Pagpakita sing Kaayo sa Isa ka Di-mainabyanon nga Kalibutan

“Ang halandumon nga butang sa isa ka dutan-on nga tawo amo ang iya mahigugmaon nga kaayo.”​—⁠HULUBATON 19:​22, NW.

1. Ngaa mabudlay magpakita sing kaayo?

GINAKABIG mo bala ang imo kaugalingon nga isa ka mainayuhon nga tawo? Kon amo, ang pagkabuhi sa kalibutan karon mahimo nga mabudlay. Matuod, ang kaayo ginapakilala sa Biblia subong bahin sang “bunga sang espiritu,” apang ngaa tuman kabudlay magpakita sing kaayo bisan sa ginatawag nga Cristianong kadutaan? (Galacia 5:22) Subong sang nakita naton sa nagligad nga artikulo, ang sabat makita sing bahin sa ginsulat ni apostol Juan​​—⁠ang bug-os nga kalibutan kontrolado sang di-mainayuhon nga espiritu nga persona, si Satanas nga Yawa. (1 Juan 5:19) Ginpakilala ni Jesucristo si Satanas subong “manuggahom sang kalibutan.” (Juan 14:30) Busa, ining kalibutan kaangay gid sa rebelde nga manuggahom sini, nga ang panimuot makilala paagi sa malain nga paggawi.​—⁠Efeso 2:2.

2. Ano nga mga hangkat ang makaapektar sang pagpakita naton sing kaayo?

² Ang aton kabuhi naapektuhan gid kon ang iban nagapakig-angot sa aton sing di-mainayuhon. Mahimo ini ipakita sang akig nga mga kaingod, di-mainabyanon nga mga estranghero, bisan sang mga abyan kag mga katapo sang pamilya nga ayhan, kon kaisa, nagapanghikot sing di-mapinatugsilingon. Ang pag-ipit nga makaupod ang mga tawo nga di-mainayuhon kag nagasinggit kag nagabuyayaw sa isa kag isa masami nga ginabangdan sang daku nga kabalaka. Bangod di-mainayuhon ang iban, mahimo nga mangin di-mainabyanon man kita, kag mahimo  naton balusan ang di-pagkamainayuhon sing di-pagkamainayuhon. Ini nga panimuot mahimo pa gani magdul-ong sa mga problema sa espirituwal ukon pisikal nga kapagros.​—⁠Roma 12:17.

3. Anong mabudlay nga mga problema ang ginaatubang sang mga tawo nga nagatilaw sang ila kahanda nga mangin mainayuhon?

³ Mahimo mabudlayan man kita sa pagpakita sing kaayo bangod sang mahuol nga mga kahimtangan sa kalibutan. Halimbawa, ang katawhan sa kabilugan nagabatyag sing kahuol bangod sang mga pamahog kag mga buhat sang terorismo, subong man sang posible nga paggamit sing biolohiko ukon nuklear nga mga hinganiban sang nagkalainlain nga mga pungsod. Dugang pa, minilyon ka tawo ang imol kag hawothawot sing pagkaon, pasilungan, panapton, kag pagpabulong. Ang pagpakita sing kaayo mangin isa ka hangkat kon ang kahimtangan daw indi na magbag-o.​—⁠Manugwali 7:7.

4. Ano ang sayop nga mahinakop sang iban kon nagahunahuna tuhoy sa pagpakita sing kaayo sa iban?

⁴ Ang isa ka tawo madali maghinakop nga ang pagpakita sing kaayo indi gid ang prioridad kag mahimo mangin tanda pa gani sang kaluyahon. Magabatyag sia nga ginahingalitan, ilabi na kon ang iban wala sing pasunaid sa iya balatyagon. (Salmo 73:2-9) Apang, ang Biblia nagahatag sing nagakaigo nga panuytoy para sa aton sang nagsiling ini: “Ang mahumok nga panalabton nagapalugpay sang kasingkal, apang ang matigdas nga pulong nagapaibwal sang kaakig.” (Hulubaton 15:1) Ang kalulo kag kaayo duha ka aspekto sang bunga sang espiritu nga naangot sing suod kag epektibo ini kon nagasumalang sing mabudlay kag makahalangkat nga mga kahimtangan.

