Madumduman Mo Bala?

Nalipay ka bala sa pagbasa sa ulihi nga mga gua sang Ang Lalantawan? Bueno, tilawi kon masabat mo ang masunod nga mga pamangkot:

• Paano naton mahibaluan nga si Jesus may mga utod nga lalaki kag babayi?

Amo ini ang ginasiling sang Biblia sa Mateo 13:​55, 56 kag Marcos 6:3. Ang Griegong tinaga (adelphos) nga mabasa sa sining mga bersikulo gingamit sa pagpatuhoy “sa pisikal ukon legal nga kaangtanan [kag] nagakahulugan lamang sing mag-utod sa duha ukon isa lamang ka ginikanan.” (The Catholic Biblical Quarterly, Enero 1992)​​—⁠12/15, pahina 3.

• Anong bag-o nga sahi sang inaway ang makita karon, kag ano masami ang mga kabangdanan?

Sining karon lang nga mga tinuig ang mga inaway nga nagasalot sa katawhan masami nga mga inaway sibil​—⁠inaway sa ulot sang nagasumpunganay nga grupo sang mga banwahanon sang isa ka pungsod. Ang kaugot sa iban nga rasa kag tribo, kinatuhayan sa relihion, inhustisya, kag kinagubot sa politika amo masami ang kabangdanan. Ang isa pa ka kabangdanan amo ang kakagod sa gahom kag kuarta.​​—⁠1/1, pahina 3-4.

• Paano naton mahibaluan nga wala gintuyo ni Jesus nga dapat sauluhon sang mga Cristiano ang mga tinaga sang modelo nga pangamuyo?

Ginhatag ni Jesus ining halimbawa nga pangamuyo sa iya Sermon sa Bukid. Mga 18 ka bulan pagkatapos sini, ginsulit niya ang panguna nga mga ideya sang iya nahauna nga instruksion tuhoy sa pangamuyo. (Mateo 6:​9-​13; Lucas 11:​1-4) Talalupangdon nga wala niya ini ginsulit sing tinaga por tinaga, nga nagapakita nga wala sia naghatag sing liturhiko nga pangamuyo nga dapat sauluhon.​​—⁠2/1, pahina 8.

• Pagkatapos sang Anaw, diin nakakita ang pating sing dahon sang olibo nga gindala sini sa arka?

Indi naton mahibaluan kon daw ano kaparat ukon kainit ang tubig sang anaw. Apang ang mga kahoy nga olibo kilala nga nagapanalingsing liwat bisan pa utdon ini. Mahimo nga ang pila sini nakalampuwas sa anaw kag nagpanalingsing pagkatapos sang Anaw.​​—⁠2/15, pahina 31.

• Sa tion sang inaway sibil sa Nigeria nga ginlikupan ang Biafra, paano nakabaton sing espirituwal nga pagkaon ang mga Saksi ni Jehova sa sinang duog?

Isa ka alagad sibil ang gintangdo sa isa ka opisina sa Europa kag isa pa ang nagtrabaho sa hulugpaan sang eroplano sang Biafra. Mga Saksi sila nga duha. Ginbaton nila ang delikado nga hilikuton sa pagpasulod sing espirituwal nga pagkaon sa Biafra, busa nakabenepisyo ang madamong kauturan tubtob sang matapos ang inaway sang 1970.​​—⁠3/1, pahina 27.

• Ano ang nahimo sang Paghidait sa Westphalia, kag paano nadalahig ang relihion?

Gintunga sang Repormasyon ang Balaan nga Emperyo sang Roma sa tatlo ka relihion​—⁠Katoliko, Luterano, kag Calvinista. Ang Protestante nga Unyon kag ang Katoliko nga Liga gin-organisar sang temprano nga bahin sang ika-17 nga siglo. Nian isa ka relihioso nga inaway ang nagdabdab sa Bohemia kag nangin isa ka internasyonal nga pagsumpunganay sing gahom. Ang Katoliko kag Protestante nga mga manuggahom naggamit sing kusog ukon taktika agod maghari sa politika kag sa komersio. Sang ulihi, ginhiwat ang paghambalanay para sa paghidait sa probinsia sang Westphalia sa Alemanya. Paglipas sang halos lima ka tuig, ang Tratado sang Westphalia ginpirmahan sang 1648, nga nagtapos sang Katluan ka Tuig nga Inaway kag ang moderno nga Europa nagsugod man nga mangin isa ka kontinente sang soberano nga mga estado.​​—⁠3/15, pahina 20-3.

• Ano ang kahulugan sang marka, ukon ngalan, sang “sapat nga mapintas”​​—⁠ang numero nga 666?

Ining marka ginasambit sa Bugna 13:16-18. Ang sapat nagapatuhoy sa tawhanon nga paggahom, kag ang “numero sang tawo” sa sapat nagapakita nga ang mga gobierno nagapadayag sang di-himpit nga kahimtangan sang tawo. Ang 6 dugangan sing 60 dugangan sing 600 nagapakita nga nagkulang ini sa panulok sang Dios. Ang mga may marka sini nagahatag sing masimbahon nga pagpadungog sa politikal nga mga Estado, ukon nagadangop sila sa sini para sa kaluwasan.​​—⁠4/1, pahina 4-7.