Ano ang Pilion Mo nga Relihion?

‘ANG mga relihion lainlain lamang nga mga dalan nga isa ang padulungan. Kay man, indi bala isa lamang ang Dios?’ Amo sini ang ginabatyag sang madamo nga para sa ila bisan pa importante ang pagbuylog sa isa ka relihion, indi importante kon ano nga relihion ang ginpili sang isa nga sundon.

Sa primero, daw makatarunganon ini, kay matuod gid man nga isa lamang ang Dios nga Labing Gamhanan. (Isaias 44:6; Juan 17:3; 1 Corinto 8:5, 6) Apang, indi naton mapasapayanan ang maathag nga mga kinatuhayan—kag pagsumpakilay pa gani—sang madamo nga relihion nga nagapangangkon nga nagaalagad sa matuod nga Dios. Daku gid ang kinatuhayan nila sa mga buhat, pagtuluuhan, panudlo, kag ginapatuman. Daku gid ini nga mga kinatuhayan amo nga nabudlayan ang mga miembro sang isa ka relihion sa paghangop ukon sa pagbaton sa ginatudlo ukon ginapatihan sang iban.

Sa pihak nga bahin, si Jesus nagsiling: “Ang Dios espiritu, kag ang mga nagasimba sa iya kinahanglan magsimba sa espiritu kag kamatuoran.” (Juan 4:24) Ginasimba bala ang Dios sa kamatuoran kon madamo sing nagasumpakilay nga mga ideya kon sin-o ang Dios, kon ano ang iya mga katuyuan, kag kon paano niya luyag simbahon? Makatarunganon bala nga magpati nga indi importante sa Labing Gamhanan nga Dios kon paano naton sia ginasimba?

Ang Matuod nga mga Cristiano sang Una kag Karon

Ang mga Cristiano sang unang siglo may lainlain nga mga opinyon kon kaisa. Halimbawa, si apostol Pablo nagsiling sa mga taga-Corinto: “Nasugid sa akon sang katawhan ni Cloe, mga kauturan ko, nga may pagpinuyasay sa tunga ninyo. Ang buot ko isiling amo ini nga ang tagsatagsa sa inyo nagasiling, ‘Ako kay Pablo,’ ukon ‘Ako kay Apolos,’ ukon ‘Ako kay Cefas,’ ukon ‘Ako kay Cristo.’”—1 Corinto 1:11, 12.

Wala lang bala kaso kay Pablo ini nga mga kinatuhayan? Pagusto lang bala ang kada isa sa iya dalanon padulong sa kaluwasan? Indi gid! Si Pablo naglaygay: “Ginapakiluoy ko sa inyo, mga kauturan, sa ngalan sang aton Ginuong Jesucristo, nga maghilisugot kamo tanan sa inyo nga walay pagbinahinbahin sa inyo, kundi mag-isa kamo ka painuino kag kaisipan.”—1 Corinto 1:10.

Siempre pa, ang pag-isa sa pagtuluuhan indi matigayon paagi sa pilit. Matigayon lamang ini kon mahalungon nga mag-usisa ang mga indibiduwal kag mag-ugyon sa pareho nga mga konklusion. Kon amo, ang personal nga pagtuon sa Pulong sang Dios kag ang bunayag nga pagtinguha nga iaplikar ang natun-an importante nga mga tikang agod matigayon ang  paghiusa nga ginsambit ni Pablo. May makita bala kita nga amo sini nga paghiusa? Subong sang nabinagbinag na, madugay na nga nagapakig-angot ang Dios sa iya katawhan subong isa ka grupo. Posible bala makilala ini nga grupo karon?

Ang Kapuslanan sang Husto nga Kaupdanan

Si salmista David namangkot anay: “O GINUO, sin-o bala ang magadayon sa imo kayangkayang? Sin-o bala ang magapuyo sa imo balaan nga bakulod?” Makapahunahuna ini nga pamangkot. Si David amo man ang nagsabat: “Sia nga nagagawi sing matarong, kag nagahikot sing pagkamatarong, kag nagapamulong sing kamatuoran sa iya tagipusuon.” (Salmo 15:1, 2) Ang sibu nga paghangop sa Biblia magabulig sa isa nga makilala ang relihion nga nagasunod sa sini nga mga ginapatuman sang Dios. Nian, paagi sa pagpakig-upod sa sini nga grupo, mapalig-on sia sang mga tawo nga nahiusa nga nagasimba sa Dios “sa espiritu kag kamatuoran.”

Ginpakita sang mga Saksi ni Jehova nga posible ang paghiusa sa pagtuluuhan kag paggawi bisan sa sining nabahinbahin nga kalibutan. Nalakip sa ila ang mga katapo anay sang lainlain nga mga relihion kag etniko nga mga grupo. Ang iban nga mga Saksi mga agnostiko ukon ateista anay. Ang iban naman basta wala lang nagasapak sa relihion. Walay sapayan sining nanuhaytuhay nga relihion, kultura, kag pilosopiya nga ila ginhalinan, natigayon nila ang paghiusa sa isa ka relihion nga wala sing kaanggid sa kalibutan karon.

Napasad ini nga paghiusa sa Pulong sang Dios, ang Biblia. Siempre pa, nahibaluan sang mga Saksi ni Jehova nga indi nila puede diktahan ang iban kon ano ang dapat himuon. Apang nagapasalamat sila sa pribilehiyo nga palig-unon ang iban nga magtuon sa Biblia agod sa sining malig-on nga sadsaran nila ibase ang pagpili sang ila paagi sa pagsimba. Sa sining paagi, madamo pa ang makabenepisyo sa pagsimba sa Dios “sa espiritu kag kamatuoran.”