5. Ano ang pila ka patag sang kabuhi diin kinahanglan ang kaayo?

⁵ Sanglit ang pagpakita sang bunga sang balaan nga espiritu importante gid sa aton subong mga Cristiano, dapat naton binagbinagon kon paano naton mapakita ang isa sa sining mga kinaiya​—⁠kaayo. Posible bala magpakita sing kaayo sa isa ka di-mainabyanon nga kalibutan? Kon amo, ano ang pila ka patag nga mahimo naton mapakita nga wala naton ginatugutan ang impluwensia ni Satanas sa pagpugong sang aton kaayo, ilabi na sa mahuol nga mga kahimtangan? Binagbinagon naton ang pagpakita sing kaayo sa pamilya, sa trabaho, sa eskwelahan, sa aton mga kaingod, sa aton ministeryo, kag sa tunga sang mga masigkatumuluo.

Kaayo sa Sulod sang Pamilya

6. Ngaa ang kaayo sa sulod sang pamilya importante gid, kag paano ini mapakita?

⁶ Agod matigayon ang pagpakamaayo kag panuytoy ni Jehova, ang bunga sang espiritu kinahanglanon kag dapat palambuon sing bug-os. (Efeso 4:32) Binagbinagon naton ang kinahanglanon nga ang mga katapo sang pamilya dapat magpakita sing kaayo sa isa kag isa. Sa adlaw-adlaw nga mga pagpakig-angot, ang bana kag asawa dapat magpakita sing mainayuhon kag mainulikdon nga espiritu sa isa kag isa kag sa ila mga anak. (Efeso 5:28-33; 6:​1, 2) Ini nga kaayo dapat makita sa kon paano nagahambalanay ang mga katapo sang pamilya, ang mga kabataan nagapadungog kag nagatahod sa ila mga ginikanan kag ang mga ginikanan nagapakig-angot sing nagakaigo  sa ila mga kabataan. Mangin maabtik sa paghatag sing komendasyon kag mahinay sa pagpakamalaut.

7, 8. (a) Ano nga sahi sang paggawi ang dapat naton likawan agod mapakita naton ang matuod nga kaayo sa pamilya? (b) Paano ang maayo nga komunikasyon nagaamot sa isa ka mabakod nga kaangtanan sa pamilya? (c) Paano mo mapakita ang kaayo sa imo pamilya?

⁷ Ang kaayo sa aton pamilya nagadalahig sang pagsunod sa laygay ni apostol Pablo: “Panghuklas kamo sini tanan: kaakig, kasingkal, malain nga hunahuna, pasipala, kag malaw-ay nga pululungon sang inyo baba.” Ang Cristianong mga pamilya dapat magkomunikar sa isa kag isa sing matinahuron kada adlaw. Ngaa? Bangod ang maayo nga komunikasyon amo ang kinahanglanon nga ingrediente sang mabakod kag mapagros nga mga pamilya. Agod mapahaganhagan ang binangig kon mag-utwas ang mga di-paghangpanay, tinguhai nga lubaron ang problema sa baylo nga daugon ang argumento. Ang malipayon nga mga katapo sang pamilya nagapanikasog gid nga mapalambo ang kaayo kag ang pasunaid sa isa kag isa.​—⁠Colosas 3:​8, 12-14.

⁸ Ang kaayo positibo kag nagapahulag sa aton sa paghimo sing maayo sa iban. Gani, ginatinguhaan naton nga mangin mapuslanon, mapatugsilingon, kag mabuligon sa kalahamut-an nga paagi sa iban nga mga katapo sang pamilya. Kinahanglan ang indibiduwal kag tingob nga panikasog agod mapakita ang sahi sang kaayo nga nagapabanaag sing maayo sa pamilya. Subong resulta, indi lamang nga matigayon nila ang pagpakamaayo sang Dios kundi, sa kongregasyon kag sa komunidad, mapadunggan nila ang Dios sang kaayo nga si Jehova.​—⁠1 Pedro 2:12.

Kaayo sa Trabaho

9, 10. Ilaragway ang pila ka problema nga mahimo mag-utwas sa trabaho, kag komentuhi kon paano ini atubangon sing mainayuhon.

