Napabakod Ka Bala sang Pulong sang Dios?

KON nagaatubang sing mga pagtilaw, paano mo ini ginalandas? Sa bahin ni Jesus, ang pagdumdom sang isa ka nagakaigo nga kasulatan nagbulig sa iya sa pag-atubang sa mga hangkat ni Satanas. (Mateo 4:​1-​11) Sing kaanggid, sang si Hari David nag-atubang sang personal nga mga pagtilaw, ginpabakod sia sang Pulong sang Dios. Sia nagsiling: “Sang ang akon nagakabalaka nga mga panghunahuna nagdamo sa sulod nakon, ang imo mga paglipay naghapuhap sa akon kalag.”​—Salmo 94:19, NW.

Sa kaanggid nga paagi, ang pagdumdom sang isa ka paborito nga teksto mahimo makalugpay ukon makapabakod sa aton kon nagaatubang kita sing mga hangkat. Halimbawa, si Rex, nga nagapangidaron na karon sing 89 anyos, nangin isa ka bug-os tion nga ebanghelisador sugod sang 1931. Apang, sia nagsiling: “Masami ako nagabatyag nga indi takus kon hatagan sang isa ka pinasahi nga asaynment sa ministeryo.” Paano niya ini nalandas? “Gindumdom ko ang akon paborito nga teksto, ang Hulubaton 3:5 (NW), diin nagasiling: ‘Magsalig kay Jehova sa bug-os mo nga tagipusuon kag indi magsandig sa imo kaugalingon nga paghangop.’ Ang pagdumdom kag pag-aplikar sining kasulatan nagbulig sa akon nga himuon sing madinalag-on ang akon mga asaynment.”

Bisan ang mga lamharon makabenepisyo gikan sa pagdumdom sing isa ka paborito nga teksto. Ang anom ka tuig nga si Jack nagsiling nga ang iya paborito nga teksto amo ang Mateo 24:14. Ini nga kasulatan nagapahulag sa iya nga magbantala upod sa iya mga ginikanan. Sia nagsiling: “Gusto ko magpanaksi kada Sabado upod sa akon iloy, amay, kag magulang nga babayi.”

Kaangay kay Jesus, nagaatubang ka bala kon kaisa sing direkta nga mga pagtilaw sa imo pagtuo? Nian ang Filipos 4:​13 mahimo mangin isa sa imo paborito nga mga kasulatan. Kaangay ni Hari David, may yara ka bala “nagakabalaka nga mga panghunahuna”? Nian ang pagdumdom sang Filipos 4:6, 7 mahimo makabulig sa imo agod malandas ini. Ginakabalak-an mo bala kon kaisa nga ang imo pag-alagad sa Dios walay pulos? Nian ang pagdumdom sang 1 Corinto 15:58 magapabakod sa imo.

Paagi sa pagsaulo sang nagakaigo nga mga kasulatan, ginatugutan naton ang Pulong sang Dios nga maggahom sa aton kabuhi. (Hebreo 4:​12) Ining paborito nga mga kasulatan mahimo makapabakod kag makalugpay sa aton.​—Roma 15:4.