Sa karon, daku gid ang katalagman nga mabiktima sang makahalalit nga mga impluwensia kag pagsulay. Importante ang pagpili sang husto nga sahi sang kaupdanan. Ang Biblia nagasiling nga ang ‘nagalakat upod sa maalam nga mga tawo mangin maalam’ kag “ang malaut nga paghiliupod nagadunot sang maayo nga mga pamatasan.” (Hulubaton 13:20; 1 Corinto 15:33) Ang pagpakig-upod sa matuod nga mga sumilimba sang Dios isa ka pangamlig. Busa, ang Biblia nagapahanumdom sa aton: “Magpatugsiling kita kon paano ang pagpukaw sa isa kag isa sa gugma kag maayong mga buhat, nga wala nagabiya sang aton pagtilipon sing tingob, subong sang kinabatasan sang iban, kundi nagalinaygayay ang isa kag isa, kag labi pa gid sa ginatan-aw ninyo nga nagapalapit ang Adlaw.” (Hebreo 10:24, 25) Isa gid ka pagpakamaayo kon ang matuod nga mga abyan kag espirituwal nga mga kauturan mahigugmaon nga nagabuligay agod matuman ang ila mga katungdanan sa Dios!

Napamatud-an ni Ottmar nga husto ini nga pagtamod. Nagdaku sia sa isa ka Katoliko nga pamilya sa Alemanya, apang nag-untat sia sa pagkadto sa simbahan. Paathag niya: “Sa kada tion nga magkadto ako sa simbahan, nagabatyag ako gihapon sing pagkawalay paglaum paggua ko sa simbahan.” Apang, wala niya madula ang iya pagtuo sa Dios. Nian nasugilanon niya ang mga Saksi ni Jehova kag nakumbinsi sia nga matuod sila nga mga alagad sang Dios. Nahangpan niya nga dapat sia makig-upod sa ila. Siling niya karon: “Bangod aktibo ako sa isa ka bug-os kalibutan nga organisasyon, malinong ang akon hunahuna kag tagipusuon. Amat-amat ako nga ginabuligan nga makatigayon sing sibu nga ihibalo sa Biblia. Bilidhon gid ini para sa akon.”

Pangagda sa mga Nagapangita

Ang mga tawo nga nahiusa nga nagapangabudlay subong isa ka grupo mas epektibo sa paghimo sa isa ka hilikuton sangsa mga indibiduwal nga nagapaiyaiya. Halimbawa, si Jesus nagsugo sa iya mga sumulunod: “Busa lakat kamo kag himuon nga mga gintutun-an ang tanan nga kapungsuran, nga nagabawtismo sa ila sa ngalan sang Amay kag sang Anak kag sang Espiritu Santo, nga nagapanudlo sa ila sa pagtuman  sang tanan nga ginsugo ko sa inyo.” (Mateo 28:19, 20) Paano matuman sing bug-os ini nga hilikuton kon wala sing panuytoy ukon organisasyon? Paano matuman sang isa ini nga sugo halin sa Kasulatan kon gintinguhaan niya nga mag-alagad sa Dios sing kinaugalingon?

Sang nagligad nga tuig, ang mga Saksi ni Jehova sa bug-os nga kalibutan nakapanagtag sing 91,933,280 ka libro, pulyeto, kag brosyur nga pasad sa Biblia, kag 697,603,247 ka magasin, sa amo ginatos ka milyon ka tawo sa 235 ka kadutaan ang nakabaton sang mensahe halin sa Pulong sang Dios. Talalupangdon gid ini nga pamatuod nga ang nahiusa kag naorganisar sing maayo nga panikasog sang isa ka grupo makahimo gid sing kapin sangsa indibiduwal nga pagpanikasog!

Dugang pa sa pagpanagtag sing mga literatura sa Biblia, nagahiwat ang mga Saksi ni Jehova sing walay bayad nga pagtuon sa Biblia agod buligan ang mga tawo nga mahangpan sing maayo ang mga ginapatuman sang Dios. Sang nagligad nga tuig, sa promedyo, 5,726,509 ka pagtuon sa Biblia ang ginhiwat kada semana sa mga indibiduwal ukon mga grupo. Ini nga pagpanudlo sa Biblia nagbulig sa minilyon ka tawo nga makatigayon sing malig-on nga basehan sang ila pagpili kon tuhoy sa pagsimba. Ginaagda ikaw nga tun-an ang mga ginapatuman sang Dios nga makita sa Biblia. Nian makapili ka.—Efeso 4:13; Filipos 1:9; 1 Timoteo 6:20; 2 Pedro 3:18.

Kon luyag mo pahamut-an ang Dios, importante ang pagbuylog sa isa ka relihion—pero indi basta ano lang nga relihion. Ang pagpili mo sing relihion dapat napasad sa sibu nga ihibalo sa Biblia, indi sa wala mapamatud-an nga mga doktrina ukon sa ginsiling lamang sang iban. (Hulubaton 16:25) Tun-i ang mga ginapatuman sa matuod nga relihion. Ipaanggid ini sa imo mga ginapatihan. Nian pilia ang husto.—Deuteronomio 30:19.

[Mga retrato sa pahina 7]

Ang mga Saksi ni Jehova nahiusa sa nabahinbahin nga kalibutan