⁹ Para sa isa ka Cristiano, ang adlaw-adlaw nga rutina sang pagpamugon mahimo mangin isa ka hangkat sa pagpakita sing kaayo sa mga katrabaho. Ang pagpaindisanay sa tunga sang mga empleyado mahimo magdul-ong sa pagpahalin sa trabaho sa isa nga malimbungon ukon malalangon nga ginpakalain sang iya katrabaho sa ila amo. (Manugwali 4:4) Indi mahapos nga magpakita sing kaayo sa sini nga mga tion. Walay sapayan sini, ang pagdumdom nga ang kaayo amo sa masami ang nagakaigo nga butang nga himuon, ang isa ka alagad ni Jehova dapat manikasog gid nga daugon ang mga mabudlay pakigbagayan. Ang pagpakita sing mainulikdon nga panimuot mahimo nga makabulig sa aton agod mahimo ini. Ayhan mapakita mo ang pag-ulikid kon ang katrabaho nagamasakit ukon may katapo sang iya pamilya nga nagamasakit. Bisan ang pagkamusta sa iya ukon sa iya pamilya may positibo nga epekto sa iya. Huo, dapat panikasugan sang mga Cristiano nga mapalambo ang paghiusa kag paghidait suno sa masarangan nila. Kon kaisa ang isa ka mainayuhon nga pulong nga nagapakita sing pag-ulikid kag kabalaka makabulig sa problema.

¹⁰ Sa iban nga mga okasyon, mahimo ipilit sang isa ka amo ang iya mga opinyon sa iya mga empleyado kag mahimo nga luyag niya nga makigbahin ang tanan sa pila ka nasyonalistiko nga okasyon ukon sa isa ka selebrasyon nga supak sa Kasulatan. Kon ang konsiensia sang isa  ka Cristiano wala nagatugot sa iya sa pagpakigbahin, mahimo ini magdul-ong sa pagpakigsugilanon niya sa iya amo. Sa sina nga higayon ayhan indi maalamon nga ipakita niya sing detalyado kon ngaa indi husto nga sundon niya ang luyag sang amo. Ti, para sa iban nga indi pareho sing pagtuluuhan sa isa ka Cristiano, ang pagpakigbahin sa selebrasyon daw amo ang husto nga himuon. (1 Pedro 2:21-23) Ayhan mainayuhon nga mapaathag mo ang imo mga rason kon ngaa indi ka makapakigbahin. Indi pagbalusi sing pagyubit ang pagyubit. Dapat sundon sang isa ka Cristiano ang maayo nga laygay sa Roma 12:18: “Kon mahimo, sa masarangan ninyo, magpakighidait sa tanan nga tawo.”

Kaayo sa Eskwelahan

11. Ano nga mga hangkat ang ginaatubang sang mga pamatan-on sa pagpakita sing kaayo sa mga kabutho?

¹¹ Isa gid ka hangkat para sa mga pamatan-on nga magpakita sing kaayo sa mga kabutho. Masami nga handum sang mga pamatan-on nga batunon sila sang mga kaklase. Ang iban nga mga pamatan-on nga lalaki nagapaisog-isog agod dayawon sila sang iban nga mga estudyante, kag ginasimusimo pa gani nila ang iban sa eskwelahan. (Mateo 20:25) Ang iban nga mga pamatan-on luyag nga mangibabaw sa kaalam, isport, kag sa iban pa nga mga aktibidades. Sa pagpadayawdayaw sang ila ikasarang, masami nga wala nila ginapakitaan sing kaayo ang ila mga kaklase kag ang iban nga mga estudyante, nagahunahuna sing sayop nga ini mismo nagapakita nga superyor sila. Ang isa ka pamatan-on nga Cristiano dapat mag-andam nga wala niya ginailog ini nga mga indibiduwal. (Mateo 20:​26, 27) Si apostol Pablo nagsiling nga “ang gugma mapinasensiahon kag mainayuhon” kag nga ang gugma ‘wala nagapahambog, wala nagapahabok.’ Gani, indi dapat sundon sang isa ka Cristiano ang malain nga halimbawa sang mga nagapanghikot sing di-mainayuhon, kundi sundon niya ang Makasulatanhon nga laygay sa pagpakig-angot niya sa mga kabutho.​—⁠1 Corinto 13:​4, NW.

12. (a) Ngaa isa ka hangkat para sa mga pamatan-on nga mangin mainayuhon sa ila mga manunudlo? (b) Sin-o ang mapangayuan sing bulig sang mga pamatan-on kon ginaipit nga mangin di-mainayuhon?

¹² Dapat pakig-angutan man sang mga pamatan-on ang ila mga manunudlo sing mainayuhon. Madamo nga mga estudyante ang nalipay nga paugtason ang ila mga manunudlo. Nagahunahuna sila nga dalayawon sila kon wala nila ginatahod ang ila mga manunudlo paagi sa paghimo sing mga butang nga supak sa mga pagsulundan sang eskwelahan. Ang iban mahimo nga magbuylog sa ila bangod ginapahog nila. Kon ang isa ka pamatan-on nga Cristiano indi magbuylog, mahimo nga yagutaon ukon uligyaton  nila sia. Ang pag-atubang sa sining mga kahimtangan sa sulod sang isa ka tuig nga pag-eskwela nagatilaw sa pamat-od sang isa ka Cristiano nga magpakita sing kaayo. Apang, dumduma kon daw ano ka importante nga mangin isa ka mainunungon nga alagad ni Jehova. Makasalig ka nga alay-ayan ka niya paagi sa iya espiritu sa sining mabudlay nga mga tion sa kabuhi.​—⁠Salmo 37:28.

Kaayo sa mga Kaingod

13-15. Ano ang mahimo mag-upang sa aton sa pagpakita sing kaayo sa mga kaingod, kag paano atubangon ining mga hangkat?

¹³ Nagapuyo ka man sa isa ka balay, sa isa ka apartment, sa isa ka trailer park, ukon bisan diin, makahunahuna ka sing mga paagi sa pagpakita sing kaayo kag pag-ulikid para sa kaayuhan sang mga kaingod. Sa liwat, indi ini pirme mahapos.

¹⁴ Ano abi kon ang imo mga kaingod naugot sa imo bangod sang imo rasa, nasyonalidad, ukon relihion? Ano abi kon di-mainayuhon sila kon kaisa ukon wala gani nagasapak sa imo? Subong isa ka alagad ni Jehova, ang pagpakita sing kaayo tubtob sa masarangan mo mapuslanon. Makita ka nga tuhay, isa gid ka kadayawan kay Jehova​—⁠ang isa nga huwaran sa kaayo. Wala ka gid makahibalo kon san-o magbag-o ang panimuot sang imo kaingod bangod sang imo kaayo. Mahimo pa gani sia mangin isa ka dumalayaw ni Jehova.​—⁠1 Pedro 2:12.

¹⁵ Paano mapakita ang kaayo? Una, paagi sa huwaran nga paggawi sa sulod sang pamilya samtang ang tanan nga katapo nagapakita sang bunga sang espiritu. Mahimo ini matalupangdan sang mga kaingod. Kon kaisa, mahimuan mo sing pabor ang imo kaingod. Dumduma nga ang kaayo nagakahulugan sang pagpakita sing aktibo nga interes sa kaayuhan sang iban.​—⁠1 Pedro 3:8-12.

Kaayo sa Aton Ministeryo

16, 17. (a) Ngaa ang kaayo importante sa aton publiko nga ministeryo? (b) Paano mapakita ang kaayo sa nanuhaytuhay nga patag sang ministeryo sa latagon?

¹⁶ Ang kaayo dapat makita sa aton Cristianong ministeryo samtang nagapanikasog gid kita nga masugilanon ang mga tawo sa ila mga puluy-an,  sa ila mga ulubrahan, kag sa publiko nga mga duog. Dapat naton tandaan nga ginatiglawas naton si Jehova, nga pirme mainayuhon.​—⁠Exodo 34:6.

¹⁷ Ano ang nalakip sa imo mga panikasog sa pagpakita sing kaayo sa imo ministeryo? Subong isa ka halimbawa, samtang nagapanaksi sa dalan, mapakita mo ang kaayo paagi sa pagpakighambal sing malip-ot kag sing mapatugsilingon sa mga tawo. Ang mga bangketa masami nga masako kag madamo sing tawo, gani maghalong nga wala mo ginabalabagan ang mga bangketa. Subong man, kon nagapanaksi ka sa teritoryo nga may negosyo, magpakita sing kaayo paagi sa pagpakigsugilanon sing malip-ot, ginadumdom nga may mga bumalakal nga dapat atendihon ang mga manugbaligya.

