Ang Pagkaneutral Bala Nagaupang sa Pagpakita sing Cristianong Gugma?

ANG pagka-Cristiano wala lamang nagalakip sa pagbasa sing Biblia, pagpangamuyo, kag pagkanta sing mga ambahanon kon Domingo. Nagalakip ini sang paghimo sing mga butang para sa Dios kag para sa mga tawo. Ang Biblia nagasiling: “Dili kita maghigugma sa pulong ukon sa hambal kundi sa buhat kag sa kamatuoran.” (1 Juan 3:​18) Si Jesus may sinsero nga pagkabalaka sa iban, kag luyag sang mga Cristiano nga ilugon sia. Ginpalig-on ni apostol Pablo ang mga masigkatumuluo nga pirme ‘magbugana sa buluhaton sang Ginuo.’ (1 Corinto 15:58) Apang ano ang buluhaton sang Ginuo? Nagalakip bala ini sang pagtinguha nga bag-uhon ang pagsulundan sang gobierno para sa kaayuhan sang mga imol kag sang mga ginapigos? Amo bala sina ang ginhimo ni Jesus?

Bisan pa ginhingyo si Jesus nga magpasilabot  ukon magdampig sa politika, wala niya ini ginhimo. Ginpangindian niya ang tanyag ni Satanas nga gahom sa tanan nga ginharian sang kalibutan, wala sia makigbais tuhoy sa pagbayad sing buhis, kag nalagyo sia sang ang isa ka organisado nga hublag luyag nga himuon sia nga hari. (Mateo 4:​8-​10; 22:17-​21; Juan 6:​15) Apang ang iya pagkaneutral wala mag-upang sa iya sa pagpanghikot para sa kaayuhan sang iban.

Nagkonsentrar si Jesus sa kon ano ang makahatag sing permanente nga kaayuhan sa iban. Bisan pa ang pagpakaon niya sa lima ka libo kag pag-ayo sa mga masakiton naghatag sing umalagi nga kaumpawan para sa pila, bangod sang iya panudlo mahimo matigayon sang bug-os nga katawhan ang dayon nga mga pagpakamaayo. Si Jesus nakilal-an, indi subong isa ka organisador sang mga kampanya sa pagbulig, kundi subong “Manunudlo.” (Mateo 26:18; Marcos 5:​35; Juan 11:28) Sia nagsiling: “Tungod sini natawo ako, kag tungod sini nagkari ako sa kalibutan, agod nga magsaksi ako sa kamatuoran.”—Juan 18:37.

Pagbantala sing Butang nga Mas Maayo Pa sa Politika

Ang kamatuoran nga gintudlo ni Jesus indi teoriya sa politika. Sa baylo, nasentro ini sa Ginharian nga sia mismo ang mangin Hari. (Lucas 4:43) Ini nga Ginharian isa ka langitnon nga panguluhan, kag buslan sini ang tanan nga pagdumalahan sang tawo kag magadala sing permanente nga paghidait sa katawhan. (Isaias 9:6, 7; 11:9; Daniel 2:​44) Busa, amo lamang ini ang matuod nga paglaum sang katawhan. Indi bala mas mahigugmaon ang pagpahayag sining pat-od nga paglaum sa palaabuton sangsa pagpalig-on sa katawhan nga magsalig sa mga tawo nga maghatag sing malig-on nga palaabuton? Ang Biblia nagasiling: “Dili kamo magsalig sa mga prinsipe, ukon sa anak sang tawo, nga sa iya wala sing bulig. Kon maggua ang iya ginhawa nagabalik sia sa iya duta; sa amo nga adlaw nagakawala ang iya mga hunahuna. Bulahan sia nga ang iya kabulig amo ang Dios ni Jacob, nga ang iya paglaum yara sa GINUO nga iya Dios.” (Salmo 146:​3-5) Gani sa baylo nga ipadala ang iya mga disipulo agod magbantala sing mas maayo nga paagi sang pag-organisar sa mga panguluhan, gintudluan sila ni Jesus nga magbantala sing “maayong balita sang ginharian.”—Mateo 10:6, 7; 24:14.

Gani, amo ini ang “buluhaton sang Ginuo” nga ginsugo sa Cristianong mga manugbantala. Bangod ginapatuman sa mga sakop sang Ginharian sang Dios nga maghigugmaanay, magamadinalag-on ang Ginharian sa pagdula sa kaimulon paagi sa balanse nga pagpanagtag sa mga ginapanag-iyahan sang katawhan. (Salmo 72:​8, 12, 13) Maayo ini nga balita kag dapat gid ini ibantala.

Sa karon, ang mga Saksi ni Jehova naorganisar para sa sining “buluhaton sang Ginuo” sa 235 ka kadutaan. Nahisuno sa sugo ni Jesus, matinahuron sila sa tanan nga panguluhan. (Mateo 22:21) Apang ginatuman man nila ining mga pulong sa iya mga sumulunod: “Kamo indi iya sang kalibutan, kundi ginpili ko kamo gikan sa kalibutan.”—Juan 15:19.

