahina 3]

Car: Dominique Faget-STF/AFP/Getty Images; child: FAO photo/B. Imevbore