18. Ano ang papel sang paghantop sa pagpakita sing kaayo sa aton ministeryo?

¹⁸ Sa pagpamalaybalay nga ministeryo, mangin mahinantupon. Indi magdugay sa ganhaan, ilabi na kon malain ang tiempo. Mahantop mo bala kon ang isa ka tawo daw natak-an na ukon naugot pa gani sa imo? Ayhan sa inyo lugar, ang mga Saksi ni Jehova masunson nga nagaduaw. Kon amo, magpakita sing pinasahi nga patugsiling, pirme mangin mainayuhon kag mabuot. (Hulubaton 17:14) Mangin mahantupon sa rason sang tagbalay sa indi pagpamati sa sina nga adlaw. Dumduma nga ang isa sa imo Cristianong mga kauturan mahimo nga magaduaw sa sina nga puluy-an sa ulihi. Kon masugilanon mo ang isa nga daw wala nagapakita sing maayo, panikasugi gid nga magpakita sing kaayo. Indi pagtaasa ang imo tingog ukon magkusmod, kundi maghambal sing kalma. Ang isa ka mainayuhon nga Cristiano indi luyag nga makigbais sa tagbalay. (Mateo 10:11-14) Ayhan sa pila ka adlaw ina nga tawo magapamati sa maayong balita.

Kaayo sa mga Miting sang Kongregasyon

19, 20. Ngaa kinahanglan ang kaayo sa kongregasyon, kag paano ini mapakita?

¹⁹ Importante man nga magpakita sing kaayo sa mga masigkatumuluo. (Hebreo 13:1) Sanglit bahin kita sang isa ka bug-os kalibutan nga paghiliutod, ang kaayo kinahanglanon sa aton pagpakig-angot sa iban.

²⁰ Kon ang isa ka kongregasyon nagagamit sing Kingdom Hall upod sa isa, duha, ukon kapin pa nga kongregasyon, importante nga mangin mainayuhon sa pagpakig-angot sa iban nga mga kongregasyon, kag ginapakitaan sila sing dignidad kon nagapakig-angot sa ila. Ang pagbuligay mabudlay kon may yara espiritu sang paindisanay tuhoy sa paghimo sing kahimusan para sa mga oras sang mga miting kag sa mga kinahanglanon subong sang pagpaninlo ukon pagpakay-o. Mangin mainayuhon kag mapatugsilingon bisan pa nga indi mag-ugyunay ang inyo opinyon. Sa sining paagi ang kaayo magamadinalag-on, kag tunay nga pakamaayuhon ni Jehova ang interes nga ginapakita ninyo sa kaayuhan sang iban.

Magpadayon sa Pagpakita sing Kaayo

21, 22. Nahisanto sa Colosas 3:​12, ano ang dapat nga mangin pamat-od naton?

²¹ Ang kaayo isa ka kinaiya nga nagalakip kag nagaapektar sang tanan nga bahin sang aton kabuhi. Busa dapat naton ini himuon nga isa ka importante nga bahin sang aton Cristianong personalidad. Ang pagpakita sing kaayo sa iban dapat nga mangin isa ka batasan.

²² Kabay nga kita tanan mangin mainayuhon sa iban kada adlaw kag busa iaplikar sang kada isa ang ginsiling ni apostol Pablo: “Subong mga pinili sang Dios, balaan kag hinigugma, panapti ang inyo kaugalingon sing mapinalanggaon nga gugma nga may kaawa, kaayo, nagapaubos nga panghunahuna, kalulo, kag pagkamainantuson.”​—⁠Colosas 3:​12, NW.

Nadumduman Mo Bala?

• Ngaa mabudlay para sa isa ka Cristiano nga magpakita sing kaayo?

• Ngaa importante nga magpakita sing kaayo sa pamilya?

• Ano ang pila ka kabudlayan sang pagpakita sing kaayo sa eskwelahan, trabaho, kag sa mga kaingod?

• Ipaathag kon paano mapakita sang mga Cristiano ang kaayo sa ila publiko nga ministeryo.

[Mga Pamangkot sa Pagtinuon]

[Retrato sa pahina 18]

Ang kaayo nga ginapakita sang tanan sa pamilya nagapauswag sang paghiusa kag kooperasyon

[Retrato sa pahina 19]

Mapakita mo ang kaayo kon magmasakit ang isa ka katrabaho ukon ang iya pamilya

[Retrato sa pahina 20]

Ginaalay-ayan ni Jehova ang mga mainunungon nga nagapakita sing kaayo walay sapayan sang pagyaguta

[Retrato sa pahina 21]

Ang pagbulig sa kaingod nga nagakinahanglan isa ka buhat sang kaayo