Ang pila nga mga sumalakdag anay sang politika nagbag-o pagkatapos matun-an sing maayo ang Biblia. Ang isa ka Italyano nga politiko nga katapo anay sang Catholic Action, isa ka kontrolado sang simbahan nga organisasyon, nagsiling: “Nag-entra ako sa politika, bangod ginbatyag ko nga ang isa ka tawo dapat makigbahin sing aktibo sa politika kag sa kauswagan sang katilingban.” Sa tapos maghalin subong meyor sang siudad agod magbantala sing Ginharian sang Dios subong isa sang mga Saksi ni Jehova, ginpaathag niya kon ngaa ang mga panikasog sang sinsero  nga mga tawo sa politika nagakapaslawan. “Amo sini ang kahimtangan sang kalibutan, indi bangod ang disente nga mga tawo wala magtinguha nga pauswagon ang kahimtangan sang katilingban, kundi, sa baylo, bangod ang sinsero nga mga panikasog sang pila nadaug sang kalautan sang madamo.”

Ang indi pagpakigbahin sa politika agod makabantala sang lamang matuod nga paglaum sang katawhan wala nagaupang sa matuod nga mga Cristiano nga buligan ang iban sa praktikal nga mga paagi. Ang mga nabuligan nila nga mangin mga sakop sang Ginharian sang Dios nakatuon nga bag-uhon ang malaglagon nga mga panimuot, tahuron ang awtoridad, pauswagon ang kabuhi sang ila pamilya, kag tamdon sing balanse ang materyal nga manggad. Ang labi pa ka importante, ginabuligan sang mga Saksi ni Jehova ang mga tawo nga matigayon ang suod nga kaangtanan sa Dios.

Ang mga manugbantala sang Ginharian sang Dios nagahatag sing benepisyo sa katilingban diin sila nagapuyo. Apang kapin pa sa sini, ginapalig-on nila ang mga tawo nga magsalig sa isa ka panguluhan nga matuod kag magadala sing permanente nga paghidait sa tanan nga nagahigugma sa Dios. Gani, bangod sang ila pagkaneutral, ini nga mga Cristiano hilway sa paghatag sing labing mabakod kag praktikal nga bulig nga matigayon karon.

[Kahon/Retrato sa pahina 7]

Halin sa Politika Pakadto sa Pagbantala sa Ginharian sang Dios

Sang bata pa si Átila, natun-an niya gikan sa ila mga pari sa Belém, Brazil, ang hublag sang Romanong Katoliko nga panudlo nga ang Simbahan dapat manghikot agod tapnaon ang pagpamigos sa katilingban, sa politika, kag sa ekonomiya (liberation theology). Nanamian gid sia mamati tuhoy sa kahilwayan sa ulihi sang katawhan gikan sa pagpamigos kag nagbuylog sia sa isa ka aktibista nga grupo, diin nakatuon sia sa pag-organisar sing mga protesta kag mga kampanya nga indi magtuman sa mga kasuguan sang gobierno.

Apang nalipay man si Átila sa pagtudlo sa mga kabataan sang aktibista nga grupo, nga nagagamit sing libro nga ginhatag sa iya, ang Pagpamati sa Daku nga Manunudlo. * Gintudlo sini ang maayo nga paggawi kag pagkamatinumanon sa mga awtoridad. Natingala si Átila kon ngaa ang mga nagasakdag sa liberation theology wala nagasunod sa mataas nga talaksan ni Jesus sa moral kag kon ngaa ang iban nagakalipat sa mga ginapigos kon yara na sila sa poder. Naghalin sia sa grupo. Sang ulihi, nagduaw ang mga Saksi ni Jehova sa iya puluy-an kag nagsugid sa iya tuhoy sa Ginharian sang Dios. Wala magdugay, nagtuon sia sa Biblia kag nagatuon tuhoy sa matuod nga solusyon sa pagpamigos sa katawhan.

Sadto nga tion, nagtambong si Átila sa isa ka seminar sang mga Katoliko tuhoy sa relihion kag politika. “Duha ini ka magkatuhay nga paagi sang pagtamod sa isa lang ka kahimtangan,” paathag sang mga instruktor. Nagtambong man sia sa isa ka miting sa Kingdom Hall. Daku gid ang kinatuhayan! Una sa tanan, wala sing nagapanigarilyo, nagainom, ukon malaw-ay nga mga lahog. Namat-od sia nga magbuylog sa ila sa hilikuton nila nga pagbantala, kag wala madugayi ginbawtismuhan sia. Nakita na niya karon kon ngaa ang liberation theology indi amo ang matuod nga solusyon sa mga problema sang mga imol.

[Nota]

[Mga retrato sa pahina 6]

Ang pagkaneutral sang Cristianong mga ministro wala nagaupang sa ila sa pagbulig